O le a le Siona?

Ua poloaiina i tatou e le Alii ia “saili e aumai i luma ma faatu le faamoemoe o Siona.” (MF&F 6:6). O Siona e faatatau i le nuu o le Alii o e tasi le loto ma tasi le mafaufau ma nonofo faatasi i le amiotonu. E mafai ona tatou faatuina Siona e ala i le fausia o le lotogatasi ma le malosi faaleagaga i o tatou aiga, uarota po o paranesi, ma alalafaga.

Ia saunia oe lava faaleagaga

E faapefea ona e tauivi ia ola i mataupu faavae o Siona i lou olaga ma le aiga? O anafea na e lagona ai se agaga o le lotogatasi i se uarota po o totonu o lou aiga?

Pe o lotogatasi alii talavou i lau korama? O le a se mea e mafai ona latou faia e faatulagaina ai Siona? O a ni papupuni atonu latou te feagai?

Ia suesue ma le agaga tatalo ia mau ma punaoa nei. O le a se mea o le a uunaia alii talavou e fausia Siona?

Mosaea 18:21; MF&F 38:27 (E tatau ona tatou sailia le lotogatasi)

4 Nifae 1:1–18 (Ua nonofo faatasi sa Nifae ma sa Lamana i se tulaga faaSiona)

MF&F 6:6; 11:6; 12:6; 14:6 (Saili e faatu le faamoemoe o Siona)

MF&F 97:21; Mose 7:18 (O le a le Siona?)

Jeffrey R. Holland, “O Pese e Usuina ma Lē Usuina,” Ensign po o le Liahona, Me 2017, 49–51

Benjamín De Hoyos, “Ina Ia Avea Lo Tatou Malamalama ma Tagavai mo Atunuu,” Ensign po o le Liahona, Me 2017, 124–26

Henry B. Eyring, “E Fusia o Tatou Loto ia Tasi,” Ensign po o le Liahona, Nov. 2008, 68–71.

“Siona,” Faamaoni i le Faatuatua (2004), 158–59

Vitio: “O Vae o Dayton,” “ Faasoa atu le Malamalama o Keriso”

3:2

5:20

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua), ma valaaulia se faufautua po o se isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faailoa atu le lesona o lenei vaiaso:

Fai atu i uso taitasi o le korama e faauma le fuaiupu lenei: “O mea na matou aoaoina i le vaiaso ua tea na taua ia te au aua….”
Tusi Siona i le laupapa, ma fai atu i alii talavou e lisi upu e oo mai i le mafaufau pe a latou mafaufau i Siona. Valaaulia i latou e faitau itulau 158–59 o Faamaoni i le Faatuatua e faaopoopo i le latou lisi. O le a la tatou matafaioi o ni uso e umia le perisitua i le fausiaina o Siona?

Aoao faatasi

O gaoioiga taitasi nei e mafai ona fesoasoani i uso o le korama e aoao ai e uiga i Siona. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

