Aisea e Faaipoipo Ai, Aisea e Fai ai se Aiga

Saunia e Elder D. Todd Christofferson

O Le Korama a Aposetolo e Toasefululua

O se aiga e fausia i luga o le faaipoipoga o se alii ma se tamaitai e maua ai se faatulagaga sili mo le fuafuaga a le Atua ia lauusiusi.

I luga ae o le Faitotoa Tele i Sisifo o le Westminster Abbey lauiloa i Lonetona, Egelani, o loo tutu ai ni faatagata e 10 o maturo Kerisiano o le seneturi e 20. O loo i ai ma Dietrich Bonhoeffer, o se faifeau Siamani atamai sa fanau i le 1906. Sa avea Bonhoeffer o se tagata tetee le mataofiofia o le pulega saua a le Nazi ma le faiga sa fai a’i tagata o Iutaia ma isi. Sa faafalepuipuia o ia i lona tetee aliali ma iu ai ina sa fasiotia i se togalauapi o pagota. O Bonhoeffer o se tusitala o le mau tusitusiga, ma o nisi o ana tusiga ua sili ona lauiloa o tusi ia na fesoasoani ai leoleo sa faavauvau alolofa ia te ia ma fesoasoani ai e aveese faanana o ia mai le falepuipui, ma na lolomi ma faasalalauina mulimuli ane o Tusi ma Pepa mai le Falepuipui.

O se tasi o na tusi o le tusi i si ona tei teine a o lei faia lana faaipoipoga. Na aofia ai malamalamaaga taua nei: “O le faaipoipoga e sili atu nai lo le alofa o le tasi i le isi. … I lo oulua alofa e na o oulua lava lua te vaai i ai i le lalolagi, peitai i le faaipoipoga e tatau ona sosoo ai oulua i se sooga i le filifili o augatupulaga, lea e faamatua’ia e le Atua e faataunuuina mo lona mamalu, ma valaauina ai i lona malo. I lo oulua alofa o le a na o le lagi o lo oulua lava fiafia lua te vaai i ai, peitai i le faaipoipoga ua tuuina oulua i se tulaga o tiutetauave agai atu i le lalolagi ma tagata. O lo oulua alofa o la oulua lava lea meatotino, peitai o le faaipoipoga e tele atu nai lo se mea e patino faaletagata—o se tulaga aloaia, o se tofi. E pei lava o se palealii, ae le na o se manao e pulea, e afua ai ona i ai se tupu, ma e faapena foi i le faaipoipoga, e le na o se alofa o le tasi i le isi, e soofaatasia ai oulua i le silafaga a le Atua ma tagata. … O lea la, o le alofa e mai ia te oulua, ae o le faaipoipoga e mai lugā, e mai le Atua.”

O le a le auala e maualuga atu ai le faaipoipoga i le va o se alii ma se tamaitai nai lo le alofa o le tasi i le isi ma lo la’ua lava fiafia e avea ai “o se tulaga o le tiutetauave agai atu i le lalolagi ma tagata”? O le a le itu e sau ai “mai lugā, mai le Atua”? Ina ia malamalama, e tatau ona tatou toe foi i le amataga.

Ua faaalia mai e perofeta faapea na muai ona tatou ola o ni atamai ma sa tuuina mai ia i tatou ni foligafaatusa, po o ni tino agaga, e le Atua, o lea na avea ai ma Ana fanau agaga—o atalii ma afafine o ni matua faalelagi. Na oo mai le taimi i lea muai olaga o agaga i le taimi, na faagasolo ai Lona finagalo ina ia “mafai ona tatou maua se avanoa e avea ai faapei o Ia,” sasaunia e lo tatou Tama Faalelagi se fuafuaga e faatino ai. I tusitusiga paia o loo aumaia ai ni igoa eseese, e aofia ai “o le fuafuaga o le olataga,” “o le fuafuaga tele o le fiafia,” ma le “o le fuafuaga o le togiolaina.” O faamoemoega autu e lua o le fuafuaga sa faamatala atu ia Aperaamo i upu nei:

“Ma ua tulai mai se tasi i totonu o i latou sa pei o le Atua, ma sa fai atu o ia ia te i latou o e sa faatasi ma ia: O le a tatou o i lalo, ona o loo i ai se avanoa iina, ma o le a tatou ave mai mea nei, ma o le a tatou faia se lalolagi e nonofo ai i latou nei [agaga];

“Ma o le a tatou tofotofoina ai i latou, e vaai pe latou te faia mea uma o soo se mea e poloaiina ai i latou e le Alii lo latou Atua:

“Ma o i latou o e e tausia lo latou esetete muamua, o le a faaopoopoina i luga o i latou; … ma o i latou o e e tausia lo latou esetete lona lua o le a faaopoopo i luga o o latou ulu le mamalu e faavavau ma faavavau lava.”

