E mafai faapefea ona ou aoao ina ia onosai atili?

O le onosai o le malosiaga lea e tumau ai i mea e tuai ona oo mai, faafitauli, mea faafeagai, po o puapuaga e aunoa ma le ita, le fiafia, po o le atuatuvale. E mafai ona tatou atinaeina le onosai e ala i le saili atu e fai le finagalo o le Atua ma taliaina Lana taimi, faatuatuaina o le a Ia faataunuuina Ana folafolaga uma ia i tatou. Ao tatou aoao ia onosai i nai mea iti, ua tatou saunia i tatou lava e fetaiai ma tofotofoga tetele atu ma le onosai.

Saunia oe lava ia faaleagaga

O a ni aafiaga ua aoaoina ai oe e uiga i le onosai (e aofia uma ai ni tofotofoga tetele ma ni aafiaga laiti ifo)? O le a se mea na fesoasoani ia te oe e atiina ae ai le onosai? Na faapefea ona faamanuia e le onosai lou olaga?

O a ni faatosinaga o loo feagai ma alii talavou i malo i nei aso e ono taitai atu ai i latou i le le onosai? O le a se mea e manaomia ona malamalama ai alii talavou e faatatau i uiga o le onosai? O le a faapefea ona fesoasoani ia i latou i lo latou lumanai?

Ia suesue ma le agaga tatalo ia mau ma punaoa nei. O le a se mea ua musuia ai oe e faasoa atu i alii talavou?

Iopu 1; 19:25–26 (O le faataitaiga a Iopu)

Salamo 37:7–9; Luka 21:19; Eperu 10:35–36; Mosaea 23:21–22; Alema 26:27; MF&F 24:8 (E oo mai faamanuiaga ia i latou e onosai)

Roma 5:3; Iakopo 1:3 (E faamalosia e faafitauli le onosai)

Dieter F. Uchtdorf, “Faaauau i le Onosai,” Ensign po o le Liahona, Me 2010, 56–59; tagai foi i le vitio “Faaauau i le Onosai”

2:46

Robert C. Oaks, “O Le Mana o le Onosai,” Ensign po o le Liahona, Nov. 2006, 15–17

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi o le Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Fai atu i alii talavou taitasi e tusi i luga o le laupapa se fuaiupu se tasi e aotele ai mea na ia aoaoina i le lesona o le vaiaso ua tea.
Tusi le autu o le lesona lenei i luga o le laupapa, ma faitau le palakalafa i le amataga o le otootoga lenei. Valaaulia alii talavou e faasoa mai ni tulaga e mafai ona oo i ai i o latou olaga ia o le a latou manaomia ai le onosai (e pei o le aoga, faaipoipoga, po o galuega). Faaali atu ni nai mea faitino e fai ma faatusa o taimi i lou olaga na ao ai ona e faaali atu le onosai (mo se faataitaiga, se tipiloma i le kolisi, se mama faaipoipo, po o se pine faifeautalai). Tuu atu ia i latou e mate mai po o le a le faatatauga o mea faitino i le onosai, ona faasoa atu lea o aafiaga na e mauaina.

Aoao faatasi

O gaoioiga taitasi o loo i lalo o le a fesoasoani i tagata o le korama e malamalama ai i le taua o le onosai. I le mulimuli ai i le uunaiga a le Agaga, filifili se gaoioiga se tasi pe sili atu o le a sili ona aoga mo lau korama:

Tusi i luga o le laupapa ia faaulutala “Onosai” ma le “Le Onosai.” Tuu atu i alii talavou taitasi se tasi o mau nei e uiga i le onosai ua fautuaina mai i lenei otootoga. Valaaulia alii talavou e faitau leotele auauai a latou mau, talanoaina mea ua latou aoaoina, ma tusi i luga o le laupapa ia faamanuiaga o le onosai po o taunuuga o le le onosai. O a nisi faamanuiaga ma taunuuga e mafai ona latou faaopoopo atu i a latou lisi? Valaaulia alii talavou taitasi e tusi i luga o se fasi pepa se tulaga o le a manaomia ai le onosai (uunai i latou e faaaofia ai e le gata o mea tiga tetele ae o le ita foi mai lea aso i lea aso po o ni mea le talafeagai). Tuu atu ia i latou e faafesuiai ia pepa ma se isi alii talavou, tusi se tali o le a faaalia ai le onosai, ona faasoa mai lea i le korama po o a mea ua latou tusiaina.
Faasoa atu le tala o le onosai o se tama mai le lauga a Elder Robert C. Oaks “O Le Mana o le Onosai,” ma valaaulia alii talavou e faasoa mai soo se tala latou te iloaina e uiga i le onosai. Tuu atu i alii talavou taitasi se vaega o lenei lauga lea e te manatu e ono aoga. Valaaulia o ia e faitau ma aotele atu i le korama. O le a se mea ua latou aoaoina mai lenei lauga ua musuia ai i latou e faalagolago atu i le Alii ma Lana taimi? O a nisi o mafuaaga tatou te le onosai ai? E mafai faapefea ona tatou faatoilaloina lenei uiga?
Faaali atu i alii talavou ni pepa lautele o i ai savali o le Mormonad mai ni lomiga lata mai o le Liahona. Vaevae le korama i ni vaega laiti, ma valaaulia i latou e fatu a latou lava Mormonad i le autu o le onosai. E mafai ona latou amata i le sueina o se mau e uiga i le onosai (e pei o mau na e lisi atu i lenei otootoga) ma mafaufau i se ala fatufatua’i e faaali ai i luga o se pepa lautele e i ai se savali. Fai atu ia i latou e faasoa atu a latou pepa lautele o i ai se savali i le korama ma faamalamalama atu po o le a le uiga o le onosai ia i latou. (I le avea ai ma se vaega o lenei talanoaga, atonu e te manao e faasoa atu i le korama le uiga o le onosai o loo maua i le amataga o lenei otootoga.)
Faaali atu le vitio o le “Faaauau i le Onosai,” ma valaaulia alii talavou e talanoaina mea ua latou aoaoina mai le faataitaiga o le marshmallow. O a nisi o tulaga ia e oo ina le onosai ai alii talavou? Valaaulia alii talavou taitasi e faitau se vaega se tasi mai le lauga a Peresitene Dieter F. Uchtdorf “Faaauau i le Onosai,” ma fai atu ia te ia e aotele atu mo le korama atoa se mea ua ia aoaoina mai le vaega na ia faitauina. E mafai faapefea e le fautuaga a Peresitene Uchtdorf ona fesoasoani i alii talavou ia onosai atili?

2:46
Valaaulia se tagata o le korama e toe faamatala le tala ia Iopu (tagai Iopu 1). Aisea e manatu ai alii talavou na mafai e Iopu ona fetaiai ma ona tofotofoga ma le onosai tele? Na faapefea e lona faatuatua i le Faaola ona fesoasoani ia te ia (tagai Iopu 19:25–26)? Valaaulia le korama e fautua mai ni mea patino e mafai ona latou faia e faatoilalo ai lagona o le le onosai—i taimi o faigata tetele, e pei o mea na fetaiai ma Iopu, ma tofotofoga laiti o aso uma.
Faitau o se korama le palakalafa 9 e oo i le 17 o le lauga a Elder Robert D. Hales “Faatalitali i le Alii: Ia Faia Lou Finagalo,” e tagai ai mo ni tali i le fesili “O le a le uiga o le faatalitali i le Alii?” Mo nisi malamalamaaga, valaaulia alii talavou e tagai i mau ua sii mai e Elder Hales ma faasoa mai soo se mea lava ua aoao ai i latou e nei mau e uiga i le onosai. E mafai faapefea e alii talavou ona faaaogaina upu a Elder Hales po o nei mau e fesoasoani ai i se tasi ua tauau ina leai se faamoemoe?

Fai atu i alii talavou e faasoa mai mea na latou aoaoina i le aso. Pe ua latou malamalama i le taua o le onosai? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“E mafai ona e faaalia o loo e faalogo atu e ala lea i lou faailoa atu o se foliga o le naunau. E mafai ona e vaai i le tagata o loo tautala nai lo anomea o lau lesona po o nisi mea o loo i totonu o le potu. E mafai ona e uunaia le tagata o loo tautala e faauma ona manatu e aunoa ma le faalavelaveina. E mafai ona e aloese mai le faasalaveia o talanoaga ae lei taitai i ni fautuaga po o ni faaiuga” (O Le Aoao Atu, E Leai Se Isi Valaauga E Sili Ai [1999], 69).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Faasoaina mai ona lagona e uiga i le onosai ma valaaulia tagata o le korama e faaali atu se onosai atili i o latou aiga i le vaiaso a sau.
Valaaulia isi tagata o le korama e faaali mai se mau po o se faamatalaga e uiga i le onosai (po o le Mormonad na latou fatuina) i se nofoaga o le a faamanatu mai ai ia i latou ia onosai.