Pakan-a ang Inyong Kalag sa Kanunay nga Pag-ampo

Ni Elder Ulisses Soares

Sa Korum sa Napulog Duha ka Apostoles

Kita nagkinahanglan sa espirituhanong pag-alima sa pakighinabi sa atong Langitnong Amahan, usa ka panalangin nga atong magamit sa bisan asa ug sa kanunay.

Kitang tanan mibati na sa una og kagutom. Ang sakit nga gutom mao ang paagi sa lawas sa pagsulti kanato nga kini nagkinahanglan og pag-alima. Ug kon kita gigutom, kita nasayod kon unsa ang kinahanglan natong buhaton—mokaon.

Ang atong mga espiritu usab adunay mga paagi sa pagpahibalo kanato kon kita kinahanglan og espirituhanong pag-alima. Apan ingon og mas sayon kana para nato ang pagbaliwala lang sa espirituhanong kagutom kay sa pisikal nga kagutom.

Sama nga adunay daghang nagkadaiya nga mga pagkaon nga atong makaon kon kita gigutom, adunay nagkadaiya nga mga butang nga atong mahimo aron sa pagtagbaw sa atong espirituhanong kagutom. Pananglitan, kita mahimong “magbusog sa mga pulong ni Kristo” (2 Nephi 32:3) diha sa mga kasulatan ug pinaagi sa mga pulong sa mga propeta. Makatambong kita sa simbahan sa kanunay ug moambit sa sakramento (tan-awa sa Doktrina ug mga Pakigsaad 59:9). Makaserbisyo kita sa Dios ug sa Iyang mga anak (tan-awa sa Mosiah 2:17).

Apan adunay laing tinubdan sa espirituhanong pag-alima nga atong magamit sa tanang panahon, sa matag higayon sa atong mga kinabuhi, dili igsapayan sa atong mga kahimtang. Kita kanunayng makahinabi uban sa Langitnong Amahan pinaagi sa pag-ampo.

“Ang Akong Kalag Gigutom”

Samtang ang propeta nga si Enos nangayam didto sa lasang, siya naghunahuna mahitungod “sa mga pulong nga [iyang] madunggan kanunay nga gipamulong sa [iyang] amahan mahitungod sa kinabuhi nga dayon, ug ang hingpit nga kalipay sa mga santos, mituhop gayod pag-ayo sa akong kasingkasing.” Kini nga mga pulong “mituhop gayod pag-ayo sa [iyang] kasingkasing” (Enos 1:3).

Tungod kay si Enos anaa sa espirituhanong kahimtang sa hunahuna, siya mibati og usa ka dakong panginahanglan: “Ang akong kalag gigutom,” siya miingon (Enos 1:4).

Unsa ang gibuhat ni Enos sa dihang mibati siya niining espirituhanong kagutom, niining panginahanglan alang sa espirituhanong pag-alima? “Ako miluhod sa atubangan sa akong Magbubuhat,” miingon siya, “ug ako nangamuyo ngadto kaniya sa hilabihan nga pag-ampo ug nangaliya alang sa akong kaugalingon nga kalag” (Enos 1:4).

Hilabihan ka dako ang espirituhanong kagutom ni Enos nga siya nag-ampo “sa tibuok adlaw … ug sa diha nga midangat ang kagabhion ako sa gihapon mipataas sa akong tingog pag-ayo nga kini miabot sa mga kalangitan” (Enos 1:4). Sa kataposan, ang Dios mitubag sa iyang pag-ampo ug gipasaylo ang iyang mga sala. Mibati si Enos nga ang iyang pagbati nga sad-an nahanaw. Apan ang iyang espirituhanong pag-alima wala matapos didto.

Siya nakakat-on mahitungod sa gahom sa hugot nga pagtuo diha ni Jesukristo, ug siya mibubo sa iyang tibuok kalag alang sa iyang katawhan—bisan sa iyang mga kaaway. Siya mihimo og mga pakigsaad uban sa Ginoo ug misiguro sa mga saad gikan Kaniya. Ug human sa gamhanang pag-ampo ni Enos, siya miadto sa iyang katawhan nanagna ug nagpamatuod sa mga butang nga iyang nadungog ug nakita. (Tan-awa sa Enos 1:5–19.)

Dili matag pag-ampo matubag sa ingon ka talandugon nga paagi, apan ang atong mga kasinatian sa pag-ampo mahimong makahuluganon gihapon ug makapausab sa kinabuhi. Kita makakat-on og pipila ka importanteng mga leksiyon gikan sa kasinatian ni Enos bahin sa pag-ampo. Pananglitan:

Ang pagpaningkamot nga hingpit nga masunod ang ebanghelyo makatabang kanato nga mabati ang atong espirituhanong kagutom.
Ang atong espirituhanong kagutom makadala ug kinahanglan modala kanato sa pagluhod sa pagtinguha sa tabang sa Langitnong Amahan.
Ang pag-ampo ngadto sa Langitnong Amahan makatabang sa pagtagbaw sa atong espirituhanon nga kagutom—ug dayon sa pipila.
Kita makaampo bisan asa, bisan kanus-a.
Ang pag-ampo makatabang kanato sa paghinulsol.
Ang pag-ampo makapalig-on sa atong hugot nga pagtuo diha ni Jesukristo.
Kita makadawat og usa ka personal nga pagpamatuod nga ang atong Langitnong Amahan modungog kanato ug nakamatngon kanato.
Ang pagpamatuod ug kalig-on nga atong madawat pinaagi sa pag-ampo makatabang kanato sa pagserbisyo ug paglig-on sa uban.

