Ko e hā ʻoku mahuʻinga ai ʻa Sīsū Kalaisi ʻi heʻeku moʻuí?

Naʻe fili ʻa Sīsū Kalaisi ke Ne hoko ko hotau Fakamoʻuí. ʻOku malava ʻi Heʻene Fakaleleí ke tau toetuʻu pea fakatomala pea fakamolemoleʻi ke tau lava ʻo foki ki he ʻao ʻo ʻetau Tamai Hēvaní. Tānaki atu ki hono fakahaofi kitautolu mei heʻetau ngaahi angahalá, ʻoku toe ʻomi ʻe he Fakamoʻuí e nonga mo e mālohi ʻi he taimi ʻo e faingataʻá. ʻOkú ne tā e sīpinga haohaoá maʻatautolu, pea ko ʻEne ngaahi akonakí ko e fakavaʻe ki he fiefiá ʻi he moʻuí ni pea mo e moʻui taʻengata ʻi he maama kahaʻú.

Teuteuʻi fakalaumālie koe

Ko e hā ʻoku mahuʻinga ai ʻa Sīsū Kalaisi kiate koé? Kuó Ne tokoniʻi fēfeeʻi hoʻo moʻuí?

Ko e hā ʻoku mahuʻinga ai ke mahino ki he kau talavoú ʻa e ngaahi fatongia ʻo Sīsū Kalaisí? ʻE founga fēfē haʻo tokoniʻi kinautolu ke nau ʻilo Hono mahuʻinga ʻi heʻenau moʻuí?

Ako ʻi he faʻa lotu ʻa e ngaahi potu folofola mo e ngaahi maʻuʻanga tokoni ko ʻení. Ko e hā ʻe tokoni atu ke ke akoʻi ke mahino e ʻuhinga ʻoku mahuʻinga ai ʻa Sīsū Kalaisi ki he kau talavoú?

Mātiu 10:1 (Naʻe foaki ʻe Sīsū Kalaisi ki Heʻene kau ʻAposetoló ʻa e mālohi ʻo e lakanga fakataulaʻeikí)

Sione 6:38 (Naʻe hāʻele mai ʻa Sīsū Kalaisí ke fai e finangalo ʻo ʻEne Tamaí)

Sione 8:12; 3 Nīfai 11:11 (Ko Sīsū Kalaisi ʻa e maama mo e moʻui ʻo e māmaní)

Sione 14:6 (Ko Sīsū Kalaisi ʻa e halá, mo e moʻoní, pea mo e moʻuí)

2 Nīfai 2:3–9; 9:5–12 (Ko e fakamoʻoni ʻa Līhai mo Sēkope ki he Fakalelei ʻa Sīsū Kalaisí)

3 Nīfai 27:14–16 (ʻOku fakamoʻui kitautolu ʻe Sīsū Kalaisi mei he angahalá mo e maté ʻi Heʻene Fakaleleí)

3 Nīfai 27:27 (Ko Sīsū Kalaisi hotau faʻifaʻitakiʻangá)

David A. Bednar, “Ka Ne Mou ‘Ilo Au,”EnsignpeLiahona, Nōvema. 2016, 102 – 5.

“Ko e Kalaisi Moʻuí: Ko e Fakamoʻoni ʻa e Kau ʻAposetoló” Ensign, ʻEpeleli 2000, 2–3 (vakai voki, Tuʻu Maʻu ʻi he Tuí, 182–83; pe Fatongia ki he ʻOtuá, 106)

José A. Teixeira, “Ko e Fekumi Ki he ʻEikí,” Ensign pe Liahona, Mē 2015, 96–98

Jeffrey R. Holland, “Ko e ʻUluaki Fekau Maʻongoʻongá,” Ensign pe Liahona, Nōvema 2012

Vitiō: “Fakaleleiʻí”, “#Hallelujah—An Easter Message about Jesus Christ”

NaN:NaN

2:14

Ko e Faiako ‘i he Founga ‘a e Fakamo‘uí

Naʻe fakaafeʻi ʻe he Fakamoʻuí ʻa e kakai kehé ke nau ngāue ʻi he tui mo moʻui ʻaki ʻa e ngaahi moʻoni naʻá Ne akoʻí. Naʻá ne kumi ha ngaahi faingamālie maʻanautolu ke nau ako ai ʻi ha ngaahi aʻusia lelei. Ko e hā te ke lava ʻo fai ke tokoniʻi ai ʻa e kau talavoú ke nau ʻilo hono mahuʻinga ʻo hono ʻai ke hoko ʻa Sīsū Kalaisi ko ha konga ʻo ʻenau moʻuí?

