Toe Fo’i i le Faatuatua

Saunia e Rosemary M. Wixom

Peresitene Aoao o le Peraimeri

E mafai e i tatou taitoatasi ona faamalosia lo tatou faatuatua ia Iesu Keriso i a tatou faigamalaga taitoatasi ma maua le olioli.

I lenei taeao o le Eseta, Peresitene Monson, matou te faafetai tele e faalogologo atu i le siufofoga o lo tatou perofeta soifua. Matou te faatāuaina au saunoaga, e aofia ai au fautuaga “Saili le olioli i le faigamalaga” ma le “E i ai le faamoemoe i le lumanai e pei foi o lou faatuatua.”

I lenei tausaga o loo faasoaina etamaiti o le Peraimeri le olioli ma le malosi o lo latou faatuatua ia Iesu Keriso pe a latou usuina le pese “Ou Te Iloa E Alofa Lo’u Faaola Ia Te A’u.” Latou te usuina le upumoni “O Lo’o Soifua o Ia! … Avatu lo’u loto ia te Ia.” E pei o fanau Peraimeri, e mafai foi e i tatou taitoatasi ona faamalosia lo tatou faatuatua ia Iesu Keriso i a tatou faigamalaga taitoatasi ma maua le olioli.

I se sauniga o le Aso Sa talu ai nei a le Aualofa, sa ou faalogo ai i se tina talavou o faasoa le vaega o lana faigamalaga o le liua. Sa ia ola ae i le Ekalesia, ma ni matua o ē sa aoaoina o ia i le talalelei. Sa ia auai i le Peraimeri, Tamaitai Talavou, ma le seminare. Sa ia fiafia e aoao ma iloatino upumoni. O lana sailiga faifai pea o le fiailoaina o le aisea [po o le mafuaaga o mea]. Ua saunoa mai Elder Russell M. Nelson, “Ua na o se mafaufau e fia iloa e mafai ona aoaoina e le Alii.” Ma o lenei tamaitai talavou sa mafai ona aoaoina.

Ina ua maea le aoga maualuga, sa ia auai i se iunivesite, sa faamauina i le malumalu i se faifeautalai ua maea le misiona, ma sa faamanuiaina i ni fanau aulelei.

Faatasi ai ma le agaga o le suesue, sa faaauau pea e lenei tina ona fai atu ni fesili. Ae a o faasolo faigata ia fesili, sa faapena foi i tali. Ma o nisi taimi sa leai ni tali—pe leai ni tali na aumaia ai le filemu. Na iu lava, a o ia saili e maua tali, na faateleina le alia’e o fesili, ma sa amata ona ia fesiligia ai nisi o faavae moni o lona faatuatua.

I lea taimi o le fenumiai, na faapea atu ai nisi sa siomiaina o ia, “Tau lava o lou faalagolago mai i lo’u faatuatua.” Ae sa ia mafaufau, “E le mafai ona ou faia. Tou te le malamalama; tou te le o taulimaina nei faafitauli.” Sa ia faamalamalama atu, “Sa ou naunau e faaaloalo ia i latou sa aunoa ma ni masalosaloga pe afai latou te faaaloalo mai foi ia te a’u.” Ma na faia e le toatele.

Sa ia saunoa mai, “Sa iloa e o’u matua lo’u loto ma sa tuuavanoa mai ia te au. Sa la filifili e alolofa ia te a’u a o o’u taumafai e faavasegaina mo a’u lava.” Na faapena foi, sa masani ona feiloai le epikopo ma lenei tina talavou ma talanoaina lona talitonuina o [lea tina].

Sa le’i faatuai foi ona tuuina atu e tagata o le uarota le alofa, ma sa ia lagona le faaaofiaina o ia. O lana uarota sa le o se nofoaga e faafoliga ai le amiotonu; o se nofoaga sa faafailele ai le amio.

“Sa mataina,” na ia manatua. “I lea taimi sa ou lagona se sootaga malosi i o’u matua matutua ua maliliu. Sa laua lagolagoina au ma augani mai ia te au e taumafai pea. Sa ou lagona le la fai mai, ‘Taulai atu i mea ua e iloa.’”

