E mafai faapefea e le Faaola ona fesoasoani ia te au i taimi o ou tofotofoga?

I le avea ai ma se vaega o Lana taulaga togiola, na tauave ai e le Faaola i Ona lava luga o tatou tiga ma ma’i. Ona sa Ia oo i o tatou tofotofoga, ua Ia silafia ai le auala e fesoasoani mai ai ia i tatou. Pe a tatou faatino le faatuatua ia Iesu Keriso, o le a Ia tuu mai ia i tatou le malosi ma faamama a tatou avega.

Saunia oe lava ia faaleagaga

Mafaufau i tofotofoga o loo oulua fetaiai. O faapefea ona e mauaina le malosi e ala i le Togiola?

Mafaufau i alii talavou i le korama. O a tofotofoga o loo latou fetaiai? O a ni aafiaga faaleagaga, ni mau, ma ni upusii e te fia manao e faasoa atu ia i latou? O i ai ni aafiaga faaletagata lava ia e mafai ona fefaasoaai e alii talavou i le tasi ma le isi?

A o e sauni, ia suesue ma le agaga tatalo nei punaoa ma isi na fesoasoani ia te oe e liliu atu i le Faaola i taimi o faigata.

Mataio 11:28–30; Filipi 4:13; 1 Nifae 17:3; Helamana 5:12; MF&F 19:23; 68:6 (E mafai e Iesu Keriso ona tuu mai ia i tatou le malosiaga, ma faamāmā a tatou avega)

Mosaea 23:12–16; 24:8–17 (O loo faamalosia e le Alii le nuu o Alema e fesoasoani ai ia i latou e tauave a latou avega)

Isaia 53:3–5; Alema 7:11–13 (E malamalama Iesu Keriso i o tatou mafatiaga, aua ua uma ona oo i ai o Ia)

Ulisses Soares, “Tau Atu i le Atua ma le Lemafaagaeetia,” Ensign po o le Liahona, Me 2017, 33–35

Russell M. Nelson, “Olioli ma le Ola ai Faaleagaga,” Ensign po o le Liahona, Nov. 2016, 81–84

W. Christopher Waddell, “O Se Mamanu mo le Filemu,” Ensign po o le Liahona, Me 2016, 90–92

Dallin H. Oaks, “Faamalosia e ala i le Togiola,” Ensign po o le Liahona, Nov. 2015, 61–64

“Satani,” Faamaoni I le Faatuatua (2004), 152–154

Vitio: “O le a Siitia e le Atua i Tatou i Luga,” “O Mauga e A'ea”

4:58

5:0

Aoao atu i le ala a le Faaola

Na faaaoga e le Faaola tusitusiga paia e aoao atu ai ma molimau atu ai e uiga i Lana misiona. O loo i ai i lenei lesona le tele o mau mamana o loo aoao atu ai le auala o le a faamalosia ai e le Faaola i tatou i taimi o tofotofoga. A o suesue ma talanoaina e alii talavou nei mau, o le a molimau atu le Agaga Paia i lo latou moni.

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le aoaoga faavae o le vaiaso ua tea ma faalauiloa atu le lesona o lenei vaiaso:

Fai atu i alii talavou e talanoa e uiga i nisi o mea na latou aoaoina i le lesona o le vaiaso ua tea. Tuu atu ia i latou e faasoa mai soo se aafiaga na latou maua ina ua latou faatinoina mea na latou aoaoina.
Tuu atu i tagata taitasi o le korama se fasi pepa ma fai i ai e tusi i lalo se tofotofoga o loo la fetaiai. Fai atu i alii talavou e mafaufau loloto pe mafai faapefea e Iesu Keriso ona tuu atu ia i latou le malosi i taimi o o latou tofotofoga. Uunai i latou e tusi i lalo ni manatu po o ni uunaiga ua latou maua e uiga i le auala e faatoilalo ai lea tofotofoga a o latou aoao e uiga i le aoaoga faavae o le Togiola.

Aoao faatasi

O gaoioiga taitasi nei e mafai ona fesoasoani i uso o le korama ia malamalama ai i le auala e mafai ai ona fesoasoani le Togiola ia i latou i taimi o tofotofoga. I le mulimuli ai i le musumusuga a le Agaga, filifili se tasi pe sili atu o mea nei o le a sili ona aoga mo lau korama:

