Aisea e manaomia ai lo’u faamagaloina o isi?

Ina ia maua le faamagaloga o a tatou agasala, e manaomia lo tatou faamagaloina o isi. O le faamagaloina o isi e mafai ai ona tatou faatoilaloina lagona o le ita, lototiga, po o le fia taui ma sui. O le loto faamagalo e mafai ona faamalolo ai manu’a faaleagaga ma aumaia le filemu ma le alofa lea e na o le Atua e mafai ona tuuina mai.

Saunia oe lava ia faaleagaga

O le a se mea ua e aoaoina i lou faamagalo atu i isi? E mafai ona e mafaufau i se taimi na fesoasoani ai lou faamagaloina o se tasi, e te maua ai le filemu ma le alofa?

O a aafiaga o i ai o alii talavou e manaomia ai ona faamagalo atu i isi? O le a se mea e tatau ona latou aoaoina e uiga i le faamagalo ia i latou lava? E mafai faapefea ona e fesoasoani i alii talavou e faamagalo atu ina ia mafai ai ona latou maua le filemu?

Manatua: Afai e i ai ni fesili a alii talavou e uiga i le faamagalo atu i tulaga o le sauaina, fautuaina e saili se fautuaga mai lo latou epikopo po o le peresitene o le paranesi.

O a mau o le a fesoasoani i le alii talavou e iloa ai faamanuiaga o le a oo mai i o latou olaga pe a latou faamagalo atu i isi?

Mataio 5:44; MF&F 64:9–11 (Ua poloaiina i tatou e faamagalo atu i tagata uma)

Mataio 6:14–15; 18:21–35 po o le vitio “Faamagalo ia Fitugafulu ni Fitu” (Ina ia maua le faamagaloga, e tatau ona tatou faamagalo atu i isi)

Luka 23:34 (Na faamagalo e Iesu Keriso i latou sa faasatauroina o Ia)

Kevin R. Duncan, “O Le Uu Faamalolo o le Faamagaloga,” Ensign po o le Liahona, Me 2016, 33–35

Gordon B. Hinckley, “Faamagaloga,” Ensign po o le Liahona, Nov. 2005, 81–84

Dieter F. Uchtdorf, “O Le e Alofa Atu e Alofaina Mai,” Ensign po o le Liahona, Me 2012, 70–76

Vitio: “Faamagalo Atu: Ua Māmā Ai La’u Avega”

8:24

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

O a mea o manatua e alii talavou mai le lesona talu ai? O mea sa valaaulia i latou e fai? O a ni o latou aafiaga ina ua latou faaaogaina mea sa latou aoaoina?
Fai i alii talavou e mafaufau i se taimi na latou faamagalo ai se tagata. Valaaulia i latou e faasoa mai mea na latou oo i ai, pe a le afaina ia i latou. O le a le taunuuga? Mata o le a se eseesega pe ana latou le faamagalo atu?

Aoao faatasi

O gaoioiga taitasi nei e mafai ona fesoasoani i uso o le korama e malamalama ai i le taua o le faamagalo atu i isi. I le mulimuli ai i le taitaiga a le Agaga, filifili se tasi pe sili atu o mea nei o le a sili ona aoga mo lau korama:

Vaevae le korama i ni vaega, ma valaaulia vaega taitasi e faitau ni mea na filifili mai lauga ua tuuina atu i lenei otootoga po o se isi lauga e te filifilia. Fai atu i alii talavou e faailoga vaega o le lauga ua faagaeetia ai i latou. Valaaulia i latou e faasoa mai mea na latou faailogaina ma faamalamalama mai pe aisea e taua ai ia i latou.
Faitau faatasi le faataoto o le auauna le alofa o i le Mataio 18:23–35 (pe faaali le vitio “Faamagalo ia Fitugafulu ni Fitu”), ma fesoasoani i alii talavou e faaopoopo ma faatusatusa ia aitalafu a le auauna ma lana uo auauna (tagai “Mamafa ma Fuafaatatau” i le Lolomifefiloi a le Tusi Paia). O le a se mea na aoao e alii talavou mai lenei faataoto e faatatau i le faamagalo atu? Valaaulia ia alii talavou e sue ma faasoa mai nisi mau o loo aoao mai i le taua o le faamagalo atu o isi (e pei o mau o loo fautuaina mai i lenei otootoga).
Fai atu i alii talavou e faatusatusa ia faataitaiga o i tusitusiga paia e uiga i tagata na faamagalo atu i isi. E mafai ona e iloiloina faataitaiga a Iosefa i Aikupito (tagai Kenese 45:1–7), o Nifae ma ona uso (tagai 1 Nifae 7:21), o Iesu Keriso i luga o le satauro (tagai Luka 23:34), po o isi. Aisea e matua taua ai lava le faamagalo atu o tagata o le aiga? Faaali se tasi o vitio o loo fautuaina atu i le otootoga lenei, ma fai atu i alii talavou e faasoa mai ni o latou lagona. O a nisi faataitaiga o le faamagalo atu e mafai ona latou faasoa maia?
Fai i alii talavou e sue i tusitusiga paia se mea na aoao atu e le Faaola e uiga i le faamagalo atu o isi ma faasoa mai i le vasega se mea sa latou mauaina (mo se faataitaiga, tagai Mataio 5:44; 6:14–15; 18:22–23). Fai atu ia i latou e faasoa mai ni aafiaga o le filemu lea e oo mai i le faamagalo atu o isi.
Tusi ia fesili nei i ni fasipepa eseese, ma tuu atu ia tofu uso o le korama ma se fasipepa: Aisea e manaomia ai lo tatou faamagaloina o tagata uma, e aofia ai i tatou lava? Aisea ua na o le Alii e mafai ona filifilia pe tatau pe leai foi ona faamagaloina se tagata? Aisea e avea ai le le faamagalo atu ma se agasala maoae? Valaaulia ia alii talavou taitasi e mafaufau loloto i lana fesili ao ia faitauina le Mataupu Faavae ma Feagaiga 64:9–11. Ona fai atu lea i alii talavou e faasoa mai ni o latou manatu ma malamalamaaga.

Fai atu i alii talavou e faasoa mai mea na latou aoaoina i le asō. Pe o latou malamalama i le taua o le faamagalo atu i isi? O a ni lagona po o ni uunaiga ua latou maua? Pe i ai nisi a latou fesili? Pe aoga le toe faaalu o se isi taimi i lenei aoaoga faavae?

Motugaafa faafaiaoga

“O faiaoga o e tautatala atu i le tele o le taimi pe taliina ia fesili uma e i latou lava ua latou faamoemoe e faalotovaivaia ia tagata o loo aoaoina mai le auai” (O Le Aoao Atu, E Leai Se Isi Valaauga e Sili Ai [1999], 67).

Valaaulia e faatino

E faaiuina e le uso o le au peresitene o le korama lea o loo taitai le fonotaga. E mafai ona ia:

Uunai uso o le korama e mafaufau i se tasi e manaomia ona latou faamagaloina ma faia se tautinoga e faamagalo atu i lena tagata.
Valaaulia uso o le korama e faasoa mai mea na latou aoaoina faatasi ma o latou aiga.