Ang Balaang Kapalaran sa Atong mga Anak

Ni W. Justin Dyer, PhD

Brigham Young University

Upat ka paagi nga ang mga ginikanan makatabang sa ilang mga anak nga makat-on mahitungod ni Jesukristo ug makaila sa diosnon nga potensiyal nga anaa sila.

Ang mga bata kasagaran pangutan-on, “Unsay imong gusto nga mamahimo inig dako nimo?” Didto sa kinabuhi sa wala pa dinhi sa kalibotan, kon gipangutana kita sa susama nga pangutana, ang atong tubag tingali yano lang nga, “Gusto ko nga mahimong sama sa atong langitnong mga ginikanan.”

Ang pagkaginikanan kasagaran mahitungod sa pagpakatulog ug pagpakaligo sa mga anak, pagtudlo ug pagsapot sa mga anak, pagkorihir ug paghupay. Apan tingali mahimo kitang mohunong og kadiyot ug tan-awon ang atong pagkaginikanan gikan sa usa ka mas lapad nga panglantaw, hinumdoman ang diosnon nga kinaiya sa atong mga anak—nga sila mga anak sa Dios usab—ug nga sila adunay diosnon nga kapalaran, gani sa pagkahimong sama sa Dios ugma damlag (tan-awa sa Doktrina ug Pakigsaad 132:20).

Si Presidente Dallin H. Oaks, Unang Magtatambag sa Unang Kapangulohan, mitudlo, “Ang atong teyolohiya nagsugod sa langitnong mga ginikanan, ug ang atong [labing gitinguha] mao ang pagkab-ot sa mahangtorong kahimayaan.”¹ Ug matag usa kanato anaa nianang diosnon nga potensiyal. “Ang Pamilya: Usa ka Pamahayag ngadto sa Kalibotan” nag-ingon: “Ang tanan nga mga tawo—lalaki ug babaye—gilalang diha sa hitsura sa Dios. Ang matag usa hinigugmang espiritu nga anak nga lalaki o babaye sa langitnong mga ginikanan, ug, sa ingon, ang matag usa adunay mga kinaiya sa pagkadios ug kalagmitan nga mahimong usa ka dios.”²

Ang mga ginikanan makatabang sa paggiya sa mga anak sa ilang kinabuhi ug mahimong malamposon sa ilang dalan paingon sa pagkahimong sama sa Dios. Apan aron mahimong mas sama Kaniya, ang atong mga anak kinahanglang makat-on una mahitungod kon unsa sama ang Dios. Usa ka rason nga si Jesukristo mianhi sa yuta mao ang pagtabang kanato nga makasabot sa atong Langitnong Amahan. Sama sa gisulti sa Manluluwas, “Ako ug ang Amahan usa ra” (Juan 10:30); “ang nakakita kanako nakakita usab sa Amahan” (Juan 14:9). Aron mahimong sama sa Dios, modangop kita sa Manluluwas, magkat-on Kaniya.

Aniay upat ka butang nga atong mabuhat aron sa pagtabang sa atong mga anak nga makat-on kon kinsa si Jesukristo ug busa mahimong makaila sa ilang Langitnong Amahan:

Tudloi sila nga mosalig sa apostoles ug mga propeta sa Manluluwas.
Tudloi sila nga molihok diha sa hugot nga pagtuo.
Tudloi sila sa importansiya sa pagpadayag.
Mamahimong ehemplo sa mga kinaiya sa Manluluwas.