Valaaulia ia alii talavou e faitau pe matamata i le tala a Elder Ulisses Soares e uiga i se faifeautalai na maliu lona tuafafine, o loo maua i le lauga “Tau Atu i le Atua ma le Lemafaagaeetia.” Na faapefea ona fesoasoani le malamalama i le Togiola a Iesu Keriso ma le ata o le faaolataga i le faifeautalai i le taimi o lona tofotofoga? O a nisi malamalamaaga na maua e alii talavou mai le saunoaga a Elder Soares? Fai atu ia i latou e mafaufau e uiga i se tofotofoga o loo latou aafia ai i le taimi nei. E mafai faapefea ona latou maua le malosi mai le Faaola e fesoasoani ai ia i latou?
Valaaulia alii talavou e suesue vaega o le saunoaga a Peresitene Russell M. Nelson “Olioli ma le Ola ai Faaleagaga,” aemaise lava le aafiaga a Eliza R. Snow. O a ni aafiaga e mananao alii talavou e faasoa mai i le taimi na latou maua ai le olioli i tulaga faigata? Ina ia fesoasoani i alii talavou e mafaufau i mea e aumaia ia i latou le olioli, vavae le vasega i ni vaega se lua. Tuu atu i vaega taitasi se taimi faatapulaa, ma luiina i latou e tusi i lalo le tele o mea latou te mafaia e aumaia ia i latou le olioli. A maea ona latou faia, valaaulia i latou e suesue i le saunoaga a Peresitene Nelson mo mea e faaopoopo i le latou lisi. O a ni mea e mafai ona latou faia e manatua ai mea ia e aumaia ia i latou le olioli i taimi faigata?
Valaaulia se uso o le korama e aoao atu se vaega o lenei lesona. E mafai ona ia faia lenei mea o se vaega o lana fuafuaga o le Tiute i le Atua e aoaoina ma aoao atu e uiga i le Togiola (tagai “Malamalama i le Aoaoga Faavae,” itulau 18, 42, po o le 66).
Vaevae le korama i ni vaega. Tuu atu i vaega taitasi e faitau se tasi pe sili atu o mau o i lenei otootoga ma aotele mea ua latou faitauina i le korama. Valaaulia alii talavou e tusi i lalo pe faapefea ona mafai e mea latou te aoao mai i nei mau ona fesoasoani ia i latou e faatoilalo o latou tofotofoga. Uunaia i latou e faasoa mai mea sa latou tusia, pe afai latou te lagona le toafimalie e faia ai. Mafaufau e faasoa atu ou lava aafiaga. Faatasi ai ma le faatagaga mai le epikopo, atonu e valaaulia foi ni tama o alii talavou e o mai i le vasega ma faasoa mai pe na faapefea ona faamalosia i latou e le Faaola i o latou tofotofoga.
Faaali atu le vitio “O Le a Siitia e le Atua i Tatou i Luga.” O le a faapefea ona tali e alii talavou le fesili na tuu mai e Elder Robert D. Hales i le amataga o le vitio? O le a le mea na faia e Brittany e sue ai le malosi e faatoilalo ai lona tofotofoga? Valaaulia alii talavou e mafaufau loloto ma tusi i lalo ni auala e mafai ona latou mulimuli ai i le faataitaiga a Brittany a o latou fetaiai ma o latou lava tofotofoga.

4:58
Fai atu i alii talavou e lisi mai nisi o mala ma faigata o fetaiai ma tagata. Iloilo faatasi o se vasega a le o le lauga a Elder Dallin H. Oaks “Faamalosia e ala i le Togiola a Iesu Keriso” po o le lauga a Epikopo W. Christopher Waddell “O Se Mamanu mo le Filemu,” vaavaai ai mo ni faamatalaga e uiga i le ala e mafai ai ona fesoasoani mai le Faaola ia i tatou i taimi o faigata. Tuu atu i alii talavou e faatino mai i se tala le fesoasoani atu i se uo o loo aafia i nisi o faafitauli sa latou lisiina mai. Fai atu ia i latou e faasoa mai ni malamalamaaga mai le lauga ao latou faatinoina mai i se tala. E mafai foi ona e faaalia le vitio “O Mauga e A'ea” ma valaaulia i latou e faasoa mai o latou malamalamaaga.

5:0

Fai atu i alii talavou e faasoa mai mea na latou aoaoina i le asō. Pe o latou malamalama i le auala e mafai ai e le Togiola ona fesoasoani ia i latou i taimi o o latou tofotofoga? O a ni lagona po o ni uunaiga ua latou maua? Pe i ai nisi a latou fesili? Pe aoga le toe faaalu o se isi taimi i lenei aoaoga faavae?

Motugaafa faafaiaoga

“O talanoaga i vaega toalaiti e mafai ona vave faaaofia ai i latou o e foliga mai ua vave ona mou atu le fiafia ma le naunautai” (O Le Aoao Atu, E Leai Se Isi Valaauga e Sili Ai [1999], 76).

Valaaulia e faatino

E faaiuina e le uso o le au peresitene o le korama lea o loo taitai le fonotaga. E mafai ona ia:

Faasoa atu se aafiaga sa fesoasoani ai le Faaola ia te ia e faafetaiaia se tofotofoga ma lui uso o le korama e faalagolago i le Faaola e faafetaiaia ai o latou tofotofoga.
Taitai se talanoaga i le auala e mafai ona faaaoga ai e uso o le korama mea na latou aoaoina i le aso e uunaia ai se tasi o loo manaomia le fesoasoani a le Faaola.