Ona o lo tatou Tama Faalelagi, o lea sa avea i tatou o ni tagata agaga. O lea la ua Ia ofoina mai ia i tatou se ala e faamae’a pe faaatoatoa ai lena tagata. O le faaopoopoga o le elemene faaletino e taua ina ia maua le atoaga ma le mamalu o loo sapi ai le Atua lava Ia. Afai, na o tatou faatasi ma le Atua i le lalolagi o agaga i le muai olaga, ma tatou ioe e auai i le faatinoga o Lana fuafuaga—pe i se isi faaupuga, “tausia lo [tatou] esetete muamua”—o le a “faaopoopoina i o tatou luga” se tino faaletino ina ua tatou o mai e nonofo i le lalolagi lea sa Ia foafoaina mo i tatou.

Afai la, i le gasologa o lo tatou olaga faitino, sa tatou filifili e “faia mea uma o soo se mea e poloaiina ai [i tatou] e lo [tatou] Atua,” o lona uiga ua tatou tausia la tatou “esetete lona lua.” O lona uiga la e ala i a tatou filifiliga tatou te faaali atu ai i le Atua (ma i tatou lava) la tatou tautinoga ma le mana e ola ai i Lana tulafono faaselesitila a o tatou i ai i fafo mai o lona afioaga, ma i se tino faaletino ma ona mana uma, manaoga, ma naunauga. Pe mafai ea ona tatou faafoeina le tino faaletino ina ia avea o se meafaigaluega ae le o se pule o o tatou agaga? Pe mafai ea ona faatuatuaina i tatou i le olaga nei ma le faavavau i mana faaleatua, e aofia ai le mana e foafoa ai le ola? Pe o le a tatou taitoatasi ma faatoilaloina le leaga? O i latou sa faia o le a “faaopoopoina i luga o o latou ulu le mamalu e faavavau ma faavavau lava”—o se itu taua o lena mamalu o le tino toetu, tino ola pea, ma le mamalu. E leitioa tatou “alalaga fiafia” i avanoa ma folafolaga ofoofogia.

E le itiiti ifo i le fa ni mea e manaomia mo le manuia o lenei fuafuaga paia:

Muamua o le Foafoaga o le lalolagi e avea ma o tatou nofoaga e nonofo ai. Po o a lava auiliiliga o le faasologa o le foafoaga, ua tatou iloa e le o se mea na faafuaveta, ae na taitaiina e le Atua le Tama ae faataunuuina e Iesu Keriso—“na ia faia mea uma lava; e leai foi se mea e tasi na faia e lei faia e ia.”

Lona lua o le tulaga o le olaga nei. Sa faatino e Atamu ma Eva mo i latou uma o e sa filifili e auai i le faatinoga o le fuafuaga sili a le Tama mo le fiafia. O lo la Pa’ū na afua ai tulaga sa manaomia mo lo tatou fanau mai faaletino, ma mo se aafiaga faaletino ma le aoaoina i fafo mai o le afioaga o le Atua. O le Pa’ū na oo mai ai ma se iloa o le lelei ma le leaga ma le mana na tuuina mai le Atua e filifili ai. O le mea mulimuli, o le Pa’ū na aumaia ai le oti faaletino lea e manaomia e fai ai lo tatou taimi i le olaga nei ma taimi e le tumau ina ia aua ai ne’i o tatou ola e faavavau i a tatou agasala.

Lona tolu o le togiolaina mai le Pa’ū. Ua tatou vaai i le matafaioi a le oti i le fuafuaga a lo tatou Tama Faalelagi, ae o lena fuafuaga o le a le aoga e aunoa ma se auala e faatoilalo ai le oti i le iuga, faaletino ma le faaleagaga. O le mea lea, na puapuagatia ai le Faaola, o le Alo Pele o le Atua, o Iesu Keriso, ma maliu e togiola mo le solitulafono a Atamu ma Eva, lea ua maua ai le toetu ma le tino ola pea mo tagata uma. Ma e talu ai e leai se tasi o i tatou o le a atoatoa ma faifai pea le usitai i le tulafono o le talalelei, o lea ua togiolaina ai foi i tatou e Lana Togiola mai i a tatou lava agasala le tuutuuga o le salamo. O le alofa tunoa togiola o le Faaola, ua maua mai ai le faamagaloga o agasala ma le faapaiaga o le agaga, ua mafai ai ona tatou toe fanauina faaleagaga ma toe faalelei ai ma le Atua. O lo tatou oti faaleagaga—le tuueseeseina o i tatou mai le Atua—o le a muta.

