Sau, Mulimuli Mai ia te A’u
Aisea e taua ai le faaipoipoga faalemalumalu?

Aisea e taua ai le faaipoipoga faalemalumalu?

I le fuafuaga o le fiafia a lo tatou Tama Faalelagi, e mafai ai e se alii ma se tamaitai ona faamauina i le tasi ma le isi mo le olaga nei ma le faavavau atoa. O i latou o e ua faamauina i le malumalu ua i ai le faamautinoaga e faapea o a latou faaipoipoga o le a faaauauina e faavavau pe afai latou te faamaoni i a latou feagaiga. Latou te iloa e leai se mea, e oo lava i le oti, e mafai ona vavaeeseina tumau i latou.

Saunia oe lava ia faaleagaga

Aisea e taua ai ia te oe le faaipoipoga i le malumalu? O a faamanuiaga o saunia e lenei sauniga mo oe ma lou aiga?

O a faataitaiga amiotonu o se faaipoipoga faalemalumalu o maua e nei alii talavou? E mafai faapefea ona e fesoasoani e faamautinoa ia i latou se naunautaiga maoae ina ia faaipoipo i le malumalu?

A o e suesue i nei mau ma isi punaoa e uiga i le faaipoipoga faalemalumalu, vaai mo ni mea e ono fesoasoani ai i alii talavou ia lagona le taua o le faaipoipo i le malumalu o le Alii.

MF&F 49:16–17 (O le faaipoipoga e fesoasoani e faataunuu ai le faamoemoega o le Foafoaga)

MF&F 131:1–4; 132:15–21 (E manaomia le faaipoipoga faaselesitila mo le faaeaga)

“O Le Aiga: O Se Folafolaga i le Lalolagi,” Ensign po o le Liahona, Nov. 2010, 129

L. Tom Perry, “Aisea e Taua ai le Faaipoipoga ma le Aiga—i Soo Se Mea i le Lalolagi,” Ensign po o le Liahona, Me 2015, 39–42

“David A. Bednar, “E Taua le Faaipoipoga i Lana Fuafuaga Faavavau,” Ensign po o le Liahona, Iuni 2006, 82–87.

Richard G. Scott, “O Faamanuiaga e Faavavau o le Faaipoipoga,” Ensign po o le Liahona, Me 2011, 94–97

“Faaipoipoga,” Faamaoni i le Faatuatua (2004), 38–42

Aoao atu i le ala a le Faaola

I le taimi o Lana galuega faalelalolagi, na fai atu ai e le Faaola ni fesili na uunaia ai Ona soo e mafaufau ma faalogo lelei. Sa Ia matua naunau moni atu lava i a latou tali i Ana fesili, ma na Ia olioli i lo latou faaleoina o le faatuatua. Taumafai e mafaufau i ni fesili e mafai ona faaosofia ia alii talavou e mafaufau ma faalogo lelei e uiga i sauniga o le malumalu aemaise lava le faaipoipoga faalemalumalu. Faalogo ma le totoa i a latou tali ma tali atu ma le agalelei e pei ona uunaia ai e le Agaga.

Vitio: “Fai mai ni Fesili ia i Matou”

3:24

Matamata atili

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

  • Fai atu i alii talavou taitoatasi e mafaufau i se fesili na taliina i le lesona o le vaiaso ua te’a, ona valaaulia lea o alii talavou taitasi e fai atu lana fesili i isi sui o le korama. Faaalu ni nai minute e tali ai fesili.

  • Tuu atu i alii talavou e fai se lisi o filifiliga taua o le olaga. Tuu atu ia i latou e ta’u mai ia filifiliga latou te manatu atonu o le a tele atu sona aafiaga i lo latou faasinomaga e faavavau ma faamatala pe aisea na latou faia ai na filifiiga. Afai e mafai, faaali atu se lua ata ma lou toalua o le aso na oulua faamau ai i le malumalu. Faasoa atu ou lagona e uiga i lou toalua ma le taua e faavavau o lau faamauga i le malumalu.

