E mafai faapefea ona ou saunia e faatulaga se aiga e totonugalemu ia Keriso?

O le fausiaina o le malo o le Atua e amata i le fausiaina o se aiga ma se auaiga amiotonu. O le aiga o se iunite sili lea ona taua o le Ekalesia. I le avea ai ma tagata o le Ekalesia, e tatau ona tatou fausia se aiga o loo i ai le Agaga. O se aiga e totonugalemu ia Keriso e ofoina mai ia i tatou se nofoaga o le puipuiga mai le agasala, sulufaiga mai le lalolagi, ma se alofa atoatoa, ma mama. Pe tele pe laitiiti lo tatou aiga, e mafai ona avea “o se fale tatalo lea, o se fale o le anapogi, o se fale o le faatuatua, o se fale o le aoaoga, o se fale o le mamalu, o se fale maopoopo, o se fale o le Atua” (MF&F 88:119).

Saunia oe lava ia faaleagaga

O le a se mea e te faia ia avea ai lou aiga o se puipuiga mai le agasala ma se sulufaiga mai le lalolagi? O le a se mea e te faia e aoao ai lau fanau ma le aiga i le talalelei?

Mafaufau i aiga o loo nonofo ai alii talavou. O a ni aafiaga o loo latou maua nei o le a fesoasoani ia i latou e tausia ai ni o latou lava aiga amiotonu?

O a mau ma lauga o le a fesoasoani i alii talavou e saunia ai e faatuina ni aiga e totonugalemu ia Keriso?

1 Nifae 1:1; Enosa 1:1–3; Mosaea 27:14 (O le faatosinaga a tama amiotonu)

Salamo 127:3; Mosaea 4:14–15; MF&F 68:25–28; 88:119; 93:40 (Ua poloaiina matua e aoao ma faafailele a latou fanau)

“O Le Aiga: O Se Folafolaga i le Lalolagi,” Ensign po o le Liahona, Nov. 2010, 129.

Henry B. Eyring, “I Fanau a La’u Fanau,” Ensign po o le Liahona, Nov. 2013

Richard G. Scott, “Mo Le Filemu i le Aiga,” Ensign po o le Liahona, Me 2013

David A. Bednar, “O Mana o le Lagi,” Ensign po o le Liahona, Me 2012, 48–51

“Aiga,” Mo Le Malosi o le Autalavou (2011), 14–15

Vitio: “O se Tama Moni Lava”

7:7

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faailoa atu le lesona o lenei vaiaso:

Tusi i le laupapa le fesili mai le autu o le lesona o le vaiaso ua tea, ma fesili atu i alii talavou pe o le a faapefea ona latou taliina lenei fesili.
Valaaulia alii talavou e faamatala mai po o le a faapei se aiga pe afai e fuafuaina e se tasi e fiafia i musika (po o ata tifaga po o taaloga). O le a se mea o le a vaaia e alii talavou iina? O le a se lagona o le a latou maua iina? Ona fesili atu lea pe o le a lo latou manatu pe faape’i se aiga e totonugalemu ia Keriso. O le a faapefea ona tulagaese? O le a le mea o le a latou vaaia iina? O le a le mea o le a latou lagonaina iina? Fai atu ia i latou e fautuaina mai ni tali i le fesili “E mafai faapefea ona ou fausia se aiga e totonugalemu ia Keriso?”

