“Pagpakigbahin sa Kahayag sa Manluluwas: Mga Panghitabo Luyo sa mga Eksena,” Alang sa Kalig-on sa mga Kabtan-onan, Abr. 2024.
Pagpakigbahin sa Kahayag sa Manluluwas: Mga Panghitabo Luyo sa mga Eksena
Paminawa ang mga sugilanon sa pagkadisipulo luyo sa music video sa 2024 nga Tema sa Kabatan-onan!
Ang tema karong tuiga sa music video sa kabatan-onan tanan mahitungod sa pagkahimong usa ka disipulo ni Kristo (tan-awa sa 3 Nephi 5:13). Ug ang kabatan-onan nga miapil wala lang didto aron sa pag-akting; nagkat-on sila unsay ipasabot sa pagkahimong usa ka disipulo usab. Ania kon giunsa sa pipila kanila sa pagkakita ug pagpakigbahin sa kahayag sa Manluluwas matag adlaw.
Jordan, edad 18, Germany
Kini nga bidyo usa ka talagsaong oportunidad sa pagpakigbahin sa ebanghelyo pinaagi sa musika. Ganahan kaayo ko og musika, ug migahin ko og duha ka semana sa pagpraktis sa kanta nga “Ako Tinun-an ni Kristo” sa gitara. Gitukar ko kini, ug dili ko makahunong.
Manghinaot ko nga ang mga tawo nga magtan-aw sa bidyo makapamalandong sa sinserong paagi ug maningkamot nga mahimong tinuod nga mga disipulo ni Kristo. Seguradong dili gayod kadto sayon, apan mamahimo kamong disipulo ni Kristo diha sa mga butang nga inyong gihimo, sa inyong mga buhat. Mao kana ang akong nakuha gikan niini nga kasinatian—nga ako kinahanglan nga mas mahimong Kristohanon ug mosunod Kaniya.
Duna koy lig-ong pagpamatuod nga si Jesukristo mao ang atong Manluluwas ug nga Siya miula sa atong mga sala. Mapasalamaton kaayo ko sa Iyang Pag-ula. Gihatagan ko niya og higayon nga makahinulsol, mapasaylo, ug sa kataposan makabalik ngadto Kaniya ug sa Langitnong Amahan. Kini ang labing mahinungdanon nga gasa nga gihatag kanato sa Dios.
Ark, edad 16, Finland
Kon ang mga tawo motan-aw niini nga bidyo, manghinaot ko nga mahinumdoman nila ang gugma ni Jesukristo ug kon unsa Siya ka maluluy-on. Ang pagkahimong disipulo ni Kristo importante, ilabi na alang sa kabatan-onan nga sama nato, kay kini makahatag nato og tinguha nga moserbisyo og misyon. Ang pagserbisyo og misyon usa ka talagsaong oportunidad sa pagpakigbahin sa kahayag sa Manluluwas nga anaa kanato ngadto sa ubang katawhan. Mapalig-on nato ang atong kaugalingon ug makakat-on diha niana nga paagi.
Carolina, edad 15, Sweden
Dihang nagsugod kami sa paghimo og salida, nakaingon ko nga, “Unsa man gyod kaha ang akong buhaton? Dili ko kahibalong mo-akting.” Apan makalingaw kaayo kadto nga kasinatian. Gibati gyod nako ang gugma sa Dios atol sa paghimo og salida. Diha sa bidyo, gidala nako ang papel sa usa ka batang babaye kinsa dunay lisod nga panahon apan nakakuha og tabang gikan sa bag-ong higala.
Ako usab dunay lisod nga mga panahon sa tinuod nga kinabuhi. Niadtong 2021, nalaslas ang akong ACL [ugat] tungod sa gymnastics. Hilabihan ang akong kasagmuyo ug wala ko kahibalo unsay akong buhaton.
Nahinumdom ko nga naglingkod didto sa simbahan sa wala pa ko operahi. Dunay tawo nga namulong, apan wala ko maminaw hangtod nga misulti sila og usa ka bersikulo: “Mahimo ko ang tanang butang pinaagi ni Kristo nga nagapalig-on kanako” (Mga Taga-Filipos 4:13). Kadto nga panahon nakatabang nako kay nasayod ko nga nagkinahanglan ko nga mag-ampo ug magpaduol sa Langitnong Amahan ug ni Jesukristo aron madawat nako ang Ilang kalig-on.
Ang Dios sa kanunay magauban kaninyo bisan sa malisod nga mga panahon. Usahay lang kinahanglan kamo nga motunol sa inyong kamot, ug Siya mokab-ot niini. Pangitaa lamang Siya.
Meleah, edad 16, Sweden
Diha sa bidyo, nakakita ko og usa ka batang babaye nga nag-inusarang naglingkod sa bangkô nga mibati og kasubo ug pag-inusara, ug misulay ko sa pagdasig kaniya. Dunay daghang higayon, labi na atol sa inyong katuigan sa pagkabatan-on, diin mobati kamo nga nag-inusara ug mobati nga walay bisan usa nga nakasabot kaninyo.
Apan ang Dios nakasabot. Siya makatabang kaninyo nga makasagobang niana nga mga panahon ug mopadala og mga tawo nga motabang ninyo nga makasugakod niini. Siya mipanalangin kanako og akong pamilya ug akong mga higala. Kinahanglan lang nga mosalig kamo sa buotang mga tawo nga naglibot kaninyo ug mosalig sa Dios, kay momaayo ra kini.
Naghunahuna ko nga ang importanteng mensahe niini nga bidyo mao nga kita kinahanglang magmaisogon ug maanaa alang sa usag usa kon magsagubang kita og malisod nga mga panahon. Aron mahimong disipulo ni Jesukristo, gusto kong motabang sa mga tawo nga naa sa akong palibot ug mopakigbahin sa kahayag nga ania sa sulod kanako ngadto kanila.
Patricia, edad 11, Sweden
Maanindot ang pagbati nga mahimong kabahin sa butang nga mas labaw kay kanako pinaagi sa paghimo niini nga bidyo. Ang pagkahimong usa ka disipulo ni Jesukristo dako kaayo nga butang nga mahitabo. Nagserbisyo kamo sa Dios, ug mao lamang kana ang akong gusto. Mao kana ang kinamaayohang butang nga akong nahibaloan.
Aatos, edad 18, Finland
Kaanindot nga makita ang tanang panghitabo luyo sa mga eksena sa paghimo niini nga bidyo, sama sa,“Aw, ingon anaon diay nimo pagpalihok ang camera.” Kon hisgotan ang pagkahimong disipulo ni Jesukristo, si Presidente Russell M. Nelson mitudlo kanato nga kita kinahanglan nga maoy tigpasiugda og kalinaw ug moseguro nga ang atong mga buhat susama sa kang Kristo.1 Kon makakita kamo og mga tawo nga dili maayo ang pagbati, adtoa og tabangi sila. Kabahin kana sa pagkahimong disipulo ni Jesukristo.