Aoao faatasi

O gaoioiga taitasi o loo i lalo e mafai ona fesoasoani i tagata o le korama ia malamalama i le taua o le faaipoipoga i le malumalu. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

  • Aumai ni mea faitino se lua pe tolu (po o ni ata o mea faitino) lea e faaalia ai le eseese o latou tulaga anagata (mo se faataitaiga, o se sipuni palasitika ma se sipuni uamea). Fai atu i alii talavou e talanoaina le mafuaaga e sili atu ai le lelei o le mea faitino e sili atu lona anagata nai lo le mea faitino e itiiti le anagata. E faapefea la ona faatatau lenei mea i le faaipoipoga? Fai atu i alii talavou e faitau, matamata, pe faalogologo i ni vaega o le saunoaga a Elder L. Tom Perry “Aisea e Taua ai le Faaipoipoga ma le Aiga—I Soo Se Mea i le Lalolagi.” Fesili atu i alii talavou po o le a le mafuaaga latou te mananao ai i se faaipoipoga i le malumalu.

  • Valaaulia se uso o le korama e aoao atu se vaega o lenei lesona. E mafai ona ia faia lenei mea o se vaega o lana fuafuaga o le Tiute i le Atua e aoao mai ai ma aoao atu e uiga i aiga e faavavau (tagai “Malamalama i le Aoaoga Faavae,” itulau 18, 42, po o 66).

  • O le saunoaga a Elder David A. Bednar “E Taua le Faaipoipoga i Lana Fuafuaga Faavavau” o loo faamatala ai ni mafuaaga se lua i le tulaga e taua ai le faaipoipoga ma mataupu faavae taiala e tolu e uiga i le aoaoga faavae o faaipoipoga e faavavau. Totofi ia tagata taitasi o le korama e faitau se tasi o mafuaaga po o mataupu faavae ona aoao atu lea o se isi tagata o le korama e uiga i mea sa ia aoaoina e faatatau i le faaipoipoga mai mea sa ia faitauina. O a ni aafiaga e mafai ona latou faasoaina atu lea e faailoa atu ai le taua o mea sa aoao mai e Elder Bednar?

  • Faitau faatasi o se korama le MF&F 131:1–4 ma le “O Le Feagaiga Fou ma le Faavavau o le Faaipoipoga” i le Faamaoni i le Faatuatua (itulau 39-40), ma vaavaai mo ni tali i le fesili “Aisea e taua ai le faaipoipoga i le malumalu?” Afai e manaomia, fesoasoani i alii talavou e saili uiga o soo se upu po o fuaitau e le masani ai. Fai atu i tagata o le korama e lisi mai nisi o mea e ono taofia alii talavou mai le faaipoipo i le malumalu. O le a se mea e mafai ona latou faia i le taimi nei e faamautinoa ai latou te faaipoipo i le malumalu?

  • Tuu atu i alii talavou taitasi se kopi o le saunoaga a Elder Richard G. Scott “O Faamanuiaga e Faavavau o le Faaipoipoga.” O a lagona o Elder Scott e uiga i lana soa e faavavau? O a ni mea na fiafia ai alii talavou e uiga i lana mafutaga a lona faletua? Fai atu ia i latou e mafaufau loloto po o le a se mea o le a ausia ai se mafutaga faapei o Elder ma Sister Scott.

Fai atu i alii talavou e faasoa mai mea na latou aoaoina i le aso. Pe ua latou malamalama i le taua o faaipoipoga i le malumalu? O a ni o latou lagona po o uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“O tala e mafai ona fafaguina ai le fiafia o i latou o loo aoaoina. E masani ona sili atu ona tatou aoaoina atu se mataupu faavae ma le aoga pe a tatou faamatala atu muamua se tala e faamalamalama ai. E fesoasoani foi lea i tagata o loo aoaoina ia malamalama i le mataupu faavae i le tulaga o mea e tutupu i aso uma” (O Le Aoao Atu, E Leai Se Isi Valaaauga E Sili Ai [1999], 100).

Valaaulia e faatino

O le alii talavou o loo taitai e faaiuina le fonotaga. E mafai ona ia:

  • Tuu atu lana molimau e uiga i le taua o le faaipoipoga i le malumalu ma lona manao ia faaipoipo i le malumalu.

  • Ia lui tagata o le korama ia tautino ia faaipoipo i le malumalu i se aso.