E ui i le toatele o tagata na lagolagoina o ia, ae sa oo ina le toaga o ia. Sa ia fai mai, “Ou te le’i faaesea a’u lava mai le Ekalesia ona o amioga leaga, le lē manatu mamafa i mea faaleagaga, saili mo se ‘alofaga e lē ola ai i poloaiga, pe saili mo se auala faigofie e taulimaina ai o’u popolega. Sa ou lagona na ou manaomia le tali i le fesili ‘O le a tonule mea lea ou te talitonu i ai?’”

Pe tusa o se taimi faapenei sa ia faitau ai i se tusi o tusitusiga a Mother Teresa, o lē sa i ai foi ni lagona faapenei. I se tusi i le 1953, sa tusia ai e Mother Teresa: “Faamolemole tatalo faapitoa mo au ina ia ou lē faaleagaina Lana galuega ma ia mafai e lo Tatou Alii ona faaali mai o Ia Lava—aua o loo i ai se pogisa matautia i totonu ia te au, e pei ua mate mea uma. Sa faapea i taimi eseese talu mai ona ou amataina ‘le galuega.’ Ole atu i lo Tatou Alii e aumai ia te au le lototele.”

Na tali le Akiepikopō o Périer: “E taitai oe e le Atua, Tina pele; e lē o pogisa tele le mea o e i ai e pei ona e manatu i ai. O le ala e mulimuli ai atonu e le o taimi uma e vave manino ai. Tatalo mo le malamalama; aua nei vave faia se faaiuga, faalogo i mea e tau atu e isi, mafaufau i a latou mafuaaga. O le a e maua pea se mea e fesoasoani ia te oe. … Taialaina e le faatuatua, e le tatalo, ma le faautautaga ma se faamoemoega sa’o, ua lava lena mo oe.”

Na manatu la’u uo afai na mafai e Mother Teresa ona ola i lana tapuaiga e aunoa ma tali uma ma e aunoa ma se lagona manino i mea uma, atonu e mafai foi e ia. E mafai ona ia faia se la’a se tasi faigofie agai i luma i le faatuatua—ona sosoo ai lea ma le isi. E mafai ona ia taulai i upumoni ua ia talitonu i ai ma tuu na upumoni e faatumulia lona mafaufau ma le loto.

Ina ua ia mafaufau i tua i le mea na tupu, sa ia faapea mai, “Sa matuai faavaivaia la’u molimau. Sa faaleagaina atoa. Ae na pau le mea na totoe o Iesu Keriso.” Sa ia faaauau ai, “Ae Na te le tuua oe pe a i ai ni au fesili. Pe a taumafai se tasi e tausi poloaiga, e vatele pea le matala o le faitotoa. Na matuā taua lava le tatalo ma le suesueina o tusitusiga paia.”

O lana la’a muamua e toefausia lona faatuatua sa amata i upumoni autu o le talalelei. Sa ia faatauina se tusipese a le Peraimeri ma amata ona faitau i upu o pese. Sa amata ona ia fiafia i nei pese. Sa ia tatalo mo le faatuatua e aveesea ai le mamafatū na ia lagonaina.

Sa ia iloaina e faapea, pe a ia fetaiai ma se faamatalaga e mafua ai ona ia masalosalo, e “mafai ona [ia] tu, tagai i le mea atoa o loo tupu, ma faaaoga patino le talalelei ia te ia lava.” Sa ia fai mai, “E masani ona ou fesili, ‘Pe o le ala sao ea lea mo a’u ma lo’u aiga?’ O nisi taimi ou te fesili ifo ia te au lava, ‘O le a se mea ou te manao ai mo la’u fanau?’ Sa ou iloa na ou manao ia i latou e faia ni faaipoipoga o le malumalu. O le taimi lena na oo mai ai le talitonuga i lo’u loto.”

Ua saunoa mai Elder Jeffrey R. Holland, “O le lotomaualalo, faatuatua, ma le faatosinaga a le Agaga Paia [o le a] avea pea ma elemene o sailiga uma mo le upumoni.”

E ui na i ai ni ana fesili e uiga i le auala na oo mai ai le Tusi a Mamona, ae sa le mafai ona ia faafitia ia upumoni na ia iloaina i le Tusi a Mamona. Sa ia taulai i le suesueina o le Feagaiga Fou ia malamalama atili ai i le Faaola. Sa ia fai mai, “Ae na iu lava na ou toe faitauina le Tusi a Mamona aua sa ou fiafia i le mea na ou lagonaina pe a faitau e uiga ia Iesu Keriso ma Lana Togiola.”

