Leoleo o le Mamā
Elaine S. Dalton
Peresitene o Tamaitai Talavou
Sauniuni nei ina ia mafai ona outou agavaa mo le mauaina o faamanuiaga uma o loo faatalitali mai mo outou i malumalu paia o le Alii.
E i ai taimi e le mafai ai e upu ona faamatala o tatou lagona. Ou te tatalo ia molimauina e le Agaga i o outou loto lou faasinomaga faalelagi ma lou tiutetauave e faavavau. O outou o le faamoemoe o Isaraelu. O outou o afafine filifilia tautupu o lo tatou Tama Faalelagi alofa.
O le masina ua mavae, sa ou maua ai le avanoa e auai i le faaipoipoga i le malumalu, o se tamaitai talavou sa ou iloaina talu ona fanau mai o ia. A o ou nofo i le potu mo faamauga, ma matamata i le moli tautau matagofie ua fe’ilafi i sulu o le malumalu, sa ou manatuaina lena aso na faatoa ou si’iina ai o ia. Sa faaofu o ia e lona tina i se tama’i ofu paepae ma sa ou manatu o ia o se tasi o pepe e aupito sili ona lalelei ua ou vaai i ai. Ona savali mai ai lea o lea tamaitai talavou i le faitotoa, ua toe ofu paepae foi. Sa susulu o ia ma le fiafia. A o ulufale mai i le potu, sa ou moomoo ma lo’u loto atoa maimau e pe ana vaai tamaitai talavou uma i lena taimi, ma taumafai ai pea lava pea ia agavaa e faia ma tausia feagaiga paia ma maua ia sauniga o le malumalu e saunia ai e olioli i faamanuiaga o le faaeaga.
Ina ua tootutuli ifo lenei ulugalii i le fatafaitaulaga paia, sa la mauaina folafolaga e le oo i ai le malamalama faaleolaga nei, o le a faamanuiaina ai, faamalolosia, ma fesoasoani ai i la la’ua malaga i le tino nei. O se tasi lea o taimi e tutu faasasa’o ai le lalolagi ae patipatia e le lagi uma. A o tilotilo atu le ulugalii fou i faaata tetele i totonu o le potu, sa fesiligia le alii faaipoipo po o le a le mea la e vaai i ai. Fai mai a ia, “O o’u augatuaa uma na muamua atu ia te au.” Ona tilotilo lea o le ulugalii i le faaata tele i le puipui i le isi itu, ona fai mai lea o le tamaitai ma ona loimata, “Ua ou vaai atu ia i latou uma lava o le a tutupu mai ia i ma’ua.” Sa vaai o ia i lona aiga faavavau—o lana fanau. Ou te iloa sa toe malamalama o ia i lena taimi, i le taua o le talitonu i le ola mama ma le amio mama. E leai se isi vaaiga e sili atu ona matagofie nai lo se ulugalii sa saunia lelei e tootutuli faatasi i le fatafaitaulaga o le malumalu.
O outou tausaga i Tamaitai Talavou o le a saunia ai outou mo le malumalu. O iina o le a e maua ai faamanuiaga e mafai ona e maua o se afafine faapelepele o le Atua. E alofa lo outou Tama Faalelagi ia te outou ma e finagalo ia outou fiafia. O le auala e faia ai lena mea o le “savali i le ala o le mama”1 ma “piimau i [a outou] feagaiga.”2
Tamaitai talavou, i se lalolagi ua faatupulaia ai le faaleagaina o le amiolelei, talia ai mea leaga, soona faaaogaina o fafine, ma lefemilosa’iga o matafaioi, e tatau lava ona e tu e leoleo oe lava, o lou aiga, ma i latou uma tou te mafuta. E tatau ona avea outou ma leoleo o le mama.
