Aisea tatou te totogi ai sefuluai?

O le totogiina o le sefuluai o se avanoa paia. A totogi a tatou sefuluai, ua tatou faaali atu le agaga faafetai i mea uma ua tuuina mai e le Atua ma toe faafoi atu ia te Ia se vaega o mea na tatou maua. O sefuluai e faaaoga e fau ai malumalu ma falelotu, faaliliu ma lolomi ai tusitusiga paia, fai ai le galuega faafaifeautalai ma talafaasolopito o aiga, ma atinae ai le malo o le Atua i luga o le fogaeleele i isi lava auala.

Saunia oe lava ia faaleagaga

Mafaufau i faamanuiaga faaleagaga ma faaletino ua e maua mai le totogiina o lau sefuluai. O a ni aafiaga sa oo ia te oe e mafai ona e faasoa atu i alii talavou?

Aisea o le a taua ai i alii talavou le totogi o le sefuluai? E faapefea ona e aoao atu ia i latou le taua o le ola i le tulafono o le sefuluai?

O a ni mau ma isi punaoa o le a fesoasoani i alii talavou ia malamalama i le mafuaaga tatou te totogi ai sefuluai?

Malaki 3:8–10; 3 Nifae 24:8–10; MF&F 64:23 (Faamanuiaga folafolaina o le sefuluai)

MF&F 119 (Ua faailoa mai le tulafono o le sefuluai)

David A. Bednar, “O Pupuni o le Lagi,” Ensign po o le Liahona, Nov. 2013

Henry B. Eyring, “O Faamanuiaga o le Sefuluai,” Liahona, Iuni 2011, 4–5

Carl B. Pratt, “O Faamanuiaga Silisili ona Taua a le Alii,” Ensign ma le Liahona, Me 2011, 101–3

“Sefuluai,” Faamaoni i le Faatuatua (2004), 155–57

“Sefuluai ma Taulaga,” Mo le Malosi o le Autalavou (2011), 38–39

Aoao atu i le ala a le Faaola

Na faatuatuaina e le Faaola Ona soo, saunia i latou, ma tuu atu ia i latou tiutetauave taua e aoao atu, faamanuia, ma auauna atu i isi. E mafai faapefea ona faaali atu lou faatuatuaina o alii talavou ma tuu atu ia i latou avanoa e aoao ai isi?

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Tusi i luga o le laupapa le fesili mai le autu o le lesona o le vaiaso ua tuanai, ma fesili atu pe mafai e se tasi o alii talavou ona tali le fesili e faaaoga ai mea sa ia aoaoina i le vaiaso ua mavae.
Tusi i luga o le laupapa, “Aisea e te totogia ai le sefuluai?” Fai atu i alii talavou e vaai faalemafaufau faapea, ua fesili atu ia i latou se uo mai se isi tapuaiga i le fesili lenei. O le a se latou tali i ai? Ia uunaia i latou e faasoa atu ni aafiaga sa latou maua po o latou aiga foi e faatatau i le sefuluai.

Aoao faatasi

O gaoioiga taitasi o loo i lalo o le a fesoasoani ai i alii talavou ia malamalama i le tulafono o le sefuluai. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Fai atu i alii talavou e sue le Malaki 3:8–10 ma le MF&F 64:23 ma faasoa atu i folafolaga na faia i e totogi sefuluai. Fai atu i alii talavou e sue pe fia le mea ua faamoemoe le Alii tatou te totogi atu i sefuluai i le faitau lea o le MF&F 119 (faamalamalama atu o le “mea faaopoopo” o le tatou “tupe maua” i le tausaga).Tufa atu lisiti o sefuluai ma tuu atu i alii talavou e faamatala atu i le tasi ma le isi le auala e faaaoga ai. Ia faasoa atu auala ua faamanuiaina ai oe ona o le totogiina o le sefuluai.
Tusi ni koluma se tolu i luga o le laupapa ma ulutala nei: Faamanuiaga, Auala E Faaaoga Ai Tupe, ma le Uiga Faaalia. Vaevae le korama i ni vaega toalaiti, ma tofi atu i vaega taitasi se tasi o autu e fai i ai se suesuega i le Mo le Malosi o le Autalavou: “Sefuluai ma Taulaga.” Fai atu ia i latou e tusi mea ua latou maua i koluma talafeagai o loo i luga o le laupapa. Valaaulia ni isi o i latou e faasoa atu a latou molimau e uiga i le tulafono o le sefuluai.
Faitau, faaali, pe faamatala atu le tala e uiga i le tamamatua o Elder Pratt mai le “O Faamanuiaga Silisili ona Taua a le Alii.” Tufa atu kopi o le lauga i alii talavou, ma fai atu ia i latou e sue se tasi o lesona sa aoaoina mai e Elder Pratt mai lona tamamatua ma faasoa atu i le korama. Valaaulia alii talavou e faamatala e uiga i se taimi na faamanuaina ai i latou po o latou aiga ona o le totogiina o le sefuluai (pe faasoa atu sa oe lava aafiaga).
Vaevae le korama i ni vaega se lua. Fai atu i le tasi vaega e faitau le lauga a Peresitene Henry B. Eyring “O Faamanuiaga o le Sefuluai,” ma talosaga atu i le isi vaega e faitau parakalafa lua 2–13 o le lauga a Elder David A. Bednar “O Pupuni o le Lagi.” Fai atu ia i latou e faitau lauga, fai se lisi o faamanuiaga tatou te maua pe a totogi a tatou sefuluai, ona tusi lea o faamanuiaga i luga o le laupapa. Valaaulia alii talavou e faasoa atu ni faamanuiaga ua oo atu ia i latou ma o latou aiga mai le totogi o le sefuluai. Fesili atu ia i latou pe faapefea ona fesoasoani le ola i le tulafono o le sefuluai i a latou faaipoipoga ma aiga i le lumanai.

Fai atu i alii talavou e faasoa mai mea na latou aoaoina i le aso. Pe ua latou malamalama i le mafuaaga tatou te totogi ai sefuluai? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Valaaulia e faatino

O le alii talavou o loo taitai e faaiuina le fonotaga. E mafai ona ia:

Faasoa atu pe aisea ua avea ai le totogi o le sefuluai ma se vaega taua o lona olaga.
Ia luiina tagata o le korama ia totogi e le aunoa ia sefuluai.