Ia Oo Mai Lou Malo
Saunia e Elder Neil L. Andersen
O Le Korama a Aposetolo e Toasefululua
O le mafaufau i Lona afio mai e faagaeetia ai lo’u agaga. O le a ofoofogia! O le lautele ma le matagofie, o le tele ma le ofoofogia, o le a sili mamao atu i soo se mea ua vaai i ai mata faaletino pe oo foi i ai.
A o tatou pepese, sa matua uunaia a’u i se manatu faapea o le taimi lava lenei, e faitau selau ma fia afe, masalo e faitau miliona o tagata talitonu o Au Paia i atunuu e 200, i se tulaga ofoofogia i gagana eseese e 75, ua tatou sii ae faatasi o tatou leo i le Atua, ma pepese:
“Le Tupu o Tupu, Afio Mai!” O i tatou o se aiga toatele naua o ni tagata faatuatua i le lalolagi atoa, o soo o le Alii o Iesu Keriso.
Ua tatou tauaveina i o tatou luga Lona suafa, ma o vaiaso taitasi a o tatou aai ma feinu i le faamanatuga, tatou te folafola atu ai o le a tatou manatua o Ia ma tausi Ana poloaiga. E mamao lava i tatou mai le atoatoa, ae tatou te le o faasamasamanoa i lo tatou faatuatua. Tatou te talitonu ia te Ia. Tatou te tapuai ia te Ia. Tatou te mulimuli ia te Ia. Tatou te alolofa tele ia te Ia. O la tatou galuega ua silisili ia i le lalolagi uma.
Ua tatou ola, uso e ma tuafafine, i taimi o loo loma ai le Afio Mai Faalua o le Alii, o se taimi ua loa ona faatalitali i ai le au faatuatua o le talafaasolopito. Ua tatou ola i taimi o taua, o taimi o faalavelave faalenatura, o aso ua fetosoa’i ai le lalolagi e le fememeai ma fevesiaiga.
Ae ua tatou ola foi i le taimi o le Toefuataiga, o le taimi ua avatu ai le talalelei i le lalolagi uma—o se taimi sa folafola mai ai e le Alii faapea o le a Ia “faatu mai … se nuu mama” o e o le a Ia faaauupegaina “i le amiotonu ma le mana o le Atua.”
Ua tatou sapi i lo tatou olioli ma le lotomalie, ma tatou te faamoemoe e fetaiai ma le lotototoa ma a tatou tauiviga ma mea e le o mautinoa. O nisi faigata e sili atu ona ogaoga i lo isi, peitai e leai se tasi e sao mai ai. Na saunoa Elder Neal A. Maxwell i se tasi taimi, “Afai ua atoatoa le lelei o mea uma mo oe i le taimi nei, faatali la.”
E ui ina sa faamautinoa mai faafia e le Aii ia i tatou e “le tatau ona mata’u,” ae o le tausisia o se vaaiga manino e ati i luga atu o lenei lalolagi, e le faigofie pea pe a tatou i ai i le lotolotoi o tofotofoga.
Sa aoao mai e Peresitene Thomas S. Monson ia te au se lesona taua e uiga i le tausisia o se vaaiga e faavavau.
Sefuluvalu tausaga talu ai a o ma malaga atu i se nofoaafi i Suitiselani ma Peresitene Monson, sa ou fesili atu ia te ia e uiga i ona tiutetauave mamafa. O lana tali sa faamalosia ai lo’u faatuatua. “I le Au Peresitene Sili,” sa saunoa ai Peresitene Monson,”matou te faia mea uma matou te mafaia e tulei ai i luma lenei galuega. Ae o le galuega lenei a le Alii. Na te taitaia. O loo i ai o Ia i le foeuli. Matou te maofa a o matou matauina o Ia o tatala faitotoa matou te le mafai ona tatalaina ma faatino ia vavega e seasea matou manatu i ai.”
Uso e ma tuafafine, o le vaaia ma le talitonu i vavega a le Alii i le faavaeina o Lona malo i le lalolagi, e mafai ona fesoasoani tatou te vaai ai ma talitonu o loo i ai le aao o le Alii i le galuega ma i o tatou foi olaga.
Na tautino mai le Alii, “Ou te mafai ona fai o la’u lava galuega.” Tatou te taumafai uma e fai la tatou vaega, peitai o Ia o le tusiata mamanu sili. I lalo o le taitaiga a Lona Tama, sa Ia foafoaina ai lenei lalolagi. “Na ia faia mea uma lava; e leai foi se mea e tasi na faia e lei faia e ia.” A oo ina tatou alafa’i mai faaleagaga ma mataituina, tatou te vaaia Lona aao i le salafa o le lalolagi ma vaaia Lana faatosinaga i o tatou lava olaga patino.
Sei ou faasoa atu se faataitaiga.
I le 1831, i le na o le 600 tagata o le Ekalesia, sa tautino mai ai e le Alii, “O ki o le malo o le Atua ua tuu atu i tagata i luga o le lalolagi, ma mai iina o le a taavale atu ai i luma le talalelei i tuluiga o le lalolagi, e pei ona o le a taavale atu le maa na tofi mai le mauga e aunoa ma lima, seia tumu ai le lalolagi atoa.”
