Tiute i le Atua

E faapefea ona avea au ma se faifeautalai i le taimi nei?

Ua tuuina mai e le Alii i uso taitoatasi ua umia le Perisitua Arona le tiute e valaaulia tagata uma e o mai ia Keriso (tagai MF&F 20:59). Ua valaaulia foi e perofeta a le Alii alii talavou agavaa uma, ma malolosi i le Ekalesia e auauna atu i se misiona faafaifeautalai. O le faataunuuina o la tatou tiute i le Perisitua Arona o le valaauliaina lea o tagata uma ia o mai ia Keriso e fesoasoani ia i tatou e saunia ai mo le auaunaga faafaifeautalai i le lumanai. I lenei auala, ua tatou fesoasoani e fausia le malo o le Atua.

Saunia oe lava ia faaleagaga

O a ni aafiaga na e maua i le faasoaina atu o le talalelei i isi? Na faapefea e isi ona faasoa mai le talalelei ia te oe? Afai na e auauna atu faafaifeautalai, o le a se mea na e faia e saunia ai mo le misiona? I le toe tepa i tua i le taimi nei, o le a se isi mea semanu e te faia e saunia ai?

O le a se taunuuga o le faasoaina atu o le talalelei mo alii talavou? E mafai faapefea ona e fesoasoani ia i latou e saunia mo le galuega faafaifeautalai i le taimi nei ma le lumanai?

Suesue ma le agaga tatalo mau ma punaoa nei. O le a se mea ua uunaia ai oe e faasoa atu i alii talavou?

Faataunuuina o Lo’u Tiute i le Atua (2010), 28–29, 52–53, 76–77

Alema 17:2–3 (Na saunia atalii o Mosaea mo a latou misiona e ala i le anapopogi, tatalo, ma le suesueina o tusitusiga paia ma le filiga)

Galuega 2, 16; Mosaea 18 (Na valaaulia e Peteru, Paulo, ma Alema isi e o mai ia Keriso)

Neil L. Andersen, “O Se Molimau a le Atua,” Ensign po o le Liahona, Nov. 2016, 35–38

M. Russell Ballard, “Ia Outou Faalagolago i le Alii,” Ensign po o le Liahona, Nov. 2013, 43–45

David A. Bednar, “Avea ma se Faifeautalai,“Ensign po o le Liahona, Nov. 2005, 44–47.

David A. Bednar, “O Mai Ia Ina Matamata,”Ensign po o le Liahona, Nov. 2014, 107-10.

Vitio: “Faataunuuina o Lou Tiute i le Atua,” “Missionary Mindset,” “Priesthood Duty: Preaching the Gospel”

4:56

4:11

4:49

Aoao atu i le ala a le Faaola

Sa valaaulia e le Faaola isi e molimau atu i upumoni sa latou aoaoina ina ia mafai ona pai atu le Agaga i o latou loto. “A o outou pe se a la outou upu ia te au po o ai?” Sa Ia fesili ai. Na faamalosia le molimau a Peteru a o ia tali atu, “O Oe o le Keriso, le Alo o le Atua soifua” (Mataio 16:15–16). E mafai faapefea i le faasoa atu o le talalelei ona faamalolosia molimau a alii talavou o le korama?

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Valaaulia alii talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea na latou aoaoina i le lesona o le vaiaso ua tea.
Fai atu i alii talavou e mafaufau ma le agaga tatalo i uo, tagata o aiga, po o uso o le korama e le toaaga mai e mafai ona latou valaaulia e o mai ia Keriso. Valaaulia i latou e tusi nei igoa i a latou tusi o le Tiute i le Atua (tagai itulau 28–29, 52–53, 76–77). Fautuaina alii talavou ina ia lagona uunaiga atonu latou te maua i taimi o le lesona e uiga i mea e mafai ona latou faia e faasoa atu ai le talalelei i nei tagata.

Aoao faatasi

O le faamoemoega o lenei lesona o le fesoasoani lea i alii talavou e saunia mo se auaunaga i le olaga atoa o se faifeautalai. Tuu atu i alii talavou se taimi ao faia le fonotaga a le korama e tusi ai fuafuaga i a latou tusi o le Tiute i le Atua . Uunai i latou e faasoa atu a latou fuafuaga i le tasi ma le isi, ma i fonotaga o lumanai a le korama, ia valaaulia i latou e faasoa atu o latou aafiaga i le saunia mo le galuega faafaifeautalai ma le valaauliaina o isi e o mai ia Keriso.

