“E Le o Lenei Ea le Anapogi Ou te Loto I Ai?”
Saunia e Peresitene Henry B. Eyring
Fesoasoani Muamua i le Au Peresitene Sili
O le a sili atu mea e faia e lau taulaga anapogi nai lo le fesoasoani atu e fafaga ma faalavalava ni tino. O le a faamaloloina ma suia ia loto.
Ou uso e ma tuafafine, o se fiafiaga mo au le faailoa atu o lo’u alofa ia te outou i lenei konafesi aoao o Le Ekalesia a Iesu Keriso o le Au Paia o Aso e Gata Ai. O lena fiafia e sau mai le molimau a le Agaga e faapea e oo atu le alofa o le Faaola ia te outou taitoatasi ma fanau uma a le Tama Faalelagi. E finagalo lo tatou Tama Faalelagi e faamanuia Lana fanau i le faaleagaga ma le faaletino. E malamalama foi o Ia i o latou manaoga taitoatasi, a latou fuafuaga, ma o latou faamoemoega.
A tatou ofo atu se fesoasoaniga i soo se tasi, e lagonaina e le Faaola e peiseai o tatou aapa atu e fesoasoani ia te Ia.
Na Ia tau mai le moni o lena mea ia i tatou ina ua Ia faamatalaina se taimi o le lumanai o le a tatou maua uma pe a tatou vaai ia te Ia pe a mavae ma faamaeaina lo tatou olaga i lenei lalolagi. O se ata i lo’u mafaufau o lena aso ua faatupulaia atili ai le manino i aso na ou tatalo ai ma anapogi ia iloa le mea ou te tautala ai i lenei taeao. O le faamatalaga a le Alii o lena faatalanoaga i le lumanai sa tuuina atu i Ona soo, ma ua faamatalaina ai mea tatou te mananao ai ma o tatou loto atoa ina ia moni mo i tatou foi:
“Ona fai atu ai lea o le Tupu i e o i lona itu taumatau, O mai ia, o outou ua faamanuiaina e lou Tama, ia fai mo outou tofi le malo ua saunia mo outou ao lei faavaeina le lalolagi:
“Aua na ou fia’ai, ona outou avane ai lea ni mea ou te ai ai: na ou fi inu, ona outou avane ai lea ni vai ou te inu ai: Sa fai a’u ma tagata ese, ona outou talia lea o a’u:
“Na ou lelavalava ona outou faaofuina lea o au: na ou ma’i ona outou asiasia mai lea o au: na ou i le falepuipui ona outou o ane ai lea ia te au.
“Ona tali mai ai lea ia te ia o e amiotonu, e faapea mai, Le Alii e, o anafea ua matou iloa ai oe ua fia ai ma matou fagaina oe? po o fia inu, ma matou avane e te inu ai?
“O anafea foi na matou iloa ai oe o le tagata ese, ma matou talia oe? po o le le lavalava, ma matou faaofuina oe?
“O ana fea foi na matou iloa ai oe ua ma‘i, po o i le fale puipui ma matou o atu ai ia te oe?
“Ona tali atu ai lea o le Tupu, e faapea atu ia te i latou, E moni, ou te fai atu ia te outou, aua na faia e outou i le tasi o e aupito itiiti o o‘u uso nei, o a’u lea na outou faia i ai.”
Tatou te mananao uma i lena faafeiloaiga fiafia mai le Faaola. Ae e mafai faapefea ona onomea ia i tatou? O loo toatele atu tagata fiaaai, leai ni aiga, ma fanau ua tuulafoaiina a le Tama Faalelagi nai lo i latou atonu e mafai ona tatou fesoasoani i ai. Ma o loo faatupulaia pea le aofai tatou te le o oo atu i ai.
O lea ua tuuina mai ai e le Alii ia i tatou se mea e mafai ona faia e i tatou taitoatasi. O se poloaiga e matua faigofie lava lea e mafai ona malamalama i ai se tamaitiiti. O se poloaiga faatasi ma se folafolaga mo e le tagolima ma i tatou foi.
