“Mahimong Higala nga Imong Gikinahanglan,” Alang sa Kalig-on sa mga Kabatan-onan Abr. 2024.
Mahimong Higala nga Imong Gikinahanglan
Ikaw makatabang ug makaluwas og usa ka tawo.
Paghulagway ni Uran Duo
Nakaapil na ba ka og usa ka party, sayaw, o lain nga mga kalihokan ug desperadong nangita sa usa ka tawo nga imong kaila? Ikaw ganahan nga sila mangita nimo ug moluwas nimo gikan sa imong pag-inusara. Sa laing bahin, nakasulod na ba ka og usa ka lawak nga puno sa mga tawo ug nakabantay og laing tawo nga nag-inusarang nagtindog? Wala ba usab sila maghulat og usa ka tawo nga moluwas kanila?
Lihok, Ayaw Paghulat
Matag usa kanato nagkinahanglan og usa ka higala. Kana nagpasabot nga naay uban nga mga tawo nga naghulat kanimo nga mahimo nilang higala.
Si Presidente Henry B. Eyring, Ikaduhang Magtatambag sa Unang Kapangulohan misulti , “Kitang tanan nagkinahanglan og tinuod nga mga higala, nga mohigugma kanato, nga maminaw kanato, nga mogiya kanato sa agianan, ug mopamatuod sa kamatuoran ngari kanato aron atong mapadayon ang pagpakig-uban sa Espiritu Santo.”1 Kon kitang tanan nagkinahanglan og tinuod nga higala, nan kinahanglan nga kita mahimong usa ka tinuod nga higala.
Kon ikaw mahimong maayong higala nga gipangita sa ubang mga tawo, ikaw dili na kinahanglan nga maghulat diha aron sila mangita nimo. Ikaw makatabang sa uban kinsa nagkinahanglan og higala ug moduol aron moluwas una kanila!
Unsa ang Buhaton sa Tinuod nga Higala
Usahay ang mga tawo maghunahuna nga ang pagkahimong usa ka maayong higala nagpasabot nga mosuporta sa mga desisyon sa imong mga higala—bisan unsa pa ka sayop o kakuyaw kadto nga mga desisyon. Apan sa gitudlo ni Presidente Eyring, ang usa ka maayong higala mopakita kanato sa agianan aron magpabilin kanato ang Espiritu Santo.
Ang pagkahimong usa ka maayong higala, unya, nagpasabot nga usahay kinahanglan nga malumo kitang mogiya sa atong mga higala ngadto sa dalan sa pagkadisipulo. Ang ubos nga pagtan-aw sa atong mga higala ug ang pagkamahukmanon dili makatabang. Apan kon tinuod kita nga nagmahal kanila, kita mohigugma kanila sa paagi nga matabangan sila nga makabalik ngadto sa luwas nga dalan sa pakigsaad sama sa gibuhat sa Manluluwas. Dili igsapayan kon unsa kini kadugay.
Kinsa ang nanginahanglan sa imong pagtunol sa kamot sa panaghigalaay aron moluwas kanila karon?