Mga Hulagway sa Hugot nga Pagtuo

Mapasalamaton sa Pagdala Kanila Pauli

Ni Gisèle Vanizette, Alberta, Canada, ingon nga gisugilon ngadto ni Alison R. Wood, Mga Magasin sa Simbahan

Ang luwas nga pagbalik sa akong amahan atol sa Ikaduhang Gubat sa Kalibotan nakatabang kanako sa pagdayeg sa milagro sa buhat sa family history human nga mipasakop ako sa Simbahan.

Ibabaw: Ang tagsulat uban sa iyang apo nga lalaki nga si Jordan Stanford ug anak nga babaye nga si Marie-Laure Stanford.

Mga litrato sa maayong kabubut-on sa tagsulat

Ang Paris, France, usa ka dapit diin sa daghang paagi gamay ra ang paglaom sa katawhan niadtong 1939. Ang kapildihan sa among mga sundalo nagsugod na, ug daghang mga taga Paris ang nagsugod sa pagbiya sa dakbayan. Sa panahon sa ting-init sa 1940, ang Germany misakop sa France.

Gipatawag ang akong amahan sa Service du Travail Obligatoire (Gikinahanglan nga Trabaho nga Serbisyo [Compulsory Work Service]) ug gipadala ngadto sa Germany aron motrabaho diha sa usa ka factory. Si Mama ug ako magkauban nga nagpuyo, nagtrabaho og bisan unsa nga mga trabaho aron makabayad sa nag-unang mga gikinahanglan latas sa lisod nga mga tuig sa pagsakop.

Usa ka adlaw paingon pauli gikan sa trabaho atol sa ting-init sa 1944, misakay ko sa akong bisikleta latas sa Place de la Concorde ug nakaplagan ang akong kaugalingon diha sa tunga-tunga sa usa ka gubat. Ang German nga mga tangke naghuot diha sa plasa, ug dihay dakong kagubot samtang adunay pagpamusil gikan sa tanang habig, lakip na gikan sa ibabaw sa mga atop. Usa ka German nga sundalo mibira kanako sa akong bukton ug gitukmod ko sa luyo sa iyang tangke, nga miluwas sa akong kinabuhi.

Human niana, paspas nga miabot ang kausaban. Ang Allied nga mga sundalo sa wala madugay misulod ug mikuha pag-usab sa Paris. Nagsaulog ang France, apan si Mama ug ako dili makaapil diha sa kinatibuk-an nga pagpabuhagay sa kalipay. Wala kami nadunggan nga balita ni Papa. Hinay-hinay nga mibalik ang French nga mga binilanggo, apan naghunahuna kami kon kumusta kaha kadtong mga mitrabaho sa German nga mga factory.

Usa ka gabii, walay pahibalo, miabot si Papa nga gikapoy ug walay pagpamalbas. Gisugilon niya kanamo ang iyang milagroso nga pag-ikyas gikan sa Germany ug ang iyang panaw pinaagi sa paglakaw, pinaagi sa pagsakay og bisikleta, ug pinaagi sa tren latas sa Hungary ug Czechoslovakia.

Ang among pamilya magkauban na pag-usab, ug puno ang among hingpit nga kalipay.

Si Gisèle isip usa ka batan-ong babaye.

Dili Malalis nga mga Tubag

Pipila ka tuig ang milabay, ang mahangtoron nga importansiya sa pagbaton—ug paghiusa—sa among pamilya nahimong klaro kanako human gidawat nako ang mga pagtulon-an sa duha ka batan-on nga mga lalaki nga nanuktok sa pultahan sa factory sa tsokolate sa akong bana. Gipaila nila ang ilang mga kaugalingon nga mga misyonaryo sa Ang Simbahan ni Jesukristo sa mga Santos sa Ulahing mga Adlaw.

Ang akong bana, si Gerard, nakigsabot nga makigkita kanila sa panimalay human sa trabaho, apan nakalimot siya sa pagsulti kanako. Sa dihang nakit-an nako nga miabot kining duha ka batan-on, gipalingkod nako sila diha sa sala ug gipahulat kang Gerard. Wala kaayo ko nahimong mabination ngadto kanila.

Relihiyoso ko, apan ang akong tinuohan wala kaayo magkinahanglan og daghan gikan kanako. Malipayon kong nagpakabuhi nga walay panginahanglan sa pagtuon o pagpangutana. Ang hunahuna sa pagkwestiyon sa akong tinuohan nakapabalaka kanako, ug wala ko mobati nga adunay igong kaisog sa pag-usab sa akong relihiyon.

