O le a le toetu?

E ala i le Togiola a Iesu Keriso, o le a toetutu tagata uma. O o tatou tino ma agaga o le a toe tuufaatasia i se tulaga ola pea atoatoa. O se malamalamaaga ma se molimau i le toetu, e mafai ona aumaia ia i tatou le faamoemoe ma le vaaiga manino, pe a tatou feagai ma luitau ma manumalo o le olaga.

Saunia oe lava ia faaleagaga

O le a se mea e te iloaina e uiga i le toetu? O a ni malamalamaaga ua tatou maua e uiga i le toetu mai tusitusiga paia o aso nei?

O le a se malamalama o alii talavou e uiga i le toetu? E mafai faapefea e se malamalama sili atu o le toetu ona aafia ai o latou lagona e uiga i o latou tino faitino?

O a ni mau po o nisi punaoa e mafai ona e faaaogaina e fesoasoani ai e aoao alii talavou e uiga i le toetu? O le a se mea ua musuia oe e faasoa atu?

Luka 24 (O Le Toetu o Iesu Keriso)

1 Korinito 15 (Ona sa faatoilaloina e le Faaola le oti, o lea o le a tatou toetutu uma ai)

Alema 11:41–45 (Pe a tatou toetutu, o le a toe faatasia o tatou agaga ma tino, ma faamasinoina i tatou)

Alema 40–41 (Ua faamalamalama atu e Alema le toetu i lona atalii o Korianetona)

Paul V. Johnson, “Ma e Leai Foi Se Toe Oti,” Ensign po o le Liahona, Me 2016, 121–23

Thomas S. Monson, “Ua Toetu o Ia!” Ensign po o le Liahona, Me 2010, 87–90

D. Todd Christofferson, “O Le Toetu o Iesu Keriso,” Ensign po o le Liahona, Me 2014

Ata Vitio: “Ua Toetu o Ia”

22:25

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le aoaoga faavae mai le vaiaso ua tea ma faalauiloa atu le lesona o lenei vaiaso:

Valaaulia alii talavou e sue i se mau na latou aoaoina i le lesona o le vaiaso ua tea. Uunai nisi e faasoa mai a latou mau, ni mea na latou aoaoina, ma po o a ni mea o loo latou faia ina ia ola ai i ona aoaoga?
Fai atu i alii talavou po o le a se mea latou te faamanatuina i le Eseta. O a nisi o faatusa o le Eseta? E faapefea ona aoao i latou e nei faatusa e uiga i le toetu?

Aoao faatasi

O gaoioiga taitasi nei e mafai ona fesoasoani i uso o le korama e malamalama ai i le toetu. I le mulimuli ai i le taitaiga a le Agaga, filifili se tasi pe sili atu o mea nei o le a sili ona aoga mo lau korama:

Fai atu i alii talavou e faitau ia tala o loo i le saunoaga a Peresitene Thomas S. Monson “Ua Toetu o Ia!” ma le lauga a Elder Paul V. Johnson “Ma e Leai Foi Se Toe Oti.” Fai atu ia i latou e aotele mai tala nei i a latou lava upu ma faasoa mai mea na aoao atu ia i latou e uiga i le toetu. O a nisi mea na uunaia i latou e uiga i nei tala?
Filifili nisi o fuaitau mai le 1 Korinito 15 e uiga i le toetu. Valaaulia alii talavou e faitau ia fuaitau, i ni vaega laiti pe taitoatasi, ma fatu se faamatalaga o le aotelega o mea latou te aoaoina e uiga i le toetu (mo se faataitaiga, e mafai ona aoteleina le fuaiupu 1–8 e faapea “O loo i ai molimau o le toetu”). Aisea e lagona ai e alii talavou e taua mo i latou ona iloa nei upumoni e uiga i le toetu?
Fai atu i alii talavou ia mafaufau i se uo e le o se tagata o le Ekalesia ua maliu sē pele ia te ia. Valaaulia le afa o alii talavou e faitau le Alema 40 ma le isi afa e faitau le Alema 41. Fai ia i latou e fai se lisi o aoaoga e uiga i le toetu o loo i nei mataupu e mafai ona latou faasoa atu i a latou uo. Ona tuu atu lea ia i latou e faasoa mai a latou lisi i le vasega atoa.
I le avea ai ma se korama, fai se lisi o tagata o i tusitusiga paia o e na molimauina le Toetu o le Faaola. Valaaulia alii talavou e saili i le lauga a Elder D. Todd Christofferson “O Le Toetu o Iesu Keriso” e maua ai nisi faataitaiga. Uunaia i latou e sue ia tautinoga a nei molimau i totonu o tusitusiga paia (o nisi o mau faasino o loo tauina mai i le lauga a Elder Christofferson). O le a se mea na tatou aoao e uiga i le Faaola ma Lona Toetu mai nei molimau? Faasoa atu lau molimau e uiga i le Toetu o le Faaola, ma valaaulia ni nai uso o le korama e faasoa mai a latou molimau.
Tufa atu nisi o tusi o Aoaoga a Peresitene o le Ekalesia (pe fai ni kopi o mataupu filifilia), ma valaaulia alii talavou e sue ni aoaoga mai perofeta o aso e gata ai e uiga i le toetu. Fai atu ia i latou e faasoa mai i le vasega mea latou te maua.
Valaaulia alii talavou e sue ni viiga e faatatau i le toetu (tagai i le faasino autu i le pito i tua o le tusipese mo ni manatu). Ia usu e le vasega nisi o nei viiga. Tagai i mau o loo i vaefaamatalaga o le viiga, ma talanoaina ni mea latou te aoao atu.

Fai atu i alii talavou e faasoa mai mea na latou aoaoina i le asō. Pe ua latou malamalama atili i le toetu? O a ni lagona po o ni uunaiga ua latou maua? Pe i ai nisi a latou fesili? Pe aoga le toe faaalu o se isi taimi i lenei aoaoga faavae?

Motugaafa faafaiaoga

“Afai e te faaaogaina ni gaoioiga eseese e aoao ai, o le a sili atu foi ona malamalama tagata o loo aoaoina i mataupu faavae o le talalelei ma tele ni mea latou te taofimauina. O se auala e filifilia ma le faaeteete e mafai ona faamanino atili ai se mataupu faavae, o le a sili atu ona lelei, ma faagalo gata” (O Le Aoao Atu, E Leai Se Isi Valaauga e E Sili Ai [1999], 96).

Valaaulia e faatino

E faaiuina e le uso o le au peresitene o le korama lea o loo taitai le fonotaga. E mafai ona ia:

Tuu atu lana molimau i le toetu.
Valaaulia uso o le korama e aoao atili e uiga i le toetu i a latou suesuega faaletagata lava ia o tusitusiga paia ma faasoa mai mea latou te aoaoina i le korama.