O Lē Faamafanafana
Saunia e Peresitene Henry B. Eyring
Fesoasoani Muamua i le Au Peresitene Sili
Ou te molimau atu ua auina mai e le Keriso soifua le Agaga Paia, le Faamafanafana, ia i latou ua tatou osifeagaiga ia faamafanafanaina.
Ou tuafafine pele, o se fiafiaga mo au le faatasi ai ma outou. Sa ou mafaufau i lou tina, lou toalua, ou afafine, ou afafine faaletulafono, fanau teine a lau fanau—o nisi o i latou o loo i ai iinei. O lenei polokalama matagofie ua sili atu ai ona ou talisapaia i latou. Ou te iloa o le mauaina o se aiga faapena ma se aiga matagofie e oo mai ona ua latou tuu le Faaola i le totonugalemu o o latou olaga taitoatasi. Tatou te manatuaina o Ia i le po nei i musika, tatalo, ma e ala i lauga musuia. O se tasi o uigapaia o le Faaola e sili ona tatou talisapaiaina o Lona agaalofa lemafuatia.
O lenei po ua outou lagonaina e silafia e Ia outou ma e alofa ia te outou. Ua outou lagonaina Lona alofa mo i latou o nonofo i outou talaane. O i latou o o outou uso, afafine agaga a lo tatou Tama Faalelagi. E popole o Ia mo i latou e pei ona Ia popole mo outou. E malamalama o Ia i o latou faanoanoaga uma. E finagalo o Ia e fesoasoani atu ia i latou.
O la’u savali ia te outou i le po nei e faapea, e mafai ma e tatau ona outou avea ma se vaega taua o Lana faamafanafanaga o loo tuuina atu ia i latou e manaomia le faamafanafanaina. E mafai ona e faia lau vaega i le mea sili pe afai e te iloaina atili le auala Na te tali mai ai na tatalo mo se fesoasoani.
E toatele o loo tatalo atu i le Tama Faalelagi mo se toomaga, mo se fesoasoani i le tauaveina o a latou avega o le faanoanoa, tuuatoatasi, ma le fefe. E faafofogaina e le Tama Faalelagi na tatalo ma malamalama i o latou manaoga. Ua Ia folafola mai faatasi ma Lona Alo Pele, le Iesu Keriso toetu, ia fesoasoani.
Na tuu mai e Iesu Keriso lenei folafolaga matagofie:
“Ia outou o mai ia te au, o outou uma o e tigaina ma mafatia i avega, o a’u foi e malolo ai outou.
“Ia outou amoina la’u amo, ma ia outou faaa’oa’o ia te au, aua o au lē agamalu ma le loto maulalo, ona maua lea e outou o le malologa mo outou agaga.
“Aua e avegofie la’u amo, o la’u avega foi e māmā ia.”
O avega e tatau ona tauaveina e Ana auauna faamaoni i le olaga ua faamamaina e Lana Togiola. O le avega o le agasala e mafai ona aveesea, ae o tofotofoga o le olaga faaletino mo tagata lelei e mafai ona avea pea ma ni avega mamafa.
Ua outou vaaia ia tofotofoga i olaga o tagata lelei tou te alolofa i ai. Ua outou lagonaina se manao e fesoasoani atu ia i latou. O loo i ai se mafuaaga o lou lagonaina o le agaalofa mo i latou.
O oe o se tagata o le feagaiga o le Ekalesia a Iesu Keriso. Sa amata se suiga tele i lou loto ina ua e oo mai i totonu o Lana Ekalesia. Sa e osia se feagaiga, ma e mauaina se folafolaga lea na amata suia ai lou lava natura.
Sa faamatalaina e Alema i ana lava upu i le Vai o Mamona, le mea lea sa e folafolaina atu i lou papatisoga ma le uiga o le a i ai ia te oe ma tagata uma o siomiaina oe—aemaise i o outou aiga. Sa saunoa atu o ia ia i latou sa sauni e osia feagaiga ia ua e osia, ma sa latou mauaina foi folafolaga na faia e le Alii ia te oe:
“Faauta, o vai nei o Mamona (ona sa faapea ona ta’ua o ia vai) ma o lenei, ona ua outou mananao e o mai i le lafu a le Atua, ma ta’ua o ona tagata, ma outou loto e tauave avega a le tasi, ina ia māmā;
“Ioe, ma outou loto e faanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga, ma tutu o ni molimau a le Atua i taimi uma ma i mea uma, ma nofoaga uma atonu tou te i ai, seia oo lava i le oti, ina ia mafai ona togiolaina outou e le Atua, ma faitauina faatasi ma i latou o le uluai toetutu, ina ia mafai ona outou maua le ola e faavavau.”
