E Mafai Faapefea Ona Ou Lagonaina le Alofa o le Atua pe a Ou Tauivi ma le Atuatuvale?
Ou te tauivi ma le atuatuvale tuga, ae o le iloaina o le alofa o le Tama Faalelagi ma Iesu Keriso ia te a’u e aumaia ai ia te a’u le olioli ma le faamoemoe.
A o o’u tuputupu a’e, sa ou iloaina ai ou te aafia i le tosina atu i le itupa e tasi, lea na taitai atu ai i le tele o mafaufauga le lelei e uiga ia te a’u lava ia. O lenei aafiaga ma le tele o luitau i lo’u olaga na faatosinaina ai la’u tauiviga i le taimi nei ma le atuatuvale tuga.
Ou te alofa i lo’u Faaola ma sa i ai [ia te a’u] i taimi uma se molimau malosi o le talalelei a Iesu Keriso, ma ou te iloa e mafai ona maua le filemu, olioli, ma le malologa e ala i le ola ai i le talalelei. Ae ona o lo’u tauivi ma le soifua maloloina faalemafaufau, e mafai ona faigata ia te a’u ona lagonaina lena filemu folafolaina ma le olioli i tulaga uma lava.
Ou te tuuto atu ia Iesu Keriso ma a’u feagaiga, ae o le vaai atu i lo’u olaga e ala i tioata o le atuatuvale e mafai ona foliga mai ai ua leai se faamoemoe o mea uma, ma e masani ona ou mafaufau ia te a’u lava:
“E mafai faapefea ona ou lagonaina le olioli i le ola ai i le talalelei ma vaai ia te a’u lava e pei ona silafia ai a’u e le Tama Faalelagi ma le Faaola?”
Sa ou filifili e vaai i le faataitaiga a le Faaola mo tali ma le faamalologa.
Ia Faamuamua le Alii
A o o’u suesue e saili tali, sa ou mafaufau i taimi i lo’u olaga na ou lagonaina ai le pogisa o le atuatuvale. Sa ou iloaina o le manatuaina ma le ola e pei o le Faaola o le saogalemu lea ou te pipii atu i ai pe a sili ona ou tauivi.
Na aoao mai Elder Quentin L. Cook o le Korama a Aposetolo e Toasefululua: “E manino lava o loo i ai so tatou Tama oi le Lagi o lē e silafia ma alofa patino ia i tatou ma malamalama atoatoa i o tatou mafatiaga. O Lona Alo, o Iesu Keriso, o lo tatou Faaola ma le Togiola.”
E leai se mea e aumaia ia te a’u le faamoemoe sili atu nai lo le na o le manatuaina o le Faaola ma e malamalama o Ia ma le Tama Faalelagi i mea uma o loo feagai ma a’u. A o’u lagona la le faanoanoa, ou te taumafai ia avea i La’ua ma o’u manatu muamua ma le mulimuli i aso uma. Ou te taumafai ia mautinoa o loo ou taumafai e fesootai ma i La’ua, aemaise lava i taimi faigata.
Mafaufau Loloto i Ona Uiga
Pe a ou suesue i tusitusiga paia, ou te fiafia e faitau e uiga i uiga o Keriso. E fesoasoani lenei mea ia te a’u e faaloloto ai la’u sootaga ma Ia ma le Tama Faalelagi. I le Tusi a Mamona, ua faamatalaina ai Keriso o se tagata agaalofa (tagai i le 3 Nifae 17:6), lagolago (tagai i le 2 Nifae 4:20), ma le malamalama moni ma le ola (tagai i le 3 Nifae 11:11).
O se tasi o faalagiga e sili ona ou fiafia i ai o le Faaola o le Fautua. Ona o lo’u faatuatua ia te Ia ma Lana Togiola, e mafai ai ona Ia aioi atu i lo’u faamoemoe i le Tama ma faatoga mai mo a’u (tagai i le Moronae 7:28).
O loo faaauau pea ona aoaoina a’u e tusitusiga paia i le ala e alofa ai le Tama Faalelagi ma Iesu Keriso ia te a’u, ma o lenei mea e aumaia ai ia te a’u le filemu ou te matua manaomia lava i o’u taimi sili ona faigata.
Iloaina o Lo’u Faasinomaga Paia
Na faamanatu mai e Peresitene Russell M. Nelson ia i tatou ni upumoni taua se tolu e uiga ia i tatou lava: muamua, o i tatou o fanau a le Atua; lona lua, o i tatou o fanau o le feagaiga; ma le lona tolu, o i tatou o soo o Iesu Keriso.
O le iloaina o nei upumoni ua fesoasoani ia te a’u e maua ai lo’u tulaga i le Ekalesia ma lagona ai le alofa atoatoa o le Atua.
Ona o loo o’u aafia i le tosina atu i le itupa e tasi, mo se taimi umi lava sa ou le mautinoa pe faapefea ona ou maua lo’u tulaga i le Ekalesia a Iesu Keriso. Ou te le iloa pe o le a faapefea ona tulaga mai le tele o mea i lo’u olaga.
Ae peitai, o le taulai atu i lo’u faasinomaga paia ua faatumulia ai a’u i le filemu tele. Ua faamanatu mai ia te a’u le tele o le alofa atoatoa o le Tama Faalelagi ia te a’u, ma o lenei mea ua suia ai mea uma mo a’u.
Ona o lo’u faasinomaga paia, ua ou iloa ai e le tuua lava na o a’u.
Suia o La’u Taulaiga
O loo ou taumafai e faatoilalo lo’u atuatuvale e ala i le taumafai e iloa lo’u Faaola. Pe a ou taulai atu i Lona alofa, ou te maua le fiafia ua Ia folafola mai ia te a’u. E ui lava e le o aso uma e susulu, ae e mafai lava ona ou pipiimau i Lona malamalama tumau-faavavau i aso taitasi, ma le faamoemoe o le a sili atu le lelei o taeao.
E pei ona aoao mai Elder Dieter F. Uchtdorf o le Korama a Aposetolo e Toasefululua:
“Afai tatou te sailia le olioli—afai tatou te saili mo ni mafuaaga e olioli ma mulimuli ai ma le fiafia i le Faaola, o le a tatou maua lava.
“E seāseā lava tatou mauaina se mea tatou te le o sailia.
“O e sailia le olioli?
E mafai ona tatou fiafia, ma o le talalelei a Iesu Keriso e mo tagata uma, e tusa lava pe tatou te tauivi ma le atuatuvale po o soo se isi lava luitau. O le mea lena e faia e le o mai ia Keriso mo i tatou. A tatou aoao e uiga ia te Ia ma mulimuli ia te Ia, e mafai ona tatou lagonaina Ana folafolaga o le olioli, filemu, ma le malologa.
O Iesu Keriso o lo’u fiafia moni lea, ma e mafai foi ona avea o Ia ma ou fiafia moni.