Sa ia faaiuina, “E ao lava ia te oe ona e mauaina ni ou lava aafiaga faaleagaga i upumoni o i lena tusi,” ma sa ia mauaina [na aafiaga]. Sa ia faamatalaina, “Sa ou faitau i le Mosaea ma lagona le taitaiina atoatoa. ‘Ia talitonu i le Atua; ia talitonu o loo soifua o ia, ma o ia na foafoaina mea uma … ; ia talitonu ua ia te ia le poto uma, ma le mana uma, i le lagi ma le lalolagi; ia talitonu e lē mafai e le tagata ona malamalama i mea uma e mafai ona malamalama i ai le Alii.’”

Pe tusa o se taimi faapenei sa oo mai ai se valaauga e galue o se ta piano o le Peraimeri. “Sa saogalemu,” o lana tala lea. “Sa ou manao ia i ai la’u fanau i le Peraimeri, ma o lea ua mafai ona ou faatasi ma i latou. Ma sa ou le’i saunia e aoao atu.” A o ia galue, sa faaauau ona ia lagona [uiga] a i latou na siomia o ia o le valaaulia e “Sau; matou te taliaina oe, i soo se tulaga o e i ai, ma o le a matou galulue ma oe i le tulaga o e i ai. Tuu mai ia i matou soo mea e te ofoina mai.”

O le tataina o pese a le Peraimeri, e masani ona ia manatu ifo ia te ia lava, “O upumoni nei ou te fiafia i ai. O loo mafai pea ona ou faasoa atu le molimau. Ou te tau atu na o na mea ou te iloa ma faatuatuaina. Atonu e le o se taulaga atoatoa o le malamalama, ae o le a avea ma a’u taulaga. O mea ua ou molimau ai ua faamalosia i lo’u loto. Ua matagofie le toe foi atu i le ute o le talalelei ma lagonaina le manino.”

I lena taeao o le Aso Sa, a o ou faalogo i lenei uso talavou o faasoa le tala o lana faigamalaga, sa faamanatu mai ai ia te au “o luga o le papa o lo tatou Togiola” e tatau ona tatou atiae uma ai lo tatou faavae. Sa toe faamanatu mai foi ia te au le fautuaga a Elder Jeffrey R. Holland: “Ia taofi mau i mea ua uma ona outou iloa ma tutu malolosi seia oo mai se isi malamalama.”

I le taimi o lana lesona, sa oo ina ou iloa atili ma le naunautai, o tali i a tatou fesili faamaoni e oo mai pe a tatou saili ma le naunautai ma pe a tatou ola i poloaiga. Sa faamanatu mai ia te au e mafai ona fesoasoani lo tatou faatuatua e talitonu i mea tatou te le malamalama i ai i lena taimi.

Oka, e maeu lo’u manao ia pei o na tagata o e na siomia lenei tina talavou, agaalofa ma lagolago o ia. E pei ona saunoa mai Peresitene Dieter F. Uchtdorf: “O i tatou uma o tagata malaga o loo saili i le malamalama o le Atua a o tatou malaga i luga o le ala o le avea ma soo. Tatou te le tuuaia fua isi mo le aofaiga o le malamalama latou te ono maua pe ua le mafai foi ona maua; ae, tatou te faafailele ma uunaia le malamalama atoa seia oo ina manino, susulu, ma moni.”

A usuina e fanau Peraimeri “Le Tatalo a Se Tamaitiiti [A Child’s Prayer],” latou te fesili: “Tama Faalelagi, o e i ai moni iinā? E te faafofoga ma tali i tatalo a tamaiti uma?”

Atonu tatou te tuufesili foi, “O I Ai moni ea le Tama Faalelagi iina?” ae olioli ai—e pei o lau uo—pe a oo mai tali i faamautinoaga filemu ma faigofie. Ou te molimau atu o na faamautinoaga faigofie e oo mai pe a avea Lona finagalo ma o tatou loto. Ou te molimau atu o loo i ai le upumoni i le lalolagi i le asō ma o Lana talalelei o loo maua i Le Ekalesia a Iesu Keriso o le Au Paia o Aso e Gata Ai. I le suafa o Iesu Keriso, amene.