O le mafuaaga lena e te maua ai se lagona o le fia manao ia fesoasoani atu i se tagata o loo tauivi e agai i luma a o mamafatu i se avega o le faanoanoa ma faigata. Na e folafola atu o le a e fesoasoani i le Alii ia faamāmāina a latou avega ma ia faamafanafanaina. Ua uma ona tuuina atu ia te oe le mana e fesoasoani ai e faamāmāina na avega pe a e mauaina le meaalofa o le Agaga Paia.
Sa faamatalaina e le Faaola le auala e fesoasoani ai o Ia e faamāmāina avega ma tuu atu le malosi e tauave ai ina ua lata ina faasatauroina o Ia. Sa Ia silafia o le a faanoanoa Ona soo. Sa Ia silafia latou te ono matatau mo lo latou lumanai. Sa Ia silafia o le a latou lagonaina le masalosalo i o latou gafatia e agai ai i luma.
O lea sa Ia tuu atu ai ia i latou le folafolaga lea ua Ia faia ia i tatou ma i Ona soo moni uma:
“Ou te fai atu foi i le Tama, ona foai mai ai lea e ia ia te outou le tasi Fesoasoani, ina ia tumau pea o ia ia te outou e faavavau;
“O le Agaga lea … [o] le upu moni, e le mafai e le lalolagi ona talia o ia, aua ua le vaaia o ia, ua le iloa foi o ia; a o outou, ua outou iloa o ia, aua e tumau pea ia ia te outou, e i ai foi o ia i totonu ia te outou.”
Ona Ia folafola mai lea:
“A o le Fesoasoani, o le Agaga Paia lea, e auina mai e le Tama i lo’u igoa, o ia lava na te aoao ia te outou i mea uma lava, e faamanatu mai foi o ia ia te outou i mea uma ua ou fai atu ai ia te outou.
“Ou te tuuina atu ia te outou le manuia, o lo’u manuia ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.”
I ni nai vaiaso talu ai na ou vaaia ai lena folafolaga o le auina mai o le Agaga Paia ua faataunuuina i olaga o fanau a le Atua sa aioi atu i tatalo ina ia faamāmāina a latou avega. O le vavega o avega e faamāmāina na oo mai i se ala na folafola mai e le Alii. Sa Ia auina maia ma le Tama Faalelagi le Agaga Paia e fai ma Faamafanafana i Ona soo e fesoasoani atu ai.
Talu ai nei sa faanoanoa ai ni augatupulaga se tolu o se aiga i le maliu o se tamaitiiti e lima tausaga le matua. Sa maliu faafuasei o ia a o i ai ma lona aiga i se tafaoga. Sa ou toe maua foi le avanoa e vaaia ai le auala na faamanuiaina ai e le Alii ē faatuatua i le toomaga ma le malosi e tumau ai.
Sa ou vaavaai i le auala sa faamāmāina ai e le Alii a latou avega mamafa. Sa ou i ai ma i latou o se auauna o le feagaiga a le Alii—e pei lava ona outou faia soo i tou olaga—“e faanoanoa faatasi ma e e faanoanoa … ma faamafanafana atu ia te i latou o e e manaomia le faamafanafanaga.”
Ona sa ou iloaina e moni lena mea, sa ou fiafia ai ma toafilemu ina ua valaauliaina a’u e matua matutua ia matou feiloai faatasi ma matua o le tamaitiiti a o lei faia le falelauasiga.
Sa ou tatalo ia iloaina le auala e mafai ona ou fesoasoani atu ai i le Alii e faamafanafana i latou. Sa matou nofonofo i lo matou potu malolo. Sa ou faamafanafanaina le potu o se po malulu i se tamai afi i le magalafu.
Sa ou lagonaina ia tau atu ia i latou ou te alofa ia i latou. Sa ou tau atu ia i latou ua ou lagonaina le alofa o le Alii mo i latou. I ni nai upu lava, sa ou taumafai ai e tau atu ia i latou o loo ou faanoanoa foi mo i latou ae ua na o le Alii lava sa Ia silafia ma mafai ona lagonaina atoatoa lo latou tiga ma le faavauvau.
Ina ua maea ona fai atu na upu, sa ou lagona le uunaiga ia faalogo atu ma le alofa a o latou talanoa mai i o latou lagona.