Tuku ke taki e kau talavoú

ʻE tataki e fakataha fakakōlomú ʻe ha mēmipa ʻo e kau palesitenisī fakakōlomú. Te ne taki e kau talavoú ʻi hono aleaʻi fakataha e pisinisi ʻa e kōlomú, akoʻi kinautolu ʻi honau ngaahi fatongia ʻo e lakanga fakataulaʻeikí (mei he folofolá pea mo e tohi Fatongia ki he ʻOtuá), pea mo fakaafeʻi ha ʻetivaisa pe mēmipa kehe ʻo e kōlomú ke ne akoʻi ha lēsoni ʻo e ongoongoleleí. ʻE lava ke teuteu ʻaki haʻane fakafonu e ʻasenita ʻo e fakataha ʻa e kōlomú lolotonga e fakataha ʻa e kau palesitenisií.

Kamata ʻa e akó

Fili mei he ngaahi fakakaukau ko ʻení pe ko haʻo fakakaukau pē ʻaʻau ke fakamanatu e lēsoni ʻo e uike kuo ʻosí mo fakafeʻiloaki ʻaki e lēsoni he uike ní:

Hiki ha fehuʻi ʻe taha pe toe lahi ange ʻi he palakipoé ke tokoni ki he kau talavoú ʻi hono fakamanatu e meʻa ne nau ako he uike kuo ʻosí.
Fakaafeʻi ʻa e kau talavoú ke nau kumi ʻa e “Sīsū Kalaisí” ʻi he Fakahinohino ki he Folofolá pea vakaiʻi ʻa e lisi ʻo e ngaahi fakamatala he tefito ko iá. Kole ange ke nau kumi ha ngaahi foʻi lea mo ha ngaahi kupuʻi lea ʻoku nau fakamatalaʻi e ngaahi fatongia ʻo Kalaisí mo Hono misioná. Ko e hā ʻoku nau ʻilo fekauʻaki mo Sīsū Kalaisi ʻi heʻenau vakaiʻi e lisi ko ʻení? ʻOku fēfē ʻenau ongo kau kiate Iá ʻi he hili ʻenau fakamanatu e meʻa naʻá Ne fai maʻatautolú?

Ako fakataha

ʻE tokoni ʻa e ngaahi ʻekitivitī takitaha ʻi laló ke mahino ki he kau mēmipa ʻo e kōlomú ʻa e ʻuhinga ʻoku mahuʻinga ai ʻa Sīsū Kalaisi ʻi heʻenau moʻuí. Muimui ʻi he ueʻi ʻa e Laumālié ʻo fili ha taha pe toe lahi ange ʻe ngāue lelei taha ki hoʻo kōlomú:

Fakaafe‘i ha niʻihi ʻo e kaingalotu ʻo e uōtí ʻi ha taimi lahi kimu‘a, ke nau haʻu ki he kalasí pea vahevahe ha a‘usia naʻe tokoni ke nau ʻilo ‘a Sisu Kalaisi. Vahevahe e kōlomú ki ha kulupu ‘e fā pea vahe ki he kulupu takitaha ke lau ha taha ʻo e ngaahi konga ‘i he lea ʻa ‘Eleta David A. Bednar ko e “Ka Ne Mou ʻIlo Au.” Kole ki he kulupu takitaha ke vakai ki heʻenau ngaahi kongá ki ha ngaahi tali ki he ngaahi fehuʻi ko ʻení: Ko e hā ʻa e faikehekehe ʻi he ʻilo fekauʻaki mo Kalaisí pea mo e ʻiloʻi ʻa Kalaisí? Ko e hā ʻe lava ke tau fai ke tau ʻiloʻi moʻoni ʻa Kalaisi? Ko e hā ha fakahinohino ʻe lava ke ke vahevahe mo ho ngaahi kaungāmeʻa ʻoku nau fie fakamālohia honau vā fetuʻutaki mo e Fakamoʻuí?
Fakaafeʻi ʻa e ngaahi mēmipa ʻo e kōlomú ke nau vakaiʻi ʻa e lea ʻa ʻEletā José A. Teixeira “Ko e Fekumi Ki he ʻEikí” pea fekumi ki he ngaahi tāpuaki naʻe palōmesi ange ʻe ʻEletā Tekisila kiate kinautolu ʻoku nau fekumi kia Sīsū Kalaisí. Fakaafeʻi kinautolu ke nau vahevahe ʻa e ngaahi meʻa naʻa nau maʻu ʻi he leá pea mo e meʻa ʻoku nau fai fakataautaha ke ngaohi ʻa e Fakamoʻuí ke hoko ko e konga mahuʻinga ʻo ʻenau moʻui fakaʻahó. Ko e konga ʻo e aleá ni, te mou lava ʻo vakaiʻi fakataha ʻa e ngaahi tōʻonga iiki ʻoku fokotuʻu mai ʻe ʻEletā Tekisila ʻi heʻene leá. Fakaafeʻi ʻa e kau talavoú ke nau fokotuʻu ha taumuʻa ke fakaʻaongaʻi ʻa e taha ʻo e ngaahi fokotuʻu naʻe aleaʻi ʻi he kalasí ke nau ʻunuʻunu ofi ange kia Sīsū Kalaisi.
Fakaafeʻi ha mēmipa ʻo e kōlomú ke ne akoʻi ha konga ʻo e lēsoni ko ʻení. Te ne lava ʻo fakahoko ʻeni ko ha konga ʻo ʻene palani ki he Fatongia ki he ʻOtuá ke ako pea mo akoʻi ʻa e Fakaleleí (vakai, “Mahino ʻo e Tokāteliné,” peesi 18, 42, pe 66).
Kole ki ha niʻihi ʻo e kau talavoú ke nau fekumi ʻi he 2 Nīfai 2:3–9 ke ʻilo ʻa e meʻa naʻe fai ʻe Sīsū Kalaisi maʻatautolú, pea kole ki ha niʻihi ke nau fekumi ʻi he 2 Nīfai 9:6–10 ke ʻilo ʻa e ngaahi nunuʻa ʻe hoko kapau naʻe ʻikai ke ne fakahoko Hono misioná. ʻE kehe fēfē ʻa e māmaní? Vahevahe hoʻo ʻofa ki he Fakamoʻuí, pea fakaafeʻi ʻa e kau talavoú ke nau fai ʻa e meʻa tatau.
Fakaʻaliʻali ha ngaahi fakatātāa ʻo e Fakamoʻuí heʻene tokoniʻi ʻa e niʻihi kehé (vakai, Tohi Fakatātā ʻo e Ongoongoleleí, 36–60). Tukuange ki he kau talavoú ha ngaahi miniti ke nau fakalaulauloto ai pea nau toki vahevahe ʻa e ngaahi founga kehekehe ne tokoniʻi ai kinautolu, honau ngaahi fāmilí, mo ha niʻihi kehe ʻoku nau ʻilo, ʻe he Fakamoʻuí. Fakaafeʻi kinautolu ke nau vahevahe ʻenau ngaahi ongo fekauʻaki mo e Fakamoʻuí. Kole ki ha kau talavoú ke nau lau ʻa e palakalafi fakaʻosi ʻe fā ʻo e malanga ʻa ʻEletā Sefilī R. Hōlani ko e “Ko e ʻUluaki Fekau Maʻongoʻongá” ʻi heʻenau fakakaukauʻi ʻa e fehuʻi “Ko e hā te u lava ʻo fai ke fakahaaʻi e lahi ʻo e mahuʻinga ʻo Sīsū Kalaisi ʻi heʻeku moʻuí?” Fakaafeʻi kinautolu ke nau hiki ʻenau ngaahi fakakaukaú, pea tuku ange ke nau vahevahe ʻa e meʻa ne nau hikí, kapau ʻoku nau ongoʻi fiemālie ke fai ia.
Huluʻi ʻa e vitiō “Fakaleleiʻí.” Ko e hā ʻoku ako ʻe he kau talavoú mei he vitioó ʻo fekauʻaki mo e meʻa ʻe lava ʻe Sīsī Kalaisi ʻo fai maʻanautolú? Te nau fakaʻaongaʻi fēfeeʻi ʻa e pōpoaki ʻo e foʻi vitioó ni ke tokoni ki he kakai ʻoku faingataʻaʻia ke fakamolemoleʻi kinautolú pe ongoʻi ʻoku ʻikai toe lava ʻo tokoni ange ʻa e Fakamoʻuí? Ko e hā ha ngaahi potu folofola te nau vahevahe? (vakai, hangē ko ʻení, ʻĪsaia 1:18; ʻAlamā 36:3, 27; ʻEta 12:27; T&F 58:42–43).

NaN:NaN
Fakaʻaliʻali ha fakatātā ʻo e Fakamoʻuí, pea hiki ʻi he palakipoé ʻa e ngaahi fehuʻí ni: “Ko hai ʻa Sīsū Kalaisi?” “Ko e hā kuó Ne fai maʻatautolú?” “ʻOku tau ʻiloʻi fēfē ʻokú Ne moʻui he ʻahó ni?” Fakaafeʻi ʻa e kau talavoú ke fekumi ʻi he “Ko e Kalaisi Moʻuí: Ko e Fakamoʻoni ʻa e Kau ʻAposetoló” pe ko e tohi himí ke maʻu ha tali ki he ngaahi fehuʻi ko ʻení (vakai, “Sīsū Kalaisi—Ko e Fakamoʻui” ʻi he Ko e Ngaahi Kaveinga ʻi he tohi himí). Kole ange ke nau vahevahe ʻa e meʻa ʻoku nau maʻú. ʻOku kaunga fēfē ʻenau ngaahi fakamoʻoni kia Sīsū Kalaisí ki heʻenau moʻui fakaʻahó? Te ke lava foki ʻo huluʻi ʻa e foʻi vitiō “#Hallelujah—An Easter Message.”

2:14

Kole ki he kau talavoú ke nau vahevahe ʻa e meʻa ne nau ako ʻi he ʻaho ní. Ko e hā ha ngaahi ongo pe ngaahi fakakaukau ʻoku nau maʻu? ʻOku mahino kiate kinautolu e ʻuhinga ʻoku mahuʻinga ai ʻa Sīsū Kalasi ʻi heʻenau moʻuí? ʻOku toe ʻi ai nai haʻanau ngaahi fehuʻi? ʻE ʻaonga ke fakamoleki ha toe taimi ʻi he tefito ko ʻení?

Tokoni Fakafaiako

“ʻOku totonu ke ke tokanga ke ʻoua naʻá ke lea ʻo lahi ange ʻi he fie maʻú pe faʻa fakahaaʻi hoʻo fakakaukaú. ʻE lava ʻe he ngaahi tōʻonga ko ʻení ke ne fakatupu ha mōlia atu e tokanga ʻa e kalasí. Fakakaukau ko koé ko ha fai-fakahinohino pē ʻi ha fononga akoako ʻa ia ʻokú ke toki fakahū pē ha ngaahi tali ke pukepuke ʻaki e kau akó ʻi he hala ʻoku totonú” (ʻOku ʻIkai ha Ui ʻe Mahuʻinga Ange ʻi he Faiakó [1999], 71).

Fakaafeʻi ke ngāue

ʻE fakaʻosi ʻa e fakatahá ʻe he talavou ʻokú ne tatakí. ʻE lava ke ne:

Fai ʻene fakamoʻoni ki he Fakamoʻuí.
Fakaafeʻi e kau mēmipa ʻo e kōlomú ke nau fakakaukauʻi ha founga ʻe tāpuakiʻi ai heʻenau fakamoʻoni ki he Fakamoʻuí ha taha ʻoku nau ʻiloʻi pea fakalotolahiʻi kinautolu ke vahevahe ʻenau fakamoʻoní.