Faamanuiaga o le Malumalu
Saunia e Peresitene Thomas S. Monson
A tatou auai atu i le malumalu, e mafai ona oo mai ia te i tatou se maualuga o le faaleagaga ma se lagona o le filemu.
Ou uso e ma tuafafine pele, e ese lo’u faafetai i lo tatou mafuta ai i lenei taeao matagofie o le Eseta ina ua liliu atu o tatou mafaufauga i le Faaola o le lalolagi. E momoli atu o’u alofaaga ma faafeiloai atu ia te outou uma taitoatasi ma tatalo o le a musuia e le Tama Faalelagi a’u upu.
O le konafesi lenei ua atoa i ai le fitu tausaga talu ona lagolagoina a’u e avea ma Peresitene o le Ekalesia. O ni tausaga pisi, e le gata e tumu i nai faigata laiti, ae faapena foi i faamanuiaga e le mafaitaulia. Faatasi ai ma faamanuiaga sili ona faafiafiaina ma paia o nei faamanuiaga, o lo’u avanoa e faapaia ai ma toe faapaia ia malumalu.
Talu ai nei lava, ia Novema ua mavae atu, sa ou maua ai se avanoa e faapaia ai le Malumalu fou matagofie o Phoenix Arisona. Sa matou faatasi ai ma Peresitene Dieter F. Uchtdorf, Elder Dallin H. Oaks, Elder Richard J. Maynes, Elder Lynn G. Robbins, ma Elder Kent F. Richards. I le afiafi a o lumanai le faapaiaga, sa faia ai se faafiafiaga faaleaganuu ofoofogia lea na auai ai o tatou talavou e silia ma le 4,000 i le faatinoga, mai itumalo e tautuaina e le malumalu. O le aso na sosoo ai sa faapaiaina ai le malumalu i ni sauniga paia ma le musuia se tolu.
O le fauina o malumalu o se faailoga manino lea o le faatupulaia o le Ekalesia. Ua 144 o tatou malumalu ua faaaoga i le taimi nei i le salafa o le lalolagi, e 5 o loo toe faafou ma le 13 isi o loo fauina. E le gata i lea, o malumalu e 13 na fofogaina atu talu ai o loo i ai nei i tulaga eseese o tapenapenaga a o lei amataina ona fau. O le tausaga nei ua faamoemoe e toefaapaiaina ai malumalu e 2 ma faapaia ia malumalu fou e 5 lea na faatulaga mo le faamaeaina.
Mo le lua tausaga ua mavae, a o taulai atu a matou taumafaiga i le faamaeaina o malumalu na faasilasila muamua atu, sa matou taofia ai fuafuaga faagaoioi mo soo se malumalu faaopoopo. Peitai, i lenei taeao, ou te fiafia lava e faasilasila atu ni malumalu fou se tolu o le a fausiaina i nofoaga nei: Abidjan, Ivory Coast; Port-au-Prince, Haiti; ma Bangkok, Tailani. E ofoofogia faamanuiaga ua faapolopoloina mo au paia faamaoni i nei nofoaga, ma, e moni lava, i soo se mea o loo i ai malumalu i le lalolagi atoa.
O loo faagasolo pea le faiga o le fuafuaina o manaoga ma le sailia o nofoaga mo nisi malumalu, aua matou te mananao ia maua e le toatele o tagata o le au paia e mafai ai le avanoa e o ai i le malumalu e aunoa ma ni osigataulaga tele o taimi ma punaoa. E pei ona sa matou faia ai i aso ua mavae, o le a logo atu lava pe a faia ni faaiuga e tusa ai.
Pe a ou mafaufau i malumalu, e liliu atu o’u mafaufauga i le mau faamanuiaga tatou te maua mai ai. A o tatou ulu atu i faitotoa o le malmalu, tatou te tuu ese mea faalavelave ma fenumiaiga o le lalolagi. O totonu o lenei maota paia, tatou te maua ai le matagofie ma le faatulagaina lelei. E i ai le malologa mo o tatou agaga ma se mapusaga mai mea e naunau i ai o tatou olaga.