I le itula sa matou nofonofo faatasi ai, sa tele mea na la saunoa ai i lo au. Sa mafai ona ou lagonaina i o la siufofoga ma vaaia i o la fofoga sa pa’i atu le Agaga Paia ia te i laua. Sa la saunoa e uiga i le mea na tupu ma o la lagona i upu o se molimau faigofie. Ua uma lava ona tuu atu e le Agaga Paia ia i laua le filemu lea e sau mai le faamoemoe o le ola e faavavau, i le taimi o le a avea ai lo la atalii, lea ua maliu e aunoa ma se agasala, ma o la atalii e faavavau.
Ina ua ou tuu atu ia i laua uma se faamanuiaga faaleperisitua, sa ou faafetai i ai mo le faatosinaga a le Agaga Paia sa i ai iina. Sa oo mai Lē Faamafanafana, ma aumaia le faamoemoe, lototele, ma le malosi faateleina mo i matou uma.
I lena po, sa ou vaaia ai le faaalia o le auala e galue ai le Alii faatasi ma i tatou e faamama ia avega a Ona tagata. E te manatua i le Tusi a Mamona i le taimi na toeitiiti lava a olopalaina ai Lona nuu i avega na tuu i o latou luga e tagata saua.
Sa aioi tagata mo se toomaga, e pei ona faia e le toatele o e tatou te alolofa ma auauna i ai. O le faamaumauga lenei, lea ou te iloaina e moni:
“Ma o le a Ou faamāmāina foi avega ua tuu i o outou tau’au, e oo ia te outou tou te le lagonaina i latou i luga o o outou tua, a’o outou i ai lava i le pologa; ma o le a Ou faia lenei mea ina ia mafai ona outou tutu e avea o ni molimau mo a’u i le lumanai, ma ina ia mafai ona outou iloa ma le mautinoa o A’u, o le Alii le Atua, e asiasi atu i o’u tagata i o latou puapuaga.
“Ma o lenei sa oo ina faamāmāina avega sa tuu i luga o Alema ma ona uso; ioe, sa faamalosia i latou e le Alii ina ia mafai ona latou tauave ma le faigofie a latou avega, ma sa latou gaua’i atu ma le fiafia ma le onosai i le finagalo atoa o le Alii.”
Ua ou vaaia lena vavega i le tele o taimi. Tatou te faamāmāina avega a isi i se auala silisili e ala i le fesoasoani atu i le Alii ia faamalosia i latou. O le mafuaaga lena ua faaaofia ai e le Alii i lo tatou tiute o le faamafanafanaina o isi le poloaiga ia avea ma Ana molimau i taimi uma ma i nofoaga uma.
Sa tuu mai e le tama ma le tina o le tamaitiiti le molimau o le Faaola i lena afiafi i lo’u potu malolo. Na oo mai le Agaga Paia. Sa faamafanafanaina uma i matou. Sa faamalosia matua. O le avega o le faanoanoa sa lei mou atu, ae sa mafai ona laua lavatia le faanoanoa. Sa faatupulaia lo la faatuatua. Ma o le a faaauau pea ona tuputupu ae lo la malosiaga a o la talosagaina pea ma ola ai mo lena malosiaga.
O le molimau a le Agaga e uiga i le Togiola lea na oo mai i lena po sa faamalosia ai foi Iopu e tauave lana avega:
“Aua ua ou iloa, o loo soifua le na te togiolaina a’u; o aso amuli foi e tulai mai ai o ia i luga o le eleele:
“E ui lava foi ina faaumatia lenei tino pe a mavae atu lo’u pa’u, a e ou te iloa atu le Atua i lo’u tino.”
O le molimau lena a le Agaga na ia maua ai le malosi e tumau ai. E oo lava o ia i le faanoanoa ma le leai o se faamafanafanaga mai tagata na siomia ai o ia ia iloa ai le olioli lea e sau mai le faamaoni pe a manumalo ma le faamaoni i o latou tofotofoga.
Sa moni lea mea mo Iopu. Sa oo mai faamanuiaga ia te ia i lenei olaga. Sa faamutaina le tala a Iopu i lenei vavega:
“Ua sili foi ona faamanuia e Ieova o le gataaga o Iopu i lona amataga. …
“E lei iloa foi i le nuu uma ni fafine lalelei e tusa ma afafine o Iopu. Ua avatu foi ia te i latou e lo latou tama o tofi faatasi ma o latou tuagane.
“Ona ola pea lea o Iopu, ina ua mavae o ia mea, o tausaga e tasi le selau ma le fa o sefulu. Ua ia iloa foi ona atalii, ma atalii o ona atalii, e oo atu i tupulaga e fa.
“Ona oti lea o Iopu, ua toeaina, ma ua tuutulu’i lona ola.”
