Aisea e taua ai ona loto faafetai?

E finagalo le Alii ia tatou maua se agaga o le loto faafetai i mea uma tatou te faia ma tautatala ai. Pe a tatou loto faafetai, o le a tatou maua se fiafiaga sili atu ma le faamalieina i o tatou olaga. O le a tatou iloaina le uunaiga ma faamanuiaga a le Alii.

Saunia oe lava ia faaleagaga

O a nisi o mea ua matua sili ona e loto faafetai ai? Ua faapefea ona faateleina e le loto faafetai lou fiafia?

O le a se mea e faia e alii talavou e atiina ae ai se uiga o le faafetai? E faapefea e le mauaina o se uiga o le loto faafetai ona avea ma se faamanuiaga ia i latou i le taimi nei ma le lumanai?

Ia suesue ma le agaga tatalo ia mau ma punaoa nei. O le a se mea e te lagonaina o le a fesoasoani i alii talavou e atiina ae ai se uiga o le loto faafetai?

Luka 17:11–19 (Ua faamalolo e Iesu Keriso ia lepela e toasefulu, ae toatasi na toe foi atu ma faafetai ia te Ia)

Mosaea 2:20–24 (Ua aoao i tatou e le Tupu o Peniamina i le mafuaaga tatou te manaomia ai ona vivii atu ma faafetai i le Alii)

MF&F 59:7, 15–21 (E tatau ona tatou faafetai atu i mea uma)

Henry B. Eyring, “Lotofaafetai i le Aso Sapati,” Ensign po o le Liahona, Nov. 2016, 99-102

Dieter F. Uchtdorf, “Ia Lotofaafetai i Soo Se Tulaga,” Ensign po o le Liahona, Me 2014, 70-77

Russell M. Nelson, “Ia Faafetaia le Atua,” Ensign po o le Liahona, Me 2012, 77–79; tagai foi i le vitio “Ave Le Faafetai”

1:29

“Loto Faafetai,” Mo Le Malosi o le Autalavou (2011), 18

“Ua Sili Oe,”Viiga, nu. 46; “Faitau Ou Manuia,” Viiga, nu. 151

Aoao atu i le ala a le Faaola

Sa valaaulia e le Faaola isi e galulue i le faatuatua ma ola i upumoni sa Ia aoaoina atu. Na maua e Ia [le Faaola] avanoa mo Ona soo e aoao ai mai aafiaga maoae. O le a se mea e mafai ona e faia e fesoasoani ai i alii talavou ia vaaia le mana o le loto faafetai i o latou olaga?

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi o le Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Fai atu i se alii talavou e tusi se ata i luga o le laupapa e faamanatu atu ai ia te ia se mea na ia aoaoina i le vaiaso ua tea.
Atofa atu i alii talavou taitasi se mataitusi o le alafapeta, ma tuu atu ia te ia se minute se tasi e lisi ai faamanuiaga uma e mafai ona ia mafaufau i ai e amata i lena mataitusi. Aisea tatou te le amanaia ai i nisi taimi ni faamanuiaga e foliga itiiti ua tuuina mai e le Alii ia i tatou? Fai atu i se uso o le korama e faitau le Mataupu Faavae ma Feagaiga 46:32 po o le 59:21. E mafai faapefea ona tatou faaali atili atu le loto faafetai mo “soo se faamanuiaga ua faamanuiaina ai [tatou]”?

Aoao faatasi

O gaoioiga taitasi o loo i lalo o le a fesoasoani i tagata o le korama e malamalama ai i le taua o le loto faafetai. I le mulimuli ai i le musumusuga a le Agaga, filifili se gaoioiga se tasi pe sili atu o le a sili ona aoga mo lau korama:

Tusi fesili nei i le laupapa: Aisea e taua ai le lotofaafetai? O le a se mea e mafai ona ou faia, aemaise lava i le aso Sapati, ina ia maua atili ai le lotofaafetai? Valaaulia alii talavou taitasi e filifili se tasi o fesili ma tagai mo tali i le saunoaga a Peresitene Henry B. Eyring “Lotofaafetai i le Aso Sapati.” A maea ona latou faia, tuu atu ia i latou e faasoa mai mea sa latou mauaina, ma fai atu ia i latou e fai se fuafuaga e faatino ai se tasi o fautuaga a Peresitene Eyring.
Valaaulia alii talavou e faitau le Luka 17:11–19 ma faasoa mai po o le a se mafuaaga latou te manatu na ala ai ona le faafetai atu lepela e toaiva o le toasefulu i le Faaola. O a nisi o mea e ono taofia i tatou mai le faailoa atu o le loto faafetai? Valaaulia alii talavou e mafaufau e uiga i se faamanuiaga ua latou mauaina lea atonu latou te le i faailoa atu ai se loto faafetai talafeagai. Aisea e taua ai le faailoa atu o le faafetai? O le a se mea latou te faia e faaalia ai le loto faafetai?
Faamatala pe faitau atu le tala o le i’a mai le lauga a Elder Russell M. Nelson “Ia Faafetaia le Atua.” Fai atu i alii talavou pe na latou fesoasoani atu ea i nisi (e pei o le tausimea i lenei tala) e aunoa ma le faafetaia. Vaevae le vaega o totoe o le lauga i vaega faaulutala, ma atofa atu i alii talavou taitasi e faitau se vaega. Fai atu i alii talavou e tusi i lalo se mea ua latou aoaoina e uiga i le lotofaafetai ma se mau e fesootai i le mea na latou aoaoina (fautua atu i ai e mafai ona latou faaaogaina le Taiala i Tusitusiga Paia). Faataga alii talavou e faasoa mai mea na latou tusia ma faamatala mai se taimi na latou lagonaina ai le loto faafetai mo se tasi o meaalofa a le Atua.
Totofi ia sui taitasi o le korama e suesue se vaega o le saunoaga a Peresitene Dieter F. Uchtdorf “Ia Lotofaafetai i Soo se Tulaga,” e aunoa ma le tuuina atu ia i latou o autu o a latou vaega. Fai atu i ai e tusi a latou lava autu—fuaitau po o fuaiupu latou te lagona o aotele mai ai mea sa latou suesueina. Fai atu ia i latou e faasoa mai a latou autu ma soo se mea sa latou aoao mai i le fautuaga a Peresitene Uchtdorf e uiga i le lotofaafetai. O le a se mea e mafai ona latou faia e atina ae ai le uiga o le lotofaafetai o loo famatalaina e Peresitene Uchtdorf?
I le avea ai ma se korama, faitau ia fuaitau o mau ma usu ia viiga o le faamanu ma le faafetai, e pei o na viiga o loo lisiina i lenei otootoga. Valaaulia alii talavou e tagai mo fasifuaitau e uiga i mea ia latou te lagona ai foi le loto faafetai po o le faamanu. Valaaulia i latou e faasoa mai ni fasifuaitau na latou filifilia, faamalamalama mai pe aisea na latou filifilia ai, ma faailoa mai o latou lava lagona o le loto faafetai.

Fai atu i alii talavou e faasoa mai mea na latou aoaoina i le aso. Pe ua latou malamalama i le taua o le loto faafetai? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Valaaulia e faatino

O le alii talavou o loo taitai e faaiuina le fonotaga. E mafai ona ia:

Faasoa atu se mea ua ia loto faafetai ai ma valaaulia alii talavou e faafetai atu i le Tama Faalelagi mo se mea latou te lei faafetai muamua ai lava ia te Ia.
Uunai alii talavou e tusi i lalo ni nai mea latou te loto faafetai ai i aso taitasi.