O le a se mea e mafai ona ou faia e fesoasoani ai i tagata fou o le Ekalesia?

Mo le tele o tagata, o le avea ma se tagata fou o le Ekalesia e mafai ona avea ma se luitau. Atonu e aofia ai le tuueseina o faigauo ua leva ma tau faamasani i se olaga e fou. O tagata fou taitoatasi o le Ekalesia e manaomia se uo, se tiutetauave, ma le faafaileleina i “le afioga lelei a le Atua” (Moronae 6:4). E mafai ona tatou fesoasoani i tagata fou e ala i le faauoina o i latou, auauna atu faatasi ma i latou, ma faasoa atu a tatou molimau ia i latou.

Saunia oe lava faaleagaga

O le a se mea ua e faia e fesoasoani ai e faamalosia tagata fou? O a mea na fai e isi e fesoasoani ai ia te oe ina ua uma ona e papatiso?

Pe o i ai ni alii talavou i lau korama o ni tagata fou o le Ekalesia? O faapefea ona latou faamasani i le avea ai ma tagata fou o le Ekalesia? Na faapefea ona fesoasoani isi alii talavou ia i latou?

Suesue ma le agaga tatalo mau ma punaoa nei. O le a se mea ua uunaia ai oe e faasoa atu i alii talavou?

Luka 22:32; Roma15:1–2; Moronae 6:4–5; MF&F 81:5; 108:7 (Faamalosia le Au Paia)

Neill F. Marriott, “Se A Se Mea Tatou te Faia?” Ensign po o le Liahona, Me 2016, 10–12

Neil L. Andersen, “Ai Se Talia i Latou ua Talia Au,” Ensign po o le Liahona, Me 2016, 49–52

“Uo,” Mo Le Malosi o le Autalavou (2011), 16–17

Vitio: Galuega Faafaifeautalai ma le Puipuiga: Georgia Elias, Fesoasoani i Tagata Fou e Ave se Igoa i le Malumalu

4:46

1:46

Aoao atu i le ala a le Faaola

Na maua e le Faaola avanoa mo Ona soo e aoao ai mai aafiaga maoae. Ina ua Ia faaali atu i sa Nifae, na Ia valaaulia i latou e o mai ia te Ia taitoatasi, ina ia mafai ona latou vaai, lagona, ma iloa o Ia mo i latou lava. A o e aoaoina alii talavou, valaaulia i latou e saili auala e faauo ai, auauna atu, ma faasoa atu ai a latou molimau i tagata fou o le Ekalesia.

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faailoa atu le lesona o lenei vaiaso:

Fai paga alii talavou, ma tuu atu ia i latou ni minute se lua e faasoa mai ai mea latou te manatua mai le lesona o le vaiaso ua tea. Fai atu i se paga se tasi e faasoa mai i le korama mea la te manatua.
Valaaulia alii talavou e faamatala mai ni lagona na oo mai faatasi ma ni aafiaga fou, e pei o le aso muamua o se vasega, auai atu i se kalapu po o se au, po o le amataina o se galuega fou. Fai atu ia i latou e talanoaina pe faapefea ona ono tutusa nei lagona ma lagona e oo i tagata fou o le Ekalesia. Valaaulia i latou e faasoa mai ni aafiaga faapena na latou oo i ai, a le o le avea o i latou lava ma ni tagata fou po o le faatasi foi ma isi tagata fou.

Aoao faatasi

O gaoioiga taitasi nei e mafai ona fesoasoani i uso o le korama e aoao ai pe faapefea ona latou fesoasoani e faamalosia tagata fou. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Valaaulia ia alii talavou e vaai faalemafaufau atu pe mafaufau foi i se tagata o le Ekalesia o le na aapa atu i ni tagata fou na liliu mai, o e ono eseese tulaga mai le tagata o le ekalesia. E mafai ona faia e alii talavou se lisi i luga o le laupapa o mea e ono faia pe le faia foi e lenei tagata o le Ekalesia ia lagona ai e nei tagata liliu mai le taliaina. Na faamatalaina e Elder Neil L. Andersen i le “Ai Se Talia i Latou ua Talia Au” ni tala se tele e uiga i tagata na aapa atu i ni tagata fou, ma sa faamatalaina foi e Sister Neill F. Marriott i le “Se A Se Mea Tatou Te Faia?” e uiga i le faafeiloaiga sa ia mauaina o se tagata fou liliu mai mai le toalua a le tama a lona toalua. O le a se mea e mafai ona aoaoina e alii talavou mai nei tala lea e mafai ona latou faaopoopoa i le latou lisi?
Tusi i le laupapa mau fesootai (e pei ona o loo lisiina i lenei otootoga) e uiga i la tatou tiutetauave o le faamalosia o tagata o le Au Paia. Fai atu i alii talavou taitasi e faitau se tasi o mau fesootai, ma mafaufau pe faapefea ona faaaoga i tagata fou o le Ekalesia. Fai atu ia te ia e tusi i le laupapa se aotelega puupuu o lana fuaitau ma faasoa mai se faataitaiga o le mataupu faavae o loo aoao mai ai. Fesili atu i alii talavou pe aisea e taua ai le faamalosia o tagata fou o le Ekalesia.
Valaaulia alii talavou e matamata i le vitio “Galuega Faafaifeautalai ma le Faatumauina: Georgia Elias” ma vaai mo mea na fai e le uarota fou a Georgia e fesoasoani ai ia te ia ia faatumauaina le malosi i le talalelei ina ua uma lona papatisoga. O le a se isi mea ua latou aoao mai le aafiaga a Georgia e mafai ona fesoasoani ia i latou e faamalosia ai tagata fou? Valaaulia alii talavou e mafaufau i tagata fou i la latou uarota. O a ni a latou fesili atonu o i ai? E mafai faapefea e uso o le korama ona fesoasoani ia i latou? I le avea ai ma se vaega o lenei talanoaga, atonu e te manao e faaali ma talanoaina le vitio “ Fesoasoani i Tagata Fou e Ave se Igoa i le Malumalu.”

4:46

1:46
Valaaulia alii talavou e faitau “Uo” i le Mo Le Malosi o le Autalavou ma vaai mo tali i le fesili “O le a le uiga o le avea ma uo moni?” Fai atu ia i latou e faasoa mai mea ua latou maua ma faasoa mai se aafiaga i se taimi na avea ai se tasi ma se uo moni ia i latou. Aisea e matua taua ai tele mo i tatou le avea ma ni uo lelei i tagata fou o le Ekalesia? Valaaulia alii talavou e fai se lisi o tagata fou latou te iloa ma talanoaina pe faapefea ona latou faaaogaina le fautuaga i le Mo Le Malosi o le Autalavou e faauo ai ma i latou.
Valaaulia le korama e faataunuu se tasi o gaoioiga nei e suesue ai mai Tala’i La’u Talalelei,itulau 241: gaoioiga lona lua “Suesuega Faaletagata Lava Ia” po o le gaoioiga lona tolu “Suesuega Faalesoa”.

Fai atu i alii talavou e faasoa mai mea na latou aoaoina i le aso. Pe o latou malamalama pe faapefea ona fesoasoani e faamalosia tagata fou? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Valaaulia e faatino

O le alii talavou o loo taitai e faaiuina le fonotaga. E mafai ona ia:

Faasoa mai lana molimau e faatatau i le taua o le faauoina o tagata fou.
Valaaulia alii talavou e faatu se sini patino i a latou tusi Tiute i le Atua ia faauo i tagata fou (tagai “Valaaulia tagata uma e o mai ia Keriso,” itulau 28–29, 52–53, po o le 76–77).