Sulod sa taas nga panahon, si Gerard nagsimba nga wala ko. Ang gamay nga branch nga iyang gitambongan nagpahigayon og mga miting diha sa usa ka bagon [trailer] samtang ang unang meetinghouse sa Simbahan sa France gitukod pa. Mitabang gani si Gerard sa pagkalot sa pundasyon.

Mopauli siya nga malipayon ug mosulay sa pagpakigbahin sa iyang mga impresyon kanako. Sa kataposan, naminaw ko sa misyonaryo nga mga panaghisgotan, kasagaran mangutana sa katuyoan sa pagpakaulaw niadtong duha ka makaluluoy nga mga misyonaryo. Uban sa dakong pailob ug hingpit nga pagkamatinuoron, sila miangkon sa ilang pagkawalay kahibalo bahin sa piho nga mga punto sa doktrina, mitanyag sa pagsiksik sa akong mga pangutana, ug mibalik sa sunod semana uban sa dili malalis nga mga tubag.

Sa dihang ang usa ka tigbisita nga pari sa parokya nakahibalo nga gidawat namo ang mga misyonaryo, gisulayan niya sa pagpakita nga bakak ang mga pagtulon-an sa Simbahan. Apan, ang iyang mga paningkamot adunay bali nga epekto. Bisan kon gisulayan niya sa paghulagway ang mga miyembro sa Simbahan sa labing maot nga paagi, midesisyon ko sa pagdawat sa mga baroganan nga gitudlo sa mga misyonaryo ug magpabunyag.

Si Gerard dugay nang andam alang sa bunyag apan dili gusto nga magpabunyag nga wala ko. Niadtong Mayo 1964, ang mga misyonaryo mipahimutang og usa ka mabalhin-balhin nga trapal nga pool diha sa tunga-tunga sa sala sa ilang apartment ug gipuno kini og tubig gikan sa usa ka tubo nga gikonektar gikan ngadto sa usa ka lababo. Tanan sa among mga higala sa Simbahan anaa didto. Emosyonal kaayo ko nga nahadlok ko nga ang akong mga luha makapaawas sa pool!

Si Gisèle uban sa iyang bana, si Gerard, ug ang ilang duha ka anak nga babaye didto sa Bern Switzerland Temple.

Konektado alang sa Kahangtoran

Usa ka tuig ang milabay didto sa Bern Switzerland Temple, ang akong bana ug ako giselyo ngadto sa usag usa ug dayon ang among duha ka anak nga babaye giselyo kanamo. Samtang naa kami didto, gipahigayon namo ang buhat sa templo alang sa among mga katigulangan. Ganahan kaayo ko sa unsay gitudlo sa Simbahan mahitungod sa family history ug sa mga pagselyo ug sa pagpundok sa Israel. Ganahan kaayo ko sa gitutokan nga paghiusa sa mga pamilya.

Si Gisèle uban sa mga anak nga babaye nga sila si Marie-Laure Stanford ug Isabelle Horne.

Dili sayon ang pagbuhat sa family history sa France niadtong panahona, apan mibati ko nga nadasig sa pagbuhat niini. Wala pay digital nga mga rekord kaniadto, mao nga kasagaran mibiyahe ko ngadto sa yutang natawhan sa usa ka katigulangan aron sa paghangyo sa pisikal nga mga rekord. Mibati ko og ingon ka espesyal nga pagbati sa dihang gigunitan nako ang mga dokumento nga gisulat sa mapainubsanon nga mga tawo kinsa anaa atol sa pagkatawo, kaminyoon, og kamatayon sa usa sa akong mga katigulangan.

“Ganahan kaayo ko sa unsay gitudlo sa Simbahan mahitungod sa family history ug sa mga pagselyo ug sa pagpundok sa Israel.”

Ako karon murag limitado na tungod sa edad, apan mapasalamaton kaayo ko nga makapadayon ko sa paghimo sa buhat alang sa akong mga katigulangan pinaagi sa FamilySearch, pinaagi sa pag-index ug pagpangita og bag-o nga mga ngalan. Uban sa mga himan nga anaa alang kanato, naka-index ko og sobra sa 35,000 ka ngalan ug nakakita og sobra sa 5,000 ka ngalan nga dad-on ngadto sa templo.

Ang kalipay nga atong makaplagan diha sa ebanghelyo kompleto kon kita makatagamtam niini uban sa atong mga pamilya. Mapasalamaton ko alang sa kahigayonan sa paghiusa kanila—sa pagdala kanila pauli sa kahangtoran.