Aisea e taua ai Iesu Keriso i lo’u olaga?

Na filifilia Iesu Keriso e avea ma o tatou Faaola. O Lana Togiola ua mafai ai ona tatou toetutu ma salamo ma faamagaloina ina ia mafai ona tatou toe foi atu i le afioaga a lo tatou Tama Faalelagi. E le gata i le laveaiina o i tatou mai a tatou agasala, o loo ofoina mai foi e le Faaola ia i tatou le filemu ma le malosi i taimi o tofotofoga. Ua Ia setiina se faataitaiga atoatoa mo i tatou, ma o Ana aoaoga o faavae ia mo le fiafia i lenei olaga ma le ola e faavavau i le lalolagi a sau.

Saunia oe lava ia faaleagaga

Aisea e taua ai Iesu Keriso ia te oe? Na faapefea ona Ia uunaia lou olaga?

Aisea e taua ai mo alii talavou le malamalama i matafaioi a Iesu Keriso? E mafai faapefea ona e fesoasoani ina ia latou iloa Lona taua i o latou olaga?

Suesue ma le agaga tatalo nei mau ma punaoa. O le a se mea e mafai ona fesoasoani ia te oe e aoao atu ai ia malamalama i le mafuaaga e taua ai Iesu Keriso i alii talavou?

Mataio 10:1 (Na tuuina atu e Iesu Keriso le pule o le perisitua i Ana aposetolo)

Ioane 6:38 (Na afio mai Iesu Keriso e fai le finagalo o Lona Tama)

Ioane 8:12; 3 Nifae 11:11 (O Iesu Keriso o le malamalama ma le ola o le lalolagi)

Ioane 14:6 (O Iesu Keriso o le ala, le upumoni, ma le ola)

2 Nifae 2:3–9; 9:5–12 (Na molimau Liae ma Iakopo e uiga i le Togiola a Iesu Keriso)

3 Nifae 27:14–16 (Na laveaiina i tatou e Iesu Keriso mai le agasala ma le oti e ala i Lana Togiola)

3 Nifae 27:27 (O Iesu Keriso o lo tatou faataitaiga)

“O Le Keriso Soifua: O Le Molimau a le Au Aposetolo” Liahona, Ape. 2000, 2–3 (tagai foi Faamaoni i le Faatuatua, 81–83; po o le Tiute i le Atua, 107)

David A. Bednar, “Ana Iloa e Outou o A’u,” Ensign po o le Liahona, Nov. 2016, 102–5

José A. Teixeira, “Saili Atu i le Alii,” Ensign po o le Liahona, Me 2015, 96–98

Jeffrey R. Holland, “O Le Poloaiga Muamua ma le Sili,” Ensign po o le Liahona, Nov. 2012

Vitio: “Toe Maua Mai,” #Hallelujah—O Se Savali o le Eseta e uiga ia Iesu Keriso

3:27

2:14

Aoao atu i le ala a le Faaola

Na valaaulia e le Faaola isi e galulue i le faatuatua ma ola i upumoni sa Ia aoaoina. Na Ia maua ni avanoa mo i latou e aoao ai e ala atu i ni aafiaga mamana. O le a se mea e mafai ona e fesoasoani atu ai i alii talavou ia iloa le taua o le avea o Iesu Keriso ma vaega o o latou olaga?

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Tusi i luga o le laupapa se fesili se tasi po o le sili atu foi e fesoasoani ai i alii talavou e toe iloilo mea sa latou aoaoina i le vaiaso ua tea.
Valaaulia ia alii talavou e sue ia “Iesu Keriso” i le O Le Taiala i Tusitusiga Paia ma toe iloilo le lisi o faamatalaga i lalo o le ulutala. Fai atu ia i latou e saili ia upu ma fasifuaitau ia e faamatalaina ia matafaioi ma le misiona a Keriso. O le a se mea sa latou aoaoina e uiga ia Iesu Keriso i le toe iloiloina o lenei lisi? O a ni o latou lagona e uiga ia te Ia ina ua uma ona toe iloiloina mea sa Ia faia mo i tatou?

Aoao faatasi

O le a fesoasoani ia gaoioiga taitasi nei i sui o le korama e malamalama ai i le mafuaaga e taua ai Iesu Keriso i o latou olaga. I le mulimuli ai i musumusuga a le Agaga, filifili se tasi po o le sili atu foi o le a sili ona aoga mo lau vasega:

Valaaulia ni nai tagata o le uarota ao lei taitai le taimi e o mai i le vasega ma faasoa mai se aafiaga na fesoasoani ia i latou ina ia iloa Iesu Keriso. Vaevae le korama i ni vaega se fa ma atofaina atu i vaega taitasi e faitau se tasi o vaega o i le saunoaga Elder David A. Bednar “Ana Iloa e Outou o A’u.” Fai atu i vaega taitasi e tagai i a latou vaega mo tali i fesili nei: O le a le eseesega i le va o le iloaina e uiga ia Keriso ma le iloaina o Keriso? O le a se mea e mafai ona tatou faia ia iloa moni ai Keriso? O le a se taiala e mafai ona e faasoa atu ma uo o e mananao e faamalosia lo latou sootaga ma le Faaola?
Valaaulia ni uso o le korama e suesue i le lauga a Elder José A. Teixeira “Saili Atu i le Alii” ma vaavaai mo faamanuiaga na folafola mai e Elder Teixeira ia i latou o e saili Iesu Keriso. Valaaulia i latou e faasoa mai mea sa latou mauaina i le lauga ma mea o patino lava ona latou faia e avea ai le Faaola ma se vaega taua o o latou olaga i aso taitasi. I le avea ai ma se vaega o lenei talanoaga, e mafai foi ona tou iloiloina faatasi ia mausa faigofie o loo fautuaina mai e Elder Teixeira i lana lauga. Valaaulia ia alii talavou e seti se sini e faaaoga ai se tasi o fautuaga na talanoaina i le vasega ina ia faalatalata atili mai ia Keriso.
Valaaulia se tasi o le korama e aoao atu se vaega o le lesona lenei. E mafai ona ia faia o se vaega o lana fuafuaga o le Tiute i le Atua e aoao mai ma aoao atu e uiga i le Togiola (tagai “Malamalama i le Aoaoga Faavae,” itulau 18, 42, po o le 66).
Fai i nisi o alii talavou e sue le 2 Nifae 2:3–9 e saili ai ni mea sa faia e Iesu Keriso mo i tatou, ma fai atu i isi e sue le 2 Nifae 9:6–10 e saili po o a ni taunuuga o le a oo i ai pe ana faapea Na te lei faataunuuina Lana misiona. Faamata o le a se mea semanu e ese ai le lalolagi? Faasoa atu lou alofa mo le Faaola, ma valaaulia ia alii talavou e faia lea lava mea e tasi.
Faaali atu ni ata o le Faaola o loo fesoasoani atu i nisi (tagai Tusi Ata o le Talalelei, 36–60). Tuu atu ni nai minute i alii talavou e mafaufau ai ma faasoa mai ni auala eseese na fesoasoani ai le Faaola ia i latou, o latou aiga, ma nisi latou te iloaina. Valaaulia i latou e faasoa mai ni o latou lagona e uiga i le Faaola. Fai atu i alii talavou e faitau ia palakalafa mulimuli e fa o le lauga a Elder Jeffrey R. Holland “O Le Poloaiga Muamua ma le Sili” ao latou manatunatu i le fesili “O le a se mea e mafai ona ou faia e faaalia ai le taua o Iesu Keriso i lou olaga?” Valaaulia i latou e tusi o latou manatu i lalo, ma tuu atu i ai e faasoa mai ni mea sa latou tusia pe afai latou te lagona le fia faasoa mai.
Faaali le ata vitio “Toe Maua Mai.” O le a se mea na aoao mai e alii talavou mai le ata vitio e uiga i le mea e mafai ona faia e Iesu Keriso mo i latou? E mafai faapefea ona latou faaaogaina le savali mai lenei vitio e fesoasoani ai i tagata o loo faafaigata ona latou faamagaloina i latou lava pe ua lagona ua latou le mauaina le fesoasoani a le Faaola? O a ni mau latou te faaaogaina? (tagai, mo se faataitaiga, Isaia 1:18; Alema 36:3, 27; Eteru 12:27; MF&F 58:42–43).

3:27
Faaali atu se ata o le Faaola, ma tusi ia fesili nei i luga o le laupapa: “O ai Iesu Keriso?” “O le a le mea ua Ia faia mo i tatou?” “E faapefea ona tatou iloa o loo soifua o Ia i le taimi nei?” Fai atu i alii talavou e suesue i le “O Le Keriso Soifua: O Le Molimau a Aposetolo” po o le tusipese e saili ai tali o fesili nei (tagai “Iesu Keriso—Faaola” i Autu o le faasino upu i le tusipese). Fai i ai e faasoa mai mea ua latou maua. E faapefea ona aafia e a latou molimau ia Iesu Keriso o latou olaga i aso taitasi? E mafai foi ona e faaalia le ata vitio “#Hallelujah—O Se Savali o le Eseta e uiga ia Iesu Keriso.”

2:14

Fai atu i alii talavou e faasoa mai ni mea sa latou aoaoina i le aso. O a ni lagona po o ni uunaiga sa latou mauaina? Pe o latou malamalama i le mafuaaga e taua ai Iesu Keriso i o latou olaga? Pe o i ai nisi a latou fesili? Pe e aoga le faaalu o se isi taimi i lenei autu?

Motugaafa faafaiaoga

“E tatau ona e faaeteete e aua ne’i sili atu lau tautala nai lo le mea e manaomia pe faailoa soo atu foi ni ou manatu. O nei uiga e mafai ai ona faatupuina le le fiafia o tagata o loo aoaoina. Mafaufau ia te oe lava ia o se taiala i se faigamalaga o le aoaoga o le na te tuuina atu ni faamatalaga talafeagai e taofiofia ai pea i latou o loo e aoaoina i le ala sa’o” (O Le Aoao Atu, E Leai Se Isi Valaauga E Sili Ai [1999], 67).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Tuuina atu lana molimau e uiga i le Faaola.
Valaaulia ia sui o le korama e manatunatu pe mafai faapefea e a latou molimau i le Faaola ona faamanuiaina se tagata latou te iloa ma uunaia i latou e faasoa mai a latou molimau.