Pagsalig sa Apostoles ug sa mga Propeta

Usa sa labing importante nga mga paagi nga ang atong mga anak makaila ni Jesukristo mao ang pinaagi sa pagpaminaw ngadto sa Iyang pinili nga espesyal nga mga saksi. Sama sa mga panahon sa Bag-ong Tugon, ang Apostoles karon makatabang kanato nga makasabot sa Iyang kinaiya ug sa Iyang buhat. Si Presidente Russell M. Nelson mitudlo: “Ang naordinahan nga mga Apostoles ni Jesukristo kanunay nga nagpamatuod Kaniya. Sila nagtudlo sa dalan samtang kita nagsubay sa malisod nga dalan sa atong mortal nga mga kasinatian.”³ Ug si Elder Neil L. Andersen sa Korum sa Napulog Duha ka Apostoles mitudlo: “Ang propeta dili tigpataliwala ninyo ug sa Manluluwas. Hinoon, mobarog siya tupad ninyo ug motudlo sa dalan paingon sa Manluluwas.”⁴

Importante usab nga tudloan ang atong mga anak nga magbaton og pagkamapainubsanon ug pailob samtang maminaw sila sa atong dinasig nga mga lider. Si Elder Andersen misulti: “Ayaw katingala kon usahay ang inyong personal nga mga panglantaw dili kanunay nga mahiangay sa mga pagtulon-an sa propeta sa Ginoo. Mga gutlo kini sa pagkat-on, sa pagpaubos, kon moluhod kita aron mag-ampo. Matinud-anon kitang magpadayon, nga mosalig sa Dios, nga nasayod nga moabot ang panahon nga makadawat kita og dugang nga espirituwal nga katin-awan gikan sa atong Langitnong Amahan.”⁵ Ang Ginoo mitudlo og usa ka importante nga baroganan sa dihang misulti Siya ni Propeta Joseph Smith, “Kay ang iyang pulong ikaw makadawat, ingon og gikan sa akong kaugalingon nga baba, sa tanan nga pagpailob ug hugot nga pagtuo” (Doktrina ug mga Pakigsaad 21:5). Ang pagtudlo sa atong mga anak nga magbaton og pailob ug maningkamot alang sa pagsabot mohimo kanila nga espirituhanong makabarog pinaagi sa kinaugalingong paningkamot sa tibuok nilang kinabuhi.

Paglihok inubanan sa Hugot nga Pagtuo

Ang pagkahibalo sa usa ka butang mas labaw pa kaysa pagsag-ulo og mga kamatuoran. Ang mga tawo mahimong mobasa og mga libro mahitungod sa pagtukar sa piyano, apan kon dili sila motukar og usa ka nota, ang ilang kahibalo dili motabang kanila nga mahimong usa ka tigtukar sa piyano. Ang susama tinuod bahin sa pagkaila ni Jesukristo. Ang pagkaila Kaniya labaw pa kaysa pagkahibalo og mga kamatuoran. Aron makaila Kaniya, kinahanglan mobuhat kita sama sa Iyang gibuhat.

Ang Manluluwas mihatag og gibug-aton nga ang pagbuhat usa ka mahinungdanon nga bahin sa pagkahibalo: “Ang buot magbuhat sa gisugo sa Dios mahibalo kon ang akong gitudlo gikan ba sa Dios o nagsulti ba lamang ako sa kaugalingon kong pagbuot” (Juan 7:17). Si Elder David A. Bednar sa Korum sa Napulog Duha ka Apostoles misulti, “Makasugod kita sa pagkaila sa Manluluwas kon lagsikon nato ang atong espirituhanong galamhan ug eksperimentohan ang Iyang mga pagtulon-an.”⁶ Si Hari Benjamin nangutana, “Kay unsaon pagkasayod sa usa ka tawo sa agalon kinsa siya wala makaalagad?” (Mosiah 5:13).

Ang atong mga anak makakat-on mahitungod ni Kristo pinaagi sa pagtuon sa kasulatan, seminary, ug sa kinatibuk-ang komperensiya. Apan, kini dili paigo kon dili magbuhat sa unsay gibuhat ni Kristo: pagsangyaw sa ebanghelyo, pag-atiman niadtong nanginahanglan, ug sa paglibot sa “paghimog mga kaayohan” (Mga Buhat 10:38).