O le a le mama a o le a foi le leoleo? O le mama o se mamanu lea o mafaufauga ma le amio e faavae i tulaga faatonuina maualuga o le ola mama. E aofia ai i le mama le legavia ma le [amio] mama a’ia’i.3 A o le a le leoleo? O le leoleo o se tasi na te puipuia, faamalumalu, ma faasaoina.4 O le mea lea, i le avea ai o se leoleo o le mama, o le a e puipuia, faamalumalu, ma faasaoina le amio mama a’ia’i aua o le mana e foafoa ai le ola faitino, o se mana paia ma le faaeaina ma e tatau lava ona malupuipuia seia oo ina e faaipoipo. O le mama o se tulaga manaomia lea e maua ai le mafutaga ma le Agaga Paia. O le a e manaomia lena leoleoga ina ia e faia lelei ai filifiliga i le lalolagi o loo e ola ai. O le amio mama, o se tulaga e manaomia e ulufale atu ai i le malumalu. Ma o se tulaga manaomia foi e agavaa ai e tu atu i luma o le Faaola. O loo e sauniuni nei mo lena taimi. O le Alualu i Luma o le Tagata Lava Ia ma tulaga faatonuina o loo maua i le Mo Le Malosi o le Autalavoue taua. O le ola ai i mataupu faavae o loo maua i na tamaitusi, o le a faamalolosia ai ma fesoasoani ia te outou ia “agavaa mo le malo.”5
I le taumafanafana talu ai, sa tonu ai i tamaitai talavou mai le Alpine, Utah ia “agavaa atili mo le malo.” Na latou fuafua e taulai atu i le malumalu e ala i le savavali mai le Malumalu o Draper Utah i le Malumalu o Sate Leki, o le mamao e 22 maila (35 km), e pei ona sa faia ai e se tasi o paionia, o John Roe Moyle. O Brother Moyle o se tofima’a sa valaauina e le perofeta o Polika Iaga, e galue i le Malumalu o Sate Leki. E savali o ia i vaiaso taitasi i le mamao e 22 maila mai lona fale i le malumalu. O se tasi o ana galuega o le vaneina lea o upu “E Paia i le Alii” i le itu i sasae o le Malumalu o Sate Leki. Sa lei faigofie ma sa tele to’atuga sa tatau ona faatoilaloina. Sa i ai se taimi, sa a’a ai lona vae e se tasi o ana povi. Talu ai sa le mafai ona pe, o lea sa tatau ai ona tipi ese lona vae. Peitai, sa lei taofia ai lava o ia mai lana tautinoga i le perofeta ma le galuega i le malumalu. Sa ia taina se vae laau ma ina ua mavae le tele o vaiaso, sa toe savali o ia i le mamao e 22 maila i le malumalu e fai le galuega sa ia tautino atu e fai.6
Sa tonu i tamaitai talavou o le Uarota Ono a Cedar Hills, e savavali i le mamao lava lena mo se tuaa ma mo se tasi na avea ma a latou uunaiga e tumau i le agavaa e ulu atu i le malumalu. Sa fai a latou toleniga i vaiaso taitasi i le Mutuale, ma a o latou savavali, sa latou fetufaai i mea sa latou aoaoina ma lagona e uiga i malumalu.
Sa amata la latou savaliga i le taeao po i se tatalo. Ina ua latou amata, sa faagaeetia lava au i lo latou talitonuga. Sa latou saunia lelei ma sa latou iloaina ua latou saunia. Sa taulai atu o latou mata i la latou sini. O laa taitasi sa latou faia, o se faatusa lea o outou taitoatasi a o outou sauniuni nei e ulu atu i le malumalu. Ua amata la outou toleniga patino i a outou tatalo faaletagata lava ia i aso taitasi, o a outou faitauga o le Tusi a Mamona i aso taitasi, ma lo outou galulue ai i le Alualu i Luma o le Tagata Lava Ia.
A o faaauau ai le savaliga a nei tamaitai talavou, sa i ai mea faalavefau i le ala, ae sa tumau lo latou taulai atu i la latou sini. O nisi sa amata ona mafoefoe vae, a o nisi na amata ona lagona le tiga, ae sa latou savavali pea. Mo outou taitoatasi, e tele mea faalavefau, o mea tiga, ma faafatiatamai i le ala agai i le malumalu, ae ua outou naunau foi e faaauau pea. O le ala na ui ai nei tamaitai talavou, sa faataatia e o latou taitai o ē na savalia ma ui ai i le ala ma sa latou fuafuaina le ala aupito saogalemu ma le sa’o e ui ai. E faapena foi, ua uma ona makaina lo outou ala ma e mafai ona faamautinoaina outou e le gata ina sa savalia e le Faaola le ala, ae o le a oulua toe savavali ai foi ma Ia—i laa taitasi o le ala.
