“Pakan-a ang Imong Kalag pinaagi sa Pag-ampo,” Alang sa Kalig-on sa mga Kabatan-onan, Abr. 2024.
Dali, Sunod Kanako
Pakan-a ang Imong Kalag pinaagi sa Pag-ampo
Ang panalangin sa pakighinabi uban sa imong Langitnong Amahan anaa kanimo bisan asa ug sa kanunay.
Ikaw mibati og kagutom kaniadto. Ang pagbati og kagutom mao ang pamaagi sa imong lawas sa pagsulti kanimo nga kini nagkinahanglan og pagkaon. Ug kon ikaw gigutom, ikaw nasayod unsa ang kinahanglan nga buhaton—mokaon!
Ang imong espiritu usab adunay mga pamaagi sa pagpahibalo kanimo kon ikaw nagkinahanglan og espirituhanong pag-amuma. Ingon nga adunay daghang matang sa pagkaon nga imong makaon kon ikaw gigutom, adunay daghang butang nga imong mabuhat aron mabusog ang espirituhanong kagutom. Ikaw mahimong “[m]agbusog sa mga pulong ni Kristo” diha sa mga kasulatan ug sa mga pulong sa propeta (2 Nephi 32:3). Ikaw regular nga makatambong sa Simbahan ug makaambit sa sakramento (tan-awa sa Doktrina ug mga Pakigsaad 59:9). Ikaw makaserbisyo sa Dios ug sa Iyang mga anak.
Apan adunay usa ka tinubdan sa espirituhanong pag-amuma nga anaa kanimo sa tanang higayon, sa matag panahon sa imong kinabuhi, bisan unsa pa man ang imong mga sirkumstansiya. Ikaw sa kanunay makahinabi uban sa Langitnong Amahan pinaagi sa pag-ampo.
“Ang Akong Kalag Gigutom.”
Samtang si Enos nangayam og mga hayop sa kalasangan, siya naghunahuna kabahin sa unsay gitudlo sa iyang amahan “mahitungod sa kinabuhing dayon, ug ang hingpit nga kalipay sa mga santos.” Kini nga mga panudloan “mituhop gayod pag-ayo sa [iyang] kasingkasing” (Enos 1:3).
Niini nga espirituhanong kahimtang sa hunahuna, si Enos mibati og hilabihan nga panginahanglan: “Ang akong kalag gigutom,” siya miingon (Enos 1:4).
Unsa ang gibuhat ni Enos sa dihang siya mibati niini nga espirituhanong kagutom? “Ako miluhod sa atubangan sa akong Magbubuhat,” siya miingon, “ug ako nangamuyo ngadto kaniya sa hilabihan nga pag-ampo ug nangaliya alang sa akong kaugalingon nga kalag” (Enos 1:4).
Hilabihan ang espirituhanong kagutom ni Enos nga siya nag-ampo sa tibuok adlaw ug gabii. Sa kataposan, ang Dios mitubag sa iyang pag-ampo ug mipasaylo sa iyang mga sala. Si Enos mibati nga nawagtang ang iyang sala ug nakat-on kabahin sa gahom sa hugot nga pagtuo diha ni Jesukristo. Siya dayon mibubo sa iyang tibuok nga kalag alang sa iyang katawhan ug sa iyang mga kaaway. Siya mihimo og mga pakigsaad ug nakadawat og mga saad gikan sa Ginoo ug miadto sa iyang mga katawhan ug mipakigbahin unsa ang iyang nadungog ug nakita (tan-awa sa Enos 1:4–19).
Dili tanang pag-ampo dunggon sa ingon niana ka makasaysayanon nga paagi, apan ang imong kasinatian uban sa pag-ampo mahimo gihapon nga makahuloganon ug makapausab sa kinabuhi. Ania ang pipila ka importante nga mga leksiyon nga imong makat-onan gikan sa gamhanang pag-ampo ni Enos:
-
Ang pagpaningkamot nga hingpit nga mosunod sa ebanghelyo makatabang nimo nga mailhan ang imong espirituhanong kagutom.
-
Ang imong espirituhanong kagutom mahimo ug kinahanglan nga makapaluhod sa imong mga tuhod sa pagtinguha sa tabang sa Langitnong Amahan.
-
Ang pag-ampo ngadto sa Langitnong Amahan makatabang nga matagbaw ang imong espirituhanong kagutom—ug dayon ang pipila!
-
Ikaw mahimong mag-ampo bisan asa, bisan unsang orasa.
-
Ang pag-ampo makatabang kanimo sa paghinulsol.
-
Ang pag-ampo makapalig-on sa imong hugot nga pagtuo diha ni Jesukristo.
-
Ikaw makadawat og personal nga pagpamatuod nga ang imong Langitnong Amahan naminaw kanimo ug nakaila kanimo.
-
Ang pagpamatuod ug kalig-on nga imong nadawat pinaagi sa pag-ampo makatabang kanimo sa pagserbisyo ug paglig-on sa uban.
