O faapefea ona finagalo le Tama Faalelagi ia te au e faaaoga au meaalofa faaleagaga?

O meaalofa faaleagaga o ni faamanuiaga po o malosiaga ua tuuina mai e le mana o le Agaga Paia. I le avea ai ma fanau a le Tama Faalelagi, ua ia i tatou uma lava meaalofa faaleagaga. Ua tuuina mai e le Atua ia i tatou nei meaalofa ina ia tatou auauna atu i isi ma fesoasoani i le fausia o Lona malo. Ua Ia poloaiina i tatou ia saili atu ma atiina ae a tatou meaalofa faaleagaga.

Saunia oe lava ia faaleagaga

O a meaalofa faaleagaga o loo ia te oe? Ua faapefea ona faamanuiaina oe ma isi e na meaalofa, ae maise lava i lau auaunaga faaleperisitua? Ua faapefea ona faamanuiaina oe e meaalofa faaleagaga a isi? Na faapefea ona e iloaina au meaalofa?

Aisea e taua ai i alii talavou ona iloa a latou meaalofa faaleagaga? E mafai faapefea ona latou faaaogaina na meaalofa a o latou faataunuuina o latou tiute faaleperisitua? O le a faapefea ona fesoasoani lenei mea e saunia ai i latou mo a latou matafaioi, aiga, ma auaiga i le lumanai?

A o e suesueina nei mau ma isi punaoa e uiga i meaalofa faaleagaga, vaai mo auala e fesoasoani ai i alii talavou ia iloa nisi o a latou meaalofa ma faaaoga e faamanuia ai isi.

1 Korinito 12:3–27; Moronae 10:8–18; MF&F 46:8–29 (Meaalofa a le Agaga)

David A. Bednar, “Ia Atamai,” Ensign, Tes. 2006, 31–36; po o le Liahona, Tes. 2006, 14–20

“Meaalofa Faaleagaga,” Faamaoni i le Faatuatua (2004), 109–11

“Meaalofa o le Agaga,” Mataupu Faavae o le Talalelei (2009), 109–11

Vitio: “O Meaalofa Sili”

4:22

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faailoa atu le lesona o lenei vaiaso:

Fai atu i alii talavou taitasi e tusi se fuaiupu se tasi e sili ona aotele ai le lesona o le vaiaso ua tea ma faasoa mai i le korama.
Aumai i le vasega se atigipusa ua afifi-faameaalofa ua tusia ai “Mataupu Faavae ma Feagaiga 46:8–9” i se fasi pepa i totonu. Valaaulia alii talavou e vaai faalemafaufau po o le a le mea o loo i totonu o le atigipusa. Fai atu ia i latou e tatala le atigipusa ma faitau le mau. O a “meaalofa sili”? O le a le mea e tatau ona tatou faia ina ia maua ai? Fautuaina alii talavou e mafaufaui nei fesili i le taimi o le lesona.