O le a se mea na aoao mai e Elder Jeffrey R. Holland i lana saunoaga “O Pese e Usuina ma Lē Usuina” e uiga i le auala e pei ai le Ekalesia o se aufaipese? Ina ia fesoasoani i alii talavou ia malamalama i le faamatalaga faafaatusa a Elder Holland, valaaulia se tasi pe sili atu foi ni tagata o e na pepese i se aufaipese e faasoa mai ni o latou manatu i le auala na fesoasoani ai le pepese i se aufaipese ia i latou e malamalama ai i le tatau ona i ai o le tulaga eseese i le malo o le Atua. E mafai faapefea ona tatou fausia Siona i le faia o se “avanoa” i la tatou korama, i la tatou vaega o Alii Talavou, po o le uarota mo tagata o e atonu e lagona lo latou le talafeagai ma i tatou? O le a se fautuaga na tuuina mai e Elder Holland e mafai ona fesoasoani ia i tatou e faia ai lenei mea?
Na faia e Elder Benjamín De Hoyos le fesili lenei i lana saunoaga “Ina Ia Avea Lo Tatou Malamalama ma Tagavai mo Atunuu”: “O a nisi o mea taua e faia i lenei taimi matagofie o le atiina ae o Siona ma le faapotopotoina o Isaraelu?” Ina ia fesoasoani i alii talavou e saili tali i lenei fesili, e mafai ona latou faitau i parakalafa mulimuli e 11 i le saunoaga a Elder Hoyos. E mafai faapefea ona tatou fausia lelei Siona i auala e tolu na ia faasoaina mai?
Faitau faatasi Mose 7:18–19, ma vaai mo se isi igoa mo Siona. Valaaulia alii talavou e vaai faalemafaufau pe o le a faapei le “Aai Paia”. O le a faapefea ona ese mai le lalolagi o loo tatou nonofo ai nei? Valaaulia i latou e lisi i le laupapa mea o le a le maua i se Aai Paia ma mea o le a maua i se Aai Paia. Fautuaina i latou e faitau 4 Nifae 1:1–18 e sue mea e mafai ona latou faaopoopo i a latou lisi. O a ni mea e tatau ona suia ia i tatou o ni tagata taitoatasi ina ia fausia ai Siona? O a ni mea e mafai e alii talavou ona fai e fausia ai Siona i o latou aiga? i la latou korama?
Fai atu i alii talavou e faitau Mataupu Faavae ma Feagaiga 6:6; 11:6; 12:6; ma le 14:6 ma sue se fuaitau o loo tutusa ai uma. O le a le manatu o alii talavou i le uiga o le faatuina o le faamoemoe o Siona? Faaali se tasi o vitio ua fautuaina atu i lenei otootoga, ma fai atu i uso o le korama e vaai mo auala o loo sailia e alii talavou i vitio e aumaia ai i luma ma faatu le faamoemoe o Siona. O le a se mea ua uunaia ai i latou i uiga ma manao o nei alii talavou? E mafai faapefea ona latou mulimuli i faataitaiga a alii talavou e fesoasoani i le faatuina o Siona?
Vaevae le korama i ni vaega se lua. Fai atu i se tasi vaega e faitau ma talanoa i le Mosaea 18:21 ma le Mataupu Faavae ma Feagaiga 38:27, ma fai atu i le isi vaega e faitau ma talanoa i le Mataupu Faavae ma Feagaiga 97:21 ma le Mose 7:18. Valaaulia ia vaega e fuafua se lesona faitino e mafai ona latou faaaogaina e aoao atu ai le vaega o totoe o le vasega i mea sa latou aoaoina mai a latou mau (afai latou te manaomia se fesoasoani, faasoa atu ma i latou “Faaaoga Tala ma Faataitaiga e Aoao Atu ai ia Aoaoga Faavae o le Talalelei” i le itulau e 22 o le Aoao Atu i le Ala a le Faaola). Fai atu ia i latou e fetufaai o latou manatu i le tasi ma le isi. O a faamanuiaga o le lotogatasi o se aiga, se korama, ma se uarota po o se paranesi?
Faitau faatasi, o se korama MF&F 38:27. Aisea e finagalo ai le Alii ia tasi i tatou? Vaevae vaega o le lauga a Peresitene Henry B. Eyring “E Fusia o Tatou Loto Ia Tasi” i alii talavou, ma fai atu ia i latou e sue mataupu faavae ua aoao mai e Peresitene Eyring e mafai ona fesoasoani ia i tatou e maua ai le faateleina o le lotogatasi i o tatou aiga ma korama. Valaaulia alii talavou e tusi mataupu faavae latou te maua i le laupapa. O a ni pa pupuni o loo taofia alii talavou mai le mauaina o le lotogatasi? E mafai faapefea ona faatoilalo nei pa pupuni? Fautuaina alii talavou e faatutu ni sini patino ina ia faaaoga se tasi o nei mataupu faavae e faateleina ai le lotogatasi i o latou aiga. Galulue faatasi e faatu se sini ina ia sili atu le lotogatasi i le avea ai ma se korama.

Fai atu i alii talavou e faasoa mai mea na latou aoaoina i le aso. Pe ua latou malamalama po o le a le Siona? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“E le tatau ona tatou faauigaina ia faamatalaga i taitai o le Ekalesia e aunoa ma le faamautuina o le faapogai o faamatalaga. Afai tatou te sii maia mau, e tatau ona tatou mautinoa o lo tatou faaaogaina o na mau e ogatasi lea ma la latou matalalaga” (O Le Aoao Atu, E Leai Se Isi Valaauga E Sili Ai[1999], 55).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Valaaulia le korama e aapa atu i se tasi e le o lagonaina o ia o se tasi o la latou korama po o le latou vaega o uo.
Faasoa atu ona lagona e uiga i Siona ma le taua o le lotogatasi i le korama.