E mafai faapefea ona ou fesoasoani atu i au uo ua le o toe toaaga mai ina ia toe foi mai i le lotu?

O se vaega o lo tatou tiute o e umia le perisitua o le aapa atu lea i uso o le korama ma uo ua le o mai i le lotu. E masani ona uunaia i tatou e Peresitene Monson ina ia “alu atu e laveai mai” (“Ia Laveaiina,” Ensign po o le Liahona, Iulai 2001, 57). E mafai ona tatou fesoasoani ia tatou uo ua le toaaga mai e ala i le mautinoa lea ua latou lagonaina lo tatou alofa moni ma le popole, faasoaina atu o a tatou molimau e ala i upu ma amioga, ma faaaofia i latou ia tatou gaoioiga.

Saunia oe lava ia faaleagaga

O a aafiaga na e maua i le fesoasoani atu ia i latou ua le toaaga mai? O a mea ua e aoao mai nei aafiaga e mafai ona fesoasoani i alii talavou i a latou taumafaiga e aapa atu i a latou uo ua le toaaga mai?

O ai uso o le korama ua le auai mai soo? O a mea ua iloa e uso o le korama e uiga ia i latou? E mafai faapefea ona e uunaia uso o le korama e aapa atu ia i latou?

Ia suesue ma le agaga tatalo ia mau ma punaoa nei. O le a se mea ua uunaia ai oe e faasoa atu i alii talavou?

Luka 15 (Faataoto i le mamoe na se, tupe na leiloa, ma le uii faamaumau oa)

Alema 31:34–35 MF&F 18:10, 14–16 (Ua tele lava le taua o agaga)

MF&F 20:46–47, 53–55 (Tiute o le Perisitua Arona)

S. Mark Palmer, “Ua Silasila Atu Iesu ia te Ia, ua Alofa Atu ia te Ia,” Ensign po o le Liahona, Me 2017, 114–16

Mervyn B. Arnold, “I Le Laveai: E Mafai ona Tatou Faia,” Ensign po o le Liahona, Me 2016, 53–55

Dieter F. Uchtdorf, “Sau, Auai Faatasi ma i Matou,” Ensign po o le Liahona, Nov. 2013, 21-24

Vitio: “We Are Brothers”, “Help Others Come Back to Church”

3:21

1:54

Aoao atu i le ala a le Faaola

Na alofa le Faaola i Ona soo, tatalo mo i latou, ma faaauau ona auauna atu ia i latou. O ai uso i lau korama e sili atu ona manaomia le amanaia, alofa, ma le tatalo? O le a se mea e mafai ona outou faia e aapa atu ai ia i latou?

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faailoa atu le lesona o lenei vaiaso:

Fai atu i alii talavou e lipoti mai mea na latou faia e faataunuu ai soo se tofiga na latou maua i le lesona o le vaiaso ua tea.
Faaali se tasi o vitio o loo fautuaina atu i lenei faasologa, pe faasoa atu sou aafiaga na fesoasoani ai i se uo poo se tasi o le aiga ua le toaga e toe foi mai i le lotu. Valaaulia alii talavou e faitau Alema 31:34–35 ma MF&F 18:10, 14–16. O a mea ua aoao mai e nei mau ma nei tala e uiga i lagona o le Tama Faalelagi i Ana fanau?