O le tulafono o le anapogi. O upu o loo i le tusi a Isaia o le faamatalaga lea a le Alii e uiga i le poloaiga ma le faamanuiaga o loo avanoa mo i tatou i Lana Ekalesia:
“E le o lenei ea le anapogi ou te loto i ai? ina ia tatalaina fusi na faia i le amio leaga, e tatala fusi o le amo, e tuuina atu ia saoloto ē ua faasauaina, ma ia outou gausia amo uma lava?
“E le o lenei ea? Ona ia tofitofi au mea e ai i le ua fia ai, ia au mai i lou fale ē ua matitiva ma faasauaina; a e iloa lē ua lē lavalavā e te faaofuina o ia, aua foi e te lafi ia i latou o lou lava aiga?
“Ona gafoa mai ai lea o lou malamalama e pei o le tafa o ata, e taalise ona tupu mai foi o lou malolo; e alu atu foi lau amiotonu i ou luma, e muli’au mai le pupula o Ieova ia te oe.
“Ona e valaau lea, a e tali mai ai Ieova; e te alaga atu, a e fetalai mai o ia, O a’u lenei pe afai e te faateaeseina le amo ia te outou, o le tusi o le lima, ma le upu vale;
“Afai foi e te alofa atu i le ua fia’ai, ma e fafaga ia ma’ona o le ua tiga; ona alu ae lea o lou malamalama i le pouliuli, ma lou pogisa e pei o le aoauli ia:
“E taitaina foi oe e le aunoa e Ieova; e faamalie foi o ia ia te oe pe a oge vai, ma faamalosia ou ivi; e avea foi oe e pei se fanua ua faasūsūina, e pei o le punavai foi e le mate ona suavai.”
O lea la ua tuuina mai ai e le Alii ia i tatou se poloaiga faigofie faatasi ma se folafolaga ofoofogia. I le Ekalesia i nei aso ua ofo mai ai ia i tatou le avanoa e anapopogi ai faa-tasi i le masina ma tuu atu se taulaga anapogi limafoai i lo tatou epikopo po o le peresitene o le paranesi mo le manuia o lē mativa ma lē tagolima. O nisi o ia mea o le a e foai atu o le a faaaogaina e fesoasoani atu ai i e o siomia oe, masalo o se tasi i lou lava aiga. O le a tatalo ma anapopogi auauna a le Alii mo le faaaliga ia iloa ai po o ai e fesoasoani i ai ma po o le a foi se fesoasoaniga e tuu atu. O vaega o lena taulaga ua le manaomiaina e fesoasoani ai i tagata i la outou iunite o le Ekalesia i le lotoifale o le a avanoa lea e faamanuiaina ai isi tagata o le Ekalesia i le lalolagi atoa, o e o loo mafatia.
O le poloaiga ia anapopogi mo e matitiva ua anoanoai faamanuiaga o loo afifi mai ai. Sa ta’ua e Peresitene Spencer W. Kimball o le le usitaia o lena tulafono o se agasala o le faatalalē ma e i ai sona taui mamafa. Sa ia tusia: “O folafolaga silisili ua faia e le Alii ia i latou o e anapopogi ma fesoasoani i e le tagolima. … O le a oo mai musumusuga ma le taitaiga faaleagaga faatasi ai ma le amiotonu ma le latalata atu i lo tatou Tama Faalelagi. O le faatalale e fai lenei faatinoga amiotonu o le anapogi o le a faoa ai mai ia i tatou nei faamanuiaga.”
Sa ou maua se tasi o na faamanuiaga i ni nai vaiaso ua tuanai atu. Talu ai e pa’ū le konafesi aoao i se faaiuga o le vaiaso lea e masani ona aofia ai ma le sauniga anapogi ma molimau, sa ou anapogi ai ma tatalo ia iloa le auala e tatau ai pea ona ou usitaia le poloaiga ia tausia ē lē tagolima.
