O le a se mea tatou te iloa e uiga i le natura o le Aiga Atua?

O loo aofia i le Aiga Atua le Atua le Tama Faavavau, le Faaola o Iesu Keriso, ma le Agaga Paia. E ui o le Aiga Atua o ni tagata mavaevae ma e tofu ma matafaioi, ae e tasi lo Latou faamoemoe. Ua atoatoa a’ia’i lo latou lotogatasi ina ia faataunuuina le ata o le faaolataga a le Tama Faalelagi.

Saunia oe lava ia faaleagaga

E faapefea e le malamalama i le Aiga Atua ona fesoasoani ia te oe ia iloa po o ai oe? E faapefea e lo tatou malamalama i le Aiga Atua ona ese mai talitonuga o isi tapuaiga?

E faapefea ona fesoasoani le iloaina o le natura o le Aiga Atua i alii talavou?

Ia suesue ma le agaga tatalo ia mau ma punaoa nei. O le a se mea ua uunaia ai oe e faasoa atu i alii talavou?

Kenese 1:26–27 (Ua foafoaina i tatou i le faatusa o le Atua)

Mataio 3:13–17 (Na faailoa mai sui taitasi o le Aiga Atua i le taimi o le papatisoga o Keriso)

Ioane 17:21; MF&F 20:28 (O le Aiga Atua ua tasi i latou)

Galuega 7:55–56; Iosefa Samita—Talafaasolopito 1:14–17 (Na vaai Setefano ma Iosefa Samita i le Tama ma le Alo o ni tagata e mavaevae)

MF&F 130:22–23 (Ua i ai i le Tama ma le Alo ni tino faaletino; o le Agaga Paia e leai se tino faaletino)

Mataupu Faavae o le Faatuatua 1:1 (Matou te talitonu i sui e toatolu o le Aiga Atua)

Dallin H. Oaks, “O Le Aiga Atua ma le Ata o le Faaolataga,” Ensign po o le Liahona, Me 2017, 100–103

Boyd K. Packer, “O Le Molimau,,”Ensign po o le Liahona, Me 2014

Robert D. Hales, “O Le Ola e Faavavau—ia Iloa lo Tatou Tama Faalelagi ma Lona Alo, o Iesu Keriso,” Ensign po o le Liahona, Nov. 2014, 80-82

“Le Atua le Tama,” “Agaga Paia,” “Iesu Keriso,” Faamaoni i le Faatuatua (2004), 85–87, 7–9, 81–83

Vitio: “The Restoration”; tagai foi Doctrine and Covenants Visual Resources DVD

19:15

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Valaaulia se tagata o le korama e sau saunia i le fonotaga a le korama e tuuina atu se aotelega e lua minute e uiga i mea sa ia aoaoina i le lesona ua tea.
Valaaulia ia alii talavou e faatino se tala i le auala latou te aoao atu ai se tagata e le auai i lo tatou faatuatuaga e uiga i sui eseese e toatolu o le Aiga Atua. O a ni mau o le a latou faaaogaina? Aisea latou te lagona ai e taua tele lenei malamalama?