Aoao faatasi

O gaoioiga taitasi nei e mafai ona fesoasoani i uso o le korama e aoao ai pe faapefea ona latou fesoasoani e faamalosia a latou uo ua le toaaga mai. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Faaali atu i le korama se ata o se leoleo mamoe ma se mamoe, e pei o le ata o Iesu o loo Afisiina se Mamoe na Le iloa (Tusi Ata a le Talalelei [2009], nu. 64). Fai atu i alii talavou e faalogo mo upu po o fuaitau lea e faamatalaina le alofa o Iesu Keriso mo Ana mamoe a o latou usuina pe faitauina le “Pele i le Leoleo Mamoe” (Viiga, nu. 135). Ina ia fesoasoani i tagata o le korama e saili ni auala e mafai ona latou fesoasoani ai i le Faaola e ao mai i latou ua leiloloa, e mafai ona e fai atu ia i latou e iloilo ia lesona e fa na faasoa mai e Elder S. Mark Palmer i le faaiuga o lana saunoaga “Ua Silasila Atu Iesu ia te Ia, ua Alofa Atu ia te Ia.” E mafai faapefea e nei lesona ona fesoasoani ia i tatou a o tatou aapa atu i tagata o o tatou aiga ma uo ua le o toe toaaga mai? O a nisi mataupu faavae e mafai ona mafaufau i ai alii talavou o le a mafai ona fesoasoani mai?
Fai atu i alii talavou e mafaufau i se taimi na latou leiloa ai se mea e matuai taua lava. O le a se mea na latou faia e taumafai ai ia maua lena mea? Tofi uso taitasi o le korama e faitau se tasi o faataoto e tolu i le Luka 15. Fai atu ia te ia e toe faamatala mai le faataoto i ana lava upu ma faasoa mai se fuaitau mai le faataoto e aotele ai le mea na aoao mai e le Faaola. O a mea ua aoao mai e alii talavou mai faatinoga a le leoleo mamoe, le fafine, ma le tama i nei faataoto? E mafai faapefea e alii talavou ona mulimuli ia latou faataitaiga a o latou taumafai e fesoasoani ia i latou ua “leiloloa” mai la latou korama? Fai atu i alii talavou e faasoa mai soo se aafiaga o uo po o tagata o le aiga ua toe foi mai i le lotu ina ua tuanai le le toaga mai.
Valaaulia alii talavou e faitau le Mataupu Faavae ma Feagaiga 18:10–13, ma fai atu ia i latou e faasoa mai ni auala latou te faauma ai lenei fuaiupu: “O le taua o agaga e tele aua …” Fai atu i alii talavou e sue le Mataupu Faavae ma Feagaiga 20:46–47, 53–55, ma fai atu ia i latou e lisi i le laupapa upu po o fuaitau na e faamatala mai ai o latou tiute faaleperisitua. O fea o nei upu ua faamatala mai ai auala e mafai ona tatou fesoasoani ai i uso o le korama ua le toaaga mai? Valaaulia le peresitene o le korama e taitai se talanoaga e uiga i mea e mafai e alii talavou ona fai e aapa atu ai i se uso o le korama ua le toaga mai.
Ao lei oo i le taimi o le vasega, fai atu i se uso o le korama e faitau le lauga a Elder Mervyn B. Arnold “I Le Laveai: E Mafai Ona Tatou Faia.” Fai atu ia te ia e sau saunia e faasoa mai se tasi pe lua foi ni tala mai le lauga na faagaeetia ai o ia. Fai atu i alii talavou e talanoa i le auala e ono faatatau ai nei tala ia i latou o se korama. O ai ua latou iloaina e le o auai atu i le lotu? E mafai faapefea ona latou galulue faatasi o se korama e fesoasoani i lena tagata ia faalatalata atu i le Faaola? E mafai foi ona e valaauliaina ia alii talavou e sue ia mataupu faavae autu e fa o loo i le lauga a Elder Arnold. O latou iloaina ni tagata o e o faaalia nei mataupu faavae? O a ni mea e mafai ona latou faia ia faapei ai o nei tagata?
Tusi i luga o le laupapa nisi o mafuaaga e tau mai e tagata e le o mai ai i le lotu, e pei o le ”E i ai ni ou masalosaloga e uiga i aoaoga o le Ekalesia,“ ”Ou te le tutusa ma tagata i le Ekalesia,“ ”Ou te leiloa pe mafai ona ou ola e tusa ma tulaga faatonuina o le Ekalesia,“ ”Ou te iloa se tagata o le Ekalesia e matua pepelo lava,“ ma isi lava mea. Fai atu i alii talavou e tagai i tali a Peresitene Dieter F. Uchtdorf i nei atugaluga i lana lauga “Sau, Auai Faatasi ma i Matou.” Tuu atu i alii talavou se avanoa e faatino mai ai le auala latou te tali atu ai pe afai e faaalia e se uo se tasi o nei atugaluga.

Fai atu i alii talavou e faasoa mai mea na latou aoaoina i le aso. Pe ua latou malamalama i le auala e fesoasoani ai e faamalosia a latou uo ua le toaaga mai? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Valaaulia e faatino

O le alii talavou o loo taitai e faaiuina le fonotaga. E mafai ona ia:

Fefautuaai ma le korama e uiga i auala faapitoa e valaaulia ai uso e le toaaga i le lotu ma Mutuale.
Luitauina alii talavou ia aapa atu i se uso e le toaga mai ma lipoti mai i le isi vaiaso o sosoo ai.