I se Aso Toonai, a o anapogi ai, sa ou ala ae i le 6:00 ma toe tatalo. Sa uunaia au ou te matamata i talafou i le lalolagi. O iina sa ou faitau ai i le lipoti lenei:
Na faatamaia e le Āfā Fulifaō o Pam le tele o fale a o taia tonu ai Port Vila, le laumua o Vanuatu. Ua fasiotia ai e le itiiti ifo ma le toa ono tagata i Vanuatu, o le uluai lipoti faamaonia lea mai se tasi o āfā sili ona malosi ua taia ai le motu.
“Ua tau le i ai se laau o toe tu sao ona sa agi sa’o atu i ai le āfā i lea motu o le Pasefika.
Na fuafua e le vaega o iloiloga mo faalavelave faafuasei a le World Vision ia iloiloina mea ua faaleagaina i le mavae ai o le afa.
Sa latou fautuaina tagata ia saili atu i ni malutaga i fale malolosi e pei o iunivesite ma aoga.
Ona latou faapea mai lea: “‛O fale sili ona malolosi o ia i latou o falesa simā,’ sa fai mai ai Inga Mepham [mai le] CARE International. … ‛Ae o nisi o i latou e leai ni fale faapena. E faigata tele ona maua se fausaga e te manatu o le a mafai ona tatalia se (matagi) o le vaega 5.’”
Ina ua ou faitau i ai, sa ou manatuaina la’u asiasiga i tamai fale o aiga i Vanuatu. Sa mafai ona ou vaai faalemafaufau i tagata o faatasitasi i fale ua faatamaia e matagi. Ona ou manatua lea o le faafeiloaiga fiafia o a’u e tagata o Vanuatu. Sa ou mafaufau ia i latou ma o latou tuaoi o sosola ese atu i le saogalemu o o tatou falesa simā.
Ona ou vaai faalemafaufau lea i le epikopo ma le peresitene o le Aualofa o savavali atu ia i latou, ma tuu atu faamafanafanaga, palanikeke, mea taumafa, ma vai inu. Sa mafai ona ou vaai faalemafaufau i le fefefe o fanau o loo potopoto faatasi.
Ua matua mamao ese lava i latou mai le fale sa ou faitauina ai lena lipoti, ae ou te iloa le mea o le a faia e le Alii e ala atu i Ana auauna. Sa ou iloaina le mea ua faigofie ai mo i latou ona fesoasoani atu i na fanau a le Tama Faalelagi o le taulaga anapogi, ua foai fua atu e soo o le Alii o loo mamao ese mai ia i latou ae o loo latalata i le Alii.
O lea sa ou lei faatali ai mo le Aso Sa. Sa ou avatu se taulaga anapogi i lo’u epikopo i lena taeao. Ou te iloa atonu e faaaogaina e le epikopo ma le peresitene o le Aualofa la’u taulaga e fesoasoani ai i se tasi i lo matou pitonuu. Ae ou te iloa lelei i latou. Ou te iloa o le a musuia i latou ia siitia ma uunaia tagata latou te alolofa i ai mo le Alii. Atonu e le manaomia la’u taulaga itiiti i nofoaga lata mai o loo matou nonofo ai ma lo’u aiga, ae o isi faasiliga o taulaga i le lotoifale atonu e mafai ona oo atu lava i Vanuatu.
O isi āfā ma faalavelave o le a oo mai i le lalolagi atoa i tagata e alofa i ai le Alii ma ē o loo Ia lagonaina lo latou faanoanoa. O se vaega o lau taulaga anapogi ma la’u taulaga i lenei masina o le a faaaogaina e fesoasoani ai i se tasi, i se mea, o ē o le a lagonaina e le Alii lo latou toomaga e peiseai o Lona lava Ia toomaga.
O le a sili atu mea e faia e lau taulaga anapogi nai lo le fesoasoani atu e fafaga ma faalavalava ni tino. O le a faamaloloina ma suia ia loto. O le fua o se taulaga e faia ma le lotomalie atonu o se manao i le loto o le tagata na mauaina ia aapa atu foi i isi o loo mafatia. O loo tupu lena mea i le lalolagi atoa.
