O Le Aiga e Ou Le Atua
Saunia e Carole M. Stephens
Fesoasoani Muamua i le Au Peresitene Aoao o le Aualofa
E taitasi i tatou ma auai ma o loo manaomia i le aiga o le Atua.
O i ai ea se isi mea e sili atu ona matagofie ma loloto nai lo upumoni mama ma faigofie o le talalelei o loo aoaoina i se pese a le Peraimeri? Ma o outou uma o teineiti o le Peraimeri o i ai i lenei po e iloaina le pese o le a ou talanoa atu ai. Sa outou aoaoina i le polokalama a le Peraimeri i le tausaga ua tuanai.
I upu o le “O Le Aiga e Ou Le Atua”—na muai lagiina i lenei sauniga—ua faamanatu mai ai ia i tatou le aoaoga faavae mama. Ua tatou aoao e le gata o le aiga e ou le Atua ae ua avea foi i tatou taitoatasi ma vaega o le aiga o le Atua.
Ua aoao mai e le laina muamua o le pese: “E i ai se aiga o le Tama. O a’u! O oe, ma isi foi: o tatou o Lana fanau.” Mai le folafolaga i le aiga, tatou te aoao ai, “I le muai olaga, sa iloa ma tapuai atalii ma afafine faaleagaga i le Atua o lo tatou Tama e Faavavau.” I lena malo, sa tatou aoao ai e uiga i lo tatou faasinomaga o tamaitai e faavavau. Sa tatou iloa ai o i tatou taitoatasi “o se afafine faapelepele … a ni matua faalelagi.”
O la tatou malaga faaletino i le lalolagi sa le’i suia ai na upumoni. E i ai uma i tatou i lena aiga ma o loo manaomia i le aiga o le Atua. E eseese uma aiga faalelalolagi. Ma a o tatou faia le mea silisili e mafai ona tatou faia e fatuai ai ni aiga masani malolosi, o le avea ai ma tagata o le aiga o le Atua e le faalagolago i soo se ituaiga o tulaga—tulaga faalefaaipoipoga, tulaga faamatua, tulaga faaletupe, tulaga faaleagafesootai, po o ituaiga o tulaga tatou te tuuina i luga o ala o faasalalauga faaleagafesootai.
Tatou te auai. “O i tatou o afafine o lo tatou Tama Faalelagi, e alofa ia i tatou, ma e tatou te alolofa foi ia te Ia.”
O le laina lona lua e sosooina le laina muamua. “Na Ia auina mai tatou uma taitoatasi, e ala i le fananau mai, ia ola ae ma aoao iinei i aiga.”
I le muai olaga, sa tatou aoaoina o le a tatou manaomia se vaitaimi o le olaga faaletino. Sa tatou “talia le fuafuaga [a leTama Faalelagi] e mafai ai e Lana fanau ona maua se tino faaletino ma maua le tomai faalelalolagi latou te maua ai le atoatoaga ma iloa tino ai [lo tatou] taunuuga paia o ni suli o le ola e faavavau.”
Sa faamatala mai e Elder Richard G. Scott e faapea “sa aoaoina i tatou i le muai olaga e faapea o lo tatou faamoemoega i le o mai iinei o le faaosoosoina, tofotofoina, ma faalauteleina.” O lena faalauteleina e oo mai i le tele o mamanu e pei o le tele o tagata o loo aafia ai. Ou te le’i oo lava i ni aafiaga o le tatalaina o se faaipoipoga, le tiga ma le le mautonu e sau mai le tuulafoaiina, po o le tiutetauave e fesootai ma le avea ma se tina nofotoatasi. Ou te le’i oo foi i ni aafiaga o se maliu o se tamaitiiti, le lē mauaina o ni fanau, po o le tosina atu i le itupa e tasi. Ou te le’i oo foi i le onosaia o le sauaina po o se gasegase tumau po o ni mea ua fai ma vaisu. Ou te le’i maua le avanoa e tofotofoina ai i nei mea.
