O Faamanuiaga e Faavavau o le Faaipoipoga

Saunia e Elder Richard G. Scott

O Le Korama a Aposetolo e Toasefululua

E tele atu se faauigaga o le faamauga o le malumalu a o agaigai pea i luma le olaga. O le a fesoasoani ai ia te outou e mafuta vavalalata ma tele atu ai mea e ausia ma maua ai le olioli sili atu i le olaga nei.

O lena savali matagofie na aumaia e lenei aufaipese ofoofogia ou te manatu, ua faamatala mai ai, le mamanu o le olaga mo le toatele naua o i tatou: “taumafai ia faapei o Iesu.”

I le aso 14 o Iulai, 1953 sa ma tootutuli ai ma la’u pele o Jeanene o se ulugalii talavou i le fatafaitaulaga o le Malumalu o Manti i Iuta. Sa faaaoga ai e Peresitene Lewis R. Anderson le pule faamau ma ta’u ai i ma’ua o le tane ma le ava ua faaipoipoina mo le olaga nei ma le faavavau atoa. E leai so’u malosi e faamatala ai le filemu ma le toafimalie e maua mai i le mautinoa, a tumau pea ona ou ola ia ou agavaa, o le a ma mafaia ma la’u Jeanene faapelepele ma a ma fanau ona faatasi e faavavau, ona o lena sauniga paia na faia i le pule tonu o le perisitua i se maota o le Alii.

Ua fusia le ma fanau e toafitu ia i ma’ua e na sauniga paia o le malumalu. Ua maliliu si o’u toalua pele o Jeanene ma le toalua o le ma fanau. Ua latou tuuina mai se uunaiga mamana i tagata taitasi o totoe o lo matou aiga e ola ai, lea o le a maua ai e i matou uma faamanuiaga uma e faavavau na folafolaina mai i le malumalu.

O poutu taua lava e lua o loo lagolago ai le fuafuaga o le fiafia a le Tama i le Lagi, o le faaipoipoga ma le aiga. O le maualuga tele o lona taua, ua taulai atu ai taumafaiga faifai pea a Satani e faamalepe le aiga ma faavaivaia ai le taua o sauniga o le malumalu, lea e fusia faatasi ai le aiga mo le faavavau. E tele atu se faauigaga o le faamauga o le malumalu a o agaigai pea i luma le olaga. O le a fesoasoani ai ia te outou e mafuta vavalalata ma tele atu ai mea e ausia ma maua ai le olioli sili atu i le olaga nei.

Sa i ai se taimi na ou aoaoina ai se lesona taua mai lo’u toalua. Sa tele ina ou femalagaa’i i la’u galuega. Toeitiiti atoa le lua vaiaso o o’u alu ma sa ou toe foi mai i le taeao o se tasi Aso Toonai. Toe fa itula ona ou alu lea i se isi fonotaga e manaomia ona ou i ai. Sa ou vaaia ua leaga le matou tama’i masini ta lavalava ma o loo ta lima e lo’u toalua ia lavalava. Sa amata loa ona ou lipeaina le masini.

Sa sau Jeanene ma faapea mai, “Rich, o a au mea na e fai?”

Sa ou fai atu, “O lea e lipea le masini, ina ia aua ai ne’i e ta limaina.”

Sa ia fai mai, “Leai. Alu e taaalo ma tamaiti.”

Sa ou fai atu, “E mafai ona matou taaalo ma tamaiti i soo se taimi. Ou te fia fesoasoani ia te oe.”

Ona ia fai mai lea, “Richard, faamolemole alu e taaalo ma tamaiti.”

Ina ua fai mai lena faatonuga, sa ou usitai.

Sa ou maua se taimi matagofie ma le ma fanau. Sa matou tuli solo ma taavavale i luga o laulaau. Mulimuli ane sa ou alu i la’u fono. Semanu e galo ia te au lena aafiaga pe ana leai le lesona sa ia manao ou te aoaoina.

