E mafai faapefea ona ou avea atili e faapei o Keriso?

Na faatuina e Iesu Keriso le faataitaiga atoatoa mo i tatou, ma ua Ia poloaiina i tatou ia avea faapei o Ia. Na Ia faataitai mai uiga paia e pei o le faatuatua, faamoemoe, alofa mama, onosai, lotomaualalo, amio mama, maelega, ma le usiusitai. A o tatou aoao e uiga ia te Ia ma saili atu e atiae Ona uiga, o le a avea i tatou ma e tauaveina le perisitua lea ua finagalo i ai o Ia ma lo tatou Tama Faalelagi e avea ai i tatou.

Saunia oe lava ia faaleagaga

O a nisi o uiga paia o Iesu Keriso? O fea o nei uiga paia e matuai manaomia lava ona e atinaeina? O ai na e vaai i ai pe na e iloaina i lou olaga o loo faataitaia nei uiga paia?

O a uiga paia faaKeriso o loo e vaaia i alii talavou taitasi o loo e aoaoina? O a uiga paia e manaomia ona latou atinaeina i le taimi nei ina ia avea atili ai ma ni tagata faamaoni e umiaina le perisitua?

Suesue ma le agaga tatalo mau ma punaoa nei. O le a se mea ua uunaia ai oe e faasoa atu i alii talavou?

Mataio 26:36–45; Luka 7:11–15; 23:33–34; Ioane 13:4–10 (O uiga paia o le Faaola na faaalia i Lona soifuaga)

Mosaea 3:19 (E ala i le Togiola a Iesu Keriso e mafai ai ona tatou avea ma Tagata Paia)

3 Nifae 27:27 (Ua poloaiina i tatou ia avea e faapei o Keriso)

Robert D. Hales, “Avea o se Soo o lo Tatou Alii o Iesu Keriso,” Ensign po o le Liahona, Me 2017, 46–48

Stephen W. Owen, “O Taitai Sili o Soo Sili Ia,” Ensign or Liahona, Me 2016, 70–76

Richard J. Maynes, “O Le Olioli o le Ola Ai i se Olaga e Faatotonugalemu ia Keriso,” Ensign po o le Liahona, Nov. 2015, 27–30

M. Russell Ballard, “O Le Tupulaga Silisili o Talavou Matutua,” Ensign po o le Liahona, Me 2015, 67–70

“Pe Faapefea Ona Ou Atiina Ae Uiga FaaKeriso?“ Talai La’u Talalelei (2004), 137–50

Vitio: “Areto E Tatau Male Aso: Suiga,” “Uiga faaKeriso”

2:48

2:54

Aoao atu i le ala a le Faaola

I soo se tulaga lava, o le Faaola o loo avea ma o tatou faataitaiga ma se faiaoga. O le taumafai ia avea atili e faapei o Ia ma atiina ae Ona uiga o le a fesoasoani ia te oe ia avea ma se faiaoga e sili atu ona lelei. A o e sauni e aoao atu, mafaufau i uiga faaKeriso o loo e manaomiaina ina ia mafai ai ona e aoaoina ia alii talavou.

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi o le Tiute i le Atua ), ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Valaaulia tagata taitoatasi o le korama e sue se mau e uiga i le aoaoga faavae na ia aoaoina i le lesona o le vaiaso ua tea ma faasoa atu i se isi tagata o le korama.
Tuu atu i alii talavou taitasi se kopi o le gaoioiga o uiga i le itulau 135 o le Tala'i La’u Talalelei, ma fai atu ia te ia e faaalu ni nai minute e faamaea ai le iloiloga a le tagata lava ia. Valaaulia alii talavou taitasi e faasoa mai se mea na ia aoaoina mai le gaoioiga. Valaaulia ni nai alii talavou e faasoa mai se uiga faaKeriso latou te faamemelo i ai i se isi tagata o le korama po o se tagata o le aiga.

