“Dili Kinahanglan nga Mahimong Bakikaw,” Alang sa Kalig-on sa mga Kabatan-onan, Abr. 2024.
Dili Kinahanglan nga Mahimong Bakikaw
Si Hannah dili miyembro sa Simbahan. Si Natalie miyembro. Ug nagtinabangay sila sa usag usa nga maduol ni Jesukristo.
Paghulagway pinaagi ni Gabriele Cracolici
Ang Istorya ni Hannah
Akong nahimamat si Natalie sa unang adlaw sa ikaunom nga grado. Akong nabantayan nga dili siya mosuroy sa Dominggo ug siya magdala sa iyang mga kasulatan diha sa eskwelahan. Usa ka adlaw didto ako sa karnabal kauban ni Natalie, ug ako miingon, “ganahan ko nga mopasakop sa imong Simbahan.” Dili ko segurado kon unsay gihunahuna ni Natalie nianang higayona, tungod kay kalit lang kini nakong gisulti. Apan gikan niadto siya nagsugod na sa pagpakigbahin pa sa iyang tinuohan ngari kanako.
Sa ulahi nianang tuiga, ako miuban ni Natalie ngadto sa usa ka komperensiya sa kabatan-onan. Usa sa kataposan nga mga kalihokan diha sa komperensiya sa kabatan-onan mao ang miting sa pagpamatuod. Si Natalie mipakigbahin og usa ka espesyal nga pagpamatuod nga nakapadasig kanako nga magkat-on pa og dugang.
Samtang ako nagtuon sa ebanghelyo, ako nag-ampo ngadto sa Langitnong Amahan nga makaangkon og usa ka pagpamatuod. Sa wala madugay, ako nasayod nga ang akong nakat-onan tinuod. Niana nga ting-init, ako nahimong miyembro sa Ang Simbahan ni Jesukristo sa mga Santos sa Ulahing mga Adlaw.
Wala madugay, usa ka higala nangutana kanako unsa ang bunyag. Ako mipakigbahin kaniya sa mga butang nga akong giganahan sa ebanghelyo ni Jesukristo ug ang kalipay nga akong nakaplagan diha sa Manluluwas. Ang akong higala ganahan og soccer, mao nga ako nakigtambayayong sa kapangulohan sa akong klase nga magplano og usa ka kalihokan sa soccer aron sa pagdapit kaniya. Ug si Natalie ug ako nagtuon sa Basahon ni Mormon uban niya pinaagi sa FaceTime.
Sa una, ang pagtabang sa akong higala morag usa ka dako nga responsibilidad—pagsulti sa eksaktong mga butang aron siya makasabot o modapit kaniya sa tukmang mga kalihokan. Apan ako nakaamgo nga dili kini kabahin sa pagkabig kondili sa paghigugma. Kon ikaw adunay maayo nga mga katuyoan ug matarong nga mga tinguha, nan ang imong tanang gihimo sa pag-apil sa buhat sa Langitnong Amahan makonsiderar nga kalamposan. Samtang ikaw maningkamot nga higugmaon ang imong mga higala sa pamaagi sa Manluluwas, ikaw nagdapit kanila nga moduol Kaniya.
Ang Istorya ni Natalie
Sa dihang mibalhin ako sa bag-o nga eskwelahan sa ikaunom nga grado, usa ka batang babaye nga ginganlan og Hannah nagkaon sa paniudto uban nako ug mipailaila nako sa bag-o nga mga higala. Apan wala ako makaamgo nga, sa samang higayon, ako nagtabang sa pagpaila niya ngadto sa mga baroganan sa ebanghelyo.
Usa niana ka adlaw si Hannah ug ako nag-uban didto sa karnabal. Sa wala damha, miingon siya nako nga mopasakop siya sa Simbahan. Ang pagsulti nga ako nasurprisa dili importante. Ang akong unang hunahuna mao nga , “ako dili segurado kon siya nasayod ba kon unsa kini kadako nga pasalig.”
Ako dili segurado kon unsay buhaton, apan ang akong mga ginikanan nagsulti, “Siya interesado sa ebanghelyo. Ikaw kinahanglan nga modapit kaniya sa kamping sa ward.” Ako naghunahuna nga tingali makapaluya kini ni Hannah nga mogahin sa iyang tibuok semana uban namo ug mahimamat ang daghang bag-ong mga tawo. Apan ako misunod sa ilang tambag ug midapit niya sa kamping ug ngadto sa komperensiya sa kabatan-onan.
Atol sa miting sa pagpamatuod diha sa komperensiya sa kabatan-onan, akong gibati nga kinahanglan nga madungog ni Hannah ang akong pagpamatuod, bisan pa man kon ang pagpamulong sa publiko usa sa akong labing gikahadlokan. Si Hannah nasayod nga ako nahadlok, ug siya nakadayeg sa kamatuoran nga ako andam nga mopakigbahin tungod kay ako nagtuo sa ebanghelyo.
Ako usa ka tawo nga sobra maghunahuna, mao nga sa higayon nga ako mokonsiderar sa pagdapit ni Hannah alang sa mga butang, ako maghunahuna, “Basin maghunahuna siya nga ako nagpugos niya sa pagpasakop sa Simbahan.” Apan nasayod ko nga dili kini makataronganon nga kahadlok. Ang mga tawo ganahan nga dapiton ngadto sa mga butang. Sa paglabay sa panahon, ako mas komportable sa pagpakigbahin sa unsay akong gibati. Akong nakat-onan nga ang pagpakigbahin sa ebanghelyo may kalabotan sa gugma.
Adunay hilabihang hingpit nga kalipay diha sa pagpakigbahin sa mga butang nga imong gihigugma ug gimahal pag-ayo. Ang panaw ni Hannah wala lang makapausab sa iyang kinabuhi, kini usab nakapausab sa akong kinabuhi ug nakapalig-on sa akong pagpamatuod. Akong nakita ang kalainan nga gihimo sa Manluluwas alang ni Hannah, ug nakatabang kini kanako sa pag-ila sa kalainan nga Iyang gihimo alang kanako.
Ang mga tagsulat gikan sa Hawaii, USA.