Lona fa ma le mea mulimuli, o le tulaga mo lo tatou fanau mai faaletino ma le toe fanauina faaleagaga i le malo o le Atua. Mo Lana galuega ia manuia e “[faaeaina ai i tatou] faatasi ma ia lava,” sa faauuina e le Atua ia faaipoipo alii ma tamaitai ma fanauina ai fanau, ma o lea e foafoaina ai, i le faapaaga ai ma le Atua, ia tino faitino ia ua avea ma autu o le tofotofoga o le olaga nei ma e taua mo le mamalu e faavavau faatasi ma Ia. Sa Ia faauuina foi ia faavaeina e matua ni aiga e faafailele ai a latou fanau i le malamalama ma le upumoni, ma taitai i latou i se faamoemoe ia Keriso. Ua poloaiina i tatou e le Tama:

“Ia aoao saoloto atu nei mea i lau fanau, ua fai atu:

“Ona … talu ai ona sa outou fananau mai i le lalolagi i le vai, ma le toto, ma le agaga lea na Ou faia, ma faapea ona avea ai o le efuefu o se tagata ola, e faapea lava ona tatau ona toe fanauina o outou i le malo o le lagi, i le vai, ma i le Agaga [Paia], ma faamamaina i le toto, o le toto lava lea o la’u Toatasi na Fanaua; ina ia mafai ona faapaiaina outou mai agasala uma, ma olioli i afioga o le ola e faavavau i le lalolagi lenei, ma le ola faavavau i le lalolagi a sau, o le mamalu ola pea lava.”

O le iloa ai o le mafuaaga na tatou tuua ai le afioaga o lo tatou Tama Faalelagi ma le mea e manaomia tatou te toe foi atu ai ma faaeaina faatasi ma Ia, ua matua manino ai lava e leai se mea e tusa ai ma lo tatou ola ai i le lalolagi e mafai ona sili atu ona taua nai lo le fanau mai faaleagaga ma le toefanauina faaleagaga, o mea ia e lua e tatau ona muamua maua mo le ola e faavavau. O lea la, ina ia faaaoga ia upu a Dietrich Bonhoeffer, o le “tofi” o le faaipoipoga, o le “tulaga o le tiutetauave agai atu i tagata,” e faapea o lenei faatulagaga paia “mai lugā, mai le Atua” e faatinoina ai. O le “sooga i le filifili o augatupulaga” iinei ma le olaga a sau—o le faatulagaga lea o le lagi.

O se aiga e fausia i luga o le faaipoipoga o se alii ma se tamaitai e maua ai se faatulagaga sili mo le fuafuaga a le Atua ia lauusiusi—o le faatulagaga mo le fanauina o fanau, o e o mai i le mama a’ia’i ma le taumamaina mai le Atua, ma le siosiomaga mo le aoaoina ma sauniuniga o le a latou moomia mo se olaga manuia faaletino, ma se olaga e faavavau i le lalolagi a sau. O se vaega toaitiiti o aiga e fausia i na ituaiga o faaipoipoga e taua mo nuu ia ola ai ma lauusiusi. O le mafuaaga lena e uunaia ai e nuu ma malo ma puipuia le faaipoipoga ma le aiga o ni faalapotopotoga anagatā. E le na o se mea e uiga i le alofa ma le fiafia o tagata matutua.

O le suesuega faaagafesootai o se faaipoipoga ma mo aiga sa taiulu ai se alii ma se tamaitai ua faaipoipo, e uunaia malosi. Ma o lea, “matou te lapatai atu foi, o le faamalepeina o le aiga o le a aumai ai i tagata taitoatasi, alaalafaga, ma malo, faafanoga ia na uluai ta’u mai e perofeta anamua ma aso nei.” Peitai o la tatou tautinoga mo le matafaioi a le faaipoipoga ma le aiga e le faavaea i luga o suesuega faaagafesootai, ae i luga o le upumoni faapea o ni foafoaga ia a le Atua. O ia o le na foafoaina i le amataga ia Atamu ma Eva i Lona faatusa, o le tane ma le fafine, ma tuufaatasia i la’ua o se tane ma se ava ia avea ma “tino e tasi” ma ia fanafanau ma uluuluola ia tumu ai le lalolagi. E tofu tauaveina e tagata taitasi le faatusa paia, ae o totonu o le tuufaatasiga faalefaaipoipoga o le tane ma le fafine e avea ma tino e tasi, tatou te maua ai le uiga aupito sili ona atoa o le foafoaina o i tatou i le faatusa o le Atua—o le tane ma le fafine. E leai se tasi o i tatou po o se isi lava e mafai ona fetuuna’ia lenei faatulagaga paia o le faaipoipoga. E le o se mea na faia e le tagata lava ia. O lea faaipoipoga ua tonu ia “mai lugā, mai le Atua” ma o se vaega tele o le fuafuaga o le fiafia pei o le Pa’ū ma le Togiola.

