Mga Tingog sa Kabatan-onan

Lahi nga Matang sa Pagkaayo

pamilya

Wala ngadto sa tuo: Caeli (igsoong babaye), Cameron (papa), Crystal (mama), Cara, Cohen (igsoong lalaki)

Ang akong mama masakiton sukad niadtong kwatro pa ako. Sa una, walay nasayod og unsa kini, apan kami adunay pamilya ug mga higala nga nag-ampo ug nagpuasa alang sa among pamilya nga masuta kon unsa kini. Human sa daghang katuigan sa operasyon ug mga pagpalaboratoryo, among nasuta nga siya adunay Chiari malformation, kanser sa dugo, ug pipila pa ka sakit nga walay kaayohan.

Nagtan-aw sa akong mama nga masakiton kaayo, ako nagsugod sa pagkalagot sa Dios. Nasayod ko nga Siya adunay gahom sa pag-ayo kaniya, mao nga ako wala makasabot ngano nga wala Niya ayoha. Naghunahuna ko nga ang tanang pag-ampo, pagpangayo og hinabang, ug pagpuasa walay pulos.

Apan samtang ako nagtan-aw sa Oktubre 2021 nga kinatibuk-ang komperensiya uban sa akong pamilya, akong nadungog si Elder Brent H. Nielson sa Seventy nga nag-ingon, “Ang makaayo nga gahom sa Manluluwas dili lang ang Iyang ablilidad sa pag-ayo sa atong mga lawas, apan tingali mas importante, ang Iyang abilidad sa pag-ayo sa atong mga pagbati.” Sa dihang ang nabanhaw nga Manluluwas nagdapit sa mga tawo diha sa Basahon ni Mormon aron ayohon, Siya “wala maghisgot og usa ka pisikal nga pag-ayo apan hinuon sa usa ka espirituwal nga pag-ayo sa ilang mga kalag” (Liahona, Nob. 2021, 57).

Kini nga mga pulong nakatabang kanako nga makaamgo nga ang Dios wala nagbaliwala kanako. Ako wala lang makakita kon giunsa Niya pag-ayo ang akong mama sa mas importante nga paagi kay sa pagwagtang sa iyang mga sakit.

Ang akong mama wala pa gihapon maayo, apan ang Langitnong Amahan anaa alang kaniya sa iyang mahagitong mga kahimtang. Siya mitabang kaniya sa dihang siya sa tinuod mibati sa iyang labing lisod nga iyang nasinati sukad sa iyang kinabuhi. Karon kon ako maghunahuna niini nga kasinatian, ako nasayod nga ang Langitnong Amahan ug si Jesukristo nasayod sa hingpit unsa ang akong gibati ug nasinati.

Cara C., 13, Rhode Island, USA

Ganahan nga magsuroysuroy uban sa mga higala ug magdapit kanila aron magdula og mga game.