“Mga Tambal sa mga Butang nga Makadaot sa Relasyon,” Alang sa Kalig-on sa mga Kabatan-onan, Abr. 2024.
Mga Tambal sa mga Butang nga Makadaot sa Relasyon
Ania ang unsay gamiton sa pag-alkontra sa mga butang nga makadaot sa atong mga relasyon.
Ang tambal mao ang usa ka medisina nga moalkontra sa makadaot nga butang o toxin. Sa paghulagway, ang usa ka tambal mao ang butang nga “moayo” sa ngil-ad nga pagbati o sitwasyon. Sama pananglit, si Presidente Russell M. Nelson miingon, “Ang gugma nga putli mao ang tambal sa panagbingkil.”1
Dili tanang pisikal nga mga makahilo dunay tambal. Apan pinaagi sa Manluluwas, makakaplag kita og pagkaayo sa atong personal nga mga makahilo—lakip na sa atong mga relasyon sa uban.
Ayaw Itugot nga Ikaw Makahimo og Butang nga Makadaot!
Walay tawo nga hingpit. Tanan kita dunay atong mga panahon (o mga oras, o mga adlaw … ) diin kita dili ingon ka Kristohanon sama sa atong nahibaloan nga kita kinahanglan gayod unta. Nagkinahanglan kita nga makahibalo sa mga sitwasyon sa uban ug moseguro nga wala nato hiloi ang mga tawo sa atong palibot.
Aniay pipila ka tambal sa pipila ka komon nga mga butang nga makadaot:
Butang nga makadaot: Pagkamasinahon
Nganong ang ubang tawo ingon og mas malipayon/mas daghan og kabtangan/nakadawat og mas daghang panalangin kay kanako?
Mga paghulagway pinaagi ni Corey Egbert
Usa ka tambal: Kamapasalamaton.
Pagmapasalamaton sa unsay anaa nga gihatag sa Ginoo kaninyo. Sulayi sa pagsunod ang tambag gikan sa paborito nga karaang himno nga: ipha ang inyong mga panalangin sa literal nga paagi! Hinganli sa tinagsa-tagsa. Matingala kamo kon unsa ka dako ang nahimo sa Ginoo alang kaninyo.2
Butang nga Makadaot: Kasuko.
Sa tinuyo man nga paagi o dili, dunay tawo nga nakapalagot nako.
Usa ka tambal: Kapasayloan.
Ang pagpasaylo sa usag usa sa tinuod usa ka sugo (tan-awa sa Doktrina ug mga Pakigsaad 64:10). Ang bonus mao nga kon mopasaylo kita, ang Dios mopasaylo kanato (tan-awa sa Doktrina ug mga Pakigsaad 82:1). Dugang pa, sa kasagaran mas mominos ang atong kasuko human nga napasaylo nato ang uban.
Butang nga makadaot: Garbo.
“Dili ko gustong modawat nga ako sayop. Dili ko gustong mohimo sa usa ka buluhaton tungod kay nagtuo ko nga ubos ra kaayo kini alang nako. Dili ko gustong makig-uban niana nga mga bata kay dili sila apil sa akong sosyal nga grupo.
Usa ka tambal: Kamapainubsanon.
Una sa tanan: hunahunaa nga walay tawo nga mas labaw kanimo. Mga anak kita sa Dios, ug Siya nahigugma kanato—apan sa samang higayon, kita masalaypon nga mga mortal kinsa dili “labaw pa ingon sa abog sa yuta” (Mosiah 2:25). Ang Ginoo naghatag kanato—tanan kanato—og kahuyang aron kita magmapainubsanon (tan-awa sa Ether 12:27). Ug sa kanunay mas maayo nga mopili sa pagpaubos sa inyong kaugalingon kay sa maghulat hangtod nga ang Dios mopugos kaninyo sa pagpaubos (tan-awa sa Alma 32:15–16).
Unsa Kaha kon Dunay Tawo nga Mohimo og Butang nga Makadaot?
Ang gugma nga putli mao ang tambal sa daghan nga butang, dili lamang sa panagbingkil. “Ang gugma nga putli mainantoson, ug mabination, ug dili masinahon, dili manghambog, dili mangita alang sa iyang kaugalingon, dili dali nga masuko, dili maghunahuna sa daotan” (Moroni 7:45). Kinahanglan mag-ampo kita alang sa gugmang putli (tan-awa sa Moroni 7:48) aron matabangan kita nga makapasaylo sa kahuyang sa ubang mga tawo—sama nga kita naglaom nga sila mag-ampo alang sa gugmang putli aron may ikadugang sila ngari kanato. Kinahanglan nga kita usab dili mahadlok nga mobutang og mga limitasyon. Ang pagpasaylo wala magpasabot nga magpabilin diha sa makadaot nga relasyon o sa makapasakit nga sitwasyon.3