O le taeao na sosoo ai, pe tusa o le 4:00 i le vaveao, sa ou ala ai ina ua ou faalogoina nai lima laiti e lua i lo’u ua, o se kisi i lo’u alafau ma upu nei sa musumusu mai i lo’u taliga ma o le a le galo lava ia te au: “Papa, ou te alofa ia te oe. O oe o la’u uo aupito sili.”

Afai o e mauaina lena ituaiga o aafiaga i lou aiga, ua e maua se tasi o fiafiaga sili o le olaga.

Afai o oe o se alii talavou o tausaga tatau ai ma e lei faaipoipo, aua le maimauina le taimi e tulimatai ai mea le aoga. Ia faagasolo le olaga ma taulai atu i se faaipoipoga. Aua nei ola i le olaga e aunoa ma ni taumafaiga ia alualu i luma. Alii talavou, fai se misiona tauaogaina. Ona avea lea ma au faamuamua aupito maualuga le sailia o sau soa agavaa e faavavau. A e iloa ua e naunau i se tamaitai talavou, faaali atu ia te ia o oe o se tagata e tulaga ese ina ia naunau ai e fia iloa atili oe. Ave o ia i nofoaga talafeagai. Faaali i ai ou uiga fatufatua’i. Afai e te manao i se ava lelei, e tatau ona e faia ina ia vaai atu o ia ia te oe, o se tamaloa lelei tele ma se tane faamoemoeina.

Afai ua e maua se tasi, e mafai ona oulua faatupuina se mafutaga faamasani matagofie ma se faaipoipoga ma matua’i fiafia e faavavau, e ala i le tumau ai i totonu o tulafono o le agavaa ua faatuina e le Alii.

Afai ua e faaipoipo, pe o e faamaoni faalemafaufau ea ma faaletino i lou toalua? Pe o e tuuto ea i a oulua feagaiga o le faaipoipoga e ala i lou le faia o ni talanoaga ma se tasi tagata, e te le manao e faalogo i ai lou toalua? Pe o e agalelei ea ma lagolago i lou toalua ma lau fanau?

Uso e, pe o e taulamua ea i gaoioiga faaleaiga e pei o le suesue i tusitusiga paia, tatalo faaleaiga, ma afiafi faaleaiga, pe o lena lava e faatumu e lau ava le avanoa o loo i ai i le aiga ona o lou le gauai atu i ai? Pe o e ta’u atu ea i lou toalua le tele o lou alofa ia te ia? O le a aumai ai ia te ia le fiafiaga sili. Ua ou faalogo i alii pe a ou fai atu i ai lena fesili o fai mai ia te au, “Oi, na te iloa.” E manaomia ona e ta’u atu ia te ia. E lagona e le fafine le fiafia, faatuatuaina, ma e faamanuiaina tele e lena faamautinoaga [o le alofa]. Ia faailoa atu lou loto faafetai mo mea o loo faia e lou toalua mo oe. Ia faailoa atu soo lena alofa ma le loto faafetai. O le a faa’oaina sili ai le olaga, sili atu ai ona faafiafiaina, ma faatumauina. Aua le taofia na faailoaga faalenatura o le alofa. Ma e sili atu se aafiaga e maua pe a e opo maia o ia ma ta’u atu i ai.

Sa ou aoao mai i lo’u toalua, le taua o nei faaupuga. I le popofou o la ma faaipoipoga, e masani lava ou te tatalaina ai a’u tusitusiga paia e tuuina atu se savali, ae ou maua ai se fasipepa faamalosiau ma le agaalofa mai ia Jeanene, ua sulu i itulau. O nisi taimi, ona o le ootia tele ou te tau le mafaia ai ona tautala. O na faamatalaga tusitusia taua mai se ava alofa, na avea ma e faaauau pea ona avea ma se ‘oa e le mafaatauina o le mafanafana ma le faananau.

Sa amata ona ou faia foi lena mea e tasi ia te ia, ma lo’u le iloaina le matuai taua moni ia te ia. Ou te manatua se tasi tausaga na matou le maua ai se tupe ou te avatua ai se meaalofa o le Valentine ia te ia, ona ou manatu lea e tusi se ata i le valivai i luma o le pusaaisa. Na ou faia le mea e sili ona mafai, ae na ou faia ai se mea sese se tasi. O se vali suauu ae le o se valivai. Na te lei faatagaina lava a’u e aveese lena ata tumau mai le pusaaisa.

Ou te manatua se tasi aso, na ou ave ai nisi o pepa lapotopoto laiti lea e maua ai li’o pe a e faapūpūina le pepa ma ou tusia ai le numera 1 i le 100. Sa ou fuliina li’o taitasi ma tusi atu ai ia te ia se feau, e tofu le li’o ma le upu e tasi. Ona ou tago lea ua luluu ma tuu i totonu o se teutusi. Sa ou manatu o le a ata ne’a ai.

Ina ua maliu o ia, sa ou mauaina i ana meatotino, le tele o lona talisapaia o nai savali faigofie sa ma fefaasoaa’ia. Sa ou iloa ai na ia faapipiina ma le faaeteete ia na li’o uma i se fasi pepa. E le gata ina sa ia teuina a’u faamatalaga tusitusia mo ia, ae sa ia puipuia lelei foi i ni faavaa pa’u e pei o ni oa taua. E na o le tasi lava le faamatalaga tusitusia na te le’i tuuina faatasi ma isi. O loo i ai pea lava i tua o le tioata o le uati o le matou umukuka. E faitauina faapea, “Jeanene, ua oo i le taimi e ta’u atu ai ia te oe, ou te alofa ia te oe.” E tuu ai lava iina e faamanatu mai ai ia te au lena afafine lē mafaatusalia o le Tama i le Lagi.

Ina ua ou toe mafaufau i lo ma’ua ola faatasi ai, ua ou iloa ai le faamanuiaina tele o i maua. Ma te lei feupuai lava i lo ma fale, e leai foi ni upu lē alofa i lo ma va. Ua ou iloaina nei na oo mai faamanuiaga ona o ia. Na afua i lona naunautai e foai atu, faasoa, ma le le manatu ifo mo ia lava. I lo ma’ua ola faatasi ai mulimuli ane, sa ou taumafai ai e faaaoao i lana faataitaiga. Ou te fautua atu, i le avea ai o se tane ma se ava, ia oulua faia foi lena mea i lo oulua aiga.

O le alofa mama o se mana e le mafaatusalia, ma le malosi mo le lelei. O le alofa amiotonu o le faavae o se faaipoipoga manuia. O le mafuaaga aupito taua lea o fanau fiafia ma lelei ona atiina ae. O ai e mafai ona fuaina ma le tonu le uunaiga amiotonu o le alofa o se tina? O a ni fua tumau o le a maua mai i fatu o le upumoni lea e totoina ma le faaeteete e se tina ma galueaiina ma le alofa i le eleele lafulemu o le mafaufau ma le loto o se tamaitiiti? I le avea ai o se tina, ua tuuina atu ia te oe ma le faaeteete ni uiga e fesoasoani ia e iloaina ai taleni patino ma mana tulaga ese o lau tama. Faatasi ai ma lau tane, e mafai ona oulua faamalolosia ma faamatua’ia na uiga ina ia fua mai.

E matuai faamanuiaina lava le faaipoipo. E matagofie le faaipoipoga. E oo mai le taimi e amata ai ona tutusa o oulua mafaufauga, ma tututusa manatu ma lagona. E i ai taimi lua te matua fiafia ai lava, taimi o tofotofoga ma taimi o faigata, ae e taiala faatasi lava oulua e le Alii i na aafiaga e tuputupu a’e ai.

I se tasi po sa ala ai lo ma atalii laitiiti, o Richard, sa i ai se faaletonu i lona fatu ma sa tagi. Sa ma taufai lagonaina ua ala. E masani lava o lo’u toalua e ala e vaai se pepe o tagi, ae o le taimi lea sa ou fai atu ai, “Lea o le a ou alu e vaai.”

Ona o le ma’i o lo’u atalii, a amata ona tagi o ia, ona tatavale lea o lona fatu. E pua’i o ia ma leaga ai ie o lona moega. O lena po na ou siiina ai ma opo mai o ia e taumafai ai e faato’ato’a le tata o lona fatu ma uma ai lana tagi, a’o ou suiina ona lavalava ma ona ieafu mama. Sa ou siiina o ia seia iu ina moe. Sa ou le iloaina i lena taimi, o le a maliu o ia i ni nai masina mulimuli ane. O le a ou manatuaina pea lo’u siiina o ia i le tuneva o lena po.

Ou te manatua lelei le aso na maliu ai o ia. A o ma malaga ese ma Jeanene mai le falemai, na ma afe i tua i le tafaala. Na ou opoina mai o ia. Sa ma fetagisi, ae na ma iloaina o le a matou toe faatasi ma ia i tala atu o le veli ona o feagaiga na matou osia i le malumalu. O le mea lena na faigofie ai ona taliaina lona maliu.

O le agalelei o Jeanene na aoaoina ai au i le anoanoa’i o mea taua. Sa ou le faatagata matua tele, ae sa faautauta tele o ia, ma tele lona faaleagaga. O le faaipoipoga e maua ai se faatulagaga silisili mo le faatoilaloina o soo se tulaga e manatu faapito pe manatu ifo na o oe lava. Ou te manatu o se tasi o mafuaaga ua fautuaina ai i tatou ina ia faaipoipo vave i le olaga, ina ia aloese ai mai le atiina ae o ni uiga lē talafeagai e faigata ona toe suia.

Ou te faanoanoa mo soo se alii e lei faia lava se filifiliga e sailia se soa e faavavau ma ua tagi lo’u loto mo tuafafine e lei mauaina lava le avanoa e faaipoipo ai. O nisi o outou atonu e lagona le tuuatoatasi ma le le talisapaia ma lē mafai ai ona iloa pe mafai faapefea e oe ona maua faamanuiaga o le faaipoipoga ma le fanau, po o lou lava aiga. E mafaia mea uma e le Alii, ma Na te tausia folafolaga na Ia musuia ai Ana perofeta e folafola mai. O le faavavau o se taimi umi. Faatuatua i na folafolaga ma ola ina ia e agavaa e maua ina ia oo atu ai i Lona taimi, ua mafai e le Alii ona faatino i lou olaga. Ma le mautinoa, o le a e mauaina faamanuiaga folafolaina uma ua e agavaa e maua.

Faamolemole faamagalo mai au mo le talanoa e uiga i lou toalua pele, o Jeanene ae o ma’ua o se aiga e faavavau. Sa olioli pea o ia ma le fiafia, ma o le tele o lena fiafia na maua mai i le auauna atu i isi. Na oo lava i le taimi na ma’i tigaina ai, na ole atu ai o ia i ana tatalo o le taeao i lona Tama i le Lagi e taitai atu o ia i se tagata e mafai ona ia fesoasoani i ai. O lena olega faamaoni na taliina pea lava pea. Na faamāmāina avega a le toatele; na faapupulaina o latou olaga. Na faamanuiaina pea o ia i le avea ai ma tufugaaao na taitaia e le Alii.

Ou te iloa le uiga o le alofa i se afafine o le Tama i le Lagi o lē e faatasi ma le alofa tunoa ma le tuuto na ia ola ai i le ausiaina o ona tulaga gafatia atoatoa o se tamaitai amiotonu. Ou te mautinoa lava i le lumanai, pe a ou toe vaai ia te ia i tala atu o le veli, o le a ma iloaina ua atili faateleina le loloto o le alofa o le tasi i le isi. O le a sili atu foi ona ma talisapaia o le tasi ma le isi, i le tele o lenei taimi na ma valavala ai i le veli, i le suafa o Iesu Keriso, amene.