Aoao faatasi

O gaoioiga taitasi o i lalo o le a fesoasoani i tagata o le korama e aoao ai i uiga paia o Iesu Keriso. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Valaaulia alii talavou e faitau le lauga a Elder Robert D. Hales “Avea o se Soo o lo Tatou Alii o Iesu Keriso” ma talanoa pe faapefea e uiga o se soo ona pei o se filo e lalaga faastasi i se ie. Atonu e fiafia alii talavou e fatu a latou lava faatusatusaga—e faaalia ai pe faapefea e le tele o vaega e galulue faatasi ona fatu ai se mea e tele atu—e fai ma sui o le auala tatou te atiina ae ai uiga faaKeriso. Valaaulia alii talavou e filifili se tasi o uiga faaKeriso mai le lauga ma se se sini e suesue e uiga i ai ma taumafai e atiina ae ia atoatoa.
Ina ia fesoasoani i alii talavou ina ia malamalama i le mafuaaga e tatau ai ona tatou faatotonugalemu o tatou olaga ia Iesu Keriso, e mafai ona e valaaulia i latou e fai se taaloga e aofia ai ni mea faitino e faapaleniina (e pei o le veloina o se mama po o le faapaleniina o ni poloka i se faaputuga maualuga). Faaali minute e fa muamua o le lauga a Elder Richard J. Maynes “O Le Olioli o le Ola Ai i se Olaga e Faatotonugalemu ia Keriso.” O a mea ua latou aoao e uiga i le taua o le faatotonugalemuina o o latou olaga i le Faaola mai le gaoioiga ma le lauga? Fai atu i tagata o le korama e galulue i ni paga e saili se tala i le lauga lea e taua ai faamanuiaga tatou te maua ao tatou faatotonugalemuina o tatou olaga ia Keriso. O a mea o le a latou faia ia sili atu ai ona faatotonugalemuina o latou olaga i le Faaola ma Ana aoaoga?
Ia tuu atu i alii talavou ni kopi o fesili e iva na fesiligia ai e Elder Russell M. Ballard alii talavou i lana lauga “O Le Tupulaga Silisili o Talavou Matutua ” (pe mafaufau e ta [i le laau] le vaega o le lauga lea e tuuina atu ai e Elder Ballard ia fesili). Valaaulia i latou e mafaufau loloto pe faapefea ona latou taliina fesili nei, ma fai atu ia i latou e mafaufau e uiga i soo se eria o o latou olaga lea e mafai ona latou faaleleia. O a ni uiga FaaKeriso e mafai e nei fesili ona fesoasoani ia i latou ia atiina ae?
Ia faamautinoa ua tofu uma alii talavou ma se kopi o le mataupu e 6 o le Talai La’u Talalelei. Valaaulia alii talavou e filifili se tasi o uiga paia faa-Keriso o loo faamatalaina mai i lenei mataupu lea latou te fia mananao ina ia faaleleia. Fai atu ia i latou e faasoa mai pe aisea e taua ai lena uiga paia ia i latou. Tuu atu ia i latou se taimi i le fonotaga a le korama e suesue ai i le uiga paia na latou filifilia, i le mulimuli ai i fautuaga o i lalo o le ulutala “Atiina ae o Uiga faaKeriso” i itulau 131–32 o le Talai La’u Talalelei.
Valaaulia alii talavou e faailoa o latou tiute faaleperisitua, e pei ona lisiina i le tusi o le Tiute i le Atua (tagai itulau 23 [tiakono], 46–47 [aoao], 70–71 [ositaulaga]), ma talanoaina ni tulaga eseese latou te ono oo i ai a o latou faataunuuina nei tiute (mo se faataitaiga, faiaoga o aiga i se aiga e le o taliaina le talalelei po o le tutu atu mo tulaga faatonuina a le Alii). O le a faapefea ona fesoasoani uiga paia o Keriso i alii talavou i nei tulaga? O ana fea na latou vaaia ai se uso a korama o faataitaia se tasi o nei uiga paia? E mafai e alii talavou ona toe suesue i le lauga a Stephen W. Owen, “O Taitai Sili o Soo Sili Ia” ma talanoa i ni faataitaiga o ni taitaiga faaleperisitua sa latou vaai i ai i o latou olaga. E faapefea ona avea Keriso ma faataitaiga sili o le avea ma taitai? E mafai faapefea ona tatou avea ma ni taitai e pei o Keriso ao tatou faataunuuina o tatou tiute faaleperisitua?
Fai atu i uso o le korama ia faitauina e le tagata lava ia se tasi o mau o loo fautua mai i lenei otootoga, faailoga upu ma fuaitau lea e faaalia mai ai nisi o uiga mama o le Faaola. Uunaia ia latou e vaavaai mo nei uiga mama ma isi ao latou matamata i le vitio “Uiga faaKeriso.” Tuu atu ia i latou se taimi e faasoa mai ai o latou lagona e uiga i le Faaola faapea ma uiga mama sa Ia faaalia. E faapefea ona latou atiinaeina nei uiga mama i o latou lava olaga? E mafai foi ona latou faasoa mai ni faataitaiga o ni tagata latou te iloa o e sa latou lagona na faataitaia nisi o nei uiga mama faaKeriso.

2:54

Fai atu i alii talavou e faasoa mai mea na latou aoaoina i le aso. O latou malamalama i le auala e avea atili ai e faapei o Keriso? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?