Ioe, Tatou Te Mafaia ma O Le A Tatou Manumalo!
Saunia e Elder Ulisses Soares
O Le Au Peresitene o Fitugafulu
E tatau ona tatou pipiimau mausali i a tatou molimau o le talalelei a Iesu Keriso. Ona tatou manumalo ai lea i taua o aso uma e tetee atu ai i le tiapolo.
Uso pele, ua faalotomaualaloina au i le avanoa e lauga atu ai ia te outou, o e umia le perisitua a le Atua i le Ekalesia atoa i aso nei.
Na saunoa Peresitene Thomas S. Monson i se tasi taimi:
“E mafai ona avea le lalolagi i nisi taimi ma nofoaga taufaafefe e nonofo ai. O uiga mama o le lalolagi e foliga mai ua matuai faatoilaloina lava i se saoasaoa e faapopoleina ai. E leai ma se tasi—e laitiiti pe matua pe faaleogalua—e tuusaunoa mai le oo atu i na mea ia e i ai le malosiaga e tosoina ai i tatou i lalo ma faaumatia ai. …
“… Ae le moomia ona tatou lotovaivai. … O loo tatou tau ma le agasala. … O se taua tatou te mafaia ma o le a tatou manumalo ai. Ua tuuina mai e lo tatou Tama o i le Lagi ia auupega tatou te moomia e tau ai.”
O loo fetaiai i tatou uma, talavou ma matutua, i aso taitasi ma taua na ta’ua e Peresitene Monson. O loo taumafai le fili ma ana au e faafenumiai i tatou. O lo latou faamoemoega o le uunaia lea o i tatou ina ia tatou o ese mai feagaiga na tatou osia ma le Alii, ua mafua ai ona tatou faagaloina lo tatou tofi e faavavau. Ua latou iloa lelei le fuafuaga a lo tatou Tama Faalelagi mo Lana fanau, aua sa latou i ai faatasi ma i tatou i lena Fono tele i le Lagi i le taimi na tuuina mai ai. Latou te taumafai e faaaoga o tatou vaivaiga ma faaletonu, ma faaseseina i tatou i “puao o le pogisa …, ia e faatauaso ai mata, ma faamaaa ai loto o le fanauga a tagata, ma taitai ese atu ai i latou i ala lautele, latou te fano ma sē ai.”
E ui i feteenaiga o feagai ma i tatou, ae e pei ona aoao mai Peresitene Monson, o se taua lenei tatou te mafaia ma o le a tatou manumalo ai. E faatuatuaina e le Alii lo tatou gafatia ma le naunautaiga e faia ai.
O loo i ai i tusitusiga paia ni faataitaiga lemafaitaulia o e na manumalo i taua, e oo lava i le lotolotoi o tulaga matua sauaina. O se tasi o nei faataitaiga o Kapeteni Moronae i le Tusi a Mamona. O lenei alii talavou maoae na ia maua le lototele e puipui ai le upumoni i se taimi sa i ai le tele o fevaevaea’iga ma taua ia na lamatia ai le soifua o le malo atoa o sa Nifae. E ui sa atamai i le faataunuuina o ona tiute, ae sa lotomaualalo pea Moronae. O lea uiga ma isi uiga na avea ai o ia ma se meafaigaluega tulaga ese i aao o le Atua i lena taimi. Na faamatala mai e le tusi a Alema e faapea, ana pei tagata uma o Moronae, “po ua luluina i lalo e faavavau mana o seoli; [ma] ua le maua e le tiapolo se mana i luga o loto o le fanauga a tagata.” O uiga auau mama uma o Moronae na pogai mai i lona faatuatua maoae i le Atua ma i le Alii o Iesu Keriso ma lona naunautaiga maumaututu ia mulimuli i le siufofoga o le Atua ma Ana perofeta.
I se tulaga faafaatusa, e manaomia ona liua i tatou uma lava i ni Kapeteni Moronae o aso nei ina ia manumalo ai i taua e tetee atu i le tiapolo. Ou te iloa se tiakono talavou o le sa liua o ia lava i se Kapeteni Moronae o aso nei. E ui i lona naunau tele e saili atu e mulimuli i fautuaga a ona matua ma taitai o le Ekalesia, ae na tofotofoina lona faatuatua ma le naunautaiga i aso uma, e ui lava i lona talavou. Sa ia faamatala mai ia te au le faateia o ia i se tasi aso i se tulaga matua faigata ma lē toafimalie—sa matamata ana uo i ni ata mataga i a latou telefoni feaveai. I lena lava taimi, sa manaomia ai ona filifili lenei alii talavou po o le a le mea e sili ona taua—lona lauiloa po o lana amiotonu. I ni nai sekone na sosoo ai, sa faatumulia o ia i le lototele ma tau atu i ana uo e le sa’o mea sa latou faia. E le gata i lea, sa ia tau atu ia i latou e tatau ona tuu le mea sa latou faia po o le avea o i latou ma pologa i ia mea. O le toatele o ana uo aoga na faatauemu i lana fautuaga, ma fai mai o se vaega lea o le olaga ma e leai se mea e leaga ai. Peitai, sa filo ai iina se tasi na faalogo i le fautuaga a lena alii talavou ma filifili ai e tuu le mea sa ia faia.