Sa muai vaaia e le perofeta o Nifae o le a “toaitiiti” ni tagata o le Ekalesia i o tatou aso pe a faatusatusa i le faitau aofai o le lalolagi ae o le a i ai “i luga o le lalolagi atoa.”
O faataitaiga matagofie e tolu o le aao o le Alii i le faatuina o Lona malo, o malumalu ia na faasilasila mai i le asō e Peresitene Monson. I le mavae ai o ni nai vaitausaga, o ai na mafaufauina ni malumalu i Haiti, Taialani, ma le Faga o Ivory?
O le tulaga o se malumalu e le o se faaiuga talafeagai faafaafanua. E oo mai i se faaaliga mai le Alii i Ana perofeta, e tau mai ai se galuega maoae ina ia faia, ma faailoa atu ai ia Au Paia amiotonu o e o le a faatauaina ma tausia mo Lona maota i augatupulaga.
Sa ma asiasi atu ma lo’u toalua o Kathy, i Haiti i le lua tausaga talu ai. I luga o le mauga o Port-au-Prince, sa matou aufaatasi ai ma le Au Paia o Haiti i le faamanatuina o le faapaiaga o le atunuu e Elder Thomas S. Monson i le na o le 30 tausaga na muamua atu. E leai se tasi o i tatou o le a faagaloina le mafuie faataumaoi o le 2010. Faatasi ai ma tagata faamaoni o le au paia ma se au lotototoa o faifeautalai sa toetoe o tagata Haiti uma, ua faaauau ai pea ona faatupulaia le Ekalesia i lenei atumotu ma ua malosi. Ua sii ae lo’u faatuatua i le vaai atu i nei Au Paia amiotonu a le Atua, o laei papae, ma maua le mana o le perisitua paia e taitaiina ma faataunuuina ia sauniga paia i le maota a le Alii.
O ai na mafaufauina se maota o le Alii i le aai matagofie o Bangkok? O se isi faataitaiga, o Kerisiano e na o le tasi le pasene o le atunuu o Tailani e tele lava i le Lotu Puta. E pei o Haiti, ua tatou iloaina foi i Bangkok sa faapotopotoina e le Alii le au filifilia o le lalolagi. A o i ai iina i ni nai masina talu ai, sa matou feiloai ai ma Sathit ma Gaew Kaivalvatana. Sa auai Sathit i le Ekalesia ina ua 17 ona tausaga, ma sa faamisiona i lona lava nuu. Mulimuli ane, sa la feiloai ai ma Gaew i le Inisitituti, ma sa faamauina i la’ua i le Malumalu o Manila Filipaina. I le 1993, na lavevea ai le au Kaivalvatana i se loli ona na moe le avetaavale. Sa pipili ia Sathit mai le fatafata i lalo. Sa lei maluelue lava lo la’ua faatuatua. O Sathit o se faiaoga tausaafia i le Aoga Faavaomalo i Bangkok. O ia o le peresitene o le Siteki a Thailand Bangkok Matu. E i ai vavega a le Atua i Lana galuega ma i o tatou olaga patino.
O le vavega o le Ekalesia i le Faga o Ivory e le mafai ona faamatalaina e aunoa ma igoa o ni ulugalii se toalua: O Filipe ma Analei ma Lusiane ma Asata Afoue. Sa auai i latou i le Ekalesia o ni ulugalii talavou i Europa, o le tasi i Siamani a o le isi i Farani. I le 1980, e le iloa e le tasi le isi, sa manatu ai Filipe ma Lusiane e toe foi i o la’ua atunuu moni i Aferika ma le faamoemoe e fausia le malo o le Atua. Mo le Tuafafine o Asata, o se Siamani, o le tuua o lona aiga, ma Uso Asata, o le tuua o lana galuega o se enisinia faamoemoeina, e manaomia ai se faatuatua uiga ese. O nei ulugalii e toalua sa feiloai le tasi ma le isi mo le uluai taimi i le Faga o Ivory, ma sa amata ai se Aoga Sa. Ua 30 tausaga talu ai. Ua i ai nei siteki e valu iina ma tagata auai e 27,000 i lea atunuu Aferika matagofie. O loo galulue faatamalii pea le au Afoue, e faapena foi le au Asata, lea faatoa mae’a nei se la misiona i le Malumalu o Accra Ghana.
Pe o mafai ona outou vaai i le aao o le Atua i le tuleia i luma o Lana galuega? Pe o mafai ona outou vaai i le aao o le Atua i olaga o faifeautalai i Haiti po o le au Kaivalvatanas i Taialani? Pe o mafai ona outou vaai i le aao o le Atua i olaga o le au Asata ma le au Afoue? Pe o mafai ona outou vaai i le aao o le Atua i lou lava olaga?
“Ma ua leai se mea e faatausuai ai le tagata i le Atua … tau lava o i latou o e latou te le tautinoina lona aao i mea uma.”