Aoao faatasi

O gaoioiga taitasi nei o le a fesoasoani i uso o le korama e aoao ai e uiga i meaalofa a le Agaga. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Vaevae le korama i ni vaega, ma tofi vaega taitasi i se tasi o mau ua lisiina atu i lenei otootoga. Fai atu i vaega taitasi e fai se lisi o meaalofa faaleagaga o loo taua i la latou fuaitau ma faailoa mai pe aisea e tuuina mai ai e le Atua ia i tatou meaalofa faaleagaga. Fai atu i se alii talavou se toatasi mai vaega taitasi e faasoa mai mea na maua e lana vaega. O fea o nei meaalofa o loo maua e alii talavou? (Afai na maua e ni alii talavou o latou faamanuiaga faapeteriaka, fautua atu e faitau i se taimi o i luma o latou faamanuiaga e iloa ai po o a meaalofa faaleagaga na tuuina atu ia i latou.) O a meaalofa latou te mananao ia maua? E mafai faapefea e nei meaalofa ona fesoasoani ia i latou ia sili atu le lelei i le faataunuu o o latou tiute faaleperisitua?
Valaaulia alii talavou e faitau le lisi o meaalofa faaleagaga i 1 Korinito 12:8–10; Moronae10:9–16; po o Mataupu Faavae ma Feagaiga 46:13–25 ma sue se meaalofa latou te fiafia e aoao atili i ai. Tuu atu se taimi ia i latou e suesue ai le meaalofa ua latou filifilia, i le faaaogaina o punaoa e pei “O Meaalofa a le Agaga” i Mataupu Faavae o le Talalelei (itulau 135–43), “Meaalofa Faaleagaga” i Faamaoni i le Faatuatua (itulau 109–11), po o le Taiala i Tusitusiga Paia. Fai i ai e faasoa mai mea ua latou maua. E mafai faapefea ona faaaoga nei meaalofa e fesoasoani ai e fausia le malo o le Atua?
Fai atu i alii talavou e lisi tulaga eseese i se taaloga e faiau (e pei o le au soka po o se au peisipolo). E faapefea ona saofaga tagata taaalo taitoatasi i le fesoasoani ia malo le au? Tuu atu ia i latou e faitau 1 Korinito 12:12–21, lea o loo faatusa ai e Paulo le Ekalesia i se tino. O a mea ua aoao mai e nei tala faatusa i alii talavou i le ala tatou te faaaoga ai meaalofa faaleagaga e fesoasoani i le fausia o le malo o le Atua? Faasoa atu meaalofa faaleagaga ua e vaaia i uso o le korama (mo se faataitaiga, tagai i fuaiupu 8–10 po o le lisi i le amataga o le lauga a Elder David A. Bednar “Ia Atamai”). Valaaulia le peresitene o le korama e taitai se talanoaga pe faapefea ona galulue faatasi le korama i le faaaogaina o a latou meaalofa e auauna atu ai i isi ma fesoasoani e fausia le malo o le Atua.
Valaaulia alii talavou taitoasi e iloilo le lisi o meaalofa faaleagaga i itulau 109–11 o Faamaoni i le Faatuatua ma filifili se tasi po o le sili atu o le a ia manao e atiina ae. Fai atu ia te ia e faamatala pe aisea ua ia filifilia ai na meaalofa. E faapefea ona tatou atiina ae meaalofa faaleagaga? Valaaulia alii talavou e suesue Mataupu Faavae ma Feagaiga 46:7–12 ma “E Mafai ona Tatou Atiina ae a Tatou Meaalofa” i Mataupu Faavae o le Talalelei, itulau 141–42. Fai i ai e faasoa mai mea ua latou maua. O a mea ua aoao mai Mataupu Faavae Ma Feagaiga 46:9 i alii talavou po o ai e mafai ona agavaa mo meaalofa faaleagaga?
Faaali se tasi o ata vitio o i lenei otootoga ma valaaulia ia alii talavou e mafaufau ma faasoa atu se taleni po o se meaalofa latou te vaaia i uso taitasi o le korama (ia mautinoa o fetufaai atu ia uiga lelei o alii talavou taitasi). Valaaulia ia alii talavou e faitau le Mataio 25:14–30, pe valaaulia se uso o le korama e toe faamatala le faataoto i taleni. E faapefea ona faatatau lenei faataoto i meaalofa na tuuina mai e le Atua ia i tatou? E mafai faapefea e i tatou o umia le perisitua ona faaaoga a tatou taleni e auauna atu ai i isi ma faataunuu o tatou tiute faaleperisitua? Valaaulia ia alii talavou e tusi i lalo ni o latou manatu, ma fai atu i nisi o i latou e faasoa mai i le korama ni mea sa latou tusiaina.

Fai atu i alii talavou e faasoa mai mea na latou aoaoina i le aso. Pe ua latou malamalama atili ea i meaalofa faaleagaga? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“Aua lava ne’i e ulagiaina pe faitioina soo se fesili po o se manatu, ae ia faaali atu le amio pulea ma le alofa ao e taumafai i le mea sili e tali atu i ai. Afai e lagonaina e tagata o loo faatauaina o latou manatu, o le a faateleina ona latou fetufaai mai mea na latou oo i ai, o o latou lagona, ma molimau ma le saoloto” (O Le Aoao Atu, E Leai Se Isi Valaauga E Sili Ai [1999], 68).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Valaaulia alii talavou e faaaoga se tasi o a latou meaalofa faaleagaga i lenei vaiaso e faamanuia ai se tasi latou te iloa.
Faasoa mai mea ua ia fuafuaina e fai e atiina ae ai meaalofa faaleagaga, ma valaaulia uso o le korama e fai ni a latou lava fuafuaga.