Ang Akong Kasinatian sa Gahom sa Pag-ampo

Sama ni Enos, ako nakakat-on og pipila niining sama nga mga leksiyon pinaagi sa personal nga kasinatian. Ang akong mga ginikanan mipasakop sa Ang Simbahan ni Jesukristo sa mga Santos sa Ulahing mga Adlaw sa bata pa ko, ug ako nabunyagan sa pagka-otso anyos nako. Ako sa kanunayng adunay usa ka maayo, mainiton nga pagbati sa akong kasingkasing mahitungod sa akong Langitnong Amahan ug mahitungod ni Jesukristo, sa Iyang gipahiuli nga ebanghelyo, ug sa Iyang Simbahan. Apan kini wala mahitabo hangtod nga hapit nako mag 16 anyos nga nag-ampo ko mahitungod sa kamatuoran niining mga butanga.

Ang akong dinasig nga bishop mihangyo nako sa pagtudlo og usa ka batan-on sa klase sa Sunday School. Magtudlo unta ko og usa ka leksiyon mahitungod kon sa unsang paagi kita makabaton og usa ka pagpamatuod sa ebanghelyo pinaagi sa pag-ampo. Kini nga buluhaton gikan sa akong bishop nakapahunahuna nako og mas lawom mahitungod sa akong kaugalingon nga pagpamatuod. Migahin ko og panahon sa pagtuon sa Basahon ni Mormon ug sa kanunay mibati nga ang Simbahan tinuod. Ako sa kanunay mituo sa Manluluwas nga si Jesukristo, apan wala gyod nako giseryoso ang saad ni Moroni nga makit-an diha sa Moroni 10:4–5. Wala pa gayod ako sukad nag-ampo mahitungod sa pagkatinuod sa ebanghelyo.

Mahinumdom ko sa pagbati sa akong kasingkasing nga kon motudlo ko niining mga batan-on kon unsaon sa pagbaton og pagpamatuod pinaagi sa pag-ampo, ako kinahanglan nga mag-ampo alang sa usa ka pagpamatuod mismo sa akong kaugalingon. Ang akong kalag gigutom—tingali diha sa usa ka lahi nga paagi sa kang Enos, apan ako bisan pa man mibati og usa ka espirituhanong panginahanglan.

Samtang giandam nako ang leksiyon, miluhod ako ug mihalad sa gitinguha sa akong kasingkasing ngadto sa akong Langitnong Amahan aron makompirmar ang kamatuoran nga akong nabati sa kahiladman. Ako wala magpaabot og bisan unsang talagsaong pagpakita. Apan sa dihang ako nangutana sa Ginoo kon ang ebanghelyo tinuod, adunay miabot sa akong kasingkasing nga nindot kaayo nga pagbati—kanang hinay, gamay nga tingog nga nagkompirmar ngari kanako nga kini tinuod ug nga ako kinahanglang mopadayon sa pagbuhat sa unsay akong gibuhat.

Ang pagbati kusog kaayo nga dili gayod nako mabaliwala kana nga tubag ug moingon nga wala ko nakahibalo. Akong nagahin kanang tibuok adlaw sa pagbati og hilabihan ka malipayon. Ang akong hunahuna kanunayng naghunahuna og espirituhanong mga butang nga namalandong sa matahom nga pagbati sa akong kasingkasing.

Sa pagkasunod Dominggo, mibarog ko sa atubangan sa tulo o upat ka mga kauban sa klase, kinsa mas bata pa nako ang tanan. Ako mipamatuod ngadto kanila nga ang Langitnong Amahan motubag sa ilang pag-ampo kon sila magbaton og hugot nga pagtuo.

Elder Soares sa usa pa ka misyonaryo uban sa mga tawo diha sa tulumanon sa bunyag — Usa ka gidungog nga pag-ampo ni Elder Soares nadawat sa batan-on pa nakatugot kaniya sa pagpamatuod—isip usa ka misyonaryo (ibabaw sa tuo), amahan ug bana, ug Apostol—nga ang Langitnong Amahan mitubag sa mga pag-ampo nga gihalad diha sa hugot nga pagtuo.

