Faaaogaina o le Tusi a Mamona i Lou Olaga

O Le Auala e Mafai ai e le Malamalama o Keriso ona Tafiesea le Pogisa o Faapotopotoga Faalilolilo

Na saunia e Alison Wood

O Mekasini a le Ekalesia

E mafai faapefea ona tatou faaauau pea ona valaaulia le malamalama i o tatou olaga?

talavou matutua o loo nonofo faatasi ma ataata

I le avea ai ma se tagata o Le Ekalesia a Iesu Keriso o le Au Paia o Aso e Gata Ai i le olaga atoa, sa ou masani lava i taimi uma i le faaupuga faapotopotoga faalilolilo. O nei upu e masani lava ona oso mai ai ata o le au faomea amioleaga a Katianetona o loo lalafi i auala ’alo ma faia tautoga faalilolilo; o le mea atoa lava sa pei e faalilolilo ia te a’u, ae le aofia ai le aveesea mamao mai lo’u olaga.

Ae, e pei ona iloa ai, o faapotopotoga faalilolilo e matua moni lava ma e matua talafeagai lava ia i tatou i aso nei—ma e le faigata i taimi uma e pei ona e mafaufau ai. E ui o faapotopotoga faalilolilo o lona uiga “o se faalapotopotoga o tagata ua fusia faatasi i tautoga e faataunuu faamoemoega leaga o le vaega,” o nisi nei o tulaga e agavaa foi e avea o ni faapotopotoga faalilolilo:

“Pe a taupulepule tagata e nanā faalilolilo a latou amioga leaga”
Pe a faaaoga e tagata auala amioletonu e “maua ai le pule ma le oa” (Eteru 8:23)
Pe a faia e “kegi, nofoaga e faaaoga ai fualaau ma vailaau faasaina, ma aiga e faapotopoto e fai solitulafono” ni solitulafono ma ni faatinoga saua

O nei faauigaga ou te lagona le masani teisi ai. E foliga mai ou te vaaia lenei ituaiga o mea i taimi uma ou te faasolo matamata ai i talafou. Ma e le tatau ona faateia ai—ua i ai ni faapotopotoga faalilolilo talu mai le taimi o Kaino (tagai Eteru 8:15), ma ua matua faanatinati lava le perofeta o Moronae e lapataia i tatou e tatau ona faaauau pea ona tatou taumamao ese mai ai (tagai Eteru 8:23).

E faapefea la ona mautinoa ia tausia le faataumamao ese lava i le mamao e mafai ai o matautia faaleagaga o “ia faapotopotoga fasioti tagata” (Eteru 8:23) mai o tatou olaga?

O Le Faaola “E Le Galue i le Pogisa”

O faapotopotoga faalilolilo ua musuia e Satani; na te “faaoso le fanauga a tagata i faapotopotoga faalilolilo” (2 Nifae 9:9). Ma talu ai ona ua tatou iloa e galue Satani i le pogisa (tagai Eteru 8:16), e talafeagai la o le vaifofo o le faafeagai lea: o le malamalama. O le Faaola “e le galue i le pouliuli” (2 Nifae 26:23). Nai lo lena, o Ia o le malamalama:

“O le Malamalama moni, e faamalamalamaina tagata uma (Ioane 1:9)
“O le malamalama ua susulu i le pouliuli” (Mataupu Faavae ma Feagaiga 6:21)

Na aoaoina i tatou e Elder Dieter F. Uchtdorf o le Korama a Aposetolo e Toasefululua e uiga i le eseesega i le va o le ola i le pogisa ma le ola ai i le malamalama paia:

“E faaitiitia e le pouliuli lo tatou tomai e vaai ai ma le manino. Na te faanenefuina la tatou vaai i mea na sa i ai le taimi muamua na manino ai. A tatou i ai i le pouliuli, o le a mautinoa lava lo tatou faia o ni filifiliga le lelei, ona e le mafai ona tatou vaaia mea lamatia i lo tatou ala. …

“O le malamalama, i le isi itu, e faatagaina i tatou e vaai atu i mea e pei ona latou i ai moni. Na te faatagaina i tatou e iloatino le va o le mea moni ma le mea sese, le va o mea e taua ma mea e le taua.”

E Mafai Faapefea ona Tatou Valaaulia le Malamalama i o Tatou Olaga?

E le na o taimi tatou te feagai ai ma se mea telē e pei o faapotopotoga faalilolilo tatou te manaomia ai le malamalama o le Faaola—tatou te manaomia i taimi uma. E mafai la faapefea ona tatou valaaulia pea lava pea le malamalama i o tatou olaga?

Na tuuina mai e Peresitene Uchtdorf ia i tatou ni auala se tolu:

Amata i le mea o e i ai.
Liliu atu lou loto i le Alii.
Savali i le malamalama.

Afai o loo tatou vaavaai e aumai le Malamalama o Keriso i o tatou nuu, e mafai ona tatou faasoa atu a tatou molimau. Na faamalamalama mai e Peresitene M. Russell Ballard (1928–2023) e faapea, o sa Lamanā na “sailia … le vaega a le au faomea a Katianetona … sa latou talai atu le afioga a le Atua … i [a i] latou’ [Helamana 6:37].”

Afai e i ai se taimi e te lagona ai e pei o loo e ola i le pogisa—lagona le maasiasi, leiloa, e pei e manaomia ona e nanaina se mea—ia iloa e le o le auala lena e galue ai le Alii. E finagalo o Ia ia e laa atu i le malamalama o Lona alofa, salamo, toe foi atu ia te Ia, ma faaauau pea ona faasoa atu lou malamalama i tagata o loo siomia oe.

Faatasi ai ma Keriso, E Le Mafai Ona Manuia le Pogisa

O le a la le uiga o le manatu o Moronae i le talanoa mai e uiga i faapotopotoga faalilolilo? Ina ia tatou fefefe ma faaeteete?

E matuā leai lava. O le mea moni, o mafuaaga a Moronae e matuai faamoemoe lava:

“Ina ia aveesea le amioleaga”
“Ina ia leai se mana o Satani i [o tatou] loto”
“Ina ia faatauanauina i [tatou] e faia pea le lelei”
“Ina ia [tatou] o mai i le puna o le amiotonu uma ma faaolaina ai” (Eteru 8:26)

A tatou iloa togafiti a Satani—ma o le mea e sili ona taua, ia iloa le tele o le mana o loo i ai i le Tama Faalelagi ma Iesu Keriso—e mafai ona tatou saunia e tetee atu i osofaiga i a tatou molimau ma tutu malolosi e tetee atu i le toso a le lalolagi. E mafai ona tatou valaaulia le malamalama nai lo le ola i le pogisa.

E mafai ona tatou iloa, “o Keriso, e le mafai ai ona manumalo le pogisa.” Aua “e le mafai e le pogisa ona tatalia le malamalama susulu o le Alo o le Atua soifua!”