O le a le alofatunoa?

O le alofatunoa o le fesoasoaniga faalelagi lea tatou te maua e ala i le Togiola a Iesu Keriso. E ala mai i le alofatunoa, e faaolaina ai i tatou mai le agasala ma le oti. Ma le isi, o le alofatunoa o se mana lea e mafai ai ona faamalosia i tatou mai lea aso i lea aso ma fesoasoani ia i tatou ia tumau ai e oo i le iuga. E manaomia se taumafaiga i la tatou vaega ina ia maua ai le atoaga o le alofatunoa o le Alii.

Saunia oe lava ia faaleagaga

O le a le uiga o le alofatunoa ia te oe? O faapefea ona e lagonaina le mana o Iesu Keriso e fesoasoani ai ia suia lou olaga?

O le a se mea o iloa e alii talavou e uiga i le alofatunoa? E mafai faapefea ona e fesoasoani ia i latou ia malamalama i le mana o le alofatunoa i o latou olaga? E mafai faapefea e le alofatunoa ona fesoasoani i alii talavou a o latou taumafai e faataunuu o latou tiute faaleperisitua?

O a ni mau ma nisi punaoa ua fesoasoani ia te oe e malamalama ai i le alofatunoa? O le a se mea ua uunaia oe e faasoa atu i alii talavou ina ia mafai ai ona latou malamalama i le alofatunoa?

Efeso 2:8–9; 2 Nifae 25:23 (E faaolaina i tatou e ala i le alofatunoa)

Filipi 4:13; Iakopo 4:6–7 (O le alofatunoa o Iesu Keriso e aumaia ia i tatou le malosi)

Moronae 10:32–33 (E mafai e le alofatunoa ona faaatoatoaina i tatou ia Keriso)

Taiala i Tusitusiga Paia, “Alofatunoa”

J. Devn Cornish, “O Lava Ea Lou Lelei? Pe O Le A Ou Ausia Ea?” Ensign po o le Liahona, Nov. 2016, 32–34

Dieter F. Uchtdorf, “O Le Meaalofa o le Alofatunoa,” Ensign po o le Liahona, May 2015, 107–10

David A. Bednar, “Tauave ma le Faigofie a Latou Avega,” Ensign po o le Liahona, Me 2014

“Alofa Tunoa,” Faamaoni i le Faatuatua (2004), 18–20

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le aoaoga faavae mai le vaiaso ua tea ma faalauiloa atu le lesona o lenei vaiaso:

Aumai se meafaitino po o se ata, ma fai atu i alii talavou pe faapefea ona fesootai i mea na latou aoaoina i le vaiaso ua tea. O le a se mea na latou faia i le vaiaso ua tea ona o se taunuuga o mea na latou aoaoina?
Fai atu i alii talavou po o le a se mea ua latou iloa e uiga i le alofatunoa. O le a so latou manatu i le uiga o le alofatunoa? O faapefea ona latou vaaia le alofatunoa i o latou lava olaga? ia latou auaunaga faaleperisitua? Pe latou te talitonu e faaolaina i latou e ala i le alofatunoa? O a ni a latou fesili e uiga i le alofatunoa? Ia o se vaega o lenei talanoaga, atonu e te manao e faasoa atu le uiga o le alofatunoa i le amataga o lenei otootoga.

Aoao faatasi

O gaoioiga taitasi nei e mafai ona fesoasoani i uso o le korama e malamalama ai i le aoaoga faavae o le alofatunoa. I le mulimuli ai i le taitaiga a le Agaga, filifili se tasi pe sili atu o mea nei o le a sili ona aoga mo lau korama:

Valaaulia sui o le korama e faitau ia vaega o le saunoaga a Elder J. Devn Cornish “O Lava Ea Lou Lelei? Pe O Le A Ou Ausia Ea?” Fai atu ia te i latou e vaavaai mo tali i fesili nei: “O le a le alofa tunoa? E mafai faapefea ona ou mauaina le alofatunoa i lo’u olaga? E mafai faapefea ona ou agavaa atili mo le alofatunoa a le Faaola? Pe o le a ou toe foi atu i le lagi?” A maea ona mafaufau loloto alii talavou i nei fesili, valaaulia i latou e mafaufau e uiga i se uo atonu o loo tauivi ma lona faatuatua ma le lototele i le talalelei. E mafai faapefea ona fesoasoani lenei saunoaga i o latou uo?
Mafaufau e tusi se pa o loo matala ma ni faamalama o loo matala i luga o le laupapa, ma fai atu i alii talavou e sue i le amataga o le lauga a Peresitene Dieter F. Uchtdorf “O Le Meaalofa o le Alofatunoa” e maua ai le faatusatusaga na ia faia i le va o le alofatunoa ma mea faitino nei. Vaevae vaega o loo totoe o le lauga i alii talavou ma fai atu ia i latou e tusi ma faasoa mai se otootoga e tasi le fuaiupu o mea ua latou aoaoina e uiga i le alofatunoa mai o latou vaega. O a mea o le a latou faia e maua ai le alofatunoa o le Tama Faalelagi ma Lona Alo?
I nai aso o i luma, fai atu i se uso o le korama e aoao po o le a le uiga o le aveina i o tatou luga o le avega a le Faaola, mai le Mataio 11:28–30 ma le lauga a Elder David A. Bednar “Tauave ma le Faigofie a Latou Avega.” Fai atu i ai e sau sauni i le fonotaga a le korama e taitai se talanoaga e uiga i mea sa ia aoaoina ma le auala e mafai ai e le avega ona fai ma sui o la tatou fegalegaleaiga ma Iesu Keriso. Uunaia o ia e faasoa mai se faamatalaga mai le lauga a Elder Bednar na te lagona o le a fesoasoani i sui o le korama ia malamalama i le alofatunoa o le Faaola.
Tusi ni aotelega pupuu o mau mai le otootoga lenei, ma tuu se aotelega se tasi i luga o puipui taitasi o le potu. Tofi alii talavou taitasi e faitau se tasi o mau ona sue lea ma tāmau i le aotelega e tutusa ma lana mau. Fai atu i alii talavou e faasoa mai mea ua latou aoaoina mai ia latou mau e uiga i le alofatunoa. O le a se faamaoniga o le alofatunoa o loo latou vaaia i o latou olaga? O a ni faataitaiga e mafai ona latou mafaufau i ai mai tusitusiga paia?
Valaaulia ia sui taitasi o le korama e fai se lisi o mea na ia aoaoina ao ia faitau e uiga i le alofatunoa i le Lolomifefiloi o le Tusi Paia ma i le Faamaoni i le Faatuatua. Fai i alii talavou e faasoa mai se mea mai a latou lisi ma faamalamalama mai pe aisea e taua ai ia i latou. Valaaulia i latou e saili ni ata (i le Tusi Ata o le Talalelei po o se mekasini a le Ekalesia) lea e faailoa mai tagata na mauaina le alofatunoa po o se fesoasoani mai le Atua, ma fai atu ia i latou e faasoa mai mea sa latou aoaoina e uiga i tagata nei i vaega taitoalua po o ni vaega toalaiti. O a aafiaga e mafai ona latou faasoa mai o latou lava olaga?
Aumai se lala mai se laau i le fonotaga a le korama, ma valaaulia alii talavou e saili pe na faapefea ona faaaoga e le Faaola ia lala e aoao atu ai e uiga i le alofatunoa i le Ioane 15:1–10. O a ni malamalamaaga ua latou maua e uiga i le alofatunoa mai nei fuaiupu? Valaaulia se uso o le korama e faaaoga le lala na e aumaia e aotele ai mea na ia aoaoina i le vaega o totoe o le korama e uiga i le alofatunoa.

Fai atu i alii talavou e faasoa mai mea na latou aoaoina i le asō. Pe ua latou malamalama i le aoaoga faavae o le alofatunoa? O a ni lagona po o ni uunaiga ua latou maua? Pe i ai nisi a latou fesili? Pe aoga le toe faaalu o se isi taimi i lenei aoaoga faavae?

Motugaafa faafaiaoga

“Atonu…e i ai taimi e te leiloa ai le tali i se fesili. Afai e tupu mai lenei mea, e faigofie lava ona e faapea atu e te le iloa. Atonu e te manao e te fai atu o le a e taumafai e sailia le tali i le fesili. Pe e te manao foi e valaaulia tagata o loo aoaoina e saili le tali, ma tuuina atu ia i latou se taimi i le isi lesona e lipoti mai ai po o le a se mea ua latou aoaoina” (O Le Aoao Atu, E Leai Se Isi Valaauga E Sili Ai [1999], 67).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Tuu atu lana molimau i le mana o le alofa tunoa.
Taitaia se talanoaga i le auala e mafai ai e le alofa tunoa o le Faaola ona fesoasoani i uso o le korama e faataunuu o latou tiute faaleperisitua ma le mataalia sili atu.