A o tatou auai atu i le malumalu, e mafai ona oo mai ia te i tatou se maualuga o le faaleagaga ma se lagona o le filemu lea e sili mamao atu nai lo se isi lava lagona e mafai ona oo mai i le loto o le tagata. O le a tatou pueina ai le uiga moni o upu a le Faaola ina ua Ia fetalai: “Ou te tuuina atu ia te outou le manuia; o lo’u manuia ou te avatu ai ia te outou; … Aua le atuatuvale o outou loto; aua foi tou te matatau.”
O lena filemu e mafai ona sasala atu i soo se loto—o loto o loo fememeai, o loto ua mamafatū i le lototiga, o loto ua lagona le lē mautonu, o loto o loo aioi mai mo se fesoasoani.
Sa ou iloaina talu ai nei se alii talavou sa alu i le malumalu ma se loto o loo aioi atu mo se fesoasoani. I le tele o masina na muamua, sa ia maua ai lona valaauga e faamisiona i Amerika i Saute. Peitai, sa umi tele se taimi na faatali ai lona visa, ma o lea sa toe tofia ai o ia i se misiona i le Iunaite Setete. E ui i lona le fiafia ona ua le mafai ona galue i le eria na muai valaauina ai o ia, ae sa galue malosi lava i lana eria fou, ma sa naunau e auauna atu i le mea sili sa ia mafaia. Peitai, sa oo ina lotovaivai, ona o aafiaga le lelei sa i ai ma faifeautalai sa foliga mai ia te ia, sa sili ona naunau e tafafao ma fiafia nai lo le faasoaina atu o le talalelei.
I ni nai masina pupuu mulimuli ane, sa mafatia lenei alii talavou i se luitau matuia faalesoifua maloloina, lea na tuua ai o ia ua pē le afa o lona tino, ma o lea sa auina atu ai o ia i le fale ona o mafuaaga faafomai.
I ni nai masina mulimuli ane, sa faamaloloina atoatoa lea alii talavou, ma ua te’a le pē o le tino. Sa ta’uina atu ia te ia o le a toe mafai ona galue o se faifeautalai, o se faamanuiaga sa ia tatalo ai i aso taitasi. Na pau le tala le fiafia, o le a toe foi i le misiona lava lea sa ia tuua, lea na ia manatu ai e le talafeagai amioga ma uiga faaalia o nisi o faifeautalai ma le mea e tatau ona i ai.
Na sau o ia i le malumalu e saili ai se faamafanafanaga ma se faamautinoaga e mafai ona ia maua se aafiaga lelei o se faifeautalai. Sa tatalo foi ona matua o le a maua i lenei asiasiga i le malumalu le fesoasoani o loo manaomia e lo la atalii.
Ina ua ulu atu le taulealea i le potu selesitila ina ua maea le sauniga, sa nofo o ia i se nofoa ma amata loa ona tatalo mo se taitaiga mai lona Tama Faalelagi.
O le isi tagata na sosoo ai na ulu atu i le potu selesitila, o se alii talavou o lona igoa o Landon. A o savali atu o ia i le potu, sa vave ona faataupupula atu i le alii talavou lea e nofo i le nofoa, ma ona mata o moeiini ma e iloa lava o loo tatalo. Na maua e Landon se uunaiga e le mafaaseseina, e tatau ona talanoa atu i le taulealea lea. Peitai, i le musu ai e faalavelave, sa tonu ia te ia e faatali. Ina ua mavae ni nai minute ae o la lava e tatalo le taulealea, sa iloa e Landon ua le toe mafai ona toe tolopo le uunaiga. Sa ia faalatalata atu i le taulealea ma pa’i lemu atu i lona tauau. Sa pupula mata o le taulealea, ua te’i ina ua faalavelaveina o ia. Sa fai atu lemu Landon, “Ua uunaia au e tatau ona ou talanoa atu ia te oe, e ui ou te le o mautinoa pe aisea.”