O se isi auala e amata ai se talanoaga e uiga i le faasoaina atu o le talalelei o le faasino atu lea i le tala faatusa a Elder Neil L. Andersen e uiga i se paso i lana lauga “O Se Molimau a le Atua.” E faapefea ona faapei le tuufaatasia o se paso i le galuega o le faasoaina atu o le talalelei? Valaaulia tagata uma e galulue faatasi i se paso ao e talanoaina auala e mafai ai ona tou galulue faatasi o se korama ma faia galuega faafaifeautalai. I le avea ai ma se vaega o le talanoaga, atonu e mafai ona e faasino faapitoa atu i le vaega o le saunoaga a Elder Andersen ua faaautuina “O Se Valaaulia i le Autalavou.” E mafai faapefea ona fesoasoani le fautuaga ma le lu’i a Elder Andersen i alii talavou ao latou faia ni fuafuaga e faasoa atu le talalelei?
Faaali atu i alii talavou se atopau, ma valaaulia i latou e talanoaina po o a mea o le a latou manaomia e ave ia latou misiona (e pei o ofutino papae, suti, seevae, ma isi). Valaaulia i latou e fai se lisi o mea o le a latou manaomia e ave ia latou misiona e le mafai ona latou tuuina i se atopau. Valaaulia i latou e faaopoopo na mea i la latou lisi faatasi ai ma tali latou te maua i le Alema 17:2–3 ma le Mataupu Faavae ma Feagaiga e 4. Fai atu i alii talavou po o a mea e mafai ona latou faia e atiina ae ai nei uiga a o latou saunia mo le auaunaga faafaifeautalai.
Ao lei faia le fonotaga a le korama, fai atu i alii talavou taitasi e aumai se mea faitino po o se ata e suitulaga i se tasi o auala na faamanuia ai e le talalelei lona olaga. I le faagasologa o le fonotaga a le korama, faitau faatasi le tala e uiga i le atalii o Elder David A. Bednar i lana lauga “O Mai Ia Ina Matamata.” Aisea na matua naunau ai le uso laitiiti e faapipii ia lima o ana uo? Fai atu i alii talavou e faasoa mai ia mea faitino po o ata sa latou aumaia ma ia faamatala mai ia faamanuiaga o suitulaga ai nei mea faitino. Uunaia i latou e mafaufau i tagata latou te iloa o e e lei maua nei faamanuiaga, ma valaaulia i latou e fai se fuafuaga e faasoa atu ai le talalelei ma i latou.
Fai atu i alii talavou e faitau faatasi o se korama le valaaulia mai ia Elder M. Russell Ballard i lana lauga “Ia Outou Faalagolago i le Alii” (i parakalafa e lua e amata i le “O le ki lava o le musuia o oe e le Atua”). Faasoa mai se aafiaga sa e mauaina ao e taliaina lenei valaaulia, ma fai atu i alii talavou e faasoa mai ni aafiaga sa latou mauaina. Tuu atu ia i latou se taimi e mafaufau ai i se tasi e mafai ona latou aapa atu i ai ma valaaulia e sau ia Keriso.
Tusi i le laupapa, “O le a se mea e mafai ona ou faia ia sili ai ona saunia e auauna atu faafaifeautalai?” Fai atu i alii talavou e fautuaina mai ni tali talafeagai. Valaaulia i latou e saili pe na faapefea ona tali e Elder David A. Bednar le fesili i lana lauga “Avea ma se Faifeautalai.” Valaaulia i latou e suesue le lauga, ma vaai mo auala e mafai ai ona avea i latou ma faifeautalai a o le’i o atu i latou ia latou misiona. Faaali se tasi o vitio o loo fautuaina atu i lenei otootoga, ma valaaulia uso o le korama e faasoa mai pe faapefea ona fesoasoani aafiaga faapenei ia i latou e saunia ai mo le auaunaga faafaifeautalai.
A o le’i amataina le fonotaga faalekorama, valaaulia alii talavou e o mai saunia e faasoa mai se faataitaiga o le galuega faafaifeautalai mai tusitusiga paia (e pei o na o loo fautuaina mai i lenei otootoga). A o latou faasoa mai a latou tala, fesili atu ia i latou po o a mea na latou aoao e uiga i le faasoaina atu o le talalelei. O a mea na fai e tagata i nei tala e faasoa atu ai le talalelei? Na faapefea ona aafia isi i a latou aoaoga? O le a se mea ua lagona e alii talavou ua uunaia ai i latou e fai ina ia mulimuli ai i le faataitaiga a nei faifeautalai?

Fai atu i alii talavou e faasoa mai mea na latou aoaoina i le aso. Pe ua latou malamalama i le mea e mafai ona latou faia e saunia ai nei mo le auaunaga faafaifeautalai i le lumanai? O a nisi o latou lagona po o ni uunaiga? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“Ia faaeteete ia aua le vave momotuina ia talanoaga i se taumafaiga e folasia uma atu ai ia mea na e sauniaina. E ui lava e taua le aofia ai o mea uma na saunia, ae sili atu ona taua le fesoasoani i tagata o loo aoaoina ina ia lagonaina le faatosinaga a le Agaga, foiaina ni a latou fesili, faateleina lo latou malamalama i le talalelei, ma faamausaliina la latou tautinoga i le tausia o poloaiga” (O Le Aoao Atu, E Leai Se Isi Valaauga E Sili Ai[1999], 67).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Valaaulia alii talavou taitasi e tusi i lana tusi o le Tiute i le Atua se mea o le a ia faia e valaaulia ai se tasi e sau ia Keriso (tagai itulau 28–29, 52–53, 76–77), ona tuu atu lea i nai uso o le korama e faasoa mai mea na latou tusia.
Faasoa atu mea ua ia fuafuaina e fai e saunia ai mo le auaunaga faafaifeautalai i le lumanai.