E mafai faapefea ona ou atiaeina le alofa faa-Keriso?

O le alofa le pona o Keriso, lea ua iloaina o le alofa mama, o le ituaiga o alofa silisili ona maualuga, malualii, ma malosi ma e aupito sili ona olioli ai le agaga (tagai 1 Nifae 11:23). O Iesu Keriso o le faataitaiga atoa o le alofa mama. O Lana galuega i le olaga nei, sa Ia “femaliuai ma agalelei,” i le faaalia o le agaalofa mutimutivale mo tagata matitiva, mafatia, ma faanoanoa (tagai Mataio 4:23; Galuega 10:38). Ina ia maua le alofa Faa-Keriso, e tatau ona tatou sailia, tatalo ia maua, ma mulimuli i le faataitaiga a le Faaola i o tatou mafaufauga, upu, ma amioga.

Saunia oe lava ia faaleagaga

O le a se taimi na faaalia ai e isi le alofa faaKeriso ia te oe? O le a se aafiaga o lenei mea ia te oe? O le a se taimi na e lagonaina ai le alofa faaKeriso? E faapefea ona e atinaeina le alofa faaKeriso mo isi?

O a ni avanoa e maua e alii talavou e faaali atu ai le alofa faaKeriso? Aisea e taua ai lo latou aoaoina o le auala e alofa atu ai i isi e pei ona sa faia e Keriso?

Ia suesue ma le agaga tatalo mau nei ma punaoa, ma filifili mau na e sili ona faatatau i alii talavou.

1 Samuelu 16:7 (E vaai le Alii i le loto)

Luka 10:30–37 (Faataoto o le Samaria agalelei); tagai foi i le vitio o le Tusi Paia “Faataoto o le Samaria Agalelei”

5:12

Luka 23:33–34 (Na faamagaloina e Iesu fitafita Roma na faasatauroina o Ia)

Ioane 15:9–13 (Na faaalia e Keriso Lona alofa mo i tatou e ala i le foai mai o Lona ola)

1 Ioane 4:7–11, 18–21 (O le Atua e alofa)

Moronae 7:45–48 (E mafai ona tatou tatalo ina ia faatumulia i le alofa mama, le alofa le pona o Keriso)

Thomas S. Monson, “Agalelei, Alofa Mama, ma le Alofa,” Ensign po o le Liahona, Me 2017, 66–67

Dieter F. Uchtdorf, “O Le Alofa Atoatoa e Faateaeseina ai le Fefe,” Ensign po o le Liahona, Me 2017, 104–7

Thomas S. Monson, “Alofa—o le Ute o le Talalelei,” Ensign po o le Liahona, Me 2014, 91-94

Dieter F. Uchtdorf, “O Le e Alofa Atu e Alofaina Mai,” Ensign po o le Liahona, Me 2012, 70–77

Dallin H. Oaks, “Ola Faatasi ma Alolofa atu i Isi e Eseese o Tatou Talitonuga, ”Ensign po o leLiahona, Nov. 2014, 25-28

“Alofa,” Faamaoni i le Faatuatua (2004), 14–15

Vitio: “Faasoaina Atu o le Malamalama o Keriso,“ “Ia Tatou Faatamatane,” “O Vae o Dayton,” “Bullying—Stop It”

5:20

3:12

3:2

10:13

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi o le Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina mo le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Valaaulia alii talavou e mafaufau i se mea se tasi na latou faaaogaina mai le lesona o le vaiaso ua tea ma faasoa mai i le korama po o ni vaega laiti.
I luga o ni nai laupepa, tusi ai le fasifuaitau “Sa ou lagonaina le alofa silisili mai se tasi i le taimi na ___________.” Tufa atu nei fasi pepa i alii talavou taitoatasi a o lei amataina le fonotaga a le korama, ma fai atu i alii talavou taitoatasi e mafaufau i le auala o le a ia faatumuina ai le avanoa. Valaaulia alii talavou e faasoa mai o latou manatu e amata ai le lesona.