Ang Kabataan ug Kabatan-onan nga programa sa Simbahan makatabang sa atong mga anak nga molihok inubanan sa hugot nga pagtuo. Makatabang kita kanila nga mokonsiderar sa mga tumong nga motabang kanila sa pagbuhat sa mga butang nga gibuhat ni Kristo ug mahimong makaila kon kinsa Siya.⁷

Pagtinguha og Pagpadayag

Kita usab mahimong makaila ni Kristo sa usa ka mas personal nga lebel kon, sama sa giawhag ni Presidente Nelson, kita maminaw kaniya pinaagi sa Espiritu: “Kita usab [maka] paminaw Kaniya nga mas klaro kon atong hashasan ang atong abilidad sa pag-ila sa mga hunghong sa Espiritu Santo. Wala gayod sukad nga mas importante nga makahibalo unsaon sa pagpaminaw sa Espiritu nga mamulong kaninyo kay sa karon. Sa Dios nga Kapangulohan, ang Espiritu Santo mao ang mensahero. Siya modala sa mga hunahuna diha sa inyong alimpatakan nga gusto sa Amahan ug sa Anak nga inyong madawat.”⁸

Ang atong mga anak mahimong makaila sa Manluluwas kon maminaw sila sa unsay Iyang gusto nga ilang mahibaloan ug buhaton sa tagsa-tagsa. Ang programa sa Kabataan ug Kabatan-onan nag-awhag sa mga bata ug kabatan-onan: “Mahimo kang mag-ampo aron makahibalo kon unsa [ang imong mga talento] ug unsa ang imong posibling matrabaho karon dayon.”⁹ Samtang ang mga bata magtinguha nga makasabot kon unsa ang gusto sa Manluluwas alang kanila, ang ilang oportunidad nga mobati sa Iyang gugma personal nga motubo.

Kita makatudlo kanila nga dili mawad-an og kadasig kon ang mga tubag dili dayon moabot. Mahimo silang makapadayon inubanan sa hugot nga pagtuo, nasayod nga ilang mabati ang gugma sa Dios samtang maningkamot sila nga maminaw Kaniya. Si Presidente Nelson milatid sa mga lakang nga motabang kanato nga, sa mga pulong ni Propeta Joseph Smith, “molambo ngadto sa baroganan sa pagpadayag,” lakip sa: pagsubsob diha sa mga kasulatan, pagpaduol ngadto sa Ginoo pinaagi sa pag-ampo, pagpaminaw alang sa mga tubag ug pagrekord sa atong mga gibati, ug (samtang dili kita kinahanglang mahimong perpekto) paghimo og inadlaw nga mga paningkamot aron mahimong mas takos.¹⁰

Pagkahimong usa ka Ehemplo

Sa kataposan, isip mga ginikanan, usa sa mga paagi nga dunay labing dako nga epekto sa atong pagtudlo sa atong mga anak mahitungod ni Kristo mao ang pagsunod sa Iyang mga kinaiya sa atong kaugalingon nga mga kinabuhi. Si Elder Jeffrey R. Holland sa Korum sa Napulog Duha ka Apostoles misulti: “Mapangahason ra ba kaayo nga molaom nga ang atong mga anak mahimong adunay gamay nga bahin sa pagbati kanato nga ang Diosnon nga Anak mibati alang sa Iyang Amahan? Mahimo bang mas makaangkon kita niana nga gugma pinaagi sa pagpaningkamot nga mahimong dugang pa kon unsa ang Dios ngadto sa Iyang anak? Sa bisan unsa nga kahimtang, nasayod kita nga ang naglambo nga konsepto sa usa ka batan-on mahitungod sa Dios nakasentro sa mga kinaiya nga naobserbahan diha sa yutan-on nga mga ginikanan niana nga bata.”¹¹

Kon kita mosunod ni Kristo, nagtabang kita nga mapadayag Siya ug ang Amahan ngadto sa atong mga anak. Pipila sa mga hiyas ni Kristo gilatid diha sa Moroni 7:44–45, lakip sa gugma nga putli, paglaom, kamabination, kaaghop, dili dali nga masuko, mainantoson, ug molahutay sa tanan nga mga butang.

