E mafai faapefea ona ou auauna atu i isi?

Ua faatuina e Iesu Keriso le faataitaiga atoa o le auala e alofa atu ai ma auauna atu ai i isi. I le avea ai ma e e umiaina le perisitua, ua i ai ia i tatou se tiute e auauna atu ai i isi. E mafai ona tatou auauna atu i isi e pei ona sa faia e le Faaola i le tele o auala, e aofia ai le faatautaia o sauniga o le perisitua, faasoaina atu o le talalelei i isi, ma le faatinoina o nai galuega faigofie o le agalelei i aso uma.

Saunia oe lava ia faaleagaga

Mafaufau i ni aafiaga na e mauaina a o auauna atu i isi. O a ni taunuuga o lau auaunaga? O a ni aafiaga e mafai ona e faasoaina atu o le a fesoasoani ai i alii talavou ia lagonaina le taua o le auauna atu?

O anafea na e vaaia ai alii talavou o auauna atu i isi? O a ni aafiaga e mafai ona faasoa atu e alii talavou i le tasi ma le isi? Aisea e taua ai le aoaoina o le auala e tuu atu ai auaunaga faaKeriso?

A o e suesueina tusitusiga paia ma isi punaoa e uiga i auaunaga, tagai mo mea o le a musuia ai alii talavou e tuuina atu ai ia auaunaga faaKeriso.

Mataio 25:31–46; Mosaea 2:17 (A tatou auauna atu i isi, ua tatou auauna atu lava i le Atua)

Ioane 13:34–35 (E tatau ona tatou alolofa atu i isi e pei ona alofa mai le Faaola ia i tatou)

Iakopo 1:27 (O le amio Atua o le asiasi atu lea i e matuaoti ma fafine ua oti a latou tane)

1 Nifae 2:16–18; 3:1–7, 28–31; 4:1–2; 17:7–19, 50–51; 18:1–4 (O uiga o Nifae ma Lamana ma Lemuelu na tali atu ai i tofiga)

Mosaea 18:8–10 (E tatau ona tatou naunau e faamafanafana i latou o manaomia le faamafanafanaga)

Faataunuuina o Lo’u Tiute i le Atua (2010), 27, 51, 75,

Henry B. Eyring, “Fusi i o Latou Manua,” Ensign po o le Liahona, Nov. 2013

“Auauna Atu,” Mo Le Malosi o le Autalavou (2011), 32–33

Vitio: “Faasaoina o e le Tagolima,” “O Vae o Dayton,” “Pe a Tatou Faagalo ia i Tatou Lava”

5:3

3:2

3:43

Aoao atu i le ala a le Faaola

I le taimi o Lana auaunaga i le lalolagi, sa faaalu ai e Iesu Keriso Lona taimi e auauna atu ai ma fesoasoani ia i latou na vagaia o Ia. E faapena foi ona faia e soo moni o Keriso. Sa aoao mai le Faaola, “O le mea lea e iloa ai e tagata uma lava o o’u soo outou, pe afai ua outou fealofani” (Ioane 13:35). A o e aoaoina alii talavou, tagai mo avanoa e valaaulia ai i latou e faasoa mai pe faapefea ona latou auauna atu i isi ma po o le a foi le mea o uunaia i latou e auauna atu.

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi o le Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Tusi le autu o le lesona o le vaiaso ua tea i luga o le laupapa, ma tuu atu i alii talavou taitasi ia tusi vave se mea na ia aoaoina pe na faaaogaina mai le lesona.
Valaaulia alii talavou e faasoa mai ni aafiaga na latou mauaina talu ai nei a o auauna atu i isi (afai e mafai, tuu atu ia i latou e faasoa mai se galuega fesoasoani a le korama po o le tagata lava ia na latou faataunuuina o se vaega o a latou fuafuaga o le Tiute i le Atua). Na faapefea ona aafia i latou e ala i lenei auaunaga? Na faapefea ona aafia ai isi?
Fai atu i alii talavou e faasoa mai ni aafiaga latou te iloa e uiga i tagata o e na laveaiina faaletino i se taimi faigata. E faapefea lagona masani o ni tagata e uiga i se tasi na fesoasoani ia i latou? Matamata i le vitio “Faasaoina o e le Tagolima,” ma valaaulia ia alii talavou e talanoa i mea sa latou aoaoina mai ia Peresitene Monson e uiga i le auauna atu i isi e pei ona faia e le Faaola.

5:3

Aoao faatasi

O le faamoemoega o lenei lesona ia fesoasoani lea i alii talavou taitoatasi ia malamalama i le auala e faataunuu ai lona tiute faaleperisitua e auauna atu ai i isi. I le avea ai ma se vaega o lenei lesona, e tatau i tagata o le korama ona faia ni fuafuaga i a latou tusi o le Tiute i le Atua e faataunuu ai lenei tiute.A o lei amataina le fonotaga faalekorama, valaaulia alii talavou e aumai a latou tusi o le Tiute i le Atua i le lotu.I fonotaga faalekorama i le lumanai, valaaulia i latou e faasoa mai aafiaga latou te maua a o latou faataunuuina a latou fuafuaga.