Aoao faatasi

O gaoioiga taitasi nei e mafai ona fesoasoani i uso o le korama e malamalama ai pe faapefea ona faatulaga se aiga e totonugalemu ia Keriso. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Faitau faatasi, o se korama Mosaea 4:14–15 ma fai se lisi i le laupapa o mataupu faavae i nei fuaiupu o le a fesoasoani i alii talavou e faatulaga ai ni aiga e totonugalemu ia Keriso. Faaali se vitio se tasi po o vitio uma o loo fautuaina atu i le otootoga lenei. Faatonu alii talavou e mafaufau ia i latou lava o ni tama a o latou matamata. A maea vitio taitasi, fai atu i alii talavou e talanoaina po o le a le savali autu ma po o a mataupu faavae faaopoopo na latou aoaoina o le a fesoasoani ia i latou e faatulaga ai ni aiga e totonugalemu ia Keriso. Mafaufau e faaopoopo nei mataupu faavae i le lisi i le laupapa. Valaaulia i latou e faasoa mai faataitaiga o nei mataupu faavae mai o latou lava aiga po o isi aiga.
Fai atu i se alii talavou e faitau leotele Mataupu Faavae ma Feagaiga 88:119 ma tusi i le laupapa mataupu faavae e faatatau i se aiga amiotonu. Valaaulia alii talavou e filifili se tasi o nei mataupu faavae ma faasoa mai auala latou te manatu e mafai ona faaaoga ai lenei mataupu faavae i se aiga amiotonu. Fautuaina i latou e faasoa mai faataitaiga na latou vaaia. O a mea e mafai e alii talavou ona fai e faatulaga ai nei mataupu faavae i o latou aiga o i ai nei ma i o latou aiga i le lumanai? I le avea ai o se vaega o lenei talanoaga, valaaulia alii talavou e faitau le vaega ua faaautuina “Faamolemole Fesoasoani i Lo’u Toalua ia Malamalama” mai le lauga a Elder David A. Bednar “O Mana o le Lagi”.” Fai atu i alii talavou pe o le a lo latou manatu i le uiga o le avea ma taitai perisitua i le aiga.
Fai atu i alii talavou e mafaufau i faataitaiga o ni tama lelei i le Tusi a Mamona (mo se faataitaiga, tagai i mau ua fautuaina atu i lenei otootoga). Valaaulia alii talavou e lisi ni agavaa faaopoopoo o o latou tama po o tama o isi latou te iloa latou te mananao e faataitaia i ai. O le a le matafaioi a tama i le fausiaina o le malo o le Atua? O a mea a nei tama na fai na maua ai le faatosinaga lelei ia latou fanau? O a mea e mafai e alii talavou ona fai e mulimuli ai ia latou faataitaiga?
Fai atu i alii talavou e lisi i le laupapa le latou fautuaga sili ona lelei mo se ulugalii o le a faaipoipo. Vaevae le lauga a Peresitene Henry B. Eyring “I Fanau a La’u Fanau” i ni vaega, ma tuu atu i alii talavou ni vaega o le lauga e faitau. Fai atu ia i latou e faaopoopo ni mea i le lisi o i le laupapa sa latou mauaina i le lauga a Peresitene Eyring ma talanoa i mea e mafai ona latou faia i le taimi nei e saunia ai e faatulaga se aiga e faaogatotonu ia Keriso.
Vaevae le korama i ni vaega, ma vaevae le lauga a Elder Richard G. Scott “Mo Le Filemu i le Aiga” i vaega. Fai atu i vaega e suesue a latou vaega o le lauga, ma vaai mo faamatalaga po o uiga o se aiga e totonugalemu ia Keriso. Valaaulia i latou e faasoa mai mea ua latou maua e ala i le tusiaina o ata o se aiga e foliga mai e totonugalemu ia Keriso. O le a se mea e mafai e alii talavou ona fai e fesoasoani ai i o latou aiga ia avea nei ma ni aiga e sili atu le totonugalemu ia Keriso ? E mafai faapefea ona latou saunia e faatulaga ni aiga e totonugalemu ia Keriso i le lumanai?

Fai atu i alii talavou e faasoa mai mea na latou aoaoina i le aso. Pe ua latou malamalama pe faapefea ona faatulagaina se aiga e totonugalemu ia Keriso? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“O talanoaga i vaega toalaiti e mafai ona vave aofia ai i latou o e foliga mai ua vave ona mou atu le fiafia ma le naunautai” (O Le Aoao Atu, E Leai Se Isi Valaauga E Sili Ai[1999], 76).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Faasoa mai se mea o loo ia faia e saunia ai e fausia se aiga e totonugalemu ia Keriso.
Valaaulia uso o le korama ia faia se mea e faamalosia ai lo latou aiga.