Usa ka babaye nga akong kaila adunay amahan nga kanunayng masuko ug dali ra sapoton. Miingon siya, “Sulod sa daghang katuigan, nakita nako ang Langitnong Amahan sa samang paagi nga akong nakita ang akong kaugalingon nga amahan—usa ka tawo nga sa kasagaran nagpalayo ug dali nga nasagmuyo.” Kini nakaapekto sa iyang abilidad nga tinud-anay nga makasabot sa Langitnong Amahan. Bisan pa man, gipakigbahin niya nga ang Langitnong Amahan mitabang kaniya nga makat-on nga “Siya hinay-hinay nga migiya kanako nga dili mahadlok Kaniya apan hinuon mobati sa makaluwas nga gahom sa Iyang gugma.” Misugod siya sa pagkakita sa tinuod nga Siya [Langitnong Amahan].

Ang unang katuyoan sa Primary mao ang pagtabang sa mga bata nga mobati sa gugma sa ilang Langitnong Amahan.¹² Kini mahimong mao usab ang usa sa unang mga katuyoan sa mga ginikanan. Samtang ang mga anak mobati sa gugma sa Langitnong Amahan, makabaton sila og mas maayo nga pagsabot Kaniya ug gustong mahimong sama Kaniya.

Unsa ang gusto sa atong mga anak nga mamahimo inig dako nila? Isip mga ginikanan, kita makapasiugda og usa ka tinguha diha kanila nga mahimong sama sa atong langitnong mga ginikanan. Si Jesukristo mao ang atong hingpit nga ehemplo, ug samtang tabangan nato ang atong mga anak nga moduol ngadto Kaniya, sila mas lagmit nga makaangkon niini nga tinguha. Makatabang kita kanila nga mahimong makaila sa Dios ug ni Jesukristo pinaagi sa pag-ugmad og pagsalig diha sa apostoles ug mga propeta, sa pagtabang kanila nga mobuhat sama sa buhaton sa Ginoo, sa pagtabang kanila nga maminaw Kaniya pinaagi sa Espiritu, ug sa pagsunod sa Ginoo sa atong kaugalingon nga mga aksiyon.

Ang atong ehemplo ug ang ilang pakigsaad nga relasyon sa Ginoo magmugna og kalig-on, usa ka pagbati nga nahisakop, ug sa kahibalo sa gugma sa Dios nga gikinahanglan sa atong mga anak, nga mopanalangin kanila sa umaabot nga mga katuigan.

Mga Ideya alang sa mga Ginikanan

Nagkinahanglan og tabang sa paggamit niining upat ka baroganan? Ania ang pipila ka ideya nga ikonsiderar:

Salig sa Apostoles ug sa mga Propeta:

Paglista og pipila ka imbitasyon nga gihatag sa propeta ug apostoles diha sa kinatibuk-ang komperensiya ug rebyoha kini uban sa inyong mga anak.
Lihok inubanan sa Pagtuo:

Kon tukma na ang pangidaron sa inyong mga anak, tabangi sila sa ilang mga buluhaton sa pagpangalagad. Kon mas bata pa sila, tabangi sila nga moserbisyo ug motabang sa uban diha sa panimalay, sama sa buhaton sa Manluluwas.
Pagtinguha og Pagpadayag:

Pangutan-a ang inyong mga anak kon nakabati ba sila og espirituhanong mga pag-aghat bag-ohay lang ug ipakigbahin ang inyong mga pag-aghat.
Mamahimong usa ka Ehemplo:

Ikonsiderar kon kumusta kamo isip usa ka disipulo ni Jesukristo ug asa dapita kamo mahimong makapalambo. Idugang ang inyong mga hunahuna ug paghimo og plano diha sa inyong journal.

Dugang nga mga kapanguhaan bahin sa pagkaginikanan mahimong makit-an diha sa parents.ChurchofJesusChrist.org.