Ang Akong Kasinatian uban ang Gahom sa Pag-ampo
Sa dihang ako hapit na mag 16 ang panuigon, ang akong nadasig nga bishop mihangyo kanako nga motudlo sa among Sunday School nga klase sa kabatan-onan kabahin sa pag-angkon og pagpamatuod sa ebanghelyo pinaagi sa pag-ampo. Samtang ako nagdako, nakagahin ko og oras sa pagtuon sa Basahon ni Mormon ug sa kanunay mibati nga ang Simbahan tinuod. Ako sa kanunay nagtuo sa Manluluwas nga si Jesukristo, apan wala nako gibutang sa akong kasingkasing ang saad ni Moroni nga makita diha sa Moroni 10:4–5, ug nag-ampo kabahin sa kamatuoran sa ebanghelyo. Ako nakahinumdom sa pagbati nga kon ako motudlo kabahin sa pag-angkon og pagpamatuod pinaagi sa pag-ampo, ako mismo kinahanglan nga mag-ampo alang sa usa ka pagpmatuod. Ang akong kalag gigutom—tingali lahi nga paagi kay sa kang Enos, apan gibati gihapon nako ang espirituhanong panginahanglan.
Samtang ako nag-andam sa leksiyon, ako nag-ampo ug nagluhod uban sa bug-os kong kasingkasing. Sa dihang ako nangutana sa Ginoo kon ang ebanghelyo tinuod ba, dihay miabot sa akong kasingkasing nga usa ka labing tam-is nga pagbati—kanang ligdong, nga hinagawhaw nga tingog nagpamatuod ngari kanako nga kadto tinuod ug nga ako kinahanglan nga mopadayon sa pagbuhat kon unsay akong gibuhat.
Ang pagbati kusog kaayo nga dili gayod ako makabaliwala niana nga tubag ug moingon nga wala ko kabalo. Mibati ko nga malipayon kaayo! Sa pagkasunod Dominggo, ako mibarog atubangan sa akong mga klasmeyt ug mipamatuod nga ang Langitnong Amahan motubag sa ilang mga pag-ampo kon sila adunay hugot nga pagtuo.
Si Elder Soares isip usa ka batan-on
Kini nga pagpamatuod nagpabilin uban kanako. Kini nakatabang kanako sa paghimo og mga desisyon, ilabi na sa mahagitong mga panahon. Kini nagtugot kanako sa pagpamatuod ngadto sa mga tawo, uban sa kombiksiyon, nga sila makadawat sa mga tubag gikan sa Langitnong Amahan kon sila mag-ampo sa hugot nga pagtuo. Kini tinuod alang kanako isip usa ka magtutudlo nianang Sunday School nga klase sa kabatan-onan, isip usa ka misyonaryo, ug bisan karon isip usa ka Apostol.
Ang Kanus-a ug Unsa sa Pag-ampo
Siyempre, ikaw dili lamang mag-ampo kon ikaw mobati og hilabihan nga pihong espirituhanong panginahanglan. Mao nga, kanus-a ka kinahanglang mag-ampo? Ug unsa man ang kinahanglan nimong i-ampo? Ang mubong tubag mao: bisan unsang orasa ug bisan unsa.
Ang imong Langitnong Amahan kanunay nga andam maminaw kanimo ug ganahan nga ikaw mag-ampo ngadto Kaniya sa regular ug sa kanunay. Ikaw kinahanglan nga “magpakitambag uban sa Ginoo sa tanan [nimo] nga buhaton” (Alma 37:37) ug mag-ampo sa buntag, sa udto, ug sa gabii. Ikaw kinahanglan nga mag-ampo sa balay, sa trabahoan, sa eskwelahan—bisan asa ka ug sa tanan nimo nga mga paningkamot (tan-awa sa Alma 34:17–26). Ikaw kinahanglan nga mag-ampo uban sa imong pamilya (tan-awa sa 3 Nephi 18:21), “diha sa kadaghanan ug diha sa kinaugalingon” (Doktrina ug mga Pakigsaad 81:3), diha sa imong kasingkasing kon ikaw dili pormal nga mag-ampo (tan-awa sa Alma 34:27), ug sa kanunay ngadto sa Amahan sa ngalan ni Jesukristo (tan-awa sa 3 Nephi 18:19–20).
Pagduol sa Imong Langitnong Amahan
Usa sa akong paborito nga mga kasulatan nagtudlo unsaon nato pagduol sa atong Langitnong Amahan kon mag-ampo kita: “Magpaubos ka; ug ang Ginoo nga imong Dios moagak kanimo pinaagi sa kamot, ug mohatag kanimo og tubag sa imong mga pag-ampo” (Doktrina ug mga Pakigsaad 112:10). Kon ikaw magpaubos ug magmasulondon, ang Langitnonag Amahan magauban kanimo. Siya mogiya ug motabang kanato. Siya gayod motubag sa imong mga pag-ampo sumala sa Iyang kabubut-on, pamaagi, panahon, ug hingpit nga kasayoran unsa ang maayo alang kanimo.
Ang imong regular ug kanunay nga mga pag-ampo gikinahanglan ngadto sa espirituhanong pag-amuma sa imong kalag. Ang komunikasyon uban sa Langitnong Amahan pinaagi sa pag-ampo anaa ug mahimo bisan asa ug kanunay. Ako nag-ampo nga kamo makahinumdom niini ug mahalon ang mga oportunidad nga moduol sa trono sa Dios ug modawat sa mga panalangin gikan Kaniya.