Ang Pagpundok sa Israel: Sama sa usa ka Tanaman sa Oliba

mga tawo nga nagtrabaho sa tanaman sa oliba [vineyard]

Si Presidente Russell M. Nelson nagtudlo nga ang pagpundok sa Israel “mao ang labing importante nga butang nga mahitabo sa yuta karon”¹—ug kita mahimong kabahin niini! Apan unsa ang eksakto nga panagpundok, ug kang kinsa kini magamit? Sa higayon nga atong masabtan kining importanteng buhat, kita mas maayong makadesisyon kon sa unsang paagi nga gusto natong motabang sa pagpundok sa Israel.

Ang sambingay sa mga kahoy nga oliba diha sa Jacob 5 makatabang kanato niining pagsabot. Si Jacob mipakigbahin niining sambingay, sa tipik, aron sa pagtubag sa pangutana kon sa unsang paagi ang mga tawo sa pakigsaad sa Ginoo sa karaang panahon, “human misalikway sa sigurado nga pundasyon [nga mao ang Manluluwas], makatukod pa gayod niini” (Jacob 4:17).

Unsa: Ang pagpundok sa Israel usa ka tibuok kalibotan nga paningkamot sa pagtabang sa tanang anak sa Langitnong Amahan nga “madungog ang mensahe sa gipahiuli nga ebanghelyo ni Jesukristo … [ug] mohukom alang sa ilang kaugalingon kon sila gustong masayod pa og dugang.”² Kini usab nagtuman sa mga gipanagna nga namahayag nga ang mga katawhan sa pakigsaad sa Dios (ang mga kaliwat ni Abraham o kadtong kinsa gisagop ngadto sa pagkigsaad pinaagi sa bunyag) mapundok sa ulahi nga mga adlaw. Ug kini nga bahin sa pagpangandam alang sa Ikaduha nga Pag-anhi sa Ginoo. (Tan-awa sa Moises 7:61–65).

Jacob 5: Ang buhat sa agalon ug sa iyang mga sulugoon diha sa ubasan nagrepresentar sa interaksiyon sa Ginoo ngadto sa Iyang mga anak samtang ang Israel nagkatag ug gipundok (tan-awa, pananglitan sa, mga bersikulo 76–77).

Kinsa: Ang Tanan! Ang pagpundok sa Israel magamit ngadto sa tanan nga mga anak sa Dios, sa buhi ug niadtong anaa sa kalibotan sa espiritu. “Israel nagpasabot ngadto sa usa ka tawo kinsa andam ipatigbabaw ang Dios sa iyang kinabuhi.”³

Jacob 5: Ang agalon sa ubasan nagrepresentar kang Jesukristo (Jehovah). Ang maayo nga kahoy nga oliba ug ang mga sanga niini nagrepresentar sa mga katawhan sa pakigsaad sa Ginoo, ug ang ihalas nga mga kahoy ug ang ilang mga sanga nagrepresentar niadtong kinsa wala pa mihimo og mga pakigsaad sa Ginoo. Ang mga sulugoon nga nagpundok sa mga sanga nagrepresentar niadtong kinsa nagpakatap sa ebanghelyo ug nagtabang sa mga tawo sa paghimo ug pagtuman sa mga pakigsaad. (Tan-awa sa mga bersikulo 3, 70, 72–73.)

Unsaon: Sama sa gitudlo ni Presidente Nelson, sa bisan unsa nga panahon kita motabang ni bisan kinsa nga mohimo og lakang ngadto sa paghimo og mga pakigsaad sa Dios, kita motabang sa pagpundok sa Israel .⁴ Ang pagserbisyo og full-time nga misyon, paghimo sa buhat sa family history, ug pagpahigayon og mga ordinansa sa templo mao ang maanindot kaayo nga mga paagi sa pagpundok sa Israel. Ang dili kaayo klaro nga mga paagi naglakip sa pagtuman sa inyong calling sa Simbahan, ang pagkahimong usa ka higala niadtong dili sakop sa atong tinuohan, pag-adbokasiya alang sa relihiyoso nga kagawasan, makighigala og tawo nga bag-o sa simbahan, paghatag sa inyong pagpamatuod, pagserbisyo niadtong anaa sa panginahanglan, ug pagkahimong usa ka takos nga tiggunit og rekomend sa templo.

Jacob 5: Ang pagpul-ong, pagkalot, ug pagsumbak nagrepresentar sa lain laing mga paagi nga kita makatabang sa uban sa paghimo ug pagtuman sa sagradong mga pakigsaad (tan-awa sa mga bersikulo 11, 12, 58, 68).

Kanus-a: Ang pagpundok sa Israel nahitabo na sukad pa sa sinugdanan ug nagpadayon sa atong panahon isip kabahin sa nagpadayon nga Pagpahiuli sa ebanghelyo ni Jesukristo dinhi sa yuta.

Jacob 5: Ang kataposan nga paningkamot sa ubasan nagrepresentar sa kataposan nga mga adlaw ug sa atong pagpangandam alang sa Ikaduhang Pag-anhi sa Manluluwas (tan-awa sa mga bersikulo 62, 77).

Asa: Ang pagpundok sa Israel nahitabo sa tanang dapit sa tibuok kalibotan. “Ang tanang nasod mao ang dapit sa pagpundok alang sa kaugalingon niining katawhan.”⁵

Jacob 5: Ang ubasan sa agalon nagrepresentar sa kalibotan (tan-awa sa mga bersikulo 8, 14).

Ngano: Samtang atong gipundok ang Israel, kami nagdapit sa mga anak sa Dios sa paghimo og mga pakigsaad nga makatugot kanila nga makapuyo uban sa ilang mga pamilya sa langit. Ang paghimo niining mga pakigsaad sa yuta naghatag usab kanato og kalig-on, hingpit nga kalipay, ug diosnon nga tabang sa mga hagit sa kinabuhi.⁶

Jacob 5: Ang hingpit nga kalipay nga bation sa mga sulugoon gikan sa ilang makugihon nga paghago mao gihapon nga kalipay ang atong bation kon kita mobuhat sa pagdala sa uban ngadto ni Kristo (tan-awa sa mga bersikulo 71, 75).