I lenei malaga i le malumalu, sa i ai tamā ma tina, o tagata o aiga, ma taitai perisitua sa avea o ni leoleo. O la latou galuega o le faamautinoa lea sa saogalemu ma puipuia tagata uma mai mea matautia. Sa latou faamautinoa e lava le vai ma meaai e faatumauina ai le malosi. Sa i ai nofoaga o fesoasoani sa saunia e o latou taitai perisitua e malolo ai ma feinu. Tamaitai talavou, o outou tama, o outou tina, o outou epikopo, ma le anoanoai o isi o le a avea ma o outou leoleo a o outou savavali atu i le ala agai i le malumalu. O le a latou avatu lapataiga ma faatonutonu lo outou ala pe a outou manunu’a, pe tiga, pe sipa ese ma le ala, o le a latou fesoasoani ia te outou.
Sa faagaeetia au i maila mulimuli o la latou savaliga, sa o mai o latou tuagane, ma isi alii talavou ma uo e lagolago ma patipatia nei tamaitai talavou naunautai. Sa sii e se tasi tuagane lona tuafafine sa matua mafoefoe ona vae, ma fafa i le vaega faaiu agai atu i le malumalu. Ina ua taunuu atu nei tamaitai talavou tulaga ese i la latou sini, sa maligi loimata a o taitasi ma pa’i atu i le malumalu ma faia se tautinoga lē leoa o le a agavaa pea lava e ulu atu i ai.
O le savaliga i le malumalu o se upu valiata mo le olaga. Sa tutu matua ma taitai perisitua o ni leoleo i le ala. Sa latou tuuina atu le lagolago ma le fesoasoani. Sa leoleoina ma faamalosiau e tamaitai talavou le tasi ma le isi. Sa patipatia e alii talavou le malolosi, tautinoga, ma le maua’i o tamaitai talavou. Sa fafaina e tuagane ia tuafafine sa manunu’a. Sa olioli faatasi aiga ma o latou afafine ina ua tini la latou savaliga i le malumalu ma sa latou aveina i latou ma le saogalemu i o latou aiga.
Ina ia mafai ona tumau i le ala agai i le malumalu, e tatau ona e puipuia lou lava mama ma le mama o isi tou te mafuta. Aisea? Sa aoao mai e Mamona i le Tusi a Mamona e faapea, o le mama ma le ola mama o mea e “pele ma taua ai mea uma lava”7
O le a se mea e mafai ona fai e outou taitoatasi e avea ai ma se leoleo o le mama? E amata i le talitonu e mafai ona e faia se eseesega. E amata i le faia o se tautinoga. A o avea au ma se tamaitai talavou, sa ou aoaoina e i ai ni faaiuga e na o le taitasi lava ona fai. Sa ou tusia i se tamai api la’u lisi o mea o le a ou faia pea lava ma mea o le a ou le faia lava. Sa aofia ai mea e pei o le: usitai i le Upu o le Poto, tatalo i aso taitasi, totogi o la’u sefuluai, ma se tautinoga ia aua lava nei misi sa’u lotu. Sa tasi lava ona ou faia na faaiuga ma ina ua oo mai le taimi o se faaiuga, sa ou iloa lelei lava le mea e fai aua ua uma ona ou faia muamua le faaiuga. Ina ua fai mai a’u uo i le aoga maualuga, “O le a le afaina lava si mea inu e tasi,” sa ou ata ma fai atu, “Na fai la’u faaiuga a o 12 o’u tausaga ou te le faia lena mea.” O le vave faia o faaiuga, o le a fesoasoani ai ia te outou e avea ma leoleo o le mama. Ou te faamoemoe o le a taitasi outou ma tusia se lisi o mea o le a outou faia pea lava ma mea o le a outou le faia lava. Ona e ola ai lea i lau lisi.
O le avea ai ma se leoleo o le mamā o lona uiga o le a le gata ina talafeagai ou lavalava, ae o lau gagana, o au taga, ma lou faaaogaina o faasalalauga fesootai. O le avea ai ma se leoleo o le mama o lona uiga, o le a e le auina atu lava se feau feavea’i po o ni ata i alii talavou e ono aveesea ai le Agaga mai ia i latou, ma lē maua ai le mana o lo latou perisitua, pe maumau ai foi lo latou mama. O lona uiga ua e malamalama i le taua o le ola mama, aua ua outou malamalama foi o outou tino o se malumalu lea ma o mana paia o le foafoaina o le ola, e le tatau ona faatalale i ai a o lei faaipoipo. Ua outou malamalama ua ia te outou se mana paia e aofia ai le tiutetauave paia o le aumaia o isi agaga i le lalolagi e maua ai se tino lea e nofo ai o latou agaga e faavavau. O oe o se leoleo o se mea “e sili ona taua i lo penina.” 8 Ia faamaoni. Ia usiusitai. Sauniuni nei ina ia mafai ona outou agavaa mo le mauaina o faamanuiaga uma o loo faatalitali mai mo outou i malumalu paia o le Alii.