E le na o Haiti, Tailani, po o le Faga o Ivory o loo tutupu ai vavega a le Atua. Vaavaai solo. “E manatu mai le Atua i tagata uma … ; ioe, ua ia faitauina ona tagata, ma o ona loto alofa mutimutivale ua i luga o le lalolagi uma.”
O nisi taimi e mafai ona tatou vaai i le aao o le Alii i olaga o isi ae tatou te taumanatunatu, “Pe mafai faapefea ona manino atili la’u vaai i Lona aao i lo’u lava olaga?”
Na fetalai le Faaola:
“E leai … se [manuiti] e … pa’ū [i] le eleele e aunoa ma [le silafia] e lo outou Tama. …
“O lea … aua tou te matatau ai, [aua] e sili outou i manu iti e tele.”
Manatu i le alii talavou lea sa tagi atu i le perofeta o Elisaia a o siomia i latou e fili: “Aue, [o le a] se mea tatou te fai a’i?”
Sa tali atu Elisaia:
“Aua e te fefe: aua e toatele ua ia te i tatou i e ua ia te i latou.
“Ona tatalo ai lea o Elisaia, … Ieova e, … faapupula i ona mata, ina ia na iloa. Ona faapupulaina lea e Ieova o mata o le taulealea, ona iloa ai lea e ia, faauta foi, ua tumu le mauga i solofanua ma kariota afi.”
A o outou tausia poloaiga ma tatalo i le faatuatua ina ia iloa le aao o le Alii i lou olaga, o le a Ia faapupula tele ou mata faaleagaga, ma o le a atili manino ai lau vaai e le o tuua na o oe.
Ua aoao mai e tusitusiga paia e ao ona tatou “[tutu] mausali i le faatuatua i le mea o le a oo mai.” O le a le mea o le a oo mai? Na tatalo le Faaola:
“Lo matou Tama e, o i le lagi, Ia paia lou suafa.
“Ia oo mai lou malo. Ia faia lou finagalo i le lalolagi, e pei ona faia i le lagi.”
Faatoa uma atu ona tatou lagiina le viiga, “Le Tupu o Tupu, Afio Mai.”
E tupu lo tatou faatuatua a o tatou naunau atu i le toe afio mai o le Faaola. O le mafaufau i Lona afio mai e faagaeetia ai lo’u agaga. O le a ofoofogia! O le lautele ma le matagofie, o le tele ma le ofoofogia, o le a sili mamao atu i soo se mea ua vaai i ai mata faaletino pe oo foi i ai.
I lena aso, o le a afio mai o Ia o “aui i se ie ma taoto i le moega vaovao,” peitai, o le a Ia afio mai “i ao o le lagi, ua faaofuina i le mana ma le mamalu tele; faatasi ma agelu paia uma.” le a tatou faalogo “i le leo o le agelu sili, ma le … pu a le Atua.” O le a suia le la ma le masina ma, “o fetu [o le a] lia’i ese mai o latou nofoaga.” O oe ma a’u, po o i latou o e mulimuli mai ia i tatou, “o au paia … mai [itu uma] o le lalolagi,” “o le a liua … segia i luga e fetaia’i ma ia,” ma o i latou na oti i le amiotonu, o i latou foi o le a “segia i luga e fetaia’i ma ia i le taulotoa’iga … o le lagi.”
Ona, oo mai lea o se aafiaga e toetoe ina a le mafai ona mafaufauina: “O tagata uma,” ua fetalai mai ai le Alii, “o le a vaai faatasi ia te au.” Ona, oo mai lea o se aafiaga e toetoe ina a le mafai ona mafaufauina: “O tagata uma,” ua fetalai mai ai le Alii, “o le a vaai faatasi ia te au.” “Ma o le a … pei o se leo o vai e tele, ma e pei o le leo o se faititili tele.” “Ma o le a tu le Alii, le Faaola lava ia, i le lotolotoi o lona nuu.”
Ona oo mai ai lea o le toetuufaatasiga a agelu o le lagi ma le Au Paia i luga o le fogaeleele. Ae o le mea aupito taua, ua tautino mai e Isaia, “Ua iloa foi e tuluiga uma o le lalolagi le olataga mai lo tatou Atua,” ma o le a “nofotupu [o Ia] i luga o tagata uma.”
I lena aso, o le a gugu le au masalosalo, “aua o le a faalogo tagata uma … , ma tootuli tulivae uma, ma tautino atu e laulaufaiva uma” o Iesu o le Keriso, o le Alo o le Atua, o le Faaola ma le Togiola o le lalolagi.
O le asō o le Eseta. Tatou te fiafia faatasi ai ma le au Kerisiano i le lalolagi atoa i Lona Toetu mamalu ma i Lona lava toetu na folafola mai. Ia tatou sauniuni mo Lona toe afio mai, ia saga suesue pea lava pea i lou mafaufau nei mea mamalu na tutupu, faatasi ma i latou tatou te alolofa i ai, ma ia avea Lana tatalo ma a tatou tatalo: “Ia oo mai lou malo. Ia faia lou finagalo i le lalolagi e pei ona faia i le lagi.” Ou te molimau atu o loo soifua o Ia. “Le Tupu o Tupu, Afio Mai.” I le suafa o Iesu Keriso, amene.