Sau, Mulimuli Mai ia te A’u
E mafai faapefea ona ou avea ma se uso o auaunaga e sili ona lelei?

E mafai faapefea ona ou avea ma se uso o auaunaga e sili ona lelei?

Saunia Oe Lava Faaleagaga

E pei ona i ai i mea uma, o Iesu Keriso o lo tatou faataitaiga atoa lea o le auaunaga. I le taimi o Lana galuega, sa Ia aapa atu i tagata taitoatasi, taulimaina manaoga faaletino ma faaleagaga, ma faailoa atu le alofa faamaoni mo tagata uma. I le avea ai ma e mulimuli ia Iesu Keriso ma e umia Lona perisitua, ua valaaulia i tatou ina ia auauna atu e pei ona Ia faia, aemaise ia i latou ua talosagaina i tatou e auauna atu i ai o ni uso o auaunaga. E mafai ona tatou alolofa, leoleo i luga, ma faamalosia nei tagata taitoatasi e pei ona faia e Keriso. Aemaise lava ua i ai i e umia le Perisitua Arona, le tiute e “valaau atu i tagata uma ia o mai ia Keriso” (Mataupu Faavae ma Feagaiga 20:59). O ositaulaga ma aoao o loo i ai tiute faaopoopo e “asiasi atu i fale o tagata taitoatasi o le ekalesia” ma “leoleo lea i luga o le ekalesia e lē aunoa, ma faatasi ma faamalosia i latou” (Mataupu Faavae ma Feagaiga 20:47, 53). I le avea ai ma ni alii talavou o le Ekalesia, ua ia i tatou le matafaioi taua e faia i le aumaia “o le tino ola pea ma le ola faavavau o le tagata” (Mose 1:39).

O Punaoa e Fesoasoani ia te Oe e Saunia ai

O nei punaoa e fesoasoani ia te oe e saunia mo le vaega “Aoao faatasi” o le fonotaga po o le sauniga.

O Fesili e Mafaufau Loloto i Ai ae E Te Lei Aoao Atu

O le a se mea ua e faia e mulimuli ai i le faataitaiga a le Faaola a o e galue o se uso o auaunaga? Na faapefea ona faamanuiaina lou olaga ma olaga o i latou na e auauna i ai ona o lenei auaunaga? O a ni aafiaga e mafai ona e faasoa atu i alii talavou?

O a ni lagona o alii talavou e uiga i le avea ai ma ni uso o auaunaga? O a ni aafiaga e mafai ona latou faasoa i le tasi ma le isi?

O a mea e mafai e alii talavou ona fai e saunia ai ia aoaoina? Mo se faataitaiga, e mafai ona latou faitaua se lauga, matamata se vitio, pe suesue se mau e faatatau i lenei autu.

Manatua: I le sauniaina o lenei lesona, atonu e te mafaufau e fai atu i uso o le korama o loo auauna atu o ni uso o auaunaga e valaaulia a latou soa o auaunaga e faatasi mai i lenei fonotaga faalekorama ma auai i le talanoaga o le avea ma uso o auaunaga e sili atu ona lelei.

Aoao Atu i le Ala a le Faaola

I soo se nofoaga, na avea le Faaola ma faataitaiga ma faaaoao sili ia i latou na Ia aoaoina. E mafai faapefea e alii talavou ona aoao mai i au faataitaiga —ma faataitaiga a isi o loo umia le Perisitua Mekisateko—a o latou tauivi e faataunuu o latou tiute o ni uso o auaunaga?

Otootoga o le Fonotaga/Sauniga

1. Fefautuaai Faatasi ma Fefaasoaai Aafiaga

Taitaiina e se uso o le au peresitene o le korama, pe a ma le 5–10 minute

Taitai se talanoaga e uiga i aitema e pei o mea nei:

  • O la tatou korama: O ai o misi i le asō? O a ni asiasiga e tatau ona tatou faia? O ai e tatau ona tatou valaauliaina i se gaoioiga o loo loma? O ai e manaomia la tatou fesoasoani ma tatalo?

  • O o tatou tiutetauave: O a ni galuega e tatau ona tatou faia? O a ni galuega ua tatou faataunuuina? Na faapefea ona tatou valaauliaina isi e o mai ia Keriso, ma e mafai faapefea ona tatou valaauliaina isi i le taimi nei?

  • O tatou olaga: Faamanatu atu i le korama le talanoaga mai le fonotaga ua tuanai. O a ni aafiaga sa tatou mauaina i le faaaogaina o mea sa latou aoaoina? O a ni aafiaga sa tatou mauaina i nai vaiaso ua tuanai lea na faamalosia ai a tatou molimau i le talalelei?

Afai e mafai, talanoa i nei mea ao lei faia le fonotaga a le au peresitene o le korama.

2. Aoao Faatasi

Taitaiina e se taitai po o se faiaoga po o se uso o le korama: pe a ma le 25–35 minute

A uma ona suesue i punaoa o loo i luga ma mulimuli i le uunaiga a le Agaga, e mafai ona e filifilia se tasi pe sili atu o gaoioiga o loo i lalo e fesoasoani i sui o le korama ina ia malamalama i le aoaoga faavae.