Aoao faatasi

O gaoioiga taitasi o i lalo o le a fesoasoani i tagata o le korama e aoao ai i le auala e atiina ae ai le alofa faaKeriso. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Valaaulia alii talavou e faitau le Ioane 15:9–13; 1 Ioane 4:7–11, 18–21; ma le Moronae 7:47–48. O a ni mea ua aoaoina e alii talavou mai i nei fuaiupu e uiga i le atiina ae o le alofa faaKeriso? O le a faapefea ona fesoasoani nei uiga ia i latou e avea atili ai ma ni auauna mataalia o le perisitua? Valaaulia sui o le korama e saili ni tala i tusitusiga paia lea e faaalia ai le alofa o le Faaola, ma fai atu ia i latou e faasoa mai nei tala i le tasi ma le isi. E mafai faapefea ona tatou mulimuli i le faataitaiga a le Faaola? E mafai foi ona latou faitau ma talanoaina tala i se tasi o lauga o loo lisi atu i lenei otootoga pe faasoa mai ni faataitaiga o ni taimi na faamanuiaina ai i latou po o tagata latou te iloa e galuega o le alofa faaKeriso.
O mea uma sa faia e Iesu Keriso mo i tatou sa faia ona o le alofa atoatoa—mo i tatou ma mo Lona Tama. E mafai faapefea ona tatou atiae le tomai e usitai ai ona o le alofa atoatoa, e pei ona faia e le Faaola, ae le ona o le fefe? Vaevae le korama i ni vaega se lua e suesue le lauga a Peresitene Dieter F. Uchtdorf “O Le Alofa Atoatoa e Faateaeseina ai le Fefe.” Tofi se tasi o vaega e faasoa mai mea na latou aoaoina mai i vaega ua faaulutaina “Fefe e pei o le Puleaina” ma le “O Le Faafitauli o le Fefe” ma le isi vaega e faasoa mai mea na latou aoao i vaega na faaulutalaina “O Se Auala Sili Atu” ma le “O Le Alofa Atoatoa e Faateaeseina ai le Fefe.” Tuu atu i alii talavou se taimi e tusi ai o latou manatu i fesili nei: O a ni auala o loo noatia ai au e faia mea ona o le fefe? O a ni mea e mafai ona ou faia e atiina ae ai le alofa faaKeriso? O a ni mea ou te manao e sui ona o mea sa ou aoaoina?
Aumai ni fasi pepa i le vasega (e tasi le pepa mo alii talavou taitasi) ma se upu e tasi nei i le pito i luga: Agalelei, Alofa Mama, ma le Alofa. Tuu atu se fasi pepa i alii talavou taitasi, ma valaaulia o ia e saili le lauga a Peresitene Thomas S. Monson “Alofa—o le Ute o le Talalelei” ma le “Agalelei, Alofa Mama, ma le Alofa,” ma vaavaai mo se faamatalaga po o se tala e aoao mai e uiga i le upu o loo i luga o lana pepa. Valaaulia ia alii talavou e faasoa mai mea sa latou mauaina. O a ni avanoa o tatou maua o se korama e atili ai ona agalelei, alofa, ma lima foai?
Valaaulia alii talavou e suesue i le Luka 10:25–29 ma faailoa ia fesili na fesiligia ai e le loia le Faaola. Faamalamalama atu o le tali atu i nei fesili, na tuu atu ai e le Faaola le faataoto o le Samaria agalelei. Tofi ni alii talavou e fai ma nisi o tagata i le faataoto, ma fai atu ia i latou e faatino le tala a o outou faitauina faatasi (fuaiupu 30–35). Fai ma taofi e fesili atu ai ia i latou o loo fai ma sui o le sa Levi, le ositaulaga, ma le Samaria pe aisea ua latou amio ai i le ala na latou faatino ai, ma talanoaina a latou tali o se korama. Faitau le poloaiga a le Faaola i le loia i le fuaiupu 36–37, ma valaaulia alii talavou e faasoa mai ni tulaga atonu o loo fetaiai ma i latou ia e tali tutusa ma le tulaga i le faataoto.
O se korama, faitau, matamata, pe faalogologo i vaega o le lauga a Elder Dallin H. Oaks “Ola Faatasi ma Alolofa atu i Isi e Eseese o Tatou Talitonuga.” Fai atu i alii talavou e vaavaai mo fautuaga lena o le a fesoasoani ia i latou e alofa atu ai isi i taimi faigata. O a nisi mea e mafai e alii talavou ona aoao ai e ala i le suesueina o se faataitaiga faaletusitusiga paia o se tagata na faaalia le alofa ia i latou o e na faasaua pe faaita ia te ia? O faataitaiga e mafai ona i ai e aofia ai le Faaola (tagai Luka 23:34), Iosefa i Aikupito (tagai Kenese 45), poo Paorana (tagai Alema 61:9). Valaaulia alii talavou e mafaufau loloto ma le le leoa i se tasi i o latou olaga atonu o loo i ai ni o latou lagona le lelei agai i ai ma mafaufau i ni auala e mafai ona latou faaali atu ai se alofa faaKeriso sili atu i lena tagata.
Maimoa i se vitio se tasi pe sili atu o loo fautuaina atu i le otootoga lenei. O a mea ua aoaoina e alii talavou e uiga i le alofa faaKeriso mai nei vitio? E faapefea ona ese ia savali o vitio mai mea o loo aoao e le lalolagi e uiga i le faatamatane? Fai atu i alii talavou e faasoa mai se aafiaga lea sa fesoasoani ai se tagata ia i latou ia lagona le alofa o le Faaola. O le a le mea na aoao atu e lena aafiaga ia i latou e uiga ia Iesu Keriso? Valaaulia alii talavou e mafaufau i se tasi latou te iloaina atonu o loo manaomia ona lagonaina le alofa o le Alii. O le a se mea e mafai ona latou faia e fesoasoani ai i lena tagata?

Fai atu i alii talavou e faasoa mai mea na latou aoaoina i le aso. Pe o latou malamalama i le auala e atiina ae ai le alofa faaKeriso? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

”O le faalogo o se faailoga lea o le alofa. E masani ona manaomia ai le ositaulaga. Pe a tatou faalogo moni atu lava i isi, e masani ona tatou tuuese mea tatou te mananao e fofogaina atu ina ia mafai ona faaalia mai o latou lava lagona.” ( O Le Aoao Atu, e Leai Se Isi Valaauga E Sili Ai [1999], 69).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Faasoa atu ona lagona e uiga i le auala e fesootai ai le alofa faaKeriso ma le faataunuuina o se auaunaga faaleperisitua.
Valaaulia alii talavou e faatino ia uunaiga ua latou mauaina i le taimi o le fonotaga a le korama e atiina ae ai le alofa faaKeriso ma faaleleia a latou sootaga ma isi.