Dawata ang Makaayo nga Gahom sa Paghinulsol ug Pagpasaylo

Ni Elder Ulisses Soares

Sa Korum sa Napulog Duha ka Apostoles

Gikan sa iyang pamulong sa debosyonal, “Asking, Seeking, and Knocking: A Compassionate Pattern,” gihatag didto sa Brigham Young University–Hawaii sa Ene. 29, 2023. Alang sa kompleto nga pamulong, bisitaha ang speeches.byuh.edu.

Pangita og mga tubag ngadto sa tulo ka pangutana mahitungod sa paghinulsol ug pagpasaylo.

Pila ka bulan ang milabay, akong gidapit ang BYU-Hawaii nga mga estudyante sa pagsumiter og pangutana ngadto sa usa ka Apostol nga labing importante kanila isip usa ka disipulo ni Jesukristo. Akong gi-grupo ang mga pangutana ngadto sa samang mga hilisgotan. Usa sa ingon nga pagkagrupo kalabot ngadto sa paghinulsol ug sa pagka-napasaylo sa atong mga sala, pagbati og katakos sa pag-ambit sa sakramento, ug pagbati sa gugma sa Dios alang kanato bisan kon atong gibati nga dili takos. Gusto ko nga hisgotan kana nga hilisgotan dinhi.

Mahigugma Pa Ba Gihapon ang Dios Kanako Bisan Kon Ako Nakasala?

Kini makapahinam nga timan-an nga ang baroganan sa paghinulsol moabot human sa hugot nga pagtuo diha ni Jesukristo. Hinoon, ako kinahanglan gayod nga mosulti kaninyo nga ang Dios nahigugma kanato, bisan kon kita anaa sa grabe nga pagpakasala. Kita mapasaylo kon kita nakapaubos sa atong mga kaugalingon sa atubangan sa Dios, mipakitambag uban sa angay nga mga lider sa Simbahan ingon nga gikinahanglan, ug mihinulsol ug mibiya sa atong mga sala. Ang paghimo niini nga mga lakang nagdala kanato ngadto sa Manluluwas, kinsa sa kataposan makahimo sa pagpalingkawas kanato gikan sa sala, kasubo, ug sa espirituwal ug pisikal nga pagkaulipon.

Ngano nga Ako sa Gihapon Mobati nga Nakasala Bisan human Ako Nakahinulsol?

Wala kita mahibalo kon ngano usahay kita padayon nga mobati nga nakasala bisan human kita nakahinulsol alang sa mga sala nga atong nahimo. Kay sa maghunahuna, pakigsulti ngadto sa atong Langitnong Amahan mahitungod niini. Pangutana Kaniya sa direkta nga paagi. Ako nahibalo nga sa kadugayan, Siya mopadayag nganha kanimo kon unsay imong gikinahanglan. Sa akong kahimtang, sa gihapon ako adunay mga panumdoman sa pipila sa akong nanglabay nga mga kasaypanan. Samtang ako nag-ampo mahitungod niini, ang Ginoo nagsulti kanako nga ako napasaylo na, ug kinahanglan nga dili na ako maguol mahitungod niadtong mga butanga. Bisan pa niana, gibati ko usab kadtong mga panumdoman nga mga pahimangno alang kanako sa pagpaninguha nga dili mahulog ngadto niadto nga mga sayop pag-usab.

Busa, kini dili sa tibuok negatibo ang pagbaton niadto nga mga panumdoman. Nakita ko kini sa akong kinabuhi isip usa ka pagpakita sa gugma sa Dios alang kanako samtang Siya sa kanunay nagpahimangno kanako sa paglikay sa pag-agi niana nga dalan pag-usab. Samtang kita magpadayon sa pagpaninguha sa pagbuhat sa atong labing maayo, magpakita pinaagi sa atong mga buhat sa tinguha sa paglimpyo sa sulod nga sudlanan (tan-awa sa Alma 60:23), ang mga pagbati nga nakasala ug nawad-an sa kadasig ingon og magpalayo. Moabot ang panahon, ang atong kasinatian mahimong sama niana kang Alma, kinsa mipamatuod nga human sa paghinulsol “siya makahinumdom pa gihapon sa iyang mga sala, apan ang paghinumdom sa iyang mga sala wala na mohasol ug mosakit pa kaniya, tungod kay nasayod siya nga siya napasaylo na.”¹

Unsaon nga Ako Makapasaylo sa Uban Kinsa Nakapasakit Kanako?

Usa ka makapaikag nga kabalaka gipahayag pinaagi sa pangutana nga gisumiter may kalabot ngadto sa pagpasaylo niadtong kinsa nakapasakit kanato ug mihimo og ngil-ad nga mga butang ngari kanato.

Husto, kini usa ka makapaikag nga pangutana. Mopunting kita diha sa pipila ka mga baroganan ug tan-awon kon unsaon nga kita makagamit niini. Samtang kita nagtuon sa pulong sa Dios, kita nagkat-on nga ang pagpasaylo sa uban nagdala og importante nga espirituhanong mga panalangin, lakip ang kalinaw ug paglaom. Tingali ang labing importante niini nga mga panalangin mao nga samtang kita nagpasaylo sa uban, kita mahimong mapasaylo usab sa atong kaugalingong mga sala. Nagtudlo ang Ginoo kanato nga ang pagpasaylo usa ka sugo sa tanan ug nga kita “gikinahanglan nga mopasaylo sa tanan nga mga tawo” (Doktrina ug mga Pakigsaad 64:10). Bisan pa niana, kini sa gihapon malisod.

