“Pagtuo diha ni Kristo sa dili pa Siya Moanhi Pag-usab,” Alang sa Kalig-on sa mga Kabatan-onan, Abr. 2024.
Dali, Sunod Kanako
Pagtuo diha ni Kristo sa dili pa Siya moanhi Pag-usab
Ang mga Nephite adunay hugot nga pagtuo sa wala pa moanhi ang Manluluwas, ug kita mahimong makabaton og hugot nga pagtuo sa dili pa Siya moanhi pag-usab.
Nakahunahuna ba kamo kon sama sa unsa kaha nga motuo sa Manluluwas sa wala pa Siya moanhi sa yuta? Ang karaang mga Nephite kinahanglang mobuhat lang niana—“[m]agpaabot ngadto sa Miseyas, ug motuo diha kaniya nga moanhi ingon og siya mianhi na”.(Jarom 1:11).
Karong panahona, kita adunay mga rekord sa kasulatan ug kasaysayan nga nagpamatuod nga si Jesukristo nabuhi, namatay ug nabuhi pag-usab. Kita nagtuo sa usa ka Manluluwas kinsa mianhi na. Apan kita nagtuo usab sa usa ka Manluluwas kinsa moanhi pag-usab.
Sa Wala pa si Jesukristo Moanhi, ang mga Nephite Adunay Hugot nga Pagtuo Nga:
Mapasaylo sa ilang mga sala.
“Si kinsa ang motuo nga si Kristo nga moanhi, ang mao mahimo nga makadawat sa kapasayloan sa ilang mga sala, ug magmaya sa tuman nga kalipay, bisan ingon nga Siya nakaanhi na taliwala kanila.” (Mosiah 3:13).
Mopasaylo sa ilang kaugalingon.
“Ug dihay miabot nga usa ka tingog ngari kanako, nag-ingon: Enos, ang imong mga sala gipasaylo na. … Busa, ang akong kasaypanan nakuha sa hingpit. Ug ako miingon: Ginoo, giunsa kini pagbuhat? Ug siya miingon ngari kanako: Tungod sa imong hugot nga pagtuo ni Kristo, si kinsa ikaw wala pa gayod sukad makadungog ni makakita. Ug daghan nga mga katuigan ang molabay unà siya mopakita sa iyang kaugalingon diha sa lawas; … ang imong hugot nga pagtuo nakahimo kanimo nga hinlo.”(Enos 1:5–8).
Mobuhat og mga milagro.
“Kami nasayod kang Kristo, ug kami adunay usa ka paglaom sa iyang himaya sa daghan nga gatosan ka mga tuig sa wala pa siya moanhi. … Hangtod nga kami sa pagkatinuod makasugo diha pinaagi sa ngalan ni Jesus ug ang mao nga mga kahoy motuman kanamo, o ang mga bukid, o ang mga balod sa dagat ” (Jacob 4:4, 6).
Modawat og pagpadayag.
“Dihay daghan kansang hugot nga pagtuo hilabihan kalig-on bisan sa wala pa moabot si Jesukristo, kinsa dili mapugngan gikan sa sulod sa tabil, apan sa pagkatinuod nakakita uban sa ilang mga mata” (Ether 12:19).
Sa Dili pa si Jesukristo Moanhi Pag-usab Kita Mahimong Makabaton og Hugot nga Pagtuo Nga:
Mapasaylo, mopasalyo sa atong kaugalingon, mobuhat og mga milagro, og modawat og pagpadayag (sama sa mga Nephite).
Moandam sa atong kaugalingon alang sa Iyang pag-anhi.
Samtang kita maningkamot sa pagtuman sa atong mga pakigsaad, kita nag-andam nga mopuyo diha sa celestial nga gingharian. “Kay tan-awa, kini nga kinabuhi mao ang panahon alang sa mga tawo sa pagpangandam sa pagsugat sa Dios; oo, tan-awa ang adlaw niini nga kinabuhi mao ang adlaw alang sa mga tawo sa paghimo sa ilang mga buluhaton” (Alma 34:32).
Moandam sa kalibotan alang sa Iyang pag-abot.
Kita gidapit ni Presidente Russel M. Nelson nga mahimong kabahin sa “labing dako nga buhat sa kalibotan”—ang pagpundok sa Israel. “Gireserba sa atong Langitnong Amahan ang daghan sa Iyang labing halangdong mga espiritu—tingali moingon ko nga ang labing nindot Niya nga team—alang niining kataposang hugna. Kadtong halangdon nga mga espiritu—kadtong labing maayo nga mga magdudula, kadtong mga bayani—mao kamo!”1
Magbaton og paglaom panahon sa kalisod.
Kon ang Manluluwas moanhi pag-usab, ang mga matarong magpuyo sa kalinaw. Ang Manluluwas ang maghari, ug ang pagkadili patas mahimong patas. “Kay ang Ginoo anaa sa ilang taliwala, ug ang iyang himaya anaa diha kanila, ug siya ang ilang hari ug ilang magbabalaod’ (Doktrina ug mga Pakigsaad 45:59).
Mosalig diha sa Pagkabanhaw.
Tanan nga katawhan mabanhaw. Kita makaangkon og perpekto, dili mamatay nga mga lawas. Kita mahimong magkita pag-usab sa atong mga minahal nga nangamatay na. “Ang espiritu ug ang lawas pagahiusahon pag-usab diha sa iyang hingpit nga kahimtang; ang mga bahin sa lawas ug ang lutahan mapahiuli sa iyang tukma nga bayanan, gani sama kanato karon niini nga panahon” (Alma 11:43).
Ang karaang mga Nephite adunay hugot nga pagtuo sa Manluluwas sa wala pa Siya moanhi. Kita mahimong makabaton og hugot nga pagtuo nga ang Manluluwas moanhi pag-usab—kon “[kita] makakita [Kaniya] diha sa mga panganod sa langit, gisul-oban sa gahom ug dako nga himaya” (Doktrina ug mga Pakigsaad 45:44; tan-awa usab sa Mga Buhat 1:11). Sa unsang paagi nga ang pagkahibalo nga Siya moanhi pag-usab makapausab sa unsay imong buhaton karon?