Sa tupu i le soifuaga o Tuafafine Epi Tulei, e nofo i Sierra Leone. Sa amatalia se taua faalemalo i le 1989. Sa pagatia ai le atunuu mo ni tausaga. Ua leva lena ona avea Sierra Leone ma se tasi o atunuu sili ona mativa i le lalolagi. “I le taimi o le taua, sa le manino ai po o ai na puleaina le atunuu—sa tapunia … faletupe, tapunia ofisa o le malo, [sa lei mataalia foi] leoleo, … ma sa i ai fetauaiga, fasiotiga tagata, ma le faanoanoa. E faitau afe tagata na maumau ai o latou ola, ma sa silia ma le lua miliona tagata sa faamalosia e o ese mai o latou aiga ina ia sao mai fasiotiga tagata.”
E oo lava i ia taimi, sa tuputupu ae pea Le Ekalesia a Iesu Keriso o le Au Paia o Aso e Gata Ai.
Sa faatulagaina se tasi o uluai paranesi i le aai sa nofo ai Tuafafine Tulei. O lona toalua o le uluai peresitene o le paranesi. Sa auauna atu o se peresitene o le itu i le taimi o le taua faalemalo.
“A asiasi atu ni malo i le fale o Tuafafine Tulei [i le taimi nei], e fiafia lava o ia e faaali atu ia i latou ni [oa taua] mai le taua: o se ofutino tusitusi lanu moana paepae [sa ia maua] mai se taga o lavalava faaaoga na foai atu e tagata o le Ekalesia ma se palanikeke, lea ua tuai ma pūpū uma.”
Fai mai a ia, “O le ofutino lenei o le … ofu muamua lea na ou [maua]. Sa masani ona ou ofuina e alu ai e faigaluega—sa matua manaia lava. [Sa ou lagona ai le matagofie tele.] Sa lei i ai nisi o’u lavalava.
“I le taimi o le taua, sa faamafanafanaina pea i matou e lenei palanikeke, o a’u ma lau fanau. A ō mai tagata fouvale e osofai i matou, e na o le pau lava lea o le mea [e mafai] ona ou tapa i ai [pe a matou sosola atu i le togavao]. O lea matou [te] ave ai lava le palanikeke. Na te faamafanafanaina i matou ma tuli ese le namu mai ia i matou.”
“E talanoa Tuafafine Tulei e uiga i lona lotofaafetai mo se peresitene o se misiona e alu atu i le atunuu ua olopalaina e le taua ma ni [tupe] i lana taga.” O na tupe, mai foai o taulaga anapogi a tagata e pei o outou, sa faatagaina ai le Au Paia e faatau meaai sa le mafai e le toatele o tagata Siera Leone ona gafatiaina.
Fai mai Tuafafine Tulei, a o saunoa e uiga ia i latou sa lava le agalelei e foai atu mo i latou ina ia ola ai, “A ou mafaufau [i] tagata na faia lenei mea … ou te lagona lava [na] auina mai [i latou] e le Atua, ona o tagata soifua masani lava sa faia lenei faatinoga o le agalelei mo i [matou].”
Sa nofonofo se tagata asiasi mai le Iunaite Setete ma Epi e lei leva atu. A o la faatasi ai, “sa taaina atu lana vaai i se seti o tusitusiga paia sa i luga o se laulau.” Sa mafai ona ia iloaina o se oa lea mea, “sa faailogaina lelei faamatalaga i koluma. Sa tuai lava itulau; o nisi sa masaesae. Sa pa’ū ese le faavaa o le tusi.”
Sa ia uuina tusitusiga paia i lona “lima ma suesue lemu ona itulau. A o [ia faia lea mea, sa ia tau ai i se] kopi samasama o se lisiti o sefuluai ma foai. Sa mafai ona [ia] iloaina i se atunuu sa matua taūa ai le [tālā ona sa faigata ona maua], sa totogi ai e Epi Tulei le tālā e tasi i lana sefuluai, tālā i le tupe mo faifeautalai, ma le tālā mo lana taulaga anapogi mo i latou o ē, i ana upu, sa “‘matitiva moni lava.’”