Sukad niadto, kini nga pagpamatuod nagpabilin kanako. Kini nakatabang nako sa paghimo og mga desisyon, ilabi na sa mga higayon nga ako miatubang og mga hagit. Kanang pag-ampo nianang adlawa, lakip sa dugang nga mga pagsaksi nga akong nadawat latas sa mga katuigan, nakatugot kanako sa pagpamatuod ngadto sa katawhan, inubanan sa bug-os nga pagtuo, nga sila makadawat og mga tubag gikan sa Langitnong Amahan kon sila mag-ampo uban sa hugot nga pagtuo. Kini tinuod tungod kay ako nakapamatuod isip usa ka misyonaryo, isip usa ka lider, isip usa ka amahan ug bana, ug gani karon isip usa ka Apostol.

Ang Kanus-a ug Unsa kabahin sa Pag-ampo

Siyempre, kita dili lang mag-ampo kon kita mobati sa partikular nga kusog nga espirituhanong panginahanglan. Mao nga, kanus-a man kita kinahanglan nga mag-ampo? Ug unsa may angay natong iampo? Ang mubo nga tubag mao ang bisan unsang orasa ug alang sa bisan unsang butang.

Ang Dios mao ang atong Langitnong Amahan. Ang pagkasayod niini makausab sa paagi nga kita mag-ampo. Si Propeta Joseph Smith nagtudlo: “Sa pagbaton og kahibalo sa Dios, nagsugod kita sa pagkahibalo unsaon sa pagduol Kaniya, ug unsaon sa pagpangutana aron makadawat og tubag. … Kon kita andam na nga moduol ngadto Kaniya, Siya andam nga moduol ngari kanato.”¹

Ang atong Langitnong Amahan kanunayng andam sa pagpaminaw kanato ug gusto nga kita mag-ampo ngadto Kaniya sa regular ug makanunayon nga paagi. Kita kinahanglang nga “Makitambag uban sa Ginoo sa tanan [nato] nga buhaton” (Alma 37:37) ug mag-ampo sa buntag, udto, ug gabii. Kita kinahanglan mag-ampo sa panimalay, sa trabaho, sa eskwelahan—sa bisan asa man kita maadto ug sa tanan sa bisan unsa natong mga paningkamot (tan-awa sa Alma 34:17–26).

Kita kinahanglan mag-ampo diha sa atong mga pamilya (tan-awa sa 3 Nephi 18:21). Kita kinahanglan mag-ampo “sa dayag ug diha sa [atong] kasingkasing, diha sa kadaghanan ug diha sa kinaugalingon” (Doktrina ug mga Pakigsaad 81:3). “Oo, ug kon [kita] dili mangamuyo ngadto sa Ginoo, himoa nga ang [atong] mga kasingkasing puno, magpadayon sa pag-ampo ngadto kaniya sa kanunay alang sa [atong] kaayohan, ug usab alang sa kaayohan niadto kinsa naglibot [kanato]” (Alma 34:27). Ug kita kinahanglan gayod nga kanunayng mag-ampo ngadto sa Amahan sa ngalan ni Jesukristo (tan-awa sa 3 Nephi 18:19–20).

Paghulagway ni Joseph Smith pinaagi ni Walter Rane, dili mahimong pakopyahan

Pagduol sa Atong Langitnon nga Amahan

Ang atong Amahan sa Langit gusto nga mopanalangin kanato. Ug Siya mobuhat—kon kita mangayo. Si Propeta Joseph Smith nagtudlo, “Hinumdumi nga kon dili mangayo kita walay madawat; busa, pangayo pinaagi sa hugot nga pagtuo, ug kamo makadawat og mga panalangin nga makita sa Dios nga angay nga ihatag kaninyo.”²

Ang atong regular ug makanunayon nga mga pag-ampo mao ang usa ka mahinungdanon nga bahin sa usa ka balanse nga diyeta sa espirituhanong pag-alima sa atong gigutom nga mga kalag. Ang pagpakighinabi uban sa Langitnong Amahan pinaagi sa pag-ampo anaa ug gihangop sa bisan asa ug sa kanunay.

Usa sa akong paborito nga mga kasulatan nagtudlo kon sa unsaon nato sa pagduol sa atong Langitnong Amahan kon kita moluhod sa pag-ampo: “Magpaubos ka; ug ang Ginoo nga imong Dios moagak kanimo pinaagi sa kamot, ug mohatag kanimo og tubag sa imong mga pag-ampo” (Doktrina ug mga Pakigsaad 112:10). Kon kita mapainubsanon ug masulundon, ang Langitnong Amahan mag-uban kanato. Siya mogiya kanato pinaagi sa kamot. Siya modasig kanato kon asa moadto ug unsay buhaton. Siya motubag sa atong mga pag-ampo sumala sa Iyang kabubut-on, pamaagi, gitakdang panahon, ug tinuod nga kahibalo sa unsa ang maayo alang kanato.

Kita kinahanglang mohinumdom niini ug panggaon ang mga oportunidad sa pagduol sa trono sa Dios ug dawaton ang mga panalangin diha sa Iyang kamot.