Sa ala mai i le molimau a le Agaga e uiga i le oo mai o le Togiola lea na tumau ai Iopu i tofotofoga ia ua faamoemoe e oo mai i le olaga. O le vaega lena o le fuafuaga sili o le fiafia na aumai e le Tama ia i tatou. Sa Ia faatagaina Lona Alo ina ia saunia, e ala i Lana taulaga togiola, le faamoemoe lea e faamafanafanaina ai i tatou e tusa lava po o le a le faigata e ono oo ai lo tatou auala e toe foi atu ia te Ia.
Ua auina mai e le Tama ma le Alo le Agaga Paia e faamafanafana ma faamalosia soo o le Matai i la latou malaga.
Sa ou vaaia lenei vavega o le faamafanafanaga ina ua ou taunuu i fafo o le falesa lea sa faia ai le falelauasiga o le tamaitiiti. Sa taofi mai au e se tamaitai agalelei sa ou le iloaina. Sa ia fai mai sa sau i le falelauasiga ia faanoanoa ma tuu atu le faamafanafanaga pe a ia mafaia.
Sa ia fai mai na sau i le falelauasiga o se vaega o le faamafanafanaga mo ia lava. Sa ia faamatala mai e lei leva atu na maliu ai lana tama muamua. Sa ia siiina se teineitiiti lalelei. Sa ou falo atu ia ou tilotilo atu i foliga matafiafia o le teineitiiti. Sa ou fesili atu i le tina o le pepe, “O ai lona igoa?” Sa ia tali vave mai ma le fiafia “O lona igoa o Olioli. E mulimuli mai lava le olioli pe a mavae faanoanoaga.”
Sa ia tuuina mai lana molimau ia te au. Sa mafai ona ou vaaia le filemu ma le mafanafana ua oo atu ia te ia mai le puna mautinoa e tasi. Ua na o le Atua e silafiaina loto, ma o lea e na o Ia lava e mafai ona fetalai i le upumoni, “Ou te iloa ou lagona.” O lea e na o lo ta mafaufauina lava o lona olioli ma le faanoanoa na muai oo i ai, ae ua silafia e le Alii o le e alofa ia te ia.
E na o sina vaega e mafai ona ou iloaina o le tele o le olioli Na te lagonaina i taimi uma e te fesoasoani atu ai ia te Ia, i le avea ai ma Ona soo, e aumaia se taimi o le filemu ma le olioli i se atalii po o se afafine o lo tatou Tama Faalelagi.
Ou te tuu atu lau molimau ua faatonuina e le Alii i tatou taitoatasi, o Ona soo, ia fesoasoani e tauave e le tasi le avega a le isi. Ua tatou folafola atu foi e faia lena mea. Ou te molimau atu, e ala i Lana Togiola ma le Toetu, ua motusia ai e le Alii mana o le oti. Ou te molimau atu ua auina mai e le Keriso soifua le Agaga Paia, le Faamafanafana, ia i latou ua tatou osifeagaiga ia fesoasoani atu ia te Ia ia faamafanafana ia i latou.
O outou uma o molimau, e pei foi o au, o le upumoni o le lomiga o loo i luga o le pine na fai e lo’u tina mo le silia ma le 20 tausaga i le ave ai ma se sui o le fono faatonu aoao o le Aualofa. E faitauina, “E Le Uma le Alofa.” Ou te le o iloaina lava le uiga atoa o na upu. Ae ua ou maua sina vaaiga e pei ona sa ou vaaia o ia aapa atu i e le tagolima. Ua tau mai e tusitusiga paia lenei upumoni: “O le alofa mama o le alofa le pona lea o Keriso.”
E le uma lava Lona alofa, ma o le a le tuua lava lo tatou lagonaina i o tatou loto le uunaiga “e faanoanoa faatasi ma e e faanoanoa … ma faamafanafana atu ia i latou o e e manaomia le faamafanafanaga” E faapena foi o le a le tuua lava i tatou e le filemu ua Ia folafola mai pe a tatou auauna atu i isi mo Ia.
I le avea ai ma Ana molimau, ou te faafetai atu mo mea ua matua lelei ona outou faia e fesoasoani i le Alii soifua o Iesu Keriso ma le Agaga Paia, le Faamafanafana, faamalolosia o tulivae ua vaivai ma sii i luga lima ua tautau i lalo. Ou te faafetai, ma lou loto atoa, mo tamaitai i lou olaga o e na fesoasoani ma faamanuia au i le avea ai o ni soo moni o Iesu Keriso. I le suafa o Iesu Keriso, amene.