O le taimi la lenei o loo mafaufau nisi o outou, “Sister Stephens, e te le malamalama lava!” Ma ou te tali atu atonu e sao outou. Ou te malamalama atoatoa i o outou luitau. Ae e ala i o’u tofotofoga ma luitau faaletagata lava ia—tofotofoga ia na uunaia ai a’u e tatalo—ua ou masani lelei ia te Ia o Le, e malamalama Ia “ua masani foi ma le tiga,” ua oo i mea uma ma malamalama i mea uma. Ma le isi, ua ou oo uma i tofotofoga faaletino ia na ou ta’ua mai se vaaiga faaleafafine, faaletina, faaletinamatua, faaleuso, faaleolomatua o le aiga, ma faaleuo.
O lo tatou avanoa o ni afafine tausi feagaiga o le Atua e le na o le aoao mai i o tatou lava luitau; ae o le faatasia lea i le loto malamalama ma le agaalofa a o tatou lagolagosua i isi tagata o le aiga o le Atua i o latou faigata, e pei ona tatou osifeagaiga e fai.
A tatou faia lea mea, o le a tatou malamalama ai foi ma faatuatuaina e silafia e le Faaola ia faigata o le ala ma e mafai ona taialaina i tatou i soo se faanoanoaga ma ni lē fiafia e ono oo mai. O Ia o le alofa mama moni, o Lona alofa e “tumau e faavavau”—i se vaega e ala ia i tatou—pe a tatou mulimuli ia te Ia.
I le avea ai ma ni afafine o le Atua ma ni soo o Iesu Keriso, tatou te “galulue e tusa ai ma na tigaalofa ua totoina e le Atua” i o outou loto. O la tatou faatosinaga e le faatapulaaina na o tagata o o tatou aiga
Sa ou maua talu ai nei se avanoa e asiasi ai ia Sister Yazzie o le Siteki a Chinle Arizona i lona tamai fale laau. Ina ua ia faafeiloai au i totonu o lona maota, o le mea muamua na ou matauina o ata faavaa eseese o le aiga ma faifeautalai i luga o lona puipui ma laulau. O lea sa ou fesili ai, “E toa fia ni fanau a lau fanau o i ai?”
I le faateia ai i la’u fesili, sa faamimigi ona tauau. I le le mautonu i lana tali, sa ou autilo atu i lana tama teine, o Sister Yellowhair, lea na tali mai, “Na te leiloa pe toa fia ni ana fanau a fanau. E valaau uma e le fanau o ia iā ‘Tinamatua’—o ia o le Tinamatua i tagata uma.”
E le faatapulaaina e Sister Yazzie lona alofa ma faatosinaga i lona aiga moni. E malamalama o ia i le uiga o le faalauteleina o ana faatosinaga a o ia agalelei atu, faamanuia, faafaileleina, ma puipuia le aiga o le Atua. E malamalama o ia e faapea “soo se taimi e faamalosia ai e se tamaitai le faatuatua o se tamaitiiti, ua ia saofagā i le malosi o se aiga—i le taimi nei ma le lumanai.”
O le laina lona tolu o le pese e faamatala atili ai le faamoemoega o lo tatou olaga faaletino: “Ua aumai e le Atua ia i tatou ni Aiga e fesoasoani ai ia avea i tatou ma tagata e finagalo i ai o Ia.” Na aoao mai le Faaola, “Ia tasi outou; ma afai tou te lē tasi e lē a a’u outou.” Ua aoao mai e le folafolaga i le aiga e faapea i le avea ai ma afafine agaga faapelepele o ni matua faalelagi, ua ia i tatou se natura paia, faasinomaga e faavavau, ma le faamoemoega. E finagalo le Atua ia tasi i tatou—o afafine tausi-feagaiga ua faatasia e ui i eseesega o o tatou olaga taitoatasi, o e naunau e aoao mea uma e manaomia ia toe foi atu ai i Lona afioaga, ma faamauina ia te Ia o se vaega o Lona aiga e faavavau.