Sa tapuni e le tagata asiasi tusitusiga paia a Tuafafine Tulei ma mafaufau, a o ia tu faatasi ai ma lenei tina Aferika faamaoni, o loo tu o ia i luga o se eleele paia.
E pei lava ona mafai e le mauaina o faamanuiaga o au taulaga ma a’u taulaga anapogi ona suia loto, e faapena foi i le anapogi mo le manuia o isi. E oo lava i se tamaitiiti na te lagonaina lava.
E toatele tamaiti, ma nisi o tagata matutua, atonu mo ni mafuaaga patino e faigata ai ona anapogi mo le 24 itula. I upu a Isaia, e mafai ona lagonaina o le anapogi e “mafatia ai o [latou] agaga.” E iloa e matua atamamai lena avanoa ma o lea e mulimuli ai ma le faaeteete i le fautuaga a Peresitene Iosefa F. Samita: “E sili atu le aoao o i latou i le mataupu faavae, ma tuu i latou e tausia pe a lava lo latou matutua e filifili ai ma le atamai.”
Sa ou vaaia le faamanuiaga i lena fautuaga talu ai nei. Sa iloa e se tasi o atalii o la’u fanau le faigata tele ona onosaia le anapogi e 24 itula. Ae sa tuu pea e ona matua atamamai le mataupu faavae i lona loto. Sa maliu talu ai nei se tausoga o se tasi o ana uo i le aoga i se faalavelave. Sa fesili atu le atalii lea i lona tina i le aso anapogi, i le taimi tonu e masani lava ona faafaigata ai ona faaauau le anapogi, pe faamata o le a lagona e lana uo faanoanoa le mafanafana pe a faaauau pea lana anapogi.
O lana fesili o le faamautinoaga lea o le fautuaga a Peresitene Iosefa F. Samita. Ua oo le atalii o se tasi o la’u fanau i le tulaga e le gata ua ia malamalama i le mataupu faavae o le anapogi, ae sa totoina foi i lona loto. Ua oo ina ia lagonaina o lana anapogi ma tatalo o le a taitai atu ai i se faamanuiaga mai le Atua mo se tasi o loo mafatia. Afai e lava lona ola soo ai i le mataupu faavae, o le a aumaia ni aafiaga matagofie i lona lava olaga, e pei ona folafola mai e le Alii. O le a ia maua faamanuiaga faaleagaga o le mana e maua ai musumusuga ma le gafatia sili atu e tetee ai faaosoosoga.
Tatou te le iloa uma ni mafuaaga na afio atu ai Iesu Keriso i le togavao e anapogi ma tatalo ai. Ae ua tatou iloaina o se tasi o ia aafiaga: sa teena atoa e le Faaola faaosoosoga a Satani ia faaaoga sese Lona mana paia.
O si taimi puupuu lava tatou te anapopogi ai i masina uma ma sina tupe itiiti tatou te ofo atu mo ē matitiva e mafai ona tatou maua ai na o sina vaega o le suiga i o tatou natura ia le toe i ai se manao e faia le leaga. Ae o loo i ai se folafolaga sili ua tuuina mai ia i tatou pe a tatou faia mea mea uma tatou te mafaia e tatalo ai, anapogi, ma foai atu mo i latou o ē lē tagolima:
“Ona gafoa mai ai lea o lou malamalama e pei o le tafa o ata, e taalise ona tupu mai foi o lou malolo; e alu atu foi lau amiotonu i ou luma, e muli’au mai le pupula o Ieova ia te oe.
“Ona e valaau lea, a e tali mai ai Ieova, e te alaga atu, a e fetalai mai o ia, O a’u lenei.”
Ou te tatalo ia tatou maua na faamanuiaga ofoofogia mo i tatou lava ma o tatou aiga.
Ou te molimau atu o Iesu o le Keriso, i totonu o Lana Ekalesia ua valaaulia ai i tatou ia fesoasoani atu ia te Ia a o Ia tausia ē matitiva i Lana lava ala, ma ua Ia folafola mai faamanuiaga e faavavau o le a oo mai mai lo tatou fesoasoani atu ia te Ia. I le suafa o Iesu Keriso, amene.