Vaevae mau nei i alii talavou: Mataio 25:31–46; Ioane 13:34–35; Mosaea 2:17; Iakopo 1:27; ma le Mosaea 18:8–10. Fai atu ia i latou e saili mo ma tusi i lalo ni mea na latou aoaoina e uiga i le auauna atu i isi mai nei fuaiupu (tagai i leTiute i le Atua, 26). A uma ona latou faasoaina mai mea na latou mauaina i fuaiupu, valaaulia i latou e faasoa mai ni aafiaga patino o auala o loo faamanuiaina ai i latou e ala i le auauna atu i isi.
Valaaulia tagata o le korama e faitau ia fuaitau o mau nei ma faatusatusa ia uiga o Nifae ia Lamana ma Lemuelu a o latou tali mai i tofiga: 1 Nifae 2:16–18; 3:1–7, 28–31; 4:1–2; 17:7–19, 50–51; 18:1–4 (mafaufau e fai atu ia i latou e tusi a latou tali i luga o le laupapa). Fai atu ia i latou e mafaufau po o a ni o latou uiga sa i ai i le taimi mulimuli na tuu atu ai ia i latou se avanoa e auauna atu ai i isi. Valaaulia alii talavou e tusi i le avanoa ua tuu atu i le itulau 50 o le tusi o le Tiute i le Atua, ni fasifuaitau mai la latou suesuega o loo fai ma faatusa o uiga e tatau ona tatou maua ai pe a faataunuuina ia tofiga faaleperisitua.
Faaali atu se vitio se tasi po o vitio uma e lua o loo fautuaina mai i le otootoga, ma fai atu i alii talavou e tagai mo faamanuiaga e oo mai mai le auauna atu i isi, e aofia ai tagata o le latou korama. Tuu atu i tagata o le korama e sailiili a latou tusi o le Tiute i le Atua ma faailoa ni auala e mafai ona latou auauna atu ai i isi i le avea ai ma e e umiaina le Perisitua Arona (tagai i itulau 23 [tiakono], 47 [aoao], po o le 71 [ositaulaga]). Fai atu i alii talavou e mafaufau loloto i ni auala e mafai ona latou faamalosia ai le latou korama e ala iauaunaga.
Faaali atu se ata o Henry B. Eyring ao avea ma alii talavou. Faitau e uiga i aafiaga a Peresitene Eyring o se ositaulaga o asiasi atu i tagatama lana epikopo. O le a se mea o aoao e alii talavou e uiga i le auauna atu i isi mai aafiaga o Peresitene Eyring? O a aafiaga e mafai ona latou faasoa mai o latou lava olaga?

A maea ona faatinoina e alii talavou se gaoioiga se tasi pe sili atu foi o loo i luga, ia fai mea nei:

Valaaulia tagata o le korama e sue i le vaega o le “Auauna Atu i Isi” o le latou tusi o le Tiute i le Atua (itulau 26–27 [tiakono], 50–51 [aoao], po o le 74–75 [ositaulaga]). Valaaulia tagata taitoatasi o le korama e tusi i lalo se fuafuaga patino e tuu atu ai se auaunaga. Mo se faataitaiga, e mafai ona latou fuafua e mulimuli i le fautuaga a Elder M. Russell Ballard e tatalo i aso taitasi mo ni avanoa e auauna atu ai i isi (tagai “Ia Auai ma le Naunautai,” Ensign po o le Liahona, Nov. 2012, 29–31). Ona valaaulia lea o le peresitene o le korama e taitai se talanoaga e uiga i se mea e mafai e le korama ona fai e auauna atu ai i isi, ma fai atu i alii talavou e tusi le fuafuaga lea i a latou tusi.

Fuafuaga o le Tiute i le Atua

Tuu atu se taimi i le faaiuga o le fonotaga a le korama mo alii talavou e fai ai ni fuafuaga i totonu o a latou tusi o le Tiute i le Atua po o totonu o le lomiga i le initoneti o le Tiute i le Atua.O nei fuafuaga e patino, ae e mafai e tagata o le korama ona fesoasoani i le tasi ma le isi e fatufatu ni manatu mo a latou fuafuaga.

Valaaulia e faatino

O le alii talavou o loo taitai e faaiuina le fonotaga. E mafai ona ia:

Faasoa atu lana fuafuaga e auauna atu ai i se tasi ma valaaulia alii talavou e faataunuu a latou fuafuaga.
Faamalamalama atu o le a valaauliaina tagata o le korama e faasoa mai ni aafiaga latou te mauaina a o auauna atu ai i isi i vaiaso o loo loma.