“O sauniga ma feagaiga paia o loo maua i malumalu paia ua mafai ai e i [tatou] ona toe foi atu i le afioaga o le Atua ma mo aiga ina ia tuufaatasia e faavavau.” O sauniga tatou te mauaina ma feagaiga tatou te osia i le papatisoga ma i totonu o malumalu paia e fesootai ai le aiga o le Atua i itu uma o le veli—e fesootai ai i tatou i lo tatou Tama e ala i Lona Alo, o Le na tatalo, “Ina ia tasi i latou uma, faapei o oe le Tama o i totonu ia te au, o a’u foi o i totonu ia te oe, ina ia tasi i latou i totonu ia te i taua.”
A tatou faaaogaina o tatou taimi i le olaga faaletino e suesue ai ma faaaoga aoaoga a le Faaola, tatou te avea atili e pei o Ia. Tatou te oo ai ina malamalama o Ia o le ala—le ala lava e tasi—e mafai ai ona tatou faatoilaloina luitau faaletino, ia faamaloloina, ma toe foi atu i lo tatou aiga faalelagi.
O le laina mulimuli o le pese e toe foi i le amataga: “O le auala lea e faasoa mai ai Lona alofa, ona o le aiga e mai le Atua.” O le fuafuaga a le Tama mo Lana fanau o se fuafuaga o le alofa. O se fuafuaga e faatasia ai Lana fanau—Lona aiga—faatasi ma Ia. Na aoao mai Elder Russell M. Nelson, “E na o le lua lava mea e finagalo ai le Tama mo Lana fanau … : tino ola pea ma le ola e faavavau, ‘o lona uiga o le olaga faatasi ma Ia i le aiga.’” O na faanaunauga e na o le pau le mea e mafai ona iloatino ai pe afai lea tatou te faasoa atu foi le alofa ua i ai i le Tama Faalelagi mo Lona aiga e ala i le aapa atu ma faasoa atu Lana fuafuaga i isi.
I le lua sefulu tausaga talu ai, na aapa atu ai le Au Peresitene Sili ma le Korama a Aposetolo e Toasefululua i le lalolagi atoa ina ua auina atu se folafolaga i le aiga. Talu mai lena taimi, ua faateteleina osofaiga i aiga.
Afai e ao ona faamanuiaina i tatou i o tatou tiutetauave paia o ni afafine o le Atua, e tatau ona tatou malamalama i le taua e faavavau o [le fuafuaga a leTama] atoa ai ma o tatou tiutetauave taitoatasi e aoao atu upumoni e uiga i le fuafuaga a lo tatou Tama Faalelagi mo Lona aiga. Sa faamalamalama mai e Peresitene Howard W. Hunter:
“O loo i ai se tulaga manaomia tele e aumai faatasi ia tamaitai o le Ekalesia ina ia tutu faatasi ma tutu atu mo le Usoga i le taofiga o le tai fana’e o le amioleaga ua siosiomia ai i tatou, ma le tuleia i luma o le galuega a lo tatou Faaola. …
“… O lea matou te augani atu ai ia te outou ina ia auauna atu ma le uunaiga mamana mo le lelei i le faamalolosia o o tatou aiga, la tatou ekalesia, ma o tatou nuu.”
Uso e, ua tatou auai. E alofagia i tatou. E manaomia i tatou. Ua ia i tatou se faamoemoega paia, se galuega paia, se tofiga paia, ma se matafaioi paia i le Ekalesia ma le malo o le Atua ma i Lona aiga e faavavau. O tou silafia ea i totonu o o outou loto e alofa le Tama Faalelagi ia te outou ma e finagalo ia te outou ma i latou e te alofa i ai ina ia faatasi ma Ia? E pei lava o “Le Tama Faalelagi ma Lona Alo e atoatoa …, O o Laua faamoemoega mo i tatou e atoatoa.” O le La fuafuaga mo i tatou e atoatoa, ma o a Laua folafolaga e moni. O nei upumoni ou te molimau atu ai ma le agaga faafetai i le suafa o Iesu Keriso, amene.