Mo tina o loo faalogologo mai i le po nei, o outou o faataitaiga aupito sili ona taua mo le tausaafia ma le mama mo a outou tama teine—faafetai. Aua lava e te faatuai i le aoaoina o i latou, o i latou o ni afafine tautupu o le Atua ma o lo latou taua e le faalagolago i o latou foliga faaletino. Ia latou vaai foi o faaalia sa’o ma faia e le aunoa i ou lava uiga faaalia ma foliga.9 O outou foi o leoleo o le mama.
O le vaiaso nei, sa ou toe a’ea ai foi le Tumutumu o le Ensign. O le taeao po lava ma sa ou tilotilo ifo i lalo mai le mauga, i le Mauga o le Maota o le Alii—le Malumalu o Sate Leki—sa matua manino lelei ai lava. Na ofoina atu e paionia mea uma sa latou maua ina ia latou o mai ai i tumutumu o mauga, ina ia maua ai e oe ma au ia faamanuiaga o le malumalu ma faamau ai e faavavau o ni aiga. E fasefulu tausaga o le osigataulaga, o le galuega mae’ae’a, ma le savavali mai Alpine i le malumalu—aisea? Aua, e pei foi o outou, sa latou talitonu! Sa latou talitonu i se perofeta. Sa latou talitonu sa vaai o ia ma talanoa ma le Atua ma Lona Alo pele. Sa latou talitonu i le Faaola. Sa latou talitonu i le Tusi a Mamona. O le mafuaaga lena sa mafai ai ona latou fai mai, “Matou te talitonu i mea uma, matou te faamoemoe i mea uma, ua uma ona matou onosai i mea e tele, ma matou te faamoemoe o le a mafai ona matou onosai i mea uma.” 10 Sa latou onosai i mea e tele ma e tatou te mafaia foi. O le mataupu faavae lona sefulutolu o le faatuatua o mea ia tatou te talitonu i ai, aua o mea tonu na e faaagavaaina ai i tatou ia agavaa e ulu atu i le malumalu ma e i ai se aso tatou te tutu atu ai i le afioaga o le Tama Faalelagi—ua faamaonia, ua mama, ma faamauina. O le a manaomia ai outou ia “agavaa mo le malo” ma outou sauniuni nei ma maua ai le mautinoa e mafai ona outou faia o mea faigata.
Tamaitai talavou, o loo outou punouai i se galuega tele! Ma e le o tuulafoaiina outou! A outou leoleoina ma le atoatoa lo outou mama, o le a outou maua le malosi. A outou tausia a outou feagaiga sa faia, o le a taialaina outou e le Agaga Paia ma leoleoina outou. O le a siosiomia outou e au agelu o le lagi. Na faamanatu mai e Peresitene Monson ia i tatou, “Manatua tatou te le o taufetuli na o i tatou i lenei tuuga tele o le olaga; ua ia i tatou le aia tatau mo le fesoasoani a le Alii.”11 Sauniuni mo lena aso o le a outou o mai ai i le malumalu o le Alii, ua agavaa ma saunia e osia feagaiga paia. I le avea ai o ni leoleo o le mama, o le a outou mananao e saili le Faaola i Lona maota paia.
Ou te molimau atu o loo soifua le Atua ma o loo soifua foi Lona Alo pele, lo tatou Togiola, o Iesu Keriso, ma ona o le mana togiola ma le mamana o Lana Togiola lē i’u, o le a taialaina ai ma leoleo outou taitoatasi i lo outou ala agai atu i le malumalu ma toe foi atu ai i lo La’ua afioaga. Ou te tatalo ia taitasi outou ma faamalolosia mo lena galuega, lea o le a avea ma taimi e aupito silisili mo outou. Ola mo lena aso matagofie o loo ta’ua i le tusi a Faaaliga o le a outou “savavali ai … i ofu sisina: [aua ua outou] agavaa.”12 I le suafa o Iesu Keriso, amene.