Usahay nagtugot kita sa garbo, kahadlok, kaligutgot, o kakulian sa pagwala og kadasig kanato ug sa pagbabag sa atong abilidad sa pagbati og paglaom. Apan ang kaisog sa pagpasaylo moabot ngadto niadtong kinsa mibutang sa ilang hugot nga pagtuo ug pagsalig diha sa Ginoo. Uban sa Iyang panabang, makaplagan nato ang kalig-on sa pagpasaylo sa uban, bisan kon ang tigbuhat sa sayop nakahimo og usa ka seryosong sala o wala tuyoa nga sala. Ang pagpasaylo nagpasabot og pagpalabay sa pasangil alang sa usa ka miaging pagpasakit. Kini usab mao ang pagbuhi og usa ka mahinungdanong palas-anon. Kini mao ang pagpadayon sa kinabuhi sa unahan.

Kabahin sa paghikalimot, kini importante sa paghinumdom nga ang “pagpasaylo wala mangahulogan sa pagkalimot sa sala nga nahitabo o magpaka-aron ingnon nga kini wala gayod mahitabo. Kini wala magkahulogan nga imong gitugotan ang [makasakit nga batasan] sa pagpadayon. Kini wala magpasabot nga kini posible alang sa tanang mga relasyon nga mamaayo. Ug kini wala magpasabot nga ang sad-an dili patubagon sa iyang mga binuhatan. Kini nagkahulogan nga ang Manluluwas makatabang kanimo sa pagpasaylo.”²

Ania ang pipila ka mga sugyot sa pagtabang niini nga proseso:

Pag-ampo alang sa pagpaubos. Ang pagpaubos kaatbang sa garbo, nga mao ang pangunang babag sa atong paninguha sa pagpasaylo. Ang garbo naggiya kanato sa pagtutok diha sa mga pagbati og kaligutgot ngadto sa uban. Kini hinungdan usab kanato nga dili makakita sa atong kaugalingong mga kahuyang, mga sayop ug mga sala. Apan ang Ginoo nagsaad, “Kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila” (Ether 12:27). Sumala sa atong pagpaubos ug hugot nga pagtuo, ang Ginoo motabang kanato nga mahimong mas mahisama Kaniya ug sa tinuod magpasaylo sama sa Iyang gibuhat.
Pahayag og pasalamat. Ang pagpahayag og pasalamat nagdapit sa Espiritu sa mas hingpit nga paagi ngadto sa atong mga kinabuhi, diin makapahumok ug makapausab sa atong mga kasingkasing. Paghunahuna sa paghimo og journal sa mga butang nga ikaw mapasalamaton. Pangita og mga pagpakita sa gugma sa Dios sa matag adlaw. Samtang ikaw nag-ugmad og kinaiya sa pagpasalamat, imong mahibaloan nga ikaw makaila og mga rason nga magmapasalamaton alang sa imong mga pagsulay.
Pagmapailubon. Ang pagpasaylo kon ikaw anaa sa hilabihan nga kasakit mahimong mokabat og panahon. Usa ka babaye nga nagkaayo gikan sa usa ka masakit nga diborsyo midawat niining maalamong tambag gikan sa iyang bishop: “Pagbilin og luna diha sa imong kasingkasing alang sa pagpasaylo, ug kon kini moabot, abi-abiha kini.” Makahimo ikaw og lawak alang sa pagpasaylo pinaagi sa kinasingkasing nga pag-ampo, pagtuon, ug pagpamalandong. Ang pagbusog sa mga pulong ni Kristo sa inadlaw motabang usab kanimo nga mas mapaduol ngadto Kaniya ug modala og dakong gahom sa pagpang-ayo nganha sa imong kinabuhi (tan-awa sa 2 Nephi 31:20; Jacob 2:8).
Biyai ang nangaging panahon. Ang kasaysayan kasaysayan ug dili mausab. Apan ikaw makapunting sa imong enerhiya sa karon; tungod kay ang karon, ikaw adunay gahom sa pagpili sa pagpasaylo. Itugyan ang imong palas-anon diha sa Ginoo. Si Kristo nagtawag, “Umari kanako, kamong tanan nga nabudlay ug nabug-atan, ug papahulayon ko kamo” (Mateo 11:28). Hinumdomi nga agi og pagdugang sa pagdala diha Kaniya sa mga sala sa kalibotan, si Kristo midala diha Kaniya sa atong mga sakit ug mga balatian (tan-awa sa 2 Nephi 9:12; Alma 7:11–12; Doktrina ug mga Pakigsaad 18:11). Kon ikaw motugot Kaniya, siya makahimo sa imong palas-anon nga magaan.

Ang pagkaplag og kalig-on sa pagpasaylo mahimong makahagit, apan ang Manluluwas ug ang Iyang Pag-ula naghimo niini nga posible. Sa tinuod, samtang atong ablihan ang atong mga kasingkasing sa pagpasaylo sa uban, kita panalanginan og kalinaw. Nagdapit ako kaninyo sa pagdawat sa makaayo nga gahom sa pagpasaylo.