O le faataitaiga a lenei tiakono sa i ai se faatosinaga lelei i se tasi o ana uo aoga. E le masalomia lava, le feagai ai o ia ma lana uo ma ulaga ma sauaga ona o lena faaiuga. I le isi itu, sa la mulimuli i apoapoaiga a Alema i lona nuu ina ua ia faapea atu, “Ia outou o ese mai i e amioleaga, ma ia outou tuese, ma aua nei pai atu ia latou mea le mama.”
O loo i le tamaitusi Mo le Malosi o le Autalavou le fautuaga lenei, na faamaonia e le Au Peresitene Sili i le autalavou o le Ekalesia: “O lau matafaioi le faia o au filifiliga. E manatu tele mai le Atua ia te oe ma o le a fesoasoani ia te oe i le faia o filifiliga lelei, e tusa lava pe faaaoga e lou aiga po o uo o latou faitalia i auala e le sa’o. Ia i ai lou lototoa a’ia’i e tu mausali ai e usiusitai i le finagalo o le Atua, e tusa lava pe e te tu na o oe. A o e faia lenei mea, ua e faia se faataitaiga mo isi e mulimuli ai.”
O le a faaauau pea le taua o le lelei e tetee atu i le leaga i o tatou olaga atoa, talu ai o le faamoemoega o le fili o le faia o tagata uma ia pagatia e pei o ia lava. O le a taumafai Satani ma ana au e faafenumiai o tatou mafaufauga ma puleaina e ala i le faaosoosoina o i tatou ia agasala. Afai latou te mafaia, o le a latou faaleagaina tagata lelei uma. Ae ui i lea, e taua le malamalama e na o le pau le tulaga latou te maua ai le mana e pulea ai i tatou pe afai lea tatou te faatagaina.
O loo i ai foi i tusitusiga paia le tele o faataitaiga o i latou o e na tuuina atu lena faatagaga i le fili ma iu ai ina le mautonu ma oo ai ina faaumatiaina e pei o Neoa, Korioa, ma Serema. E ao ona tatou nofouta i lenei tulaga matautia. E le mafai ona tatou faatagaina i tatou lava ia lē mautonu i savali lauiloa ia ua faigofie ona taliaina e le lalolagi ma ua feteenai ma le aoaoga faavae ma mataupu faavae moni o le talalelei a Iesu Keriso. O le tele lava o nei savali faalelalolagi e leai se mea e faatusa ai nai lo se taumafaiga o lo tatou lalolagi e tauamiotonuina le agasala. E ao ona tatou manatua, i le iuga lava, o le a tutu tagata uma i luma o Keriso “ina ia faamasinoina i a [latou] galuega, pe ua lelei, pe ua leaga. Pe a tatou fetaiai ma nei savali faalelalolagi, o le a manaomia ai se lototoa tele ma se malamalama mausali o le fuafuaga a lo tatou Tama Faalelagi e filifili ai le mea sa’o.
E mafai e i tatou uma ona maua le malosi e filifili ai le sa’o pe a tatou saili le Alii ma tuu atu lo tatou talitonuga ma le faatuatuaga atoa ia te Ia. Ae, e pei ona aoao mai tusitusiga paia, e tatau ona tatou maua “le loto faamaoni” ma le “manatu moni.” Ona “faaali mai [lea e le Alii, i Lona alofa mutimutivale e le iu] le moni” ia i tatou “i le mana o le Agaga Paia. Ma o le mana o le Agaga Paia e mafai ona [tatou] iloa ai le moni o mea uma lava.”
O lenei malamalama lea e maua e ala i le Agaga Paia o la tatou molimau lava lea i mea uma, lea e faamalosia ai lo tatou faatuatua ma le naunautaiga e mulimuli i aoaoga o le talalelei toefuataiina i nei aso e gata ai, e tusa lava po o a savali lauiloa ua tatou faalogo i ai mai le lalolagi. E tatau ona avea la tatou molimau ma a tatou talita e puipuia i tatou mai ufanafana mu a le fili i ana taumafaiga e osofaia i tatou. O le a taialaina ai ma le saogalemu i tatou e la tatou molimau i taimi o le pogisa ma le le mautonu o loo i ai i le lalolagi i lenei vaitaimi.
