O le a le uiga ina ia salamo?

Na puapuagatia Iesu Keriso i le sala mo a tatou agasala ina ia mafai ai ona tatou salamo. O le salamo o se suiga o le loto ma le mafaufau lea e aumai faalatalata ai i tatou i le Atua. E aofia ai le fulitua i le agasala ma liliu atu i le Atua mo le faamagaloga. E faaosofia e ala i le alofa mo le Atua ma le naunau faamaoni e usitai i Ana poloaiga.

Saunia oe lava ia faaleagaga

O a ni mea na e oo i ai i le salamo? E aunoa ma le talanoaina o agasala patino, e mafai faapefea ona e faasoa atu pe na faapefea ona fesoasoani le salamo ia te oe e latalatala atu ai i le Tama Faalelagi?

O nisi alii talavou atonu o loo tauivi ma le le agavaa? O le a aafia e lenei mea lo latou gafatia e auauna atu ai o ni tagata faamaoni o e umia le perisitua. E mafai faapefea ona e nofouta ia i latou ma valaaulia le Agaga e fesoasoani ia i latou ia mananao e salamo?

Suesue ma le agaga tatalo nei mau ma punaoa. O le a se mea na musuia ai oe ia salamo?

Isaia 1:18 (E ala i le salamo, e mafai ai ona faamamaina i tatou mai ia tatou agasala)

Roma 3:23; 1 Ioane 1:8 (Tatou te agasala uma lava)

Alema 19:33 (E aumai e le salamo se suiga o le loto)

Alema 36:6–24 (Ua salamo Alema ma mauaina le faamagaloga e ala i le alofatunoa o le Faaola)

Alema 39:8 (E le mafai ona nana a tatou agasala mai le Atua)

MF&F 58:42–43 (Ina ia salamo, e tatau ona tautau atu ma lafoai a tatou agasala)

“Salamo,” Mo Le Malosi o le Autalavou, 28–29

Dale G. Renlund, “O Lo Tatou Leoleo Mamoe Lelei,” Ensign po o le Liahona, Me 2017, 29–32

Dale G. Renlund, “Salamo: O Se Filifiliga Fiafia,” Ensign po o le Liahona, Nov. 2016, 121–24

Linda S. Reeves, “O Le Fuafuaga Tele o le Togiolaina,” Ensign po o le Liahona, Nov. 2016, 88–90

Dieter F. Uchtdorf, “O Le A Ia Tuu Oe i Luga o Ona Tauau ma Ave Oe i le Aiga,” Ensign po o le Liahona, Me 2016, 101–4

Vitio: “I Totonu o Tuaoi”

6:25

Vitio: “O Le Togiola e Le na o se Taimi e Tasi”

3:1

Aoao atu i le ala a le Faaola

Sa valaaulia e le Faaola isi e galulue i le faatuatua ma ola i upumoni na Ia aoao atu. Na Ia maua ni avanoa mo i latou e aoao ai e ala i aafiaga mamana. O le a se mea e mafai ona e faia e fesoasoani ai i alii talavou ia vaaia le mana o le salamo i aso taitasi i o latou olaga?

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Fai i alii talavou e tusi ni ata e faamanatu atu ai ia te i latou se mea sa latou aoaoina i le vaiaso ua tea, ona talanoaina faatasi lea o mea sa latou tusia.
Vaai se alii talavou e faaloloa ona lima ma ia tofu le lima ma se mea mamafa e uuina, a o talanoaina e le korama pe faapefea ona avea le agasala ma se avega mamafa. I le taimi o le talanoaga, toe faaopoopo nisi mea mamafa i luga o lima o le alii talavou. Aveese na mea, ae valaaulia le alii talavou e faasoa mai mea na latou aoaoina e uiga i le agasala ma le salamo mai lenei lesona faatino.

Aoao faatasi

O gaoioiga taitasi nei e mafai ona fesoasoani i uso o le korama e malamalama ai i le uiga o le salamo. I le mulimuli ai i le musumusuga a le Agaga, filifili se tasi pe sili atu o mea nei o le a sili ona aoga mo lau korama:

