Ang Bulahan ug Malipayon nga Kahimtang

Minahal nga mga Ginikanan,

Si Hari Benjamin mitudlo mahitungod sa hingpit nga kalipay nga atong mabati samtang kita magsunod sa ebanghelyo. Siya mitambag sa iyang mga katawhan nga “maghunahuna sa bulahan ug sa malipayon nga kahimtang niadto nga naghupot sa mga sugo sa Dios” (Mosiah 2:41).

Mahimo usab ninyong rebyohon ang mosunod nga mga artikulo isip usa ka pamilya ug pamalandongan kon sa unsang paagi ang pagsunod niini nga mga baroganan nagdala og kalipay ug mga panalangin sa inyong kinabuhi.

Mga Panaghisgotan sa Ebanghelyo

Amumaha ang Inyong Kalag uban sa Pag-ampo

Sama nga ang kagutom nagsulti kanato nga nagkinahanglan kita og pisikal nga pag-amuma, ang atong mga espiritu adunay paagi sa pagpahibalo kanato nga nagkinahanglan kita og espirituhanong pag-amuma. Ipakigbahin ang pipila ka kinutlo gikan sa artikulo ni Elder Ulisses Soares bahin sa pag-ampo (pahina 4) ug dapita ang mga sakop sa inyong pamilya sa pagpakigbahin og usa ka panahon nga nabati nila nga ang pag-ampo mipakaon sa ilang mga kalag.

Angayan Kini nga Paningkamotan

Sayon lang nga maghunahuna kon ang inyong mga paningkamot ba sa pagtudlo sa inyong mga anak naghimo og kalainan. Sa iyang artikulo sa pahina 12, si Elder Hugo E. Martinez nagpakigbahin sa iyang kaugalingon nga kasinatian sa pagtudlo sa iyang mga anak sa ebanghelyo. Samtang basahon ninyo, pamalandongi ang ginagmay nga mga lakang nga inyong mahimo paingon sa pagmugna og usa ka mas nakasentro ni Kristo nga panimalay—nga kanunayng angayan nga paningkamotan.

Pagmugna og usa ka Lig-on nga Pundasyon

“Ang Pamilya: Usa ka Pamahayag ngadto sa Kalibotan” nagpahayag og importante nga mga kamatuoran ug mga sumbanan sa ebanghelyo. Basaha ang artikulo sa pahina 16 sa pagkat-on og tulo ka paagi sa paggamit sa pamahayag sa pamilya aron sa pagtabang sa inyong mga anak sa pagmugna og lig-on nga espirituwal nga pundasyon ug sa pagpangandam sa pagpanalipod sa ilang mga tinuohan.

Dali, Sunod Kanako nga Kalingawan sa Pamilya

Siksika ang mga Kasulatan sa Makugihong Paagi

Mga Pulong ni Mormon 1:11

Sa tibuok kasaysayan, ang mga propeta mihimo og dako nga mga paningkamot aron sa pagtipig og usa ka rekord sa ilang mga pagtulon-an aron makabaton kita og kahibalo sa ebanghelyo. Ingon nga nakadawat sa bulawan nga mga palid, si Mormon misulat: “Ako, si Mormon, nag-ampo sa Dios nga sila mahimo nga matipigan gikan karon ug sa hangtod. Ug ako nasayod nga sila matipigan; kay adunay mga mahinungdanon nga mga butang nga gikasulat diha kanila” (Mga Pulong ni Mormon 1:11).

Makapakita kita sa atong pagpasalamat alang niini nga mga rekord ug makapalig-on sa atong hugot nga pagtuo sa Ginoo pinaagi sa makugihong pagsiksik sa mga kasulatan. Isip usa ka pamilya, mahimong magkanaa kamo og usa ka lumba sa kasulatan:

Isulat ang pipila ka termino sa ebanghelyo sama sa Manluluwas, hugot nga pagtuo, paghinulsol, bunyag, ug Espiritu Santo diha sa lainlain nga mga piraso sa papel.
Papilia ang usa ka sakop sa pamilya og piraso sa papel ug ipabasa ang pulong.
Maglumba ang mga sakop sa pamilya sa pagpangita sa pulong diha sa Basahon ni Mormon. Ang una nga makakita og bersikulo nga aduna niana nga pulong mahimong mopakigbahin niana nga kasulatan ngadto sa pamilya.

Gikan sa Higala nga Magasin

Mga Sugilanon sa Basahon ni Mormon

Gamita ang mga tabang sa pagtuon sa Dali, Sunod Kanako nga seksiyon aron sa pagtudlo sa inyong mga anak sa sambingay sa mga kahoy nga oliba ug sa istorya ni Enos.

Ang Gahom sa Pag-ampo

Pangita og mga istorya, mga kalihokan, ug usa ka mensahe gikan sa propeta aron sa pagtabang sa inyong mga anak sa pagkat-on mahitungod sa pag-ampo.

“Makasulbad Kita Niini”

Tudloi ang inyong mga anak nga mahimong mga tigpasiugda og kalinaw pinaagi sa pagbasa og usa ka istorya mahitungod sa duha ka igsoon nga lalaki nga nakat-on sa pagsulbad sa ilang mga dili pagsinabtanay imbes nga mag-away.

Nagtubo Sama ni Jesus

Diha sa Seksiyon sa Mas Magulang nga mga Bata, hibaloi kon giunsa ni Isabela ug David pagtakda og mga tumong aron sa pagpalambo sa ilang mga talento ug sa paghimo og kalainan.