Sa ou aoaoina lenei mataupu faavae a o ou auauna atu o se faifeautalai talavou. Sa ma auauna atu ma la’u soa i se paranesi laitiiti lava ma maotua o le Ekalesia. Sa ma taumafai e talanoa i tagata uma i le aai. Sa latou talia lelei i maua, ae sa latou fiafia e felafolafoai i tusitusiga paia ma fesiligia i maua mo ni faamaoniga mausali e faatatau i le moni o mea sa ma aoao atua.
Ou te manatua o taimi uma lava ma te taumafai ai ma la’u soa e faamaonia se mea i tagata, e aluese lava le Agaga o le Atua ma i ma’ua ma e ma te lagona lava le fenumiai atoa ma le le mautonu. Sa ma lagonaina le tatau ona matuai faaogatusaina a maua molimau ma upumoni o le talalelei sa ma aoao atua. Na amata mai i lena taimi, ou te manatua pe a ma tuuina atu se molimau ma o ma’ua loto atoa, sa faatumulia le potu i se mana faamautinoa filemu, na oo mai mai le Agaga Paia, ma sa leai se avanoa mo se le mautonu po o se finauga. Sa ou iloa e le mafai e ‘au a le fili ona faafenumiaia, faaseseina, pe faalavelaveina le mana o se molimau faamaoni a se soo moni o Iesu Keriso.
E pei ona aoao mai le Faaola Lava Ia, e manao le fili ia lulu ia i tatou e pei o saito, ma aveesea ai lo tatou tomai e faatosinaina le lalolagi mo le lelei.
Ou uso pele, talu ai o loo faasalalauina atu i le lalolagi atoa ia galu o le le mautonu ma masalosaloga i lenei vaitaimi, e tatau ona tatou pipiimau mausali i a tatou molimau o le talalelei a Iesu Keriso. Ona matua faateleina ai lea o lo tatou tomai e puipuia le upumoni ma le faamasinotonu. O le a tatou manumalo i taua o aso uma e tetee atu i le tiapolo, ma nai lo le faatoilaloina e luitau o le olaga, o le a tatou faataunauina isi e ola i tulaga faatonuina a le Matai.
Ou te valaaulia tagata uma ina ia saili le saogalemu i aoaoga o loo maua i tusitusiga paia. Na faaogatusa e Kapeteni Moronae lona faatuatua i le Atua ma lana molimau e uiga i le upumoni ma le malamalama ma le atamai o loo maua i tusitusiga paia. O lenei auala sa ia talitonu ai o le a ia maua faamanuiaga a le Alii ma o le a maua ni manumalo se tele, ma o le mea moni lava lena na tupu.
Ou te valaaulia tagata uma ina ia saili le saogalemu i upu atamamai a o tatou perofeta o i ai nei. Na saunoa Peresitene Thomas S. Monson: “O i tatou o e ua faauuina i le perisitua a le Atua e mafai ona faia se eseesega. A tatou faatumauina lo tatou mama faaletagata lava ia ma faamamalu lo tatou perisitua, e avea i tatou ma faataitaiga amiotonu mo isi e mulimuli i ai … [ma] fesoasoani e faamalamalamaina se lalolagi ua faateleina le pogisa.”
Ou te valaaulia tagata uma ina ia faalagolago i le alofa mutimutivale ma le mana o le Togiola a Iesu Keriso. E ala atu i Lana taulaga togiola, ua mafai ai ona tatou maua le lototele e manumalo ai i taua o o tatou aso, e oo lava i le lotolotoi o o tatou faigata, luitau, ma faaosoosoga. Ia tatou faalagolago i Lona alofa ma le mana e laveai ai i tatou. Na fetalai mai Keriso Lava Ia:
“O A’u nei le ala, ma le upu moni, ma le ola; e le alu atu lava se tasi i le Tama, pe a le ui mai ia te au.”
“O A’u nei o le malamalama o le lalolagi; o le mulimuli mai ia te au, e le savali o ia i le pouliuli, a e ia te ia le malamalama o le ola.”
“Ua Ou fai atu nei mea ia te outou, ina ia outou maua le manuia ia te au; e maua foi outou e le puapuaga i le lalolagi, a ia outou loto tetele, ua ou manumalo i le lalolagi.”
Ou te molimau atu ai i nei upumoni i le suafa paia o Iesu Keriso, amene.