I le lalolagi o le muai olaga, sa fouvale Lusifelo i le Atua ma Lana fuafuaga, ma iu ina matua faatupulaia lona tetee. Ua ia tauivi ia lē faia ni faaipoipoga ma le faatulagaina o aiga, i mea o loo faatulagaina ai faaipoipoga ma aiga, na te faia mea na te mafaia e faalavelaveina ai. Na te osofaia mea uma e paia e uiga i feusuaiga faaletagata soifua, nutipalaina mai le matalalaga o le faaipoipoga i ni ituaiga le mafaatusalia o mafaufauga ma taga lē mama. E saili o ia e faatalitonu alii ma tamaitai faapea o mea e faamuamua i faaipoipoga ma aiga, e mafai ona faatuatuanai pe lafoaia, pe ta’umaualaloina nai lo matata faalegaluega, o isi mea e ausia, ma se tulimataiga o lou lava faamalieina ma le saolotoga o le tagata. E moni lava e fiafia tele le fili pe a le aoaoina e matua ma faamasani a latou fanau ia faatuatua ia Keriso ma ia toefanauina faaleagaga. Uso e ma tuafafine, e tele mea e lelei, e tele e taua, ae e na o ni nai mea e manaomia.

Ina ia tautino atu ia upumoni faavae e tusa ai ma le faaipoipoga ma le aiga, e le o faaseloa ai le vaai pe tuuitiitia ai osigataulaga ma manuia o i latou e le i afea le tulaga lea i le taimi nei. O nisi o outou e le o maua faamanuiaga o le faaipoipoga ona o ni mafuaaga e aofia ai le leai o se vaai i le lumanai, tosina atu i le itupa e tasi, faaletonu o le tino po o le mafaufau, pe na o le fefe foi lava ne’i toilalo faapea, mo na o lea taimi pe ā, ua lamatia ai le faatuatua. Pe atonu foi sa e faaipoipo, ae ua faamutaina lena faaipoipoga, ma ua tuua ai na o oe e faafoeina mea e toetoe ina a le mafai e ni tagata se toalua ona taulimaina. O nisi o outou ua faaipoipo, e le mafai ona fanauina ni fanau e ui i le naunautaiga lofituina ma tatalo faatauanau.

Ae tusa lava, e tofu tagata uma ma meaalofa; e tofu tagata uma ma taleni; e mafai e tagata uma ona saofaga i le tatalaina mai o le fuafuaga paia i tupuaga taitasi. E tele mea e lelei, e tele mea e manaomia—o nisi lava taimi o mea uma e tatau ai mo le taimi nei—e mafai ona ausia i tulaga faatauvaa. Ua toatele naua outou o loo faia le mea silisili tou te mafaia. Ma a outou amoina avega aupito mamafatu o le olaga nei, ia outou gagana mai e puipuia le fuafuaga a le Atua ia faaeaina Lana fanau, ua tatou saunia uma lava e lagolagoina outou. Faatasi ai ma le mautinoa tatou te molimau atu o le Togiola a Iesu Keriso ua faamoemoeina, ma, i le iuga, o le a tauia ai mea uma na le’i mauaina, ma le toilalo o i latou na liliu atu ia te Ia. E leai se tasi na muai fuafuaina faapea e itiiti mea na te maua nai lo mea uma o i le Tama mo Ana fanau.

Sa faailoa mai ia te au e se tina talavou lona atugaluga e uiga i lona le agavaa mo lenei valaauga taua. Sa ou lagonaina o le faafitauli o loo popole ai o ia, e laitiiti ma e le tatau ona ia popole ai; o la sa lelei le mea o loo ia faia. Peitai, sa ou iloaina sa na ona manao o ia e faamalie le Atua ma faamamaluina Lona faatuatuaga ua tuu atu ia te ia. Sa ou tuuina atu ni upu faamautinoa, ma i lo’u loto sa ou ole atu ia faamafanafanaina o ia e le Atua, lona Tama Faalelagi, i Lona alofa ma le molimau o Lana faamaoniga a o ia faatinoina Lana galuega.

O la’u tatalo lea mo i tatou uma i le asō. Ia tatou taitasi ma sailia le faamaoniga o Lona finagalo. Talosia ia lauusiusi faaipoipoga ma manuia aiga, pe o lo tatou taunuuga o se atoaga o nei faamanuiaga i le olaga nei pe leai foi, talosia ia aumaia e le alofa tunoa o le Alii le fiafia i le taimi nei ma le faatuatua i folafolaga mautinoa o le a oo mai. I le suafa o Iesu Keriso, amene.