  • O le le uiga o le upu auaunaga i alii talavou o loo e aoaoina? Ina ia silafia, e mafai ona e tusia le Auaunaga i luga o le laupapa ona valaaulia lea o alii talavou e tusi upu e siosio ai e fesootai ma le auaunaga. E mafai ona latou maua upu po o fuaitau e faaopoopo atu i le lisi mai mau e pei o mau nei: Mataio 25:34–40; Luka 10:25–37; 2 Nifae 25:26; Mosaea 18:8–9; 3 Nifae 18:25; ma le Mataupu Faavae ma Feagaiga 81:5. O le a le mea ua latou aoao mai i nei fuaiupu e uiga i le auaunaga? E mafai ona e fai atu i alii talavou e faasoa mai faataitaiga ua latou vaaia e uiga i tagata o loo auauna atu i isi. O a mea e mafai ona faia e alii talavou e fesoasoani ai i tagata ina ia latalata atili ia Keriso?

  • Fai atu i alii talavou e vaevae i ni paga ma faitau le 3 Nifae 17, ma vaavaai mo mea ua latou aoaoina mai le Faaola lea e mafai ona fesoasoani ia i latou a o latou galulue o ni uso o auaunaga. Valaaulia i latou o soa taitasi e faasoa mai mea na latou maua. Mo se faataitaiga, na faapefea ona auauna atu le Faaola “taitoatasi”? O a manaoga na Ia auauna atu i ai?

  • Faitau faatasi le Mataupu Faavae ma Feagaiga 20:53, ma valaaulia alii talavou e fai se lisi (pe tusi se ata) o ni auala e mafai ai ona latou “leoleo lea i luga o le ekalesia e lē aunoa, ma faatasi ma faamalosi i latou.” O a ni auala e mafai ona auauna atu ai alii talavou i isi tagata o le Ekalesia? Mafaufau e valaaulia le epikopo po o le peresitene o le korama a toeaina e talanoa i le korama e uiga i le auala e mulimuli ai i le faataitaiga a Keriso i le auauna atu i tagata o le uarota. E mafai e alii talavou ona mafaufau i ni fesili ao lumanai le fonotaga e mafai ona o latou fesili atu ai i nei taitai e uiga i le auaunaga. Valaaulia alii talavou e fai ni fuafuaga e faaleleia ai a latou taumafaiga e auauna atu i isi i le uarota.

  • Fai atu i alii talavou taitasi e faitau se tasi o tala mai le savali a Elder Jeffrey R. Holland “Ia Faatasi ma Faamalosi i Latou” po o le savali a Sister Jean B. Bingham “Auauna Atu e pei ona Faia e le Faaola.” Fai atu i alii talavou taitoatasi e o mai i luma o le potu, toe faamatala le tala i ana lava upu, ma faasoa mai se mea ua aoao mai ai e uiga i le ala e avea ai o ia ma se uso o auaunaga sili ona lelei. O le a leisi mea e fiafia ai alii talavou i nei savali?

  • Vaevae le korama i ni vaega se lua, ma fai atu i vaega taitasi e fai se lisi o auala e mafai ona latou faaleleia ai i le avea ai ma ni uso o auaunaga. A mavae ni nai minute, valaaulia se vaega e tasi e faaopoopo ni manatu i a latou lisi mai le savali a Peresitene Russell M. Nelson “Auauna Atu i le Mana ma le Pule a le Atua.” Valaaulia isi vaega e faaopoopo ni manatu i a latou lisi mai le savali a Peresitene Henry B. Eyring “Auaunaga Musuia.” Fai atu i vaega e faasoa mai a latou lisi, ma fautuaina alii talavou taitasi e filifili se mea se tasi mai le lisi o le a ia galue ai.

  • I le aluga o le vaiaso ao lei faia le sauniga o le korama, valaaulia alii talavou e o i le ministering.lds.org ma saili se mea e musuia ai i latou ina ia avea atili o ni uso o auaunaga faapei o Keriso ma o mai saunia e faasoa mea na latou maua. O a ni aafiaga e mafai e alii talavou ona faasoa atu pe a latou vaaia uso o auaunaga o faamanuiaina olaga o isi?

3. O Se Fuafuaga e Faatino

Taitaiina e se uso o le au peresitene o le korama, pe a ma le 5–10 minute

  • Fai atu i alii talavou e talanoaina soo se lagona po o uunaiga sa latou maua i le taimi o le fonotaga. O le a se mea na taua ia i latou? E i ai se mea e mafai ona latou faia patino pe o se korama e faaaoga ai mea sa latou aoaoina?

  • Tuu atu ni nai minute i alii talavou e tusi ai mea o le a latou faia i vaiaso a sau e faatino ai a latou uunaiga. Valaaulia i latou e faasoa mai o latou manatu.

  • Faamanatu atu i alii talavou o le a latou maua le avanoa e faasoa atu ai o latou aafiaga i le amataga o le fonotaga e sosoo ai.