Valaaulia se sui o le korama e sau saunia i le vasega e faasoa atu se tala mai i se tasi o saunoaga ua fautua atu i le otootoga lenei. E mafai foi ona e faaali atu se vitio o le failauga o loo faamatalaina le tala. O le a se mea ua aoao mai e ia tala ia i tatou e uiga i le salamo? Tusi faamatalaga e uiga i le salamo mai lauga i luga o ni fasi pepa. Valaaulia alii talavou e filifili se faamatalaga ma faasoa mai mea ua latou aoaoina—muamua ma se paga ona sosoo ai lea ma le vasega. Tuu atu ia i latou le taimi e manatunatu ai i suiga latou te lagona le fiafia e faia ona o mea ua latou aoaoina.
Fai atu i se uso o le korama e sau saunia i le vasega e faasoa mai le tala i le amataga o le lauga a Elder Allen D. Haynie “Manatua Le Ua Tatou Faalagolago i Ai” po o le aafiaga o le toe fausiaina o Frauenkirche po o le faataoto a le Faaola e uiga i le mamoe na leiloa mai le lauga a Peresitene Dieter F. Uchtdorf “O Le A Ia Tuu Oe i Luga o Ona Tauau ma Ave Oe i le Aiga.” E mafai foi ona e faaalia ia vitio a nei failauga o loo faamatalaina tala nei. O le a se mea ua aoao mai e ia tala ia i tatou e uiga i le salamo? Tusi faamatalaga e uiga i le salamo mai lauga. Valaaulia alii talavou e filifili se faamatalaga ma faasoa mai mea ua latou aoaoina—muamua ma se paga ona sosoo ai lea ma le vasega. Tuu atu ia i latou le taimi e manatunatu ai i suiga latou te lagona le fiafia e faia ona o mea ua latou aoaoina.
Valaaulia se uso o le korama e aoao atu se vaega o lenei lesona. E mafai ona ia faia lenei mea o se vaega o lana fuafuaga o le Tiute i le Atua e aoaoina ma aoao atu e uiga i le salamo (tagai “Malamalama i le Aoaoga Faavae,” itulau 18, 42, po o le 66).
Fai atu i se tasi o alii talavou e nana se mea faitino a o matamata isi sui o le korama. Fai atu i le isi sui o le korama e taumafai e sue le mea faitino. O le a le mea o aoao mai e lenei faataitaiga e uiga i le taumafai e natia agasala mai i le Atua? (tagai Alema 39:8). O a ni tala o tusitusiga paia e mafai ona faasoa mai e alii talavou lea e aoao mai ia i tatou e le mafai ona tatou natia a tatou agasala mai le Atua? (tagai, mo se faataitaiga, Iona 1–2; 2 Samuelu 11–12; Galuega 5:1–11). E mafai foi ona latou iloiloina se tasi o tala o loo i le saunoaga a Sister Linda S. Reeves “O Le Fuafuaga Tele o le Togiolaina.” Valaaulia alii talavou e talanoaina fesili nei i ni vaega toalaiti: O a nisi o auala e taumafai ai tagata e natia a latou agasala? O le a sau tala e fai atu i se tasi e fesoasoani ai ia malamalama e le mafai ona tatou natiaina a tatou agasala?
Valaaulia se alii talavou e uu i luga se ata o Alema ma atalii o Mosaea (tagai Tusi Ata o le Talalelei, 77) ma aotele le tala o lo latou salamo (tagai Alema 36:6–24). Fai atu i alii talavou e faitau e le tagata lava ia le Alema 36:13, 17–20, 23–24, faailoa mataupu faavae o le salamo i nei fuaiupu, ma faasoa mai i ni vaega laiti mea na latou aoaoina. Valaaulia alii talavou e mafaufau ma tusi i lalo se mea e mafai ona latou faia e faaaoga ai mataupu faavae o le salamo i o latou lava olaga.
Valaaulia alii talavou taitasi e suesue le vaega o le “Salamo” o loo i le Mo Le Malosi o le Autalavou po o ni vaega filifilia o lauga ua fautuaina atu lenei otootoga. Tuu atu i alii talavou e faailoga ma faasoa mai soo se mea e tulagaese ia i latou. Valaaulia i latou e tusi i lalo soo sa latou fesili e le faalauaiteleina e uiga i le salamo. Valaaulia le epikopo e tali nei fesili ma faasoa atu pe faapefea ona noatia le salamo i le mana o le perisitua.
Faaali le vitio “I Totonu o Tuaoi.” Valaaulia le afa o uso o le korama e vaavaai mo ni mea latou te aoaoina mai lenei vitio e faatatau i le uiga o le salamo, ma valaaulia le isi afa e tagai mo le matafaioi a le epikopo e fesoasoani ai ia i tatou e salamo. Fai atu ia i latou e faasoa mai mea latou te aoaoina. O le a sa latou tala e fai atu i uo atonu e fefefe e talanoa i le epikopo e uiga i mea sese na latou faia?

6:25

Fai atu i alii talavou e faasoa mai mea na latou aoaoina i le asō. Pe o latou malamalama i le uiga o le salamo? O a ni lagona po o ni uunaiga ua latou maua? Pe i ai nisi a latou fesili? Pe aoga le toe faaalu o se isi taimi i lenei aoaoga faavae?

Motugaafa faafaiaoga

“O le tamaitiiti aoga e ao ona faatinoina. Afai e taulai uma mea i le faiaoga, ma avea o ia ma tama autu o le ata, e na te avea le taimi uma o le talanoaga, pe na te faia foi na o ia le gaoioiga, e toetoe lava a mautinoa lona aia fua i le aoaoina o tagata o le vasega” (Asahel D. Woodruff, i le O Le Aoao Atu, E Leai Se Isi Valaauga E Sili Ai [1999], 63).

Valaaulia e faatino

E faaiuina e le uso o le au peresitene o le korama lea o loo taitai le fonotaga. E mafai ona ia:

Faasoa atu ona lagona pe fai atu i uso o le korama e faasoa mai ni o latou lagona e uiga i le Faaola ma le uiga o le salamo.
Valaaulia alii talavou e suesue o latou olaga ma fuafua mea latou te manaomia e sui.