Aisea ua poloaiina ai i tatou e tausia le paia o le aso Sapati?

Ua tuuina mai e le Alii le aso Sapati mo lou manuia ma ua poloaiina oe e te tausia lona paia. O le faamamaluina o le aso Sapati o le a aumaia latalata atili ai i tatou i le Alii ma i o tatou aiga. O le a aumai ai ia i tatou se vaaiga e faavavau ma le malosi faaleagaga. O le Sapati foi e maua ai e i tatou le malologa mai a tatou galuega faaletino ma tapuai ai i le Alii.

Saunia oe lava ia faaleagaga

O a ni faamanuiaga ua e fiafia ai ona o lou tausia o le paia o le aso Sapati? E faapefea ona e iloa le mea e talafeagai ma le mea e le talafeagai i le Sapati?

Aisea e taua ai le malamalama o alii talavou i le mafuaaga ua tatou maua ai se aso Sapati? E mafai faapefea ona e fesoasoani e totō i totonu o i latou se manao e faamamalu le Sapati? E mafai faapefea ona e fesoasoani i alii talavou e filifili mo i latou lava po o le fea gaoioiga e talafeagai mo le aso Sapati?

Ia suesue ma le agaga tatalo ia mau ma punaoa o loo i lalo, ma filifili mea e sili atu ona aoga i alii talavou e aoao ai i latou e uiga i le aso Sapati.

Kenese 2:2 (Afuaga o le aso Sapati)

Esoto 20:8–11 (Tausi le paia o le aso Sapati)

Mareko 2:27 (O le Sapati ua faia mo le tagata)

MF&F 59:9–13 (O le faamamaluina o le Sapati e fesoasoani ia tatou tumau ai i le mama mai le lalolagi)

Henry B. Eyring, “Lotofaafetai i le Aso Sapati,” Ensign po o le Liahona, Nov. 2016, 99-102

Russell M. Nelson, “O Le Aso Sapati o se Aso Fiafia,” Ensign po o le Liahona, Me 2015, 129–32

Kevin S. Hamilton, “Pi'imau Pea,” Ensignpo o le Liahona, Nov. 2013

“Sapati,” Faamaoni i le Faatuatua (2004), 151–52

“Tausia o le Aso Sapati,” Mo le Malosi o le Autalavou (2011), 30–31

Vitio: “Na Ia Aoao le Alofa i Lona Talavou”

1:16

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Faaali atu i alii talavou se ata po o se mea faitino mai le lesona o le vaiaso ua te’a, ma fai atu ia i latou e faamatala mai pe o le a lona faatatauga i mea sa latou aoaoina i le vaiaso ua te’a.
Fai atu i alii talavou pe na valaaulia i latou e se uo e fai se mea i le Aso Sa lea sa le talafeagai mo le Sapati. Na faapefea ona latou faamalamalama atu i a latou uo le pogai tatou te tausia ai le paia o le aso Sapati? Ia faasoa atu i le korama le parakalafa o loo i le amataga o le otootoga lenei mo nisi fautuaga i auala e faamalamalama atu ai i isi le taua o le Sapati.

Aoao faatasi

O gaoioiga taitasi o loo i lalo o le a fesoasoani i alii talavou ia malamalama i le faamoemoega o le aso Sapati. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Valaaulia alii talavou taitasi e suesue le saunoaga a Peresitene Henry B. Eyring “Lotofaafetai i le Aso Sapati” ma faia se lisi o mea na tau mai e Peresitene e mafai ona tatou faafetai ai i le Sapati. Tuu atu i alii talavou e faatusatusa o latou lisi ma faasoa atu mea sa latou mauaina. Faitau faatasi le valaaulia a Peresitene Eyring i le faaiuga o lana saunoaga, ma luiina tagata o le korama ina ia faatino e tusa ai.
Vaevae le lauga “O Le Aso Sapati o se Aso Fiafia” i ni vaega laiti se tolu pe fa. Valaaulia ia alii talavou e faitau ia vaega, a le i vaega toalaiti pe faitau le tagata lava ia. O a ni malamalamaaga na latou maua e uiga i le auala e fai ai le Sapati ma se aso fiafia? E mafai faapefea ona faamautinoa e alii talavou o o latou uiga i le Sapati o le a taitai atu ai i le olioli ma le fiafia?
Vaevae ia alii talavou ia tofu paga. Fai atu i se alii talavou mai soa taitasi e faitau le MF&F 59:9–15 ma lisi ia mea ua faatonuina i tatou e fai i le Sapati. Fai atu i le isi alii talavou e sue i fuaiupu e 16–19 mo faamanuiaga folafolaina pe a tatou tausia ia paia le aso Sapati. Fai atu ia i latou e faasoa atu i le tasi ma le isi mea latou te maua ma talanoa pe aisea e taua ai le faamamalu o le aso Sapati. Valaaulia le korama e talanoa pe aisea ua tuuina mai ai ia i tatou e le Alii le aso Sapati. Fai atu i alii talavou taitoatasi e mafaufau i se mea e mafai ona ia faia e mautinoa ai e ausia faamoemoega a le Alii mo le aso Sapati i lona lava olaga.
Fesili atu i alii talavou pe faapefea ona latou iloiloina o se gaoioiga e talafeagai mo le Sapati. Fai atu ia i latou e vaai i le Mataupu Faavae ma Feagaiga 59:9–13 ma i le Mo le Malosi o le Autalavou (itulau 30–31) mo mataupu faavae e ono fesoasoani ia i latou, ma fai atu i ai e tusi mea latou te maua i luga o le laupapa. Fai atu i alii talavou taitasi e mafaufau i ana lava gaoioiga i le Aso Sa ma iloilo mo ia lava pe o ogatasi ma nei mataupu faavae. Ia uunaia alii talavou e fai se sini faapitoa ia fai soo se suiga latou te lagona e manaomia i mea latou te faia i le Sapati.
Faaali pe faatatau le tala e uiga i le tama o Elder Kevin S. Hamilton i parakalafa muamua e lua o lana lauga “Pi'imau Pea.” O a mea o aoaoina e alii talavou e uiga i le taua o le tausia o le Sapati mai le tala lenei? Tuu atu i alii talavou ni kopi o le parakalafa mai le lauga a Elder Hamilton lea e amataina i le fasi fuaitau “E tofu tatou ma filifiliga e tele e faia.” Fai atu ia i latou e faitau le parakalafa ma galulue faatasi i paga e fai se lisi o gaoioiga o le Sapati o le “lelei,” “lelei tele,” ma le “lelei silisili”. Valaaulia i latou e faasoa mai o latou manatu i le vasega.
A o e faitau i le “Sapati” i le Faamaoni i le Faatuatua, fai atu i alii talavou e faalogologo mo ni faataitaiga talafeagai o gaoioiga mo le Aso Sa. O le a le eseesega o le manatu o le lalolagi e uiga i gaoioiga o le Aso Sa mai le mea ua finagalo le Alii tatou te faia? Fai atu ia i latou e mafaufau i nisi o gaoioiga e ono saofaga i le pe aveesea ai le agaga o le Sapati. E faapefea ona latou iloa o mea o loo latou faia e tausia ai le paia o le Sapati pe leai foi? O anafea na latou lagonaina ai o mea sa latou faia sa le tusa lea ma le aso Sapati?

Fai atu i alii talavou e faasoa mai mea na latou aoaoina i le aso. Pe ua latou malamalama i faamoemoega o le aso Sapati? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“A e aoao mai tusitusiga paia, e tele lava ina fesoasoani i le au aoao le vaavaai mo se mea patino” ( O Le Aoao Atu, E Leai Se Isi Valaauga e Sili Ai [1999], 57).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Faasoa atu lana molimau i le taua o le tausia ia paia o le aso Sapati ma faamatala atu le auala ua lelei atu ai lona olaga ona o lona faia o lea mea.
Valaaulia tagata o le korama e faamalosia o latou aiga ma i latou e siomia i latou i le faia o se faataitaiga lelei o le tausia o le aso Sapati ia paia.