Aoao faatasi

O gaoioiga taitasi o loo i lalo e mafai ona fesoasoani i uso o le korama ia malamalama i le natura o le Aiga Atua. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Valaaulia alii talavou e mafaufau i ni luitau o feagai ma alii talavou i lenei vaitaimi. O le a se mea e mafai na maua e alii talavou i le vaega IV o le saunoaga a Elder Dallin H. Oaks “O Le Aiga Atua ma le Ata o le Faaolataga” lea e mafai ona fesoasoani ia i latou i nei luitau? Ina ia fesoasoani ia i latou e aoao atili i sui o le Aiga Atua, vaevae ia alii talavou i ni vaega se tolu, ma tuu atu ia tofu vaega taitasi ma se fasi pepa o i ai ia ulutala nei: “Le Atua le Tama,” “O Le Alo,” ma le “O Le Agaga Paia.” Valaaulia vaega taitasi e sue i le vaega o sosoo ai o le saunoaga a Elder Oaks ma sue ia mau na ia faasoa mai. Fai atu i alii talavou e faamaumau mea sa latou aoaoina i luga o a latou pepa ma faasoa mai o latou manatu i le korama. E mafai faapefea e upumoni na tatou aoaoina e uiga i le Aiga Atua ona fesoasoani ia i tatou i luitau na tatou mauaina?
Valaaulia se uso o le korama e aoao atu se vaega o lenei lesona. E mafai ona ia faia lenei mea o se vaega o lana fuafuaga o le Tiute i le Atua e aoao mai ai ma aoao atu e uiga i le Aiga Atua (tagai “Malamalama i le Aoaoga Faavae,” itulau 18, 42, po o 66).
Tuu atu i alii talavou se lisi o mau o i lenei otootoga. Fai atu i alii talavou taitasi e sue se tasi o nei mau ma faailoa mai mea sa ia aoaoina e uiga i le Aiga Atua ma lona lava natura paia. Valaaulia ia alii talavou e faasoa mai mea sa latou aoaoina. E mafai faapefea e lenei malamalama ona aafia ai a latou filifiliga o aso taitasi? Uunaia i latou e teu se lisi o mau faasino ina ia mafai ona latou faaaogaina e aoao atu ai isi e uiga i le Aiga Atua.
Tuu atu ia tofu alii talavou ma se pepa o i ai fesili nei: E faapefea ona e faamatalaina le mafutaga a le Faaola ma Lona Tama? O le a le tulaga e tasi ai le Tama ma le Alo? O a ni matafaioi a le Agaga Paia? Fai atu ia i latou e mafaufau loloto i nei fesili ao latou matamata, faalogologo, pe faitau i le lauga a Elder Robert D. Hales “O Le Ola e Faavavau—ia Iloa lo Tatou Tama Faalelagi ma Lona Alo, o Iesu Keriso.” Tuu atu ia i latou se taimi e tusi ai a latou tali, ma valaaulia i latou e faasoa mai mea sa latou aoaoina.
Vaevae le korama i ni vaega se tolu, ma totofi vaega taitasi e aoao e uiga i se tasi o le Aiga Atua e ala i le faitau e uiga ia te Ia i le Faamaoni i le Faatuatua (tagai itulau 7–9, 81–83, ma le 85–87) po o le saunoaga a Peresitene Boyd K. Packer “O Le Molimau.” Tuu atu ia lava le taimi i vaega e saunia ai e aoao atu i le vaega o totoe o le korama ia uiga mama ma matafaioi o a latou sui o le Aiga Atua. Tuu atu i vaega taitasi e aoao atu le vaega o totoe o le korama.
Vaevae se tasi o lauga o le konafesi aoao o loo fautuaina mai i lenei otootoga i ni vaega laiti. Tuu atu ia tofu uso o le korama ma se vaega (pe i ni vaega, e fuafua i le aofai o le korama). Tusi i luga o le laupapa ”O le a se mea ua tatou iloa e uiga i le Aiga Atua?“ Valaaulia alii talavou e faaaoga ia lauga e sue ai ona faasoa mai lea o a latou tali. Aisea e taua ai le iloa o le natura moni o le Aiga Atua? (tagai Ioane 17:3).

Fai atu i alii talavou e faasoa mai mea na latou aoaoina i le aso. O a ni o latou lagona po o ni uunaiga o i ai? Pe ua latou malamalama lelei atili i le natura o le Aiga Atua? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Motugaafa Faafaiaoga

E mafai ona e faaaogaina gaoioiga e aoao ai i lenei vaega e fuafua ai po o a ni mea ua uma ona iloa e alii talavou e uiga i le aoaoga faavae ma po o a mea o loo manaomia pea latou te aoaoina. Ia nofo sauni e fetuunai le fuafuaga o lau lesona e fetaui lelei ma o latou manaoga pe a talafeagai ai.

Valaaulia e faatino

E faaiuina e le uso o le au peresitene o le korama lea o loo taitai le fonotaga. E mafai ona ia:

Tuuina atu lana molimau e uiga i sui o le Aiga Atua ma lona agaga faafetai mo le upumoni e uiga ia i Latou na toefuatai e ala mai ia Iosefa Samita.
Valaaulia ia sui o le korama e faasoa atu i se tagata ni upumoni sa latou aoaoina i le fonotaga a le korama i le aso.