A o amata ona la talatalanoa, sa sasaa atu e le taulealea lona loto ia Landon, ma faamatala i ai ona tulaga ma faauma i lona manao ia maua se mafanafana ma se faamalosiauga e faatatau i lana misiona. O Landon, o lē faatoa taliu mai i se misiona faamanuiaina i le na o le tasi le tausaga talu ai, sa ia faamatalaina ona aafiaga i le misiona, o luitau ma popolega na la feagai, o lona liliu atu i le alii mo se fesoasoani, ma faamanuiaga sa ia mauaina. Sa mafanafana ana upu ma faalaeiauga, ma sa pipisi atu lona naunautaiga mo le misiona i le taulealea lea. Mulimuli ane, a o mou atu atuatuvalega o le alii talavou, sa oo mai se lagona filemu ia te ia. Sa ia maua se lotofaafetai loloto ina ua ia iloaina ua tali mai ana tatalo.
Sa tatalo faatasi nei alii talavou e toalua, ona sauni ai lea o Landon e alu, ua fiafia sa ia faalogo i le musumusuga na oo atu ia te ia. A o tu a’e o ia o le a alu, sa fesili atu le alii talavou ia Landon, “O fea na e faamisiona ai?” O le taimi lea e lei ta’ua ai lava e se tasi o i la’ua le igoa o le misiona sa galulue ai. Ina ua tali atu Landon i le igoa o lana misiona, sa faatumulia le alii talavou i loimata. Sa faamisiona Landon i le misiona tonu lava lea o le a toe foi i ai le alii talavou lea!
I se tusi na tusi mai ia te au talu ai nei, sa faasoa mai ai e Landon ia te au upu faamavae a le alii talavou lea ia te ia: “Sa ou faatuatua o le a faamanuia mai le Tama Faalelagi ia te au, ae sa le mafai ona ou manatu o le a Ia auina mai se tasi e fesoasoani ia te au, o se sa galue i la’u misiona. Ua ou iloa nei o le a lelei mea uma.” Sa faafofogaina ma tali mai se tatalo faatauvaa a se loto faamaoni.
Ou uso e ma tuafafine, i o tatou olaga o le a i ai o tatou faaosoosoga; o le a i ai o tatou tofotofoga ma luitau. A tatou o i le malumalu, a tatou manatua a tatou feagaiga tatou te osia iina, o le a sili ona tatou mafaia ona faatoilalo na faaosoosoga ma onosaia o tatou tofotofoga. O totonu o le malumalu e mafai ona tatou maua ai le filemu.
O faamanuiaga o le malumalu e le mafaatauina. O se tasi ou te matua faafetai ai lava i aso uma o lo’u olaga, o lea na ma maua ai ma lo’u toalua pele, o Frances a o ma tootutuli i se fatafaitaulaga paia ma osia feagaiga e noatia faatasi ai ma’ua mo le faavavau atoa e leai se faamanuiga e sili atu ona taua ia te au, nai lo le filemu ma le mafanafana ua ou maua mai le malamalama ua ou maua, o ia ma a’u o le a toe mafuta faatasi.
Tau ina ia faamanuia i tatou e lo tatou Tama Faalelagi ia tatou maua le agaga o le tapuai i le malumalu, ia tatou usiusitai i Ana poloaiga, ma ia tatou mulimuli ma le faaeteete i laasaga o lo tatou Alii ma le Faaola, o Iesu Keriso. Ou te molimau atu o Ia o lo tatou Togiola. O Ia o le Alo o le Atua. O Ia lea na afio mai i fafo mai le tuugamau i lena taeao muamua o le Eseta, ma aumaia ai faatasi ma Ia le meaalofa o le ola e faavavau mo fanau uma a le Atua. I lenei aso matagofie, a o tatou faamanatuina lena mea tulaga ese na tupu, tau ina ia tatou ofo atu ia tatalo o le lotofaafetai mo Ana meaalofa sili ma le ofoofogia mo i tatou. Ia faapea ia ona fai, ou te tatalo ai ma le lotomaualalo i Lona suafa paia, amene.