Aisea tatou te anapopogi ai?

O le anapogi o le alu lea e aunoa ma se mea’ai ma se vaiinu i lou loto fuatiaifo mo se vaitaimi faatulagaina. O le anapogi faatasi ai ma le tatalo faamaoni e mafai ona fesoasoani e saunia oe lava faapea ma isi ina ia maua faamanuiaga a le Atua. O le anapogi e aofia ai foi le foai atu o se taulaga anapogi limafoai e fesoasoani ai ia i latou o e le tagolima. E ono talosagaina i latou e umia le Perisitua Arona e fesoasoani i le epikopo i le aoina o taulaga anapogi.

Saunia oe lava ia faaleagaga

O a nisi o mafuaaga sa e anapogi ai, ma o a foi taunuuga o lau anapogi? O a ni mea e te faia ia anoa ai le anapogi?

Aisea e taua ai i alii talavou ona malamalama i le mataupu faavae o le anapogi? O le a le faafitauli sili e feagai ma alii talavou ina ia olioli ai i faamanuiaga uma o le anapogi?

O a ni mau ma nisi punaoa o le a fesoasoani i alii talavou ia malamalama i le anapogi ma ona faamanuiaga e maua mai ai?

Eseta 4:10–17; Mataio 4:1–11; MF&F 59:12–14 (O le anapogi o se puna o le malosi faaleagaga)

Isaia 58:3–12; Mataio 6:16–18 (Ua faamalamalama mai e le Alii le anapogi sa’o, lea e aofia ai taulaga anapogi)

Mataio 17:14–21 (Ua ta’u atu e Iesu i Ona soo o le anapogi ma le tatalo e tuuina atu ai le mana sili atu e faamalolo ai)

Mosaea 27:18–24; Alema 6:6 (O le anapogi e mafai ona fesoasoani e faamanuia ai isi)

Alema 5:45–46; 17:1–3, 9; Helamana 3:35 (O le anapogi e fesoasoani e faamalosia ai molimau)

Henry B. Eyring, “E Le o Lenei Ea le Anapogi Ou te Loto I Ai?’” Ensign or Liahona, Me 2015, 22–25

L. Tom Perry, “Se a Ea La Oulua Feau?” Ensign po o le Liahona, Me 2005, 84-87

Dean M. Davies, “O Le Tulafono o le Anapogi: O Se Tiutetauave Faaletagata Lava Ia e Tausia ai E Matitiva ma E le Tagolima,” Ensign po o le Liahona, Nov. 2014, 53–55

“Anapogi ma Taulaga Anapogi,” Faamaoni i le Faatuatua (2004), 20–22

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei.E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Valaaulia alii talavou e faasoa atu se mau latou te manatua mai le fonotaga a le korama i le vaiaso ua tuanai.
Valaaulia alii talavou e vaai faalemafaufau e faapea, ua manao se uo e auai i se isi tapuaiga e iloa po o le a le uiga o le anapogi ae o le a foi le mafuaaga tatou te faia ai. O le a faapefea ona latou faamalamalamaina le mataupu faavae o le anapogi i a latou uo? Ia talanoa i le eseesega o le anapogi ma le na o le alu fiaai.

Aoao faatasi

O le a fesoasoani gaoioiga taitasi nei i alii talavou ia malamalama ai i le uiga o le anapogi. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Valaaulia ia alii talavou e faitau pe matamata i le saunoaga a Peresitene Henry B. Eyring “‘E Le o Lenei Ea le Anapogi Ou te Loto I Ai?’ o se vaega. Mafaufau e vaevae le lauga i ni vaega laiti. A o latou faitauina pe matamata i vaega taitasi, fai atu ia i latou e vaavaai mo ni tali i fesili e pei o le, “O le a le uiga o le anapogi?” “O a faamoemoega o le anapogi?” ma le “O a faamanuiaga o le anapogi?” Valaaulia ia alii talavou e faasoa mai le auala na faamanuiaina ai e le anapogi o latou olaga, ma po o le a le mea o le a latou faia e faaleleia ai a latou anapogi.
I le avea ai o se korama, fai se lisi o luitau masani e ono fetaiai ma alii talavou. Valaaulia alii talavou e faitau mau o loo faamatala mai ai faamanuiaga o le anapogi, e pei o na o loo lisiina i le otootoga lenei. Fai atu ia i latou e lisi i luga o le laupapa ia faamanuiaga mai se anapogi sa’o. E mafai faapefea ona fesoasoani nei faamanuiaga i alii talavou e faatoilalo ai luitau o le olaga? E mafai faapefea ona latou fesoasoani ia i latou i o latou matafaioi o e ua umia le perisitua? Ia molimau atu i faamanuiaga o le anapogi, ma valaaulia alii talavou ia faia foi faapea.
Fai atu i alii talavou e fai se siata e tolu koluma i luga o se fasipepa ma faaigoa koluma, “O Le A Se Mea E Tatau Ona Tatou Faia?” “O Le A Se Mea E Tatau Ona Tatou Aloese Mai i le Faia?” ma le “O A Faamanuiaga Ua Folafola Mai e le Atua?” Fai atu ia i latou e tusi tali latou te maua e faatatau i le anapogi i le Isaia 58:3–12. (Afai e manaomia, ia faamalamalama atu o taulaga anapogi o se tasi lea o auala tatou te “tofitofi [a tatou] mea e ai i le ua fiaai,” ma e talia alii talavou e totogi taulaga anapogi.) Uunaia i latou e faasoa atu a latou tali ma faamanuiaga ua latou maua ona o le anapogi i le ala a le Alii.
Afai e fesoasoani alii talavou o le tou uarota i le epikopo i le aoina o taulaga anapogi (tagai i le Tiute i le Atua, 23), fuafua e tuu atu i le peresitene o le korama e taitaia se talanoaga i le auala e mafai ona latou faataunuu ai lenei tiute i se auala o le a fiafia ai le Alii. Mo se faataitaiga, e mafai ona talanoaina e le peresitene o le korama po o a mea e faaaoga i ai taulaga anapogi, po o a uiga faaalia o tagata o le korama a o latou faatinoina lenei tiute, ma po o a faamanuiaga mo le auauna atu i isi. I le avea ai ma se vaega o lenei talanoaga, mafaufau e toe iloilo le fautuaga a Epikopo Dean M. Davies lea na tuuina atu i e umia le Perisitua Arona i lana saunoaga “O Le Tulafono o le Anapogi: O Se Tiutetauave Faaletagata Lava Ia e Tausia ai E Matitiva ma E le Tagolima” (tagai Ensign po o le Liahona, Nov. 2014, 55). Valaaulia se tasi o le au epikopo e faamalamalama atu i le korama auala e faaaoga ai taulaga anapogi e fesoasoani ai i e matitiva ma e le tagolima. Ia fuafua e fai se fetuunaiga mo tagata o le korama e aoao atu i se vasega Peraimeri e uiga i lo latou tiute faaleperisitua o le aoina o taulaga anapogi.

Fai atu i alii talavou e faasoa mai mea na latou aoaoina i le aso. Pe ua latou malamalama i le uiga o le anapogi? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“Atonu ... e i ai taimi e te leiloa ai le tali i se fesili. Afai e tupu mai lenei mea, e faigofie lava ona e faapea atu e te le iloa. Atonu e te manao e te fai atu o le a e taumafai e sailia le tali i le fesili. Pe e te manao foi e valaaulia tagata o loo aoaoina e sailia le tali, ma tuuina atu ia i latou se taimi i le isi lesona e lipoti mai ai po o le a se mea ua latou aoaoina” (O Le Aoao Atu, E Leai Se Isi Valaauga E Sili Ai [1999], 67).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Faasoa atu ni aafiaga sa ia maua a o ia anapogi.
Valaaulia tagata o le korama e faaaoga mea ua latou aoaoina i le asō i le isi taimi latou te anapopogi ai.
Valaaulia alii talavou e totogi taulaga anapogi.