“Pagtabang sa Atong mga Pamilya sa Paglakaw diha sa Kahayag ug Kamatuoran,” Liahona, Abr. 2024.
Pagtabang sa Atong mga Pamilya sa Paglakaw diha sa Kahayag ug Kamatuoran
Ato ba nga gitabangan ang atong mga pamilya sa pag-atubang ngadto sa Langitnong Amahan ug sa Manluluwas ug sa pagpadayon sa pagpakabuhi nga mas maduol ngadto Kanila?
Paghulagway pinaagi ni Casey Nelson
Ang akong asawa, si Nuria, ug ako midawat og usa ka pagsaksi sa gipahiuli nga ebanghelyo ni Jesukristo human sa tulo ka bulan nga pagpaminaw ngadto sa mga misyonaryo. Nabunyagan kami niadtong 1982. Wala pa kami mga anak niadtong higayona, apan among nakat-onan ang kaimportante sa pagbaton og mga anak ug pagtudlo kanila sa ebanghelyo.
Ang Ginoo nagsulti kang Adan sa pagtudlo sa iyang mga anak “nga ang tanang katawhan, bisan diin, kinahanglan maghinulsol, o sila dili makapanunod sa gingharian sa Dios. …
“Busa Ako mohatag nganha kanimo og usa ka sugo, sa pagtudlo niini nga mga butang sa gawasnon nga paagi ngadto sa imong mga anak, mag-ingon:
“… Ikaw kinahanglan pa matawo pag-usab ngadto sa gingharian sa langit, sa tubig, ug sa Espiritu, ug malimpyohan pinaagi sa dugo, gani sa dugo sa akong Bugtong Anak; nga ikaw mabalaan gikan sa tanan nga sala, ug motagamtam sa mga pulong sa kinabuhi nga dayon niini nga kalibutan, ug kinabuhi nga dayon sa kalibutan nga moabut. …
“Ug karon, tan-awa, Ako moingon nganha kanimo: Kini mao ang laraw sa kaluwasan ngadto sa tanan nga mga tawo” (Moises 6:57–59, 62).
Si Nuria ug ako mipadako sa lima ka anak ug napanalanginan og 14 ka apo. Among nahibaloan nga kining pagtulon-an gikan sa moderno nga mga propeta, manalagna, ug mga tigpadayag tinuod: “Ang kalipay diha sa kinabuhi sa pamilya labaw nga makab-ot kon gipasikad diha sa mga pagtulun-an ni Ginoong Jesukristo.”1
Paghimo og usa ka Panimalay ug Pamilya nga Nakasentro ni Kristo
Sa daghang paagi, si Nuria ug ako mga pioneer sa Simbahan diin kami nagpuyo didto sa Puerto Rico. Ang tanang butang bag-o ngari kanamo. Among nadiskobrehan og sayo nga ang gabii sa panimalay mahimong importante sa pagpadako sa among tulo ka mga anak nga babaye ug duha ka mga anak nga lalaki.
Usahay, kami maghunahuna kon nakahimo ba kami og dakong kalainan. Nakahinumdom ko nga usa sa among anak nga lalaki itukod iyang ulo sa sofa nga ang iyang mga tiil magtuyhad ngadto sa kisami. Motan-aw kami niya ug maghunahuna, “Nakakat-on ba kaha siya og bisan unsang butang?”
Bisan kon ang atong mga anak ingon og wala magtagad, kita wala gayod masayod kon kanus-a sila naminaw gayod ug nagkat-on. Mao kana kon nganong ang makanunayon nga pagpakigbahin sa ebanghelyo mahinungdanon kaayo.
Mga tuig ang nanglabay, ang among pamilya mitambong og usa ka kalingawan. Nalingaw kami sa mga pagsakay-sakay hangtod nagabhian. Sa among pagpadulong sa sakyanan aron mamauli, mikuot ko sa akong bulsa ug nakaamgo nga ang mga yawi sa sakyanan, sa balay, ug sa akong opisina nawala!
Ang nataran sa piryahan napuno sa mga tawo, apan nakakita kami og hilom nga dapit (ingon kahilom sa imong makit-an atol sa daghang kasikas sa kalingawan) ug nag-uban kami sa pag-ampo nga ang mga yawi makit-an. Nanglakaw dayon kami diha sa piryahan ug gipangita ang nawala nga mga yawi.
Sa among pagpadayon, nakakita kami og usa ka polis. Naghunahuna mi nga tingali dunay tawo nga nakakita sa among mga yawi ug gihatod ngadto kaniya. Giduol namo ang polis ug nangutana, “Nawala ang among mga yawi. Adunay bay nakahatag diha nimo?”
Nangutana siya kon kami mga miyembro ba sa Ang Simbahan ni Jesukristo sa mga Santos sa Ulahing mga Adlaw. Medyo naglibog niana nga pangutana, mitubag ko, “Oo.”
Ang polis mihangyo dayon nako sa paghulagway sa mga yawi. Akong gibuhat, ug siya misulti kanako nga naa kini niya.
“Nganong nangutana man ka kon miyembro ba kami sa Simbahan?” Nangutana ko samtang gitunol niya ang mga yawi.
“Tungod kay ikaw adunay vial sa lana diha sa imong keychain,” miingon siya. “Ang akong amahan adunay usa nga sama gyod niini. Miyembro siya sa inyong simbahan.”
Ang mga kasinatian nga sama niini mipanalangin sa among pamilya sa pagsalig sa Langitnong Amahan ug sa pagkasayod nga ang Manluluwas nag-uban kanamo ug motabang kanamo.
Ang paghimo og panimalay nga nakasentro kang Kristo ug sa pamilya nagkinahanglan og mga ginikanan kinsa seryoso mahitungod sa ilang pasalig sa unsay gitawag ni Presidente Russell M. Nelson nga “matarong, tinuyo nga pagkaginikanan.”2 Ang atong mga anak masayod kon unsa ka makahuluganon ang ebanghelyo ni Jesukristo ngari kanato kon kita mobuhat sa atong labing maayo sa pagsunod niini, “diha sa tanan nga mga butang, ug diha sa tanan nga mga dapit” (Mosiah 18:9).
Angay Kini sa Matag Paningkamot
Sa dihang ang among kinamagulangan nga anak nga babaye misugod sa seminary, si Nuria mohatud niya sayo sa buntag. Nagpasabot ni nga ako ang mag-atiman sa ubang mga bata. Mitabang ko nila nga maandam, mamahaw kami, ug dayon ako silang ihatod sa eskwelahan.
Sa kadugayan, naghunahuna ko, “Ang seminary dili maayo! Ang pamilya nabahin. Dili na kami magkadungan sa pagpamahaw.”
Hangtod kadto nga akong nakita ang akong anak nga babaye nga nagtuon sa mga kasulatan nga siya ra usa ka gabii. Nalipay kaayo ako ug mapasalamaton nga ako nahimong usa ka tumutuo sa seminary! Sa kadugayan niana, si Nuria gitawag sa pagtudlo og seminary sa sayo sa buntag. Sa dihang misulod siya sa abogasya, mipuli ko ug mitudlo sulod sa unom ka tuig. Usahay usa kadto ka sakripisyo, apan ako nakabaton og panalangin sa pagtudlo sa tanan namong mga anak diha sa seminary.
Ang kinabuhi mahimong samok usahay, apan ang pagtabang sa atong mga pamilya sa paglakaw diha sa kahayag ug kamatuoran angay lang—ang labing maayo nga paningkamot nga atong mahatag. Sa tanan nga among gibuhat, among ipakita sa among mga pamilya nga ang ebanghelyo labaw pa kaysa mga pulong. Kini mao ang atong pagpakabuhi sa matag adlaw. Dili gayod ninyo mahibaloan sa unsang paagi ang inyong mga paningkamot nga mopanalangin sa inyong pamilya sa katuigan nga moabot.
Dili Kita Kinahanglan nga Mahimong Hingpit
Si Nuria ug ako naningkamot sa among labing maayo sa pagtudlo sa among pamilya, sama sa gitudlo ni Lehi sa iyang mga anak, sa “pagmata” ug “isul-ob ang taming sa pagkamatarong” (2 Nephi 1:23), apan kami sigurado kanunayng dili hingpit niini. Nakahimo kami og mga sayop sa among giagian.
Mapasalamaton ako niining mga pulong gikan ni Elder James R. Rasband sa Seventy: “Sama sa ipamatuod ni bisan kinsa nga ginikanan, ang kasakit tungod sa atong mga sayop dili lang ang kahadlok sa atong kaugalingong silot apan ang kahadlok nga nalimitahan nato ang kalipay sa atong mga anak o sa ubang paagi nakapugong nila sa pagkakita ug pagsabot sa kamatuoran. Ang mahimayaong saad sa maulaong sakripisyo sa Manluluwas mao nga kon bahin sa atong mga sayop isip mga ginikanan, Iyang gipawalay sala ang atong mga anak ug misaad og pagkaayo alang kanila. Ug bisan kon sila nakasala batok sa kahayag—nga kitang tanan makahimo—ang Iyang bukton sa kalooy gipatuyhad, ug Siya motubos kanila kon sila motan-aw lamang Kaniya ug mabuhi.”3
Itudlo Sila ngadto ni Kristo
Kabatan-onan ug mga young adult—dili minyo o minyo—mag-atubang og daghang mga pangutana. Sila mahimong motan-aw sa kasaysayan sa Simbahan o doktrina ug magbaton og mga pangutana o mga pagduha-duha. Ang Simbahan adunay daghang kasaligan nga mga tinubdan aron sa pagtabang kanila nga makaplagan ang mga tubag, lakip sa Dali, Sunod Kanako, mga magasin sa Simbahan, Mga Santos, ug Alang sa Kalig-on sa mga Kabatan-onan: Usa ka Giya alang sa Paghimo og mga Pagpili. Sa kataposan, sila aduna sa mga kasulatan ug sa mga pulong sa modernong mga propeta ug apostoles nga mopausbaw sa ilang hugot nga pagtuo ni Jesukristo.
Kon inyong hunahunaon ang ebanghelyo isip usa ka kahoy, ang mga dahon ug mga sanga mahimong magrepresentar sa mga palisiya o kasaysayan sa Simbahan. Samtang importante, kini wala maghatag og kinabuhi sa kahoy. Ang mga gamot, hinoon, mopakapot sa kahoy ngadto sa yuta, mopatul-id ug mopalig-on, ug mopatuhop og tubig, mga minerales, ug mga pagkaon aron malig-on ug maamumahan ang tibuok kahoy. Ang Langitnong Amahan ug si Jesukristo mao ang ugat sa punoang kahoy sa ebanghelyo. Kon wala Sila, walay mobarog o molambo.
Isip mga ginikanan, mga apohan, o gikasakopan sa pamilya, kita kinahanglan sa kanunay motabang sa uban sa pagpangita sa tinubdan sa tanang kamatuoran. Atoa bang gitudloan ang atong mga pamilya sa pag-atubang sa Langitnong Amahan ug sa Manluluwas ug mopadayon sa paglakaw padulong Kanila?
Wala Nay Labaw ka Makalipay
Ang Apostol nga si Juan namahayag, “Wala nay labaw nga makalipay kanako kay sa balita nga ang mga anak ko nagkinabuhi sumala sa kamatuoran” (3 Juan 1:4). Bisan pa man sa atong labing maayo nga mga paningkamot, hinoon, ang uban nga sakop sa pamilya mahimong mopili sa pagbiya sa ebanghelyo sulod sa panahon. Nakasinati kami niini sa among kaugalingong pamilya. Nakakaplag kami og kahupay niining mensahe gikan ni Elder David A. Bednar sa Korum sa Napulog Duha ka Apostoles:
“Ang mga ginikanan nga nagtamud sa mga pakigsaad sa ebanghelyo, nagtuman sa mga sugo sa Ginoo, ug matinud-anong nagserbisyo makaimpluwensya sa kaluwasan sa ilang mga anak nga nahisalaag. …
“… Ilang maangkon ang mga saad sa balaanong giya ug gahom, pinaagi sa inspirasyon sa Espiritu Santo ug sa mga pribilehiyo sa priesthood, diha sa ilang mga paningkamot sa pagtabang sa mga sakop sa pamilya nga makadawat sa mga panalangin sa kaluwasan ug kahimayaan.”4
Si Nuria ug ako nakakaplag og talagsaong kalipay sa among mga anak ug mga apo. Kami naglaom nga ilang hinumdoman “ang mga pulong nga [ilang] madunggan kanunay nga gipamulong sa [ilang mga ginikanan ug mga apohan] mahitungod sa kinabuhi nga dayon, ug sa hingpit nga kalipay sa mga santos” (Enos 1:3).
Ang pagtabang sa atong mga pamilya sa paglakaw diha sa kahayag ug kamatuoran dili kanunay nga sayon, apan ako mopamatuod nga wala nay molabaw pa kay sa makita sila nga maglakaw diha sa